ഇലക്ട്രിക് സ്‌കൂട്ടറിന്റെ അവതരണം അടുത്തു; കളര്‍ ഓപ്ഷനുകള്‍ നിര്‍ദ്ദേശിക്കാമോ എന്ന് ഓല

അവതരണത്തിന് മുന്നോടിയായി കമ്പനി സിഇഒ ഭവിഷ് അഗര്‍വാള്‍ തന്റെ ട്വിറ്ററില്‍ വരാനിരിക്കുന്ന ഇലക്ട്രിക് സ്‌കൂട്ടറിനെക്കുറിച്ചുള്ള നിര്‍ണായക വിവരങ്ങള്‍ വെളിപ്പെടുത്തി. ഇത് രണ്ടാം തവണയാണ് വരാനിരിക്കുന്ന ഓല ഇലക്ട്രിക് സ്‌കൂട്ടറിന്റെ പ്രൊഡക്ഷന്‍ സ്‌പെക്ക് സോഷ്യല്‍ മീഡിയയില്‍ വെളിപ്പെടുത്തുന്നത്.

ഈ വര്‍ഷം മാര്‍ച്ചില്‍ സ്‌കൂട്ടറിന്റെ ആദ്യ ചിത്രങ്ങള്‍ സോഷ്യല്‍ മീഡിയയില്‍ വൈറലായിരുന്നു. കഴിഞ്ഞ വര്‍ഷം ഇവി വികസനത്തിനായി ഒരു പ്രത്യേക ഇടം സൃഷ്ടിച്ച് സ്വന്തമായി ഇലക്ട്രിക് വാഹനങ്ങള്‍ നിര്‍മ്മിക്കാനുള്ള ഉദ്ദേശ്യം ഓല പ്രഖ്യാപിച്ച് രംഗത്തെത്തുകയായിരുന്നു.

ട്വീറ്റില്‍, ഓല സ്‌കൂട്ടറിനായി ചില കളര്‍ ഓപ്ഷനുകള്‍ നിര്‍ദ്ദേശിക്കാന്‍ അഗര്‍വാള്‍ സോഷ്യല്‍ മീഡിയ ഉപഭോക്താക്കളോട് ആവശ്യപ്പെടുന്നു, അതില്‍ ടീസര്‍ ചിത്രത്തില്‍ കാണിച്ചിരിക്കുന്നതുപോലെ ബ്ലാക്ക് ഇതിനകം സ്വീകരിച്ചിട്ടുണ്ടെന്നും വ്യക്തമാക്കുന്നു.

നേരത്തെ സൂചിപ്പിച്ചതുപോലെ, ഈ സ്‌കൂട്ടര്‍ എറ്റെര്‍ഗോയുടെ ആപ്‌സ്‌കൂട്ടറിനെ അടിസ്ഥാനമാക്കിയുള്ളതായിരിക്കും. കഴിഞ്ഞ വര്‍ഷം 2020 മെയ് മാസത്തില്‍ റൈഡ് ഹെയ്‌ലിംഗ് കമ്പനി ആംസ്റ്റര്‍ഡാം ആസ്ഥാനമായുള്ള ഇലക്ട്രിക് സ്‌കൂട്ടര്‍ കമ്പനിയായ എറ്റെര്‍ഗോ BV വെളിപ്പെടുത്താത്ത തുകയ്ക്ക് ഏറ്റെടുത്തിരുന്നു.

നെതര്‍ലാന്‍ഡില്‍ നിന്നുള്ള മുഴുവന്‍ ഇറക്കുമതിയായി ആദ്യത്തെ കൂട്ടം സ്‌കൂട്ടറുകള്‍ ഇന്ത്യയിലേക്ക് കൊണ്ടുവരാന്‍ സാധ്യതയുണ്ടെന്നും റിപ്പോര്‍ട്ടില്‍ വ്യക്തമാക്കുന്നു. തമിഴ്നാട്ടില്‍ നിലവില്‍ നിര്‍മ്മാണത്തിലിരിക്കുന്ന ഓലയുടെ അടുത്ത സൗകര്യത്തിലാണ് അടുത്ത കൂട്ടം സ്‌കൂട്ടറുകള്‍ നിര്‍മ്മിക്കുക.

ഈ നിര്‍മാണ പ്ലാന്റിനായി 2,400 കോടി രൂപയുടെ നിക്ഷേപം കമ്പനി നേരത്തെ പ്രഖ്യാപിച്ചിരുന്നു. പ്രതിവര്‍ഷം 2 ദശലക്ഷം ഇലക്ട്രിക് ഇരുചക്ര വാഹനങ്ങള്‍ ഉത്പാദിപ്പിക്കാന്‍ ഈ സൗകര്യത്തിന് കഴിയും, മാത്രമല്ല പതിനായിരത്തോളം തൊഴിലവസരങ്ങള്‍ സൃഷ്ടിക്കുകയും ചെയ്യും.

ലോകത്തിലെ ഏറ്റവും വലിയ ഇരുചക്ര വാഹന നിര്‍മാണ പ്ലാന്റായി ഇത് മാറുകയും ചെയ്യും. വരും മാസങ്ങളില്‍ പ്രവര്‍ത്തനം ആരംഭിക്കുമെന്നും പ്ലാന്റ് വ്യവസായ 4.0 മാനദണ്ഡങ്ങള്‍ പാലിക്കുമെന്നും പ്രതീക്ഷിക്കുന്നുവെന്നും റിപ്പോര്‍ട്ടില്‍ പറയുന്നു.

ഓല ഇ-സ്‌കൂട്ടറിലേക്ക് വന്നാല്‍ ഈ സ്‌കൂട്ടര്‍ എറ്റെര്‍ഗോ ആപ്സ്‌കൂട്ടറിനോട് വളരെ സാമ്യമുള്ളതായി തോന്നും. അത് അടിസ്ഥാനമാക്കിയുള്ളതാണെന്നും സൂചനകളുണ്ട്. മുന്നില്‍ ടെലിസ്‌കോപ്പിക് ഫോര്‍ക്കുകളുമായി ഇ-സ്‌കൂട്ടര്‍ വരും.

പ്രധാന ക്ലസ്റ്ററിനുചുറ്റും എല്‍ഇഡി ഡിആര്‍എല്‍ സ്ട്രിപ്പുള്ള കോംപാക്ട് വലുപ്പവും ഇരട്ട-ബീം എല്‍ഇഡി ഹെഡ്‌ലൈറ്റും ഏറ്റവും ആകര്‍ഷകമായ ഹൈലൈറ്റാണ്. സവാരിക്കായി ഉയര്‍ന്ന ഗ്രൗണ്ട് ക്ലിയറന്‍സും ലഭിക്കുന്നു, ഇതിന്റെ റൈഡിംഗ് ഡൈനാമിക്‌സ് ലളിതമായി കാണപ്പെടുന്നു.

ഇപ്പോള്‍ പ്രത്യേകതകളൊന്നും വെളിപ്പെടുത്തിയിട്ടില്ലെങ്കിലും, ഇ-സ്‌കൂട്ടര്‍ അതിന്റെ ഡച്ച് ഇരട്ടകളില്‍ നിന്ന് അതിന്റെ മിക്ക സവിശേഷതകളും കടമെടുക്കാന്‍ സാധ്യതയുണ്ട്. അലോയ് വീലുകള്‍, ഡിജിറ്റല്‍ ഇന്‍സ്ട്രുമെന്റ് കണ്‍സോള്‍, ക്ലൗഡ് കണക്റ്റിവിറ്റി, നീക്കം ചെയ്യാവുന്ന ലിഥിയം അയണ്‍ ബാറ്ററി, വിശാലമായ അണ്ടര്‍ സീറ്റ് സ്റ്റോറേജ് എന്നിവയും സവിശേഷതകളില്‍ ഇടംപിടിക്കും.