യുഗാന്ത്യം! Pulsar 150 നിര്‍ത്തലാക്കി Bajaj; പുതിയ P150 പിന്‍ഗാമിയാകും

ഇന്ത്യയിലെ മോട്ടോര്‍സൈക്കിള്‍ പ്രേമികള്‍ക്ക് ചിരപരിചിതമായ നാമമാണ് ബജാജ് പള്‍സര്‍. മോട്ടോര്‍സൈക്കിള്‍ വിഭാഗത്തില്‍ ബജാജ് ഓട്ടോയെ മുന്‍നിര കമ്പനിയാക്കി മാറ്റുന്നതില്‍ പള്‍സര്‍ 150, പള്‍സര്‍ 180 എന്നീ മോഡലുകള്‍ പ്രധാന പങ്ക് വഹിച്ചിട്ടുണ്ട്. സ്പോര്‍ട്ടി പ്രൊഫൈലിനും കരുത്തുറ്റ പെര്‍ഫോമന്‍സിനും മുന്‍ഗണന നല്‍കിയ ബൈക്കുകള്‍ ചുരുങ്ങിയ കാലത്തിനുള്ളില്‍ ഇന്ത്യന്‍ യുവാക്കളുടെ ഹൃദയത്തില്‍ സ്ഥാനം നേടി.

വര്‍ഷങ്ങളായി ബജാജ് ഓട്ടോ പള്‍സര്‍ ശ്രേണി വിപുലീകരിച്ചു കൊണ്ടിരിക്കുകയാണ്. അതിനാല്‍ തന്നെ മൊത്തത്തിലുള്ള വില്‍പ്പനയില്‍ ഇത് പ്രാഥമിക സംഭാവനയായി തുടരുന്നു. രണ്ട് പതിറ്റാണ്ടിലേറെ നീണ്ട ആവേശകരമായ പ്രയാണത്തിന് ശേഷം പള്‍സര്‍ 150 നിര്‍ത്തലാക്കാന്‍ തീരുമാനം കൈക്കൊണ്ടിരിക്കുകയാണ് ബജാജ്. 2022 നവംബറില്‍ ബജാജ് പള്‍സര്‍ 150-യുടെ പിന്‍ഗാമിയായി പള്‍സര്‍ P150 പുറത്തിറക്കിയതിനാല്‍ അത് അനിവാര്യമായ വിടവാങ്ങലായി മാറിയിരുന്നു. പള്‍സര്‍ 150 നിര്‍ത്തലാക്കുന്നത് ബജാജിന്റെ പള്‍സര്‍ ശ്രേണി നവീകരിക്കാനുള്ള ശ്രമത്തിന്റെ ഭാഗമാണ്.

ആ പദ്ധതിയുടെ ഭാഗമായി, 2022 ഓഗസ്റ്റില്‍ പള്‍സര്‍ 180 അവര്‍ നിര്‍ത്തലാക്കിയിരുന്നു. അതിന് മുമ്പേ 2021-ല്‍ പള്‍സര്‍ 220-യുടെ ഉത്പാദനം നിര്‍ത്തി.1980 കളിലും 90 കളിലും ബജാജ് സ്‌കൂട്ടര്‍ സെഗ്മെന്റിലായിരുന്നു ആധിപത്യം പുലര്‍ത്തിയിരുന്നത്. പിന്നാലെ താങ്ങാനാവുന്ന വിലയിലുള്ള 100 സിസി കമ്മ്യൂട്ടര്‍ ബൈക്കുകള്‍ക്ക് ആവശ്യക്കാര്‍ ഏറി. ഇവ ലഭ്യമായിത്തുടങ്ങിയതോടെ വിപണി അതിവേഗം രൂപാന്തരം ചെയ്യപ്പെട്ടു. ഇവ വേഗതയേറിയതും കൂടുതല്‍ ചടുലവും ഉയര്‍ന്ന ഇന്ധനക്ഷമതയും വാഗ്ദാനം ചെയ്യുന്നവയായിരുന്നു.

ഇത്തരം സംഭവവികാസങ്ങള്‍ മോട്ടോര്‍ സൈക്കിളുകളില്‍ കൂടുതല്‍ ശ്രദ്ധ കേന്ദ്രീകരിക്കാന്‍ ബജാജിനെ പ്രേരിപ്പിച്ചു. ഇത് ഒടുവില്‍ പള്‍സര്‍ 150, പള്‍സര്‍ 180 എന്നിവയുടെ ലോഞ്ചില്‍ കലാശിച്ചു. പള്‍സര്‍ ഇരട്ടകള്‍ അവരുടെ മികച്ച രൂപവും ഭാവവും പെപ്പി പെര്‍ഫോമന്‍സും കൊണ്ട് നിരവധി ഫാന്‍സിനെ സ്വന്തമാക്കി. കാലക്രമേണ, പള്‍സര്‍ 150 നിരവധി മാറ്റങ്ങള്‍ക്കും തലമുറ മാറ്റങ്ങള്‍ക്കും വിധേയമായി. ആദ്യ തലമുറ പള്‍സര്‍ 150 പരമാവധി 12 bhp പവര്‍ ഉത്പാദിപ്പിക്കുകയും ഒപ്പം 5-സ്പീഡ് ഗിയര്‍ബോക്സുമായി ഇണചേരുകയും ചെയ്തു.

2003-ലെ DTS-i ഡിജിറ്റല്‍ ട്വിന്‍ സ്പാര്‍ക്ക് ഇഗ്‌നിഷന്‍ സാങ്കേതികവിദ്യയായിരുന്നു ബൈക്കിന്റെ ഒരു വലിയ അപ്‌ഡേറ്റ്. ഇത് മൊത്തത്തിലുള്ള പെര്‍ഫോമന്‍സ് വര്‍ദ്ധിപ്പിക്കുകയും ഇന്ധനക്ഷമത മെച്ചപ്പെടുത്തുകയും ചെയ്തു. ബജാജ് പള്‍സര്‍ 150-നെ ജനപ്രിയമാക്കിയ മറ്റൊരു സവിശേഷത നൈട്രോക്സ് റിയര്‍ സസ്പെന്‍ഷനാണ്. ഇത് ഒരുപക്ഷേ അക്കാലത്തെ ഏറ്റവും മികച്ച സെഗ്മെന്റ് സവിശേഷതയായിരുന്നു. ഇത് സുഗമമായ റൈഡുകള്‍ ഉറപ്പാക്കുകയും തെരുവുകളിലെ പരുക്കന്‍ പാച്ചുകളെ മറികടക്കാന്‍ പ്രത്യേകിച്ചും ഉപയോഗപ്രദമാവുകയും ചെയ്തു.

നിലവിലെ രൂപത്തില്‍, ബജാജ് പള്‍സര്‍ 150 പരമാവധി 14 bhp പവറും 13.25 Nm പീക്ക് ടോര്‍ക്കും പുറപ്പെടുവിക്കുന്നു. വുള്‍ഫ്-ഐഡ് ഹെഡ്ലാമ്പ്, കാര്‍ബണ്‍ ഫൈബര്‍ ആക്സന്റുകള്‍, ഡാഗര്‍-എഡ്ജ്ഡ് ഗ്രാഫിക്സ് തുടങ്ങിയ സവിശേഷതകളുള്ള ബൈക്ക് മികച്ച സ്ട്രീറ്റ് പ്രസന്‍സ് നല്‍കുന്നു. മുമ്പിലും പിമ്പിലും 17 ഇഞ്ച് വീലുകളാണ് പള്‍സര്‍ 150-ക്ക് നല്‍കിയിരിക്കുന്നത്. കൂടാതെ ABS-മായി സംയോജിപ്പിച്ച് 260 എംഎം വെന്റിലേറ്റഡ് ഫ്രണ്ട് ഡിസ്‌കുമായി വരുന്നു.

ഇതിഹാസങ്ങള്‍ക്ക് പകരക്കാരെ കൊണ്ടു വരുന്നത് പ്രയാസകരമാണെങ്കിലും പള്‍സര്‍ 150-യുടെ പിന്‍ഗാമിയായ പള്‍സര്‍ P150 ഉപഭോക്താക്കള്‍ക്ക് കൈനിറയെ വാഗ്ദാനങ്ങളുമായാണ് എത്തുന്നത്. കൂടുതല്‍ ഷാര്‍പ്പും സ്പോര്‍ട്ടിയറുമായ പ്രൊഫൈല്‍ നേടുന്നതിനായി ഡിസൈന്‍ പൂര്‍ണ്ണമായും പരിഷ്‌ക്കരിച്ചിരിക്കുന്നു. മെലിഞ്ഞ ഹെഡ്ലാമ്പ്, സ്‌കല്‍പ്റ്റഡ് ഫ്യുവല്‍ ടാങ്ക്, മെലിഞ്ഞ വെയ്‌സ്റ്റ്‌ലൈന്‍, അണ്ടര്‍ബെല്ലി എക്സ്ഹോസ്റ്റ്, ക്രിസ്റ്റലിന്‍ എല്‍ഇഡി ടെയില്‍ ലാമ്പ് എന്നിവ ചില പ്രധാന ഹൈലൈറ്റുകളില്‍ ഉള്‍പ്പെടുന്നു. ആവേശകരമായ സിംഗിള്‍-ടോണ്‍, ഡ്യുവല്‍-ടോണ്‍ കളര്‍ ഓപ്ഷനുകളില്‍ ബൈക്ക് ലഭ്യമാണ്.

നിര്‍ത്തലാക്കുന്ന മോഡലിനേക്കാള്‍ 10 കിലോഗ്രാം ഭാരം കുറവായതിനാല്‍, പവര്‍-വെയ്റ്റ് അനുപാതം ഇപ്പോള്‍ കൂടുതലാണ്. പള്‍സര്‍ P150-ലെ പുതിയ പരിഷ്‌കരിച്ച എഞ്ചിന്‍ 14.5 bhp കരുത്തും 13.5 Nm ടോര്‍ക്കും ഉത്പാദിപ്പിക്കുന്നു. ടോര്‍ക്ക് ലഭ്യത, സുഗമമായ ഗിയര്‍ ഷിഫ്റ്റ് , ശബ്ദവും വൈബ്രേഷനും കുറയ്ക്കല്‍ എന്നിവയിലുടനീളം മെച്ചപ്പെടുത്തലുകള്‍ വരുത്തിയിട്ടുണ്ട്. പള്‍സര്‍ P150-ക്ക് അഡ്വാന്‍സ്ഡ് മോണോഷോക്ക് റിയര്‍ സസ്‌പെന്‍ഷന്‍ ഉള്ളതിനാല്‍ ഉപയോക്താക്കള്‍ക്ക് മികച്ച റൈഡ് നിലവാരം പ്രതീക്ഷിക്കാം. ഈ അപ്ഡേറ്റുകളെല്ലാം പള്‍സര്‍ 150-ല്‍ നിന്ന് ബാറ്റണ്‍ ഏറ്റെടുക്കാന്‍ P150 തയ്യാറാക്കിയിട്ടുണ്ട്. ഏതായാലും പള്‍സര്‍ 150 യുടെ പാരമ്പര്യം പിന്‍ഗാമി നിലനിര്‍ത്തുമോ എന്നത് നമുക്ക് കാത്തിരുന്ന് കാണാം.