ഇനി എന്തിന് താമസിക്കണം? വെറും 499 രൂപയ്ക്ക് ഇലക്ട്രിക് സ്കൂട്ടറിന്റെ ബുക്കിംഗ് ആരംഭിച്ച് ഓല

താൽപ്പര്യമുള്ള ആളുകൾക്ക് സ്കൂട്ടർ ഓൺലൈനിൽ olaelectric.com -ൽ 499 രൂപ റീഫണ്ടബിൾ തുക നൽകി റിസർവ്വ് ചെയ്യാൻ കഴിയും, ബുക്കിംഗ് സമയത്തെ അടിസ്ഥാനമാക്കി ഡെലിവറികൾക്ക് മുൻ‌ഗണന നൽകും.

റൈഡ്-ഹെയ്‌ലിംഗ് കമ്പനിക്ക് തങ്ങളുടെ ഇലക്ട്രിക് സ്കൂട്ടറുകൾക്കായി മികച്ച അവകാശവാദങ്ങളാണുള്ളത്. ക്ലാസ്-ലീഡിംഗ് സ്പീഡ്, ആശ്ചര്യപ്പെടുത്തുന്ന ശ്രേണി, ഏറ്റവും വലിയ ബൂട്ട്‌സ്പേസ്, നൂതന സാങ്കേതികവിദ്യ എന്നിവയാണുള്ളത് എന്ന് നിർമ്മാതാക്കൾ പറയുന്നു.

കുറച്ച് ദിവസങ്ങൾക്ക് മുമ്പ്, ഒരു വീഡിയോയിൽ ഇലക്ട്രിക് സ്കൂട്ടർ ബ്രാൻഡിന്റെ ചെയർമാൻ ബെംഗളൂരു നഗരത്തിന് ചുറ്റും ഓടിച്ച് സവിശേഷതകൾ വെളിപ്പെടുത്തിയിരുന്നു.

ഇക്കോ-ഫ്രണ്ട്‌ലി സ്കൂട്ടറിന്റെ അണ്ടർ സ്റ്റോറേജ് കപ്പാസിറ്റി വീഡിയോയിൽ വ്യക്തമായി കാണാൻ കഴിയും, സീറ്റിനടിയിൽ രണ്ട് പൂർണ്ണ വലുപ്പത്തിലുള്ള ഹെൽമെറ്റുകൾ ഉൾക്കൊള്ളുന്നതായി അതിൽ കാണിക്കുന്നു.

മൊത്തത്തിൽ സ്കൂട്ടറിനെ സംബന്ധിച്ചിടത്തോളം, ഇത് നെതർലാൻഡ്‌സ് ആസ്ഥാനമായുള്ള എറ്റെർഗോ ആപ്‌സ്‌കൂട്ടറിനെ അടിസ്ഥാനമാക്കിയുള്ളതാണ്, ഇത് കുറച്ച് നാൾ മുമ്പ് ഓല ഏറ്റെടുത്തതാണ്, മാത്രമല്ല വാഹനത്തിന്റെ ഓല അവതാരത്തിൽ ദൃശ്യപരമായ മാറ്റങ്ങളൊന്നും കാണുന്നില്ല.

വ്യാപകമായി ആക്‌സസ് ചെയ്യുന്നതിനായി അഗ്രസ്സീവ് വില നിശ്ചയിക്കുമെന്ന് ഓല സ്ഥിരീകരിച്ചു. വരും ദിവസങ്ങളിൽ വിലകളും സവിശേഷതകളും കമ്പനി വെളിപ്പെടുത്തുമെന്ന് ഓല ചെയർമാനും ഗ്രൂപ്പ് സിഇഒയുമായ ഭവിഷ് അഗർവാൾ പറഞ്ഞു.

തങ്ങളുടെ ഇലക്ട്രിക് സ്കൂട്ടറിനായി റിസർവേഷനുകൾ തുറക്കുന്നതോടെ ഇന്ത്യയുടെ ഇവി വിപ്ലവം ആരംഭിക്കുന്നു എന്ന് അദ്ദേഹം കൂട്ടിച്ചേർത്തു. അഗ്രസ്സീവ് വിലനിർണ്ണയത്തിനൊപ്പം അതിന്റെ അവിശ്വസനീയമായ പ്രകടനം, സാങ്കേതികവിദ്യ, രൂപകൽപ്പന എന്നിവ ഉപയോഗിച്ച് സുസ്ഥിര മൊബിലിറ്റിയിലേക്കുള്ള മാറ്റം ത്വരിതപ്പെടുത്താൻ ഇത് സഹായിക്കും.

ഇവികളിൽ ലോകനേതാവാകാനുള്ള അവസരവും സാധ്യതയും ഇന്ത്യയിലുണ്ട്, ഓലയിൽ ഈ നീകത്തിന് നേതൃത്വം നൽകുന്നതിൽ തങ്ങൾ അഭിമാനിക്കുന്നു എന്നും അഗർവാൾ വ്യക്തമാക്കി.

ഇലക്ട്രിക് സ്കൂട്ടർ ഇതിനകം CES -ലെ IHS മാർക്കിറ്റ് ഇന്നൊവേഷൻ അവാർഡും ജർമ്മൻ ഡിസൈൻ അവാർഡും നേടിയിട്ടുണ്ട്. ലോകത്തിലെ ഏറ്റവും വലിയ ഇരുചക്ര വാഹന ഫാക്ടറിയെന്ന് അവകാശപ്പെടുന്ന ഓല ഫ്യൂച്ചർ ഫാക്ടറിയിൽ ഇവ നിർമ്മിക്കും.

ഇത് തമിഴ്‌നാട്ടിലെ ഹൊസൂരിലാണ് സ്ഥിതി ചെയ്യുന്നത്. 500 ഏക്കറിൽ വ്യാപിച്ചുകിടക്കുന്ന ഇത് എല്ലാ ഓല ഇലക്ട്രിക് ഇരുചക്ര വാഹനങ്ങളുടെയും ഉൽ‌പാദന കേന്ദ്രമായി പ്രവർത്തിക്കും. കൂടാതെ പ്രതിവർഷം 10 ദശലക്ഷം യൂണിറ്റുകൾ പുറത്തിറക്കാനുള്ള ശേഷിയും ഉത്പാദന കേന്ദ്രത്തിനുണ്ട്.

ആദ്യ ഘട്ടത്തിൽ രണ്ട് ദശലക്ഷം യൂണിറ്റുകൾ ഉത്പാദിപ്പിക്കും, കൂടാതെ അടുത്തിടെ ഓല ഇലക്ട്രിക് ബാങ്ക് ഓഫ് ബറോഡയുമായി 100 ദശലക്ഷം യുഎസ് ഡോളറിന് പത്തുവർഷത്തേക്ക് ഫിനാൻസിംഗ് കരാറും ഒപ്പിട്ടു.