ഹോണ്ടയുടെ ഏറ്റവും വലിയ സ്‌കൂട്ടര്‍ പ്ലാന്റ് ഇന്ത്യയില്‍

രാജ്യത്തെ ഏറ്റവും വലിയ ഇരുചക്രവാഹന നിര്‍മാതാവാകുക എന്ന ലക്ഷ്യത്തോടെയാണ് ഹോണ്ട പ്രവര്‍ത്തിക്കുന്നത്. നിലവില്‍ ഹീറോ കൈയടക്കിവെച്ചിരിക്കുന്ന ഈ ഇടം പിടിച്ചെടുക്കാന്‍ കഠിനാധ്വാനം തന്നെ ചെയ്യേണ്ടതുണ്ട്. ഇന്ത്യയിലെ നിക്ഷേപം ഹോണ്ട വര്‍ധിപ്പിക്കുന്നത് ഈ ലക്ഷ്യം മുന്നില്‍ക്കണ്ടാണ്.

പുതിയ വാര്‍ത്തകള്‍ പറയുന്നത്, ഹോണ്ടയുടെ ഏറ്റവും വലിയ സ്‌കൂട്ടര്‍ നിര്‍മാണ പ്ലാന്റ് ഇന്ത്യയില്‍ സ്ഥാപിക്കുന്നതിനെക്കുറിച്ചാണ്. ഗുജറാത്തിലായിരിക്കും ഈ പ്ലാന്റ് സ്ഥാപിക്കപ്പെടുക എന്നാണറിയുന്നത്.

രാജ്യത്തെ സ്‌കൂട്ടര്‍ വിപണി മുമ്പെന്നത്തേക്കാളും മികച്ച വളര്‍ച്ചാനിരക്ക് പ്രകടിപ്പിക്കുന്ന സമയമാണിത്. നിലവില്‍ ഇന്ത്യയിലെ മൊത്തം ഇരുചക്രവാഹന വില്‍പനയില്‍ 27 ശതമാനവും സ്‌കൂട്ടറുകളാണ്. പത്തുവര്‍ഷം മുന്‍പത്തെ നിലയില്‍ നിന്ന് എട്ടുശതമാനം കണ്ട് വളര്‍ന്നിട്ടുണ്ട് ഈ വിഭാഗം.

നിലവിലുള്ള ആവശ്യക്കാരെ തൃപ്തിപ്പെടുത്താനുള്ള ഉല്‍പാദനം ഹോണ്ട ഇന്ത്യയില്‍ നടത്തുന്നില്ല. ഇത് ഇരുചക്രവാഹനങ്ങളുടെ കാത്തിരിപ്പുസമയം വര്‍ധിപ്പിക്കുന്നുണ്ട്. ഹോണ്ട ആക്ടിവ മോഡലിനാണ് ഇപ്പോഴും ഏറെ ആവശ്യക്കാരുള്ളത്. 110 സിസി സെഗ്മെന്റിന്റെ അമ്പത് ശതമാനത്തിലധികം വിപണിവിഹിതവും ആക്ടിവ കൈയടക്കിവെച്ചിരിക്കുന്നു.