ഇന്ത്യയുടെ സ്വന്തം ക്രാഷ് ടെസ്റ്റ്; ഭാരത് എൻസിഎപി യെ കുറിച്ചറിയാം വിശദമായി

ഇന്നു മുതൽ റോഡ് ഗതാഗത, ഹൈവേ മന്ത്രാലയത്തിന് കീഴിൽ ആരംഭിച്ച ഭാരത് എൻസിഎപി, ക്രാഷ് ടെസ്റ്റുകളിലൂടെയായിരിക്കും വാഹനങ്ങളുടെ സുരക്ഷ വിലയിരുത്തുന്നത്. സുരക്ഷിതമായ കാറുകൾ നിർമിക്കുന്നതിനും വിപണിയിലെത്തിക്കുന്നതിനും ഇന്ത്യയിലെ നിർമ്മാതാക്കൾ തമ്മിലുള്ള മത്സരം മുറുകി കൊണ്ടിരിക്കുകയാണ്. എന്നാൽ എന്താണ് ഈ സ്റ്റാർ റേറ്റിങ്ങുകൾ കൊണ്ട് ഉദ്ദേശിക്കുന്നത് എന്ന് പലഡക്കും സംശയമുണ്ടായേക്കാം. ക്രാഷ് ടെസ്റ്റിനെ കുറിച്ചും റേറ്റിങ്ങിനെ കുറിച്ചും അറിയാനായി തുടർന്നു വായിക്കുക.

രണ്ട് മാനദണ്ഡങ്ങളെ അടിസ്ഥാനമാക്കിയാണ് വാഹനങ്ങൾക്ക് റേറ്റിംഗുകൾ നൽകിയിരിക്കുന്നത്: മുൻ യാത്രക്കാർക്ക് മുതിർന്നവരുടെ സുരക്ഷയും പിന്നിലെ കുട്ടികളുടെ സുരക്ഷയും. മുതിർന്നവരുടെ സുരക്ഷയ്ക്കായി, ഒരു 5-സ്റ്റാർ റേറ്റിംഗ് നേടുന്നതിന് ഒരു കാറിന് പരമാവധി 32 പോയിന്റിൽ കുറഞ്ഞത് 27 പോയിന്റ് എങ്കിലും സ്കോർ ചെയ്യേണ്ടതുണ്ട്.

എന്താണ് ഭാരത് എൻസിഎപി: ഭാരത് ന്യൂ കാർ അസസ്‌മെന്റ് പ്രോഗ്രാം (ഭാരത് എൻസിഎപി) ഇന്ത്യയിലെ റോഡ് ഗതാഗത, ഹൈവേ മന്ത്രാലയം അവതരിപ്പിച്ച ഒരു നവീന സുരക്ഷാ വിലയിരുത്തൽ സംരംഭമാണ്. എട്ട് യാത്രക്കാർക്ക് വരെ ഉൾക്കൊള്ളാൻ കഴിയുന്നതും 3.5 ടണ്ണിൽ കൂടാത്ത ഭാരമുള്ളതുമായ പാസഞ്ചർ വാഹനങ്ങളുടെ സുരക്ഷാ പ്രകടനം വിലയിരുത്തുന്നതിലാണ് ഇത് ശ്രദ്ധ കേന്ദ്രീകരിക്കുന്നത്. യുഎസ്, യൂറോപ്പ്, ജപ്പാൻ, ഓസ്‌ട്രേലിയ, ലാറ്റിൻ അമേരിക്ക തുടങ്ങിയ രാജ്യങ്ങളുമായി ഇന്ത്യയുടെ സുരക്ഷാ മാനദണ്ഡങ്ങൾ വിന്യസിക്കുന്നതിനാണ് പ്രോഗ്രാം രൂപകൽപ്പന ചെയ്‌തിരിക്കുന്നത്.

മറ്റ് രാജ്യങ്ങൾക്കെല്ലാം സ്വന്തമായി എൻസിഎപികളുണ്ട്. ക്രാഷ് ടെസ്റ്റുകളിലൂടെയും പോയിന്റ് അടിസ്ഥാനമാക്കിയുള്ള മൂല്യനിർണ്ണയത്തിലൂടെയും വാഹനങ്ങൾക്ക് സ്റ്റാർ റേറ്റിംഗുകൾ നൽകും, ഏറ്റവും ഉയർന്ന റേറ്റിംഗ് ഫൈവ് സ്റ്റാർ ആണ്. ഇന്ത്യയിൽ ഫൈവ് സ്റ്റാർ റേറ്റിങ്ങുകൾ ലഭിച്ച എണ്ണത്തിൽ കുറച്ച് കാറുകളേ ഉളളു. ടാറ്റ് ടിഗോ, ടിയാഗോ, ഹോണ്ട സിറ്റി, റെനോ ട്രൈബർ, നെക്സോൺ എന്നീ കാറുകളിൽ ഫോർ, ഫൈവ് സ്റ്റാർ ലഭിച്ച കാറുകളിൽ ചിലത്.

പ്രാധാന്യം എന്താണ്: വാഹനങ്ങളുടെ സ്റ്റാർ റേറ്റിംഗിനെ അടിസ്ഥാനമാക്കി സുരക്ഷിതമായ തിരഞ്ഞെടുപ്പുകൾ നടത്താൻ കാർ വാങ്ങുന്നവരെ പ്രാപ്തരാക്കുന്ന ഉപഭോക്തൃ കേന്ദ്രീകൃത പ്ലാറ്റ്‌ഫോമായിട്ടാണ് ഭാരത് എൻസിഎപി പ്രവർത്തിക്കുന്നത്. സുരക്ഷിതമായ വാഹനങ്ങൾ നിർമ്മിക്കുന്നതിന് ഇന്ത്യയിലെ യഥാർത്ഥ ഉപകരണ നിർമ്മാതാക്കൾ (OEMs) തമ്മിലുള്ള ആരോഗ്യകരമായൊരു മത്സരവും ഇത് പ്രോത്സാഹിപ്പിക്കുന്നുണ്ട്. ആഗോളതലത്തിൽ നോക്കുകയാണെങ്കിൽ റോഡിലെ വാഹനാപകടങ്ങളാണ് മരണത്തിന്റെ പ്രധാന കാരണം, പ്രത്യേകിച്ച് 15 മുതൽ 49 വയസ്സുവരെയുള്ള വ്യക്തികൾക്കിടയിൽ.

റോഡപകടങ്ങൾ മൂലം പ്രതിവർഷം ഏകദേശം 1.3 ദശലക്ഷം ജീവനുകളാണ് നഷ്ടപ്പെടുന്നത്. ഈ മരണങ്ങളിൽ 90 ശതമാനവും താഴ്ന്ന, ഇടത്തരം വരുമാനമുള്ള രാജ്യങ്ങളിലാണ് സംഭവിക്കുന്നത് എന്നതിനാൽ, ഈ പ്രശ്നം പരിഹരിക്കാനാണ് പ്രോഗ്രാം ലക്ഷ്യമിടുന്നത്. ആഗോള റോഡ് ട്രാഫിക് മരണങ്ങളിൽ 11% വരുന്ന ഈ മരണങ്ങളുടെ ഒരു പ്രധാന ഭാഗം ഇന്ത്യയിലാണ് എന്നതാണ് റിപ്പോർട്ടുകൾ സൂചിപ്പിക്കുന്നത്.

ഫ്രണ്ട്, സൈഡ്, പോൾ സൈഡ് ഇംപാക്ട് ടെസ്റ്റുകൾ ഉൾപ്പെടെയുള്ള ക്രാഷ് ടെസ്റ്റുകളുടെ ഒരു നിരയിലൂടെയാണ് വാഹനങ്ങളുടെ സുരക്ഷാ റേറ്റിംഗ് നിർണ്ണയിക്കുന്നത്. ഫ്രണ്ടൽ ക്രാഷ് ടെസ്റ്റ് 64 കിലോമീറ്റർ വേഗതയിലാണ് നടത്തുന്നത്, സൈഡ്, പോൾ സൈഡ് ടെസ്റ്റുകൾ യഥാക്രമം 50 കിലോമീറ്ററിലും 29 കിലോമീറ്ററിലും നടത്തുന്നു

സമാനമായ പരിപാടികൾ സ്വമേധയാ ഉള്ള വികസിത രാജ്യങ്ങളിൽ പോലും ഭാരത് എൻസിഎപി നിർബന്ധമല്ല. അടിസ്ഥാന സുരക്ഷാ മാനദണ്ഡങ്ങൾക്കപ്പുറത്തേക്ക് പോകാൻ നിർമ്മാതാക്കളെ പ്രോത്സാഹിപ്പിക്കുന്നതിനും വിപുലമായ സുരക്ഷാ സവിശേഷതകൾ ഉൾപ്പെടുത്തുന്നതിൽ മത്സരം പ്രോത്സാഹിപ്പിക്കുന്നതിനുമാണ് NCAP-കൾ രൂപകൽപ്പന ചെയ്തിരിക്കുന്നത്. ഉദാഹരണത്തിന്, കുറഞ്ഞത് 3 നക്ഷത്രങ്ങൾ നേടുന്നതിന്, വാഹനങ്ങളിൽ ഇലക്ട്രോണിക് സ്റ്റെബിലിറ്റി കൺട്രോളും കർട്ടൻ എയർബാഗുകളും സജ്ജീകരിക്കേണ്ടതുണ്ട്.

പ്രോഗ്രാമിന്റെ ലോഞ്ച് പ്രതീക്ഷിച്ച് നിരവധി നിർമ്മാതാക്കൾ ഇതിനകം തന്നെ ഈ ഫീച്ചറുകൾ സ്റ്റാൻഡേർഡായി ഉൾപ്പെടുത്താൻ തുടങ്ങിയിട്ടുണ്ട്, ഹ്യുണ്ടായിയുടെ എക്‌സ്‌റ്റർ, കിയയുടെ കാരൻസ്. മാരുതിയും ഇപ്പോൾ തങ്ങളുടെ പല കാറുകളിലും ഇലക്ട്രോണിക് സ്റ്റെബിലിറ്റി കൺട്രോൾ ഒരു സ്റ്റാൻഡേർഡ് ഫീച്ചറായി നൽകുന്നുണ്ട്.