സ്പോർട്സ് ബൈക്ക് ആരാധകർക്ക് ഹീറോയുടെ എക്സ്ട്രീം 200എസ്

ഹീറോ മോട്ടോകോർപ്പ് എക്സ്ട്രീം 200എസ് ഓട്ടോഎക്സ്പോയിൽ അവതരിപ്പിച്ചു. മെച്ചപ്പെടുത്തിയ പെർഫോമൻസോടുകൂടിയ ഒരു മസിലൻ സ്ട്രീറ്റ് ഫൈറ്ററാണ് പുതിയ എക്സ്ട്രീം 200എസ്. എബിഎസ് പോലുള്ള ആധുനിക സുരക്ഷാ ഫീച്ചറുകൾ ഉൾപ്പെടുത്തിയിരിക്കുന്നുവെന്നാണ് ഈ സ്പോർട്സ് ബൈക്കിന്റെ പ്രത്യേകത. ചീറ്റയെ അനുകരിച്ചുള്ള ഡിസൈനായതിനാൽ ഒരു അഗ്രസീവ് ലുക്കാണ് എക്സ്ട്രീമിന് ലഭിച്ചിട്ടുള്ളത്.

ഹീറോ എക്സ്ട്രീമിന് കരുത്തേകുന്ന പുതിയ ലിക്വിഡ് കൂൾഡ് 200സിസി സിങ്കിൾ സിലിണ്ടർ എൻജിൻ 18.5 കുതിരശക്തിയും 17.2എൻഎം ടോർക്കും ഉല്പാദിപ്പിക്കുന്നു. 5 സ്പീഡ് ഗിയർബോക്സുകൂടി ഉൾപ്പെടുത്തിയിരിക്കുന്നു.

മുൻവശത്ത് ടെലിസ്കോപ്പിക് ഫോർക്കുകളും പിന്നിലായി മോണോഷോക്കുമാണ് നൽകിയിരിക്കുന്നത്. കൂടാതെ ഡിസ്ക് ബ്രേക്കുകളാണ് ഉപയോഗിച്ചിരിക്കുന്നത്. എൽഇഡി ലൈറ്റുകളും ബോഡിയിലും സീറ്റിലും ഉപയോഗിച്ചിട്ടുള്ള ഡ്യുവൽ ടോൺ ഗ്രാഫിക്സുകളാണ് ഈ പുത്തൻ ഹീറോ ബൈക്കിന്റെ മറ്റ് പ്രത്യേകതകൾ.

ഈ വർഷം പകുതിയോട് കൂടി എക്സ്ട്രീം 200എസ് വിപണിയിലെത്തുന്നതായിരിക്കും. പുതുതായി ലോഞ്ച് ചെയ്ത ടിവിഎസ് അപ്പാച്ചി 2004വി, 200സിസി ബജാജ് പൾസർ, കെടിഎം ഡ്യൂക്ക് 200എന്നിവരോടായിരിക്കും ഏറ്റുമുട്ടേണ്ടിവരിക.