എക്‌സ്‌പൾസ് 200 T, എക്‌സ്ട്രീം 200 R, 200 S എന്നിവ ഔദ്യോഗിക വെബ്സൈറ്റിൽ നിന്ന് ഹീറോ പിൻവലിച്ചു

നിർമ്മാതാക്കൾ ഇവയുടെ പരിഷ്കരിച്ച ബിഎസ് VI മോഡലുകൾ അവതരിപ്പിക്കും വരെ ബിഎസ് IV മോഡലുകളെ താൽക്കാലികമായി ഔദ്യോഗിക വെബ്‌സൈറ്റിൽ നിന്ന് നീക്കം ചെയ്തതാവാനാണ് സാധ്യത.

നമുക്കറിയാവുന്നതുപോലെ, ഹീറോ ഉൾപ്പെടെയുള്ള മിക്ക ഇരു-ചക്ര വാഹന നിർമ്മാതാക്കളും മാരകമായ കൊവിഡ്-19 വൈറസിന്റെ വ്യാപനം തടയുന്നതിനായി തങ്ങളുടെ വിൽപ്പന, ഉൽ‌പാദന പ്രവർത്തനങ്ങൾ നിർത്തിവച്ചിരിക്കുകയാണ്.

ഈ മൂന്ന് മോട്ടോർസൈക്കിളുകളുടെയും പരിഷ്കരിച്ച പതിപ്പിന്റെ ലോഞ്ച് വൈകുന്നതിന് പ്രധാന കാരണം ഇതായിരിക്കാം. ഹീറോ ഉടൻ തന്നെ ബിഎസ് VI എക്‌സ്ട്രീം 200 R, എക്‌സ്ട്രീം 200 S, എക്‌സ്‌പൾസ് 200 T എന്നിവ ഇന്ത്യയിൽ അവതരിപ്പിക്കും.

മൂന്ന് മോട്ടോർസൈക്കിളുകളും ഹീറോയുടെ ‘X' കുടുംബത്തിൽ പെടുന്നു, രൂപഭാവങ്ങളിൽ വ്യത്യാസമുണ്ടെങ്കിലും ഇവ ഒരേ എഞ്ചിൻ പങ്കിടുന്നു. എക്‌സ്ട്രീം 200 R ഒരു നേക്കഡ് സ്ട്രീറ്റ് ബൈക്കാണ്, 200 S അതിന്റെ പൂർണ്ണമായ ഫ്ലെയർഡ് സഹോദരനാണ്.

അതേസമയം, എക്സ്പൾസ് 200 T അഡ്വഞ്ചർ മോട്ടോർസൈക്കിളായ എക്സ്പൾസ് 200 -ന്റെ ടൂറിംഗ് അധിഷ്ഠിത മോഡലാണ്. 18.1 bhp കരുത്തും 17.1 Nm torque ഉം ഉത്പാദിപ്പിക്കുന്ന 199.6 സിസി, എയർ-കൂൾഡ്, കാർബ്യൂറേറ്റഡ് മോട്ടോർ ആണ് ബൈക്കുകളിൽ വരുന്നത്. ബിഎസ് VI ആവർത്തനങ്ങളിൽ കാർബ്യൂറേറ്ററിന് പകരം ഫ്യുവ-ഇഞ്ചക്ഷൻ സംവിധാനം ഉണ്ടാകും.

എക്‌സ്‌പൾസ് 200 T, എക്‌സ്ട്രീം 200 S എന്നിവയ്ക്ക് എൽഇഡി ഡിആർഎല്ലിനൊപ്പം പൂർണ്ണ എൽഇഡി ഹെഡ്‌ലാമ്പും ലഭിക്കും. ഇൻസ്ട്രുമെന്റ് ക്ലസ്റ്റർ പൂർണ്ണമായും ഡിജിറ്റലാണ്, ഇത് സ്മാർട്ട്‌ഫോൺ പേയറിംഗിനായി ബ്ലൂടൂത്ത് കണക്റ്റിവിറ്റിയും നാവിഗേഷനും കോളുകൾക്കും മെസേജുകൾക്കുമുള്ള അലേർട്ടുകളും നൽകുന്നു.

മറുവശത്ത്, എക്‌സ്ട്രീം 200 R -ൽ എൽഇഡി പൊസിഷൻ ലാമ്പുകളും സെമി ഡിജിറ്റൽ ഇൻസ്ട്രുമെന്റ് ക്ലസ്റ്ററും ഉള്ള പരമ്പരാഗത ഹെഡ്‌ലാമ്പുമാണ്.

മൂന്നിലും ഏറ്റവും താങ്ങാവുന്ന മോഡലായ ഹീറോ എക്‌സ്ട്രീം 200 R -ന് 93,400 രൂപയാണ് എക്സ്-ഷോറൂം വില. എക്‌സ്ട്രീം 200 S, എക്‌സ്‌പൾസ് 200 T എന്നിവയ്ക്ക് യഥാക്രമം 1.02 ലക്ഷം രൂപയും 96,500 രൂപയുമാണ് വില. ബിഎസ് VI മോഡലുകൾക്ക് ഈ വിലയേക്കാൾ നേരിയ വർദ്ധവുണ്ടാവാൻ സാധ്യതയുണ്ട്.