സൈക്കിളിനെയും പറപ്പിക്കുന്നു!

നിലത്തോടുന്നതിനെയെല്ലാം പറപ്പിക്കാന്‍ മനുഷ്യനുള്ള കൗതുകത്തിന് അവസാനമില്ല. കഴിഞ്ഞയാഴ്ചയില്‍ ചെക് റിപ്പബ്ലിക്കിലെ കുറെ ശാസ്ത്രജ്ഞര്‍ ബൈക്ക് പറപ്പിക്കുന്നത് നിങ്ങള്‍ കണ്ടുകാണും. ഇത്തവണ സൈക്കിളാണ് പറക്കുന്നത്. പാരാവെലോ എന്നാണ് ഈ വാഹനത്തിന് നല്‍കിയിരിക്കുന്ന പേര്.

കാര്യമായ മാറ്റങ്ങളൊന്നും വരുത്തിയിട്ടില്ല ഈ സൈക്കിളിനെ പറപ്പിക്കാന്‍. ഒരു പാരാഗ്ലൈഡറും ഫാനും മാത്രമാണ് അധികമായി ഘടിപ്പിച്ച ഉപകരണങ്ങള്‍. പാരാഗ്ലൈഡര്‍ വായുവില്‍ തൂങ്ങി നില്‍ക്കാന്‍ സൈക്കിളിനെ സഹായിക്കുമ്പോള്‍, പിന്നില്‍ ഘടിപ്പിച്ച ഫാന്‍ സൈക്കിളിനെ മുമ്പോട്ട് തള്ളുന്നു.

4,000 അടി ഉയരം വരെ ഈ സൈക്കിള്‍ വിമാനത്തിന് പോകാന്‍ കഴിയും. വായുവില്‍ മണിക്കൂറില്‍ 40 കിലോമീറ്റര്‍ വരെ വേഗത പിടിക്കാന്‍ സൈക്കിളിന് സാധിക്കും.

സാഹസികത ഇഷ്ടപ്പെടുന്നവരെ ലക്ഷ്യം വെച്ചാണ് ഈ വാഹനം നിര്‍മിച്ചിരിക്കുന്നത്. പാരാഗ്ലൈഡിംഗിലും മറ്റും താല്‍പര്യമുള്ളവരിലാണ് വിപണി കാണുന്നത്. അധികം താമസിക്കാതെ തന്നെ വാഹനം വിപണിയിലെത്തിക്കുവാന്‍ ഉദ്ദേശ്യമുണ്ട്. താഴെ ചിത്രങ്ങളും വീഡിയോയും കാണാം.