ടിവിഎസ് സ്റ്റാര്‍ സിറ്റി പ്ലസ് മേയില്‍

മെയ് മാസത്തിന്റെ ആദ്യവാരത്തില്‍ തന്നെ വാഹനം വിപണിയിലെത്തും. തുടക്കത്തില്‍ രാജ്യത്തിന്റെ വടക്കന്‍ സംസ്ഥാനങ്ങളില്‍ മാത്രമേ സ്റ്റാര്‍ സിറ്റി പ്ലസ് ലഭ്യമാകൂ.

രാജസ്ഥാന്‍, മധ്യപ്രദേശ്, യുപി, ബിഹാര്‍ എന്നിവിടങ്ങളിലാണ് ആദ്യ ലോഞ്ച് നടക്കുക. പിന്നീട് ഇതര സംസ്ഥാനങ്ങളിലേക്ക് വരും.

സ്റ്റാര്‍ സിറ്റിയുടെ നിലവിലെ അടിസ്ഥാന ഡിസൈനില്‍ തന്നെയാണ് സിറ്റി പ്ലസ് വരുന്നത്. പ്രീമിയം ഫീല്‍ കൊണ്ടുവരാന്‍ വേണ്ടി വരുത്തിയ ചില മാറ്റങ്ങളാണ് എടുത്തു പറയേണ്ടതായിട്ടുള്ളത്.

പുതിയ ഗ്രാഫിക്‌സ്, പുനര്‍രൂപകല്‍പന ചെയ്ത ഹെഡ്‌ലാമ്പ്, നീ റിസെസ്സോടുകൂടിയ ഇന്ധനടാങ്ക്, പുതുക്കിയ സീറ്റുകള്‍, പുതിയ എക്‌സോസ്റ്റ് പൈപ്പ് തുടങ്ങിയ മാറ്റങ്ങളാണ് കാണാന്‍ കഴിയുക.

സാങ്കേതികമായ ചില മാറ്റങ്ങളും ബൈക്കില്‍ വരുത്തിയിട്ടുണ്ട്. പിന്നിലെ സസ്‌പെന്‍ഷന്‍ അഞ്ചു തരത്തില്‍ ക്രമീകരിക്കാവുന്ന ഹൈഡ്രോളിക് സസ്‌പെന്‍ഷനാണ്.

സർവീസ് റിമൈൻഡർ, ആൾ ഗിയർ ഇലക്ട്രിക് സ്റ്റാർട് എന്നീ സംവിധാനങ്ങളും വാഹനത്തിലുണ്ട്. സെഗ്മെന്റിലെ ഏറ്റവും മികച്ച മൈലേജ് ഈ വാഹനം പകരുമെന്നാണ് ടിവിഎസ്സിൻറെ വാഗ്ദാനം.

110 സിസി ശേഷിയുള്ള ഇക്കോത്രസ്റ്റ് എന്‍ജിനാണ് സ്റ്റാര്‍ സിറ്റി പ്ലസ്സിലുള്ളത്. 7000 ആര്‍പിഎമ്മില്‍ 8.3 കുതിരകളുടെ കരുത്താണ് വാഹനം പകരുക. 5000 ആര്‍പിഎമ്മില്‍ 8.7 ചക്രവീര്യവും ഈ എന്‍ജിന്‍ പുറത്തെടുക്കുന്നു.