കപ്പലുകൾ ഉലകിൽ പലവിധം; ഒന്നല്ല,രണ്ടല്ല എത്രയെന്നറിയാൻ മറക്കാതെ വായിക്കുക

കപ്പലുകളെ കുറിച്ചുളള നിരവധി കാര്യങ്ങൾ ഞങ്ങൾ നിങ്ങളുമായി പങ്കു വച്ചിട്ടുണ്ട്. എന്നാൽ ലോകത്തിൽ എത്ര തരത്തിലുളള കപ്പലുകൾ ഉണ്ട് എന്ന് നിങ്ങൾക്ക് അറിയാമോ. കുറച്ചൊക്കെ നിങ്ങൾക്ക് അറിയാമായിരിക്കും, ക്രൂയിസ് കപ്പലുകൾ, ചരക്ക് കപ്പലുകൾ എന്നിവയൊക്കെ, എന്നാൽ അതിനും അപ്പുറം നിരവധി തരത്തിലുളള കപ്പലുകളുണ്ട്. അവയുടെ ഉപയോഗവും വിശദാംശങ്ങളും അറിയാനായി തുടർന്ന് വായിക്കാൻ മറക്കരുത്.

കണ്ടെയ്‌നർ കപ്പലുകൾ: പേര് സൂചിപ്പിക്കുന്നത് പോലെ, വ്യത്യസ്‌ത കണ്ടെയ്‌നറുകളിൽ ഒതുക്കിയ വലിയ അളവിലുള്ള ചരക്കുകൾ സൂക്ഷിക്കാൻ പ്രത്യേകമായി ഡിസൈൻ ചെയ്‌തിരിക്കുന്ന ഒരു കപ്പലിനെയാണ് കണ്ടെയ്‌നർ കപ്പൽ എന്ന് വിളിക്കുന്നത്. ചരക്കുകൾ കൊണ്ടുപോകുന്നതിനുള്ള ഏറ്റവും മികച്ച മാർഗ്ഗം കണ്ടെയ്നർ ഷിപ്പുകളാണ് . ഈ കപ്പലുകൾ ഒരേ സമയം ഉയർന്ന അളവിലുള്ള ചരക്ക് കൈമാറ്റം സാധ്യമാക്കുകയും ആഗോള വ്യാപാരത്തെ ഫലപ്രദമായി മാറ്റുകയും ചെയ്യുന്നു.

കാർഗോ കപ്പലുകൾ: മറ്റ് രാജ്യങ്ങളിൽ നിന്നുളള ധാന്യങ്ങളും, പൊടികളും കയറ്റുന്ന കപ്പലുകളേയാണ് കാർഗോ കപ്പലുകൾ എന്ന് വിളിക്കുന്നത്. കൽക്കരി, സിമൻ്റ് എന്നീ ചരക്കുകളും ഈ കപ്പലുകളിൽ കൊണ്ടുപോകാറുണ്ട്. ഇവയിൽ വരുന്ന ചരക്കുകൾ ഇറക്കാൻ വലിയ ക്രെയിനുകളും കൺവെയർ ബെൽറ്റുകളും ആവശ്യമാണ്. അത്തരം സംവിധാനങ്ങളുളള തുറമുഖത്ത് മാത്രമേ ഈ കപ്പലുകൾക്ക് അടുക്കാൻ സാധിക്കു.

ടാങ്കർ കപ്പലുകൾ : ദ്രാവക രൂപത്തിലുളള ചരക്കുകൾ കൊണ്ടു വരാനാണ് പ്രത്യേകിച്ച് ഈ കപ്പലുകൾ ഉപയോഗിക്കുന്നത്. അണ്ടർവാട്ടർ റിസർവോയറുകളിൽ നിന്ന് കുഴിച്ചെടുത്ത എണ്ണ, അത് പോലെ തന്നെ ലഹരിപാനീയങ്ങൾ, ഹൈഡ്രജൻ അധിഷ്‌ഠിത ഓർഗാനിക് സംയുക്തങ്ങൾ, രാസവസ്തുക്കൾ, ജ്യൂസുകൾ തുടങ്ങി എല്ലാത്തരം ചരക്കുകളും നീക്കം ചെയ്യുന്നത് ഇതിലൂടെയായിരിക്കും.

ഈ ടാങ്കറുകളിൽ ആധുനിക സജ്ജീകരണങ്ങളെല്ലാം ഉണ്ട്. കൂടാതെ വ്യത്യസ്ത വലിപ്പത്തിലും ശേഷിയിലും ഇവ ലഭിക്കും. ചെറിയ ബാർജുകൾ മുതൽ അൾട്രാ ലാർജ് ക്രൂഡ് കാരിയറുകൾ വരെയുണ്ട് ലിസ്റ്റിൽ. ലോകത്തിലെ മൊത്തം വ്യാപാര കപ്പലുകളിൽ ഏകദേശം 30 ശതമാനത്തോളം ഇത്തരത്തിലുളള ടാങ്കറുകളാണ്. സാങ്കേതിക വിദ്യ വളർന്നതോടെ പല തരത്തിലുളള ടാങ്കറുകൾ വ്യവസായ മേഖലകളിൽ എത്തിയിട്ടുണ്ട്.

യാത്രാ കപ്പലുകൾ : അത് എല്ലാവർക്കും സുപരിചിതമായ കപ്പലാണല്ലോ. ഇന്റർനാഷണൽ മാരിടൈം ഓർഗനൈസേഷൻ (ഐഎംഒ) നിശ്ചയിച്ചിട്ടുള്ള വ്യവസ്ഥകൾക്കനുസൃതമായാണ് പാസഞ്ചർ കപ്പലുകളുടെ മാനദണ്ഡങ്ങൾ നിയന്ത്രിക്കുന്നത്. ഈ വ്യവസ്ഥകൾ ഒരു ഡസൻ യാത്രക്കാർക്ക് ആവശ്യമായ ഉപരിതല വിസ്തീർണ്ണത്തിന്റെ ഏറ്റവും കുറഞ്ഞ അളവ് വ്യക്തമാക്കുക മാത്രമല്ല, യാത്രക്കാരുടെ സുരക്ഷയും ഉറപ്പാക്കുന്നതിനുള്ള നിയന്ത്രണ ആവശ്യകതകൾ നിരത്തുകയും ചെയ്യണം.

മാസങ്ങൾക്ക് മുൻപാണ് ലോകത്തിലെ ഏറ്റവും വലിയ ക്രൂയിസ് കപ്പലായ ഐക്കൺ ഓഫ് ദി സീസ് ട്രയൽ റൺ നടത്തിയത്. 1,200 അടി (365 മീറ്റർ) നീളവും 250,800 ടൺ ഭാരവുമുള്ള ഒരു കൂറ്റൻ കപ്പലാണ് ഐക്കൺ ഓഫ് ദി സീസ്. 7,960-ലധികം ആളുകളെ ഉൾക്കൊള്ളാനുള്ള ശേഷി കപ്പലിനുണ്ട്, ഇതിൽ 5,610 യാത്രക്കാരും 2,350 ക്രൂ അംഗങ്ങളും ഉൾപ്പെടുന്നു. 2024 ആദ്യം തന്നെ കരീബിയൻ കടലിലേയ്ക്കിറക്കുമെന്നാണ് അധികൃതർ അറിയിച്ചിരുന്നത്.

റിപ്പോർട്ടുകൾ അനുസരിച്ച് നിലവിൽ ഏറ്റവും വലിയ കപ്പലായ വണ്ടർ ഓഫ് ദി സീസിനേക്കാൾ 6 ശതമാനം വലുതും 10 അടി നീളവുമുള്ളതാണ് ഐക്കൺ ഓഫ് ദി സീസ്. ഫിൻലൻഡിലെ മേയർ ടർക്കു കപ്പൽശാലയിലയിൽ നിന്നാണ് ട്രയൽ റൺ ആരംഭിച്ചത്. 2022 ഏപ്രിലിൽ നിർമ്മാണം ആരംഭിച്ചതുമുതൽ കപ്പൽ അവിടെ തന്നെയാണ്. ആദ്യത്തെ യാത്ര 2024 ജനുവരി 27-ന് മിയാമിയിൽ നിന്ന് പുറപ്പെടുമെന്നാണ് കമ്പനി അറിയിച്ചിരിക്കുന്നത്.

ലോകത്തിലെ ഏറ്റവും വലിയ കപ്പലിൽ വാട്ടർ തീം പാർക്ക്, നവീകരിച്ച പൂൾ ഡെക്കുകൾ, ഒരു അക്വാ ഡോം ഏരിയ, ഒരു അക്വാ തിയേറ്റർ ഏരിയ, കൂറ്റൻ ഫ്ലോർ മുതൽ സീലിംഗ് വരെയുളള വിൻഡോകൾ, 220 ഡിഗ്രി കാഴ്ചകൾ, ആയിരക്കണക്കിന് പാർക്കുകൾ എന്നിവയുൾപ്പെടെ നിരവധി സവിശേഷതകളുണ്ട്. ഒരു നീന്തൽ ബാർ, ഒരു ഇൻഫിനിറ്റി പൂൾ എന്നിവയും ഐക്കൺ ഓഫ് ദി സീസിലെ മറ്റ് വിസ്മയങ്ങളാണ്.