പുതിയ നിറങ്ങളിൽ ബജാജ് പൾസർ 200

ബജാജ് പൾസർ 200 മോഡലിന് പുതിയ നിറങ്ങൾ നൽകാൻ പദ്ധതിയുണ്ടെന്ന് വാർത്തകൾ. നിലവിൽ പൂർണമായും ഫെയറിങ് ചേർത്ത പൾസർ 200 മോഡലിന് രണ്ട് കളർ വേരിയന്റുകളാണുള്ളത്. മഞ്ഞയിലും ചുവപ്പിലും ആകർഷകമായ ഗ്രാഫിക് പണികളോടെ ഇവ വരുന്നു.

ഇനി വരാനുള്ള നിറങ്ങളിലൊന്ന് കറുപ്പിൽ സ്വർണ നിറത്തിൽ ഗ്രാഫിക് പണികളുള്ള മോഡലാണെന്ന് അറിയുന്നു. മറ്റൊന്ന് നീല നിറത്തിൽ വെള്ള നിറത്തിലുള്ള ഗ്രാഫിക് ജോലികൾ ചെയ്തതാണ്.

തുടക്കത്തിൽ ഈ പുതിയ നിറങ്ങൾ എബിഎസ് ഘടിപ്പിച്ച പതിപ്പിനൊപ്പം മാത്രമേ ലഭിക്കുകയുള്ളൂ. എബിഎസ് ഇല്ലാത്ത പതിപ്പുമുണ്ട് പൾസർ 200ന്.

199സിസി ശേഷിയുള്ള സിംഗിൾ സിലിണ്ടർ, ലിക്വിഡ് കൂൾഡ് എൻജിനാണ് ഈ വാഹനത്തിലുള്ളത്. 24.15 കുതിരശക്തി ഉൽപാദിപ്പിക്കാൻ ഈ എൻജിന് സാധിക്കുന്നു. ടോർക്ക് 18.6 എൻഎം. 6 സ്പീഡ് ഗിയർബോക്സാണ് എൻജിനോടു ചേർത്തിരിക്കുന്നത്.

പൾസർ 200 ഫെയേഡ് മോഡലിന്റെ എബിഎസ് ഇല്ലാത്ത പതിപ്പിന് 1,18,500 രൂപയാണ് എക്സ്ഷോറൂം വില. എബിഎസ് ചേർത്ത പതിപ്പിന് 1,30,268 രൂപയാണ് വില.