നിഞ്ച ZX-25R റേസ് എഡിഷന്‍ അവതരിപ്പിച്ച് കവസാക്കി

ജപ്പാനില്‍ നടക്കാനിരിക്കുന്ന വണ്‍-മെയ്ക്ക് റേസിങ് സിരീസിനായി പ്രത്യേകം തയ്യാറാക്കിയതാണ് നിഞ്ച ZX-25R റേസ് എഡിഷന്‍ മോഡലിനെയെന്നും കമ്പനി അറിയിച്ചു. നിഞ്ജ ZX-25R -നെ അടിസ്ഥാനമാക്കി നിര്‍മ്മിച്ചതാണെങ്കിലും ബൈക്കില്‍ വ്യത്യാസങ്ങളും മാറ്റങ്ങളും കാണാന്‍ സാധിക്കും.

കമ്പനി നിരയില്‍ നിന്നും ഉടന്‍ വിപണിയില്‍ എത്താനിരിക്കുന്ന ബൈക്കാണ് ക്വാര്‍ട്ടര്‍ ലിറ്റര്‍ സ്പോര്‍ട്സ് ബൈക്കായ നിഞ്ച ZX-25R. ലോകവ്യാപകമായി പടര്‍ന്നുപിടിച്ച കൊവിഡ്-19 എന്ന മഹാമാരിയുടെ പശ്ചാത്തലത്തില്‍ ബൈക്കിനെ പുറത്തിറക്കുന്നത് വൈകുമെന്നാണ് കമ്പനി അറിയിച്ചിരിക്കുന്നത്.

ബൈക്കിനായുള്ള ബുക്കിങ് നേരത്തെ തന്നെ കമ്പനി ആരംഭിച്ചിരുന്നു. ദക്ഷിണേഷ്യന്‍ രാജ്യമായ ഇന്തോനേഷ്യയില്‍ ഏപ്രില്‍ 4 -ന് പുത്തന്‍ 250 സിസി മോഡലിനെ അവതരിപ്പിക്കാന്‍ ജാപ്പനീസ് ഇരുചക്ര വാഹന നിര്‍മാതാക്കളായ കവസാക്കി തീരുമാനിച്ചിരുന്നത്. ഇത് കമ്പനിക്ക് ആധിപത്യമുള്ള ഏറ്റവും വലിയ വിപണികളില്‍ ഒന്നാണ്.

നിഞ്ച ZX-25R -നെ അടിസ്ഥാനമാക്കിയാണ് റേസ് എഡിഷന്‍ നിര്‍മ്മിച്ചിരിക്കുന്നതെങ്കിലും, ഫ്യുവല്‍ ടാങ്ക്, എയര്‍ബോക്സ്, സബ്‌ഫ്രെയിം, സീറ്റ്, ഫെയറിങ് എന്നിവടങ്ങളിലെല്ലാം മാറ്റങ്ങള്‍ കാണാന്‍ സാധിക്കും.

അതുപോലെ തന്നെ സാധാരണ ബൈക്കുകളില്‍ കാണുന്ന ലൈറ്റുകള്‍, നമ്പര്‍ പ്ലേറ്റ്, മിററുകള്‍ എന്നിവ നിഞ്ച ZX-25R റേസ് എഡിഷനില്‍ കാണാനും സാധിക്കില്ല. റേസ് എഡീഷന്‍ ബൈക്ക് ആയതുകൊണ്ടാണ് ഈ ഡിസൈന്‍ എന്നാണ് കമ്പനിയുടെ വിശദീകരണം.

ഇതിനൊപ്പം തന്നെ റേസിങ്ങിനായി പ്രത്യേകം തയ്യാറാക്കിയ ടയറുകള്‍, ഫ്രീ-ഫ്‌ളോ കസ്റ്റം എക്സ്‌ഹോസ്റ്റ് സിസ്റ്റം എന്നിവയും ബൈക്കിന്റെ സവിശേഷതയാണ്. ഗ്ലോസ് ബ്ലാക്ക്, കാര്‍ബണ്‍ ഫൈബര്‍ ഫെയറിങ്ങും ചേര്‍ന്ന് നിറത്തിലാണ് ബൈക്കിനെ കമ്പനി അണിയിച്ചൊരുക്കിയിരിക്കുന്നത്.

ഫുട്‌പെഗ്ഗുകളും, അഡ്ജസ്റ്റ് ചെയ്യാവുന്ന ക്ലച്ച്, ബ്രേക്ക്, സസ്‌പെന്‍ഷന്‍ എന്നിവയും ബൈക്കിന്റെ പ്രത്യേകതയാണെന്ന് കവസാക്കി അവകാശപ്പെടുന്നു. അതേസമയം ബൈക്കിന്റെ എഞ്ചിന്‍ വിവരങ്ങള്‍ കമ്പനി വെളിപ്പെടുത്തിയിട്ടില്ല.

റിപ്പോര്‍ട്ടുകള്‍ അനുസരിച്ച് 249 സിസി DOHC ലിക്വിഡ് ഇന്‍-ലൈന്‍ നാല് സിലിണ്ടര്‍ എഞ്ചിന്‍ ബൈക്കില്‍ ഇടംപിടിച്ചേക്കും. ഈ എഞ്ചിന്‍ 17,500 rpm റെവ് റേഞ്ച് ഉണ്ടാകും എന്നാണ് സൂചന.