കൂടുതൽ കരുത്തും സ്പോർടിയുമായി പുത്തൻ യമഹ ആർ15....

ഏറ്റവും ഒടുവിൽ 2011ലായിരുന്നു മിനുക്കുപണികൾ നടത്തി കൂടുതൽ സ്പോർടിഭാവുമുള്ള ഈ മോട്ടോർസൈക്കിളിനെ വീണ്ടുമവതരിപ്പിക്കുന്നത്. ഇപ്പോഴിതാ നിലവിലുള്ള മോഡലിനേക്കാളും കൂടുതൽ സ്പോർടി ലുക്കും കരുത്തേറിയതുമായി ആർ15 അവതരിച്ചിരിക്കുന്നു.

ആർ15 വി3.0 എന്ന പേരിലുള്ള ഈ യമഹ ബൈക്കിനെ ഇന്തോനേഷ്യയിലാണ് അവതരിപ്പിച്ചിട്ടുള്ളത്. ഈ വർഷം അവസാനത്തോടെയായിരിക്കും ഇന്ത്യയിലുള്ള അവതരണം.

യമഹ മോട്ടോജിപി റൈഡർമാരായ വാലന്റേനോ റോസി, മാവെറിക് വിനേയിൽസ് എന്നിവർ ചേർന്നാണ് യമഹ ആർ15 വി3.0 ബൈക്ക് പ്രകാശിപ്പിച്ചത്.

നിലവിലുള്ള മോഡലിനേക്കാളും കരുത്തുറ്റതും കാഴ്ചയിൽ കൂടുതൽ സ്പോർടിയുമായിരിക്കുമെന്നാണ് ഈ ജാപ്പനീസ് മോട്ടോർസൈക്കിൾ നിർമാതാവ് അവകാശപ്പെടുന്നത്.

പുതിയ എൽഇഡി ഹെഡ്‌ലാമ്പ്, ആർവണിൽ നിന്നും പ്രചോദനമേറ്റുള്ള എൽഇഡി ടെയിൽലാമ്പ്, നവീകരിച്ച എക്സോസ്റ്റ് എന്നിവയാണ് ഈ മൂന്നാം അവതാരത്തിന്റെ പ്രത്യേകതകൾ.

സ്ലിപ്പർ ക്ലച്ചോടുകൂടിയ പുതുക്കിയ 155സിസി എൻജിനായിരിക്കും യമഹ ആർ15-ന്റെ നവീകരിച്ച പതിപ്പിന് കരുത്തേകുക.

നിലവിലുള്ള ആർ15 മോഡലുകളുടെ അതെ ഡെൽറ്റബോക്സ് ഫ്രെയിമിലുള്ളതായിരിക്കും ഈ ബൈക്കും. സ്പോർടി ലുക്ക് നൽകുന്ന അപസൈഡ് ഡൗൺ ഫോർക്കാണ് ബൈക്കിന്റെ മറ്റൊരു സവിശേഷത.

19 മുതൽ 21ബിഎച്ച്പി വരേയും 17 മുതല്ഡ 19 എൻഎം ടോർക്കുവരേയും ഉല്പാദനശേഷിയുള്ളതായിരിക്കും ഈ എൻജിൻ.

എന്നും പെർഫോമൻസിലും ഗുണനിലവാരത്തിലും ഒരുപടി മുന്നിൽനിൽക്കുന്ന ബൈക്കുകളാണ് യമഹയുടേത്. ഈ ബൈക്ക് അവതരണത്തിലൂടേയും ഇതേ വിശ്വാസ്യത വച്ചുപുലർത്താൻ സാധിക്കുമെന്ന ഉറച്ചവിശ്വാസത്തിലാണ് കമ്പനി.

ചക്രങ്ങളിലേക്ക് വീര്യമെത്തിക്കാൻ നിലവിലെ മോഡലുകളിലുള്ള അതെ 6സ്പീഡ് ഗിയർബോക്സ് തന്നെയായിരിക്കും ആർ15 പുത്തൻ പതിപ്പിലും ഉണ്ടായിരിക്കുക.

ബ്രേക്ക് സംബന്ധിച്ച കാര്യങ്ങൾക്ക് നിവലിലെ വി2.0 മോഡലുകളിലേതുപോലെ മുന്നിൽ ഡ്യുവൽ പിസ്റ്റൺ കാലിപറുകളും പിന്നിൽ സിങ്കിൾ പിസ്റ്റണുമായിരിക്കുമുണ്ടാവുക. കൂട്ടത്തിൽ 17 ഇഞ്ച് അലോയ് വീലുകളുമുണ്ടാകുന്നതാണ്.

സുരക്ഷ ഉറപ്പാക്കാൻ എബിഎസ് ഒരു സ്റ്റാൻഡേഡ് ഫീച്ചറായി ഉൾപ്പെടുത്തുന്നതായിരിക്കും. ബ്ലൂ,വൈറ്റ്, ഗ്രേ/വൈറ്റ് /റെഡ് എന്നീ കളർ കോംപിനേഷനിലായിരിക്കും ബൈക്ക് അവതരിക്കുക.

കെടിഎം ആർസി200, ഹോണ്ട സിബിആർ150ആർ, ബജാജ്ആർഎസ്200 എന്നീ ബൈക്കുകളുമായി കോമ്പുകോർക്കാനിയിരിക്കും പുതിയ യമഹ ആർ15 സ്പോർട്സ് ബൈക്കിന്റെ ഇന്ത്യയിലേക്കുള്ള വരവ്.