2022 BSA Gold Star-ന്റെ വിലകള്‍ പുറത്ത്; എതിരാളി Royal Enfield 650 ഇരട്ടകള്‍

ജാവ മോട്ടോര്‍സൈക്കിളിന്റെ തിരിച്ചുവരവിന് ശേഷം, ക്ലാസിക് ലെജന്‍ഡ്‌സ് വിപണിയില്‍ എത്തിക്കുന്ന ഐതിഹാസിക ബ്രാന്‍ഡാണ് BSA. നേരത്തെ പുറത്തുവന്നതനുസരിച്ച്, BSA ഗോള്‍ഡ് സ്റ്റാര്‍ എന്ന് പേരിട്ടിരിക്കുന്ന ഈ മോട്ടോര്‍സൈക്കിള്‍ 2022 മാര്‍ച്ചില്‍ ലോഞ്ച് ചെയ്യുമെന്നായിരുന്നു കമ്പനി പ്രഖ്യാപിച്ചിരുന്നത്.

എന്നാല്‍ ഏതാനും മാസങ്ങള്‍ക്ക് മുമ്പ് പുറത്തുവന്ന പുതിയ റിപ്പോര്‍ട്ട് അനുസരിച്ച് മോട്ടോര്‍സൈക്കളിന്റെ അരങ്ങേറ്റം വൈകുമെന്ന് പ്രഖ്യാപിച്ച് കമ്പനി തന്നെ വീണ്ടും രംഗത്തെത്തിയിരുന്നു. ഇപ്പോഴിതാ മോട്ടോര്‍സൈക്കിളിന്റെ അരങ്ങേറ്റവും, വിലയും സംബന്ധിച്ചുള്ള പുതിയ വിവരങ്ങള്‍ പുറത്തുവന്നിരിക്കുകയാണ്.

പ്രാരംഭ ഹൈലാന്‍ഡ് ഗ്രീനിന് 6,500 പൗണ്ട് (6.15 ലക്ഷം രൂപ), ഇന്‍സിഗ്‌നിയ റെഡ്, മിഡ്നൈറ്റ് ബ്ലാക്ക്, ഡോണ്‍ സില്‍വര്‍ എന്നിവയ്ക്ക് 6,800 പൗണ്ട് (6.44 ലക്ഷം രൂപ), ഒപ്പം ലെഗസി സില്‍വര്‍ ഷീന്‍ ഷേഡിന് 7,000 പൗണ്ട് (6.61 ലക്ഷം രൂപ) മുതലും വില ആരംഭിക്കുമെന്നാണ് പുതിയ റിപ്പോര്‍ട്ടുകള്‍.

ഇത് ഔദ്യോഗിക വിലകളാണെന്നാണ് റിപ്പോര്‍ട്ടില്‍ പറയുന്നതും. അടുത്ത മാസം പകുതിയോടെ ഓരോ ഷേഡും അന്തരാഷ്ട്ര വിപണികളില്‍ വില്‍പ്പനയ്ക്ക് എത്തുകയും ചെയ്യും.

ആധുനിക സാങ്കേതികവിദ്യയും 652 സിസി സിംഗിള്‍-സിലിണ്ടര്‍ DOHC ഫോര്‍-വാല്‍വ് ലിക്വിഡ്-കൂള്‍ഡ് എഞ്ചിനും 45 bhp കരുത്തും 55 Nm പീക്ക് ടോര്‍ക്കും വികസിപ്പിക്കുന്ന ഒരു റെട്രോ-തീം റോഡ്സ്റ്ററാണ് ഇത്.

ഡ്രൈവ് ചെയിന്‍ വലതുവശത്ത് സ്ഥാപിച്ചിരിക്കുന്നു, പവര്‍ട്രെയിന്‍ വികസിപ്പിച്ചത് റോട്ടാക്‌സ് എന്ന ഓസ്ട്രിയന്‍ സ്ഥാപനമാണ്, കൂടാതെ ഓസ്ട്രിയയിലെ പ്രശസ്തമായ ടെക്‌നിക്കല്‍ യൂണിവേഴ്‌സിറ്റി ഓഫ് ഗ്രാസ് എഞ്ചിന്റെ വികസനത്തിന് നിര്‍ണായകമായ പങ്ക് വഹിക്കുകയും ചെയ്തു.

കര്‍ക്കശമായ യൂറോ 5 എമിഷന്‍ ചട്ടങ്ങള്‍ പാലിക്കാന്‍ ഫ്യൂവല്‍ ഇഞ്ചക്ഷന്‍ സിസ്റ്റം സജ്ജീകരിച്ചിരിക്കുന്നു. വിന്റേജ് ഗോള്‍ഡ് സ്റ്റാറിനോട് സാമ്യമുള്ളതാണ് എഞ്ചിന്റെ പുറം രൂപകല്‍പ്പന.

പുതിയ ഗോള്‍ഡ് സ്റ്റാറിന് 166 കിലോമീറ്റര്‍ വേഗതയാണ് അവകാശപ്പെടുന്നത്, ഇത് ഡ്യുവല്‍ ക്രാഡില്‍ ഷാസിയിലാണ് നിര്‍മ്മിച്ചിരിക്കുന്നത്.

41 mm ടെലിസ്‌കോപിക് ഫ്രണ്ട് ഫോര്‍ക്കുകള്‍, ഇരട്ട റിയര്‍ ഷോക്ക് അബ്സോര്‍ബറുകള്‍, പിറെല്ലി ഫാന്റം സ്പോര്‍ട്സ്‌കോംപ് റബ്ബറില്‍ 18 ഇഞ്ച് ഫ്രണ്ട്, 17 ഇഞ്ച് റിയര്‍ വീല്‍ ഷോഡ്, മുന്‍വശത്ത് സിംഗിള്‍ ഡിസ്‌ക്, പിന്നില്‍ ഒരു കോണ്ടിനെന്റല്‍ സോഴ്സ് ഡ്യുവല്‍ എന്നിവയുണ്ട്.

ഡ്യുവല്‍-ചാനല്‍ എബിഎസ് സിസ്റ്റത്തിന്റെ പിന്തുണയും മോട്ടോര്‍സൈക്കിളിന് ലഭിക്കുന്നു. യുണൈറ്റഡ് സ്റ്റേറ്റ്‌സില്‍ എത്തുന്നതിനുമുമ്പ് ആദ്യം യൂറോപ്യന്‍ വിപണികളില്‍ ലഭ്യമാകാനാണ് BSA വില്‍പ്പനയ്ക്ക് എത്തുമെന്നാണ് റിപ്പോര്‍ട്ട്.

കൂടാതെ ഹൈ-എന്‍ഡ് റോയല്‍ എന്‍ഫീല്‍ഡ് 650 സിസി മോട്ടോര്‍സൈക്കിളുകളോട് മത്സരിക്കാന്‍ സമീപഭാവിയില്‍ ഇന്ത്യയെപ്പോലുള്ള വികസ്വര വിപണികളില്‍ പ്രവേശിക്കാന്‍ ഇതിന് കഴിയും.

വൃത്താകൃതിയിലുള്ള ഹെഡ്‌ലൈറ്റ് യൂണിറ്റ്, മസ്‌കുലര്‍ ടിയര്‍ ഡ്രോപ്പ് ആകൃതിയിലുള്ള ഇന്ധന ടാങ്ക്, മിഡില്‍ സെറ്റ് ഫുട്പെഗുകള്‍, സിംഗിള്‍ പീസ് സീറ്റ് സജ്ജീകരണം, സൈഡ് മൗണ്ടഡ് എക്സ്ഹോസ്റ്റ് സിസ്റ്റം, ചങ്കി ഫെന്‍ഡറുകള്‍, സ്പോക്ക് വീലുകള്‍, നേരായ ഹാന്‍ഡില്‍ബാര്‍ എന്നിവയാണ് 2022 BSA ഗോള്‍ഡ് സ്റ്റാറിന്റെ ചില ഡിസൈന്‍ ഹൈലൈറ്റുകള്‍.

ഇന്ത്യയില്‍ പുതിയ BSA ഗോള്‍ഡ് സ്റ്റാര്‍ ലോഞ്ച് നടക്കുമെന്ന പ്രതീക്ഷയിലാണ് ഇരുചക്ര വാഹന പ്രേമികളും വാഹന വിപണിയും, പക്ഷേ രാജ്യത്തേക്കുള്ള ബ്രാന്‍ഡിന്റെ ഔദ്യോഗിക അരങ്ങേറ്റം സംബന്ധിച്ച് നിലവില്‍ സൂചനകള്‍ ഒന്നും തന്നെ ലഭ്യമായിട്ടില്ല.

ഈ മോഡല്‍ ഇന്ത്യന്‍ വിപണിയില്‍ എത്തിയാല്‍ റോയല്‍ എന്‍ഫീല്‍ഡ് ഇന്റര്‍സെപ്റ്റര്‍ 650-യും കോണ്ടിനെന്റ്ല്‍ GT -യും ആയിരിക്കും നേരിട്ടുള്ള എതിരാളികള്‍.

ഇന്ത്യന്‍ വിപണി പോലെ തന്നെ വിദേശ വിപണികളിലും റോയല്‍ എന്‍ഫീല്‍ഡിന് സാന്നിധ്യമുള്ളതിനാല്‍ അവിടങ്ങളിലും 650 ഇരട്ടകള്‍ തന്നെയായിരിക്കും എതിരാളികള്‍ എന്ന് വേണം പറയാന്‍.