സുസുക്കി ആക്‌സസ് 125 സ്‌പെഷ്യല്‍ എഡിഷന്‍ വിപണിയില്‍, ഒപ്പം സിബിഎസ് പതിപ്പും

സിബിഎസ് സംവിധാനത്തിന്റെ പശ്ചാത്തലത്തില്‍ പുതിയ ആക്‌സസ് 125 ഭേദപ്പെട്ട ബ്രേക്കിംഗ് കാഴ്ചവെക്കും. ഇടതു ബ്രേക്ക് ലെവര്‍ പിടിക്കുമ്പോള്‍ തന്നെ മുന്‍ പിന്‍ ടയറുകളില്‍ ബ്രേക്ക്‌ഫോഴ്‌സ് അനുഭവപ്പെടും. ഇക്കാരണത്താല്‍ ബ്രേക്കിംഗ് ദൂരം കുറയും.

അടിയന്തര സന്ദര്‍ഭങ്ങളില്‍ യാത്രക്കാരുടെ സുരക്ഷ ഉറപ്പുവരുത്താന്‍ സിബിഎസ് സംവിധാനത്തിന് സാധിക്കും. നീളമേറിയ സീറ്റ്, വീതിയേറിയ ഫ്‌ളോര്‍ബോര്‍ഡ്, വലിയ അണ്ടര്‍ സീറ്റ് സ്‌റ്റോറേജ്, മുന്‍ പോക്കറ്റ് എന്നിങ്ങനെ നീളും പുതിയ ആക്‌സസ് 125 സിബിഎസ് വിശേഷങ്ങള്‍.

ഓപ്ഷനല്‍ ഡിസി സോക്കറ്റും യൂട്ടിലിറ്റി കൊളുത്തുകളും സ്‌കൂട്ടറിലുണ്ട്. ആറു നിറങ്ങളിലാണ് സുസുക്കി 125 സിബിഎസ് വിപണിയില്‍ എത്തുന്നത്. പേള്‍ സുസുക്കി ഡീപ് ബ്ലൂ, ക്യാന്‍ഡി സൊനോമ റെഡ്, ഗ്ലാസ് സ്പാര്‍ക്കിള്‍ ബ്ലാക്, മെറ്റാലിക് ഫിബ്രൊയിന്‍ ഗ്രെയ്, മെറ്റാലിക് സോണിക് സില്‍വര്‍, പേള്‍ മിറേജ് നിറങ്ങള്‍ സ്‌കൂട്ടറില്‍ തെരഞ്ഞെടുക്കാം.

കറുത്ത നിറമുള്ള അലോയ് വീലുകളും ഗ്രാബ് റെയിലുകളും ആക്‌സസ് 125 സ്‌പെഷ്യല്‍ എഡിഷനില്‍ ശ്രദ്ധയാകര്‍ഷിക്കും. സ്‌പെഷ്യല്‍ എഡിഷന്റെ സ്‌പോര്‍ടി രൂപത്തെ ഈ രണ്ടു ഘടകങ്ങളും കാര്യമായി സ്വാധീനിക്കുന്നു.

അതേസമയം റെട്രോ ശൈലി ആക്‌സസ് 125 സ്‌പെഷ്യല്‍ എഡിഷന്‍ കൈവെടിഞ്ഞിട്ടില്ലാതാനും. സ്റ്റാന്‍ഡേര്‍ഡ് ആക്‌സസില്‍ നിന്നും സ്‌പെഷ്യല്‍ എഡിഷന്‍ ആക്‌സസിനെ വേറിട്ടു നിര്‍ത്താന്‍ പ്രത്യേക ലോഗോ കമ്പനി പതിപ്പിച്ചിട്ടുണ്ട്.

ലെതര്‍ തോന്നിക്കുന്ന ബീജ് നിറത്തിലുള്ള സീറ്റും സ്‌പെഷ്യല്‍ എഡിഷന്‍ ആക്‌സസിന്റെ പ്രധാന വിശേഷമാണ്. മെറ്റാലിക് സോണിക് സില്‍വര്‍ നിറത്തിന് പുറമെ നിലവിലുള്ള മെറ്റാലിക് മാറ്റ് ബ്ലാക്, പേള്‍ മിറേജ് വൈറ്റ് നിറങ്ങളിലും സുസുക്കി ആക്‌സസ് 125 സ്‌പെഷ്യല്‍ എഡിഷന്‍ ലഭ്യമാണ്.

പുതിയ ആക്‌സസ് 125 സിബിഎസ്, ആക്‌സസ് 125 സ്‌പെഷ്യല്‍ എഡിഷന്‍ സ്‌കൂട്ടറുകളുടെ എഞ്ചിനില്‍ സുസുക്കി കൈകടത്തിയിട്ടില്ല. നിലവിലുള്ള 124 സിസി ഒറ്റ സിലിണ്ടര്‍ എഞ്ചിന്‍ ആക്‌സസ് 125 -ല്‍ തുടരുന്നു. എഞ്ചിന് 8.5 bhp കരുത്തും 10.2 Nm torque ഉം പരമാവധി സൃഷ്ടിക്കാനാവും.

ടെലിസ്‌കോപിക് ഫോര്‍ക്കുകള്‍ മുന്നിലും സിംഗിള്‍ ഷോക്ക് അബ്‌സോര്‍ബര്‍ പിന്നിലും മോഡലില്‍ സസ്‌പെന്‍ഷന്‍ നിറവേറ്റും. ബ്രേക്കിംഗിന് വേണ്ടി മുന്‍ ടയറില്‍ ഡിസ്‌കും പിന്‍ ടയറില്‍ ഡ്രം ബ്രേക്കുമാണ് ഒരുങ്ങുന്നത്. ഹോണ്ട ആക്ടിവ 125, ടിവിഎസ് എന്‍ടോര്‍ഖ് മോഡലുകളാണ് വിപണിയില്‍ സുസുക്കി ആക്‌സസ് 125 -ന്റെ എതിരാളികള്‍.