പുതിയ ഫീച്ചറുകളും, കളർ ഓപ്ഷനും; Duke 790 തിരികെയെത്തിക്കാനൊരുങ്ങി KTM

2019-ൽ ബൈക്ക് ഇന്ത്യയിൽ വിൽപ്പനയ്ക്ക് എത്തിയെങ്കിലും, 2020-ന്റെ തുടക്കത്തിൽ ബിഎസ് VI മലിനീകരണ മാനദണ്ഡങ്ങൾ പാലിക്കുന്നില്ല എന്ന് വന്നതോടെ കമ്പനി രാജ്യത്ത് നിന്ന് പിൻവലിക്കുകയും ചെയ്തു. ഇപ്പോൾ, ആഗോള വിപണിയിൽ ഡ്യൂക്ക് 790 വീണ്ടും അവതരിപ്പിക്കാൻ ഒരുങ്ങുകയാണ് കെടിഎം.

കെടിഎം ഡ്യൂക്ക് 790 പുതിയ മോഡൽ ഏറെക്കുറെ മുമ്പത്തേതിന് സമാനമാണെന്ന് വേണം പറയാൻ. യഥാർത്ഥ ലോഞ്ച് സമയത്ത് മാത്രമാകും ബൈക്കിൽ വരുത്തിയിരിക്കുന്ന പ്രധാന മാറ്റങ്ങൾ വ്യക്തമാകുക.

കൂടാതെ മിക്ക ഫീച്ചറുകളിലും മാറ്റം പ്രതീക്ഷിക്കാം. പുതിയ ഗ്രേ-ബ്ലാക്ക് കളർ ഓപ്ഷൻ ഒഴികെ സ്‌റ്റൈലിംഗിന്റെ കാര്യത്തിൽ വലിയ അപ്ഡേറ്റുകളൊന്നുമില്ല. സിഗ്‌നേച്ചർ ഓറഞ്ച് കളർ തീമിന് പുറമേയാണിതെന്നും കമ്പനി വ്യക്തമാക്കുന്നു.

ഇന്റഗ്രേറ്റഡ് എൽഇഡി ഡിആർഎല്ലോടുകൂടിയ അഗ്രസീവ് എൽഇഡി ഹെഡ്‌ലാമ്പ്, സ്‌കൾപ്റ്റഡ് ഫ്യുവൽ ടാങ്ക്, ലോ-സെറ്റ് ഹാൻഡിൽബാർ, സ്റ്റെപ്പ്-അപ്പ് സീറ്റ്, സ്റ്റെയിൻലെസ് സ്റ്റീൽ ഫിനിഷിലുള്ള സീറ്റിന് താഴെയുള്ള എക്സ്ഹോസ്റ്റ്, കോംപാക്റ്റ് ടെയിൽ സെക്ഷൻ എന്നിങ്ങനെയുള്ള സവിശേഷതകളോടെ ബൈക്ക് അതിന്റെ സ്പോർട്ടി പ്രൊഫൈൽ നിലനിർത്തുന്നു.

എക്സ്ഹോസ്റ്റിന്റെ ആകർഷകമായ ശബ്ദം, മൊത്തത്തിലുള്ള റൈഡ് അനുഭവം വർദ്ധിപ്പിക്കുകയും ചെയ്യുന്നു. 2022 കെടിഎം ഡ്യൂക്ക് 790-ന് ഒരു പൂർണ്ണ കളർ TFT ഇൻസ്ട്രുമെന്റ് കൺസോളാണ് ലഭിക്കുന്നത്. അത് വിവിധ വിവരങ്ങളുടെ ഒരു ശ്രേണി തന്നെ പ്രദർശിപ്പിക്കുന്നു.

സ്‌ക്രീൻ കൂടുതൽ സംവേദനാത്മകമാണ്, കാരണം ത്രോട്ടിലിലും മറ്റ് സമാന പ്രവർത്തനങ്ങളിലും വർദ്ധനവ്/കുറവ് എന്നിവയ്ക്കൊപ്പം നിറം മാറുകയും ചെയ്യുന്നു. എല്ലാ സമയത്തും ഒപ്റ്റിമൽ ദൃശ്യപരത ഉറപ്പാക്കിക്കൊണ്ട്, ആംബിയന്റ് ലൈറ്റിംഗിലേക്ക് ഡിസ്‌പ്ലേ സ്വയമേവ ക്രമീകരിക്കുന്നു.

ഇലക്ട്രോണിക് റൈഡിംഗ് എയ്ഡ്‌സ്, ട്രാക്ഷൻ കൺട്രോൾ, എഞ്ചിൻ ഡ്രാഗ് ടോർക്ക് കൺട്രോൾ, സൂപ്പർമോട്ടോ മോഡ്, എബിഎസ് ഉപയോഗിച്ച് സ്റ്റെബിലിറ്റി കൺട്രോൾ തുടങ്ങിയ ഒറിജിനൽ ഉപകരണങ്ങളുടെ പട്ടികയിൽ ഭൂരിഭാഗവും നിലനിർത്തിയിട്ടുണ്ട്.

സ്പോർട്, സ്ട്രീറ്റ്, റെയിൻ, ട്രാക്ക് എന്നിങ്ങനെയുള്ള ഡ്രൈവിംഗ് മോഡുകളാണ് ബൈക്കിലുള്ളത്. ക്രൂയിസ് കൺട്രോൾ, ടയർ പ്രഷർ മോണിറ്ററിംഗ് സിസ്റ്റം, ക്വിക്ക്ഷിഫ്റ്റർ+, ട്രാക്ക് മോഡ്, എഞ്ചിൻ സ്ലിപ്പ് കൺട്രോൾ, ഫോൺ, മ്യൂസിക് കണക്റ്റിവിറ്റി എന്നിവ ഇപ്പോൾ ഓപ്ഷനായി വാഗ്ദാനം ചെയ്യുന്ന ഫീച്ചറുകളിൽ ഉൾപ്പെടുന്നു.

മുമ്പത്തെ അതേ 799 സിസി എഞ്ചിനാണ് ബൈക്കിന് കരുത്തേകുന്നത്. LC8c ഇൻ-ലൈൻ 2-സിലിണ്ടർ, ലിക്വിഡ് കൂൾഡ് മോട്ടോർ 105 bhp പരമാവധി കരുത്തും 87 Nm പീക്ക് ടോർക്കും സൃഷ്ടിക്കുന്നു.

ഇത് 6-സ്പീഡ് ഗിയർബോക്‌സുമായി ഘടിപ്പിച്ചിരിക്കുന്നു. ഈ എഞ്ചിൻ ഇപ്പോൾ യൂറോ 5 എമിഷൻ മാനദണ്ഡങ്ങൾ പാലിക്കുന്നു എന്നതാണ് ഒരേയൊരു വ്യത്യാസം. യൂറോപ്പിൽ, A2 നിർദ്ദിഷ്ട 95 bhp വേരിയന്റും ഓഫർ ചെയ്യും.

ഒരു നൂതന റൈഡ്-ബൈ-വയർ സംവിധാനമാണ് പവർട്രെയിൻ നിയന്ത്രിക്കുന്നത്, റൈഡ് ഡൈനാമിക്സിനെ ഗണ്യമായി വർദ്ധിപ്പിക്കുന്നു. ഇത് ജെർക്കിംഗ്, ഇടർച്ച, അനാവശ്യ വീലികൾ തുടങ്ങിയ പ്രശ്‌നങ്ങൾ ഇല്ലാതാക്കുന്നുവെന്നും റിപ്പോർട്ടിൽ പറയുന്നു. ഭാരം കുറഞ്ഞ ബോഡിയുമായി ചേർന്ന്, ബൈക്ക് മെച്ചപ്പെട്ട ഇന്ധനക്ഷമതയും വാഗ്ദാനം ചെയ്യുന്നു.

കെടിഎം ഡ്യൂക്ക് 790 ഇന്ത്യൻ വിപണിയിൽ വീണ്ടും അവതരിപ്പിക്കുമോ എന്ന് ഉറപ്പില്ല. ഇത് നേരത്തെ ഇവിടെ ലഭ്യമായിരുന്നു, എന്നാൽ 2020-ൽ കർശനമായ ബിഎസ് VI മലിനീകരണ മാനദണ്ഡങ്ങൾ കാരണം നിർത്തലാക്കുകയായിരുന്നു.

പുനരാരംഭിച്ച മോഡൽ ഇപ്പോൾ യൂറോ 5, അതായത് BS VI-ന് സമാനമാണ്. ഈ ബൈക്ക് ഇന്ത്യയിൽ CKD ആയി ഇറക്കുമതി ചെയ്തു, അവസാനമായി വിൽപ്പനയ്ക്ക് എത്തിയ മോഡലിന് 8.64 ലക്ഷം രൂപയായിരുന്നു എക്‌സ്‌ഷോറൂം വില. ഡ്യൂക്ക് 890 ഇന്ത്യയിൽ അവതരിപ്പിക്കാനുള്ള ഓപ്ഷനും കെടിഎമ്മിനുണ്ട്. ഏത് സമീപനമാണ് കമ്പനി തിരഞ്ഞെടുക്കുന്നതെന്ന് കണ്ടറിയണം.

അതേസമയം അധികം വൈകാതെ തന്നെ പുതുതലമുറ RC390 അഡ്വഞ്ചറിനെ ഇന്ത്യയില്‍ അവതരിപ്പിക്കാനൊരുങ്ങുകയാണ് നിര്‍മാതാക്കളായ കെടിഎം. ഇതിന്റെ ഭാഗമായി മോട്ടോര്‍സൈക്കിളിനെ അടുത്തിടെ കമ്പനി ഇന്ത്യന്‍ വെബ്സൈറ്റില്‍ ഉള്‍പ്പെടുത്തുകയും ചെയ്തത് വാര്‍ത്തകളില്‍ നിറഞ്ഞിരുന്നു. മാര്‍ച്ച് അവസാനത്തോടെ ഈ മോഡല്‍ വിപണിയില്‍ എത്തുമെന്നാണ് റിപ്പോര്‍ട്ട്. ചില ഡീലര്‍ഷിപ്പുകള്‍ മോട്ടോര്‍സൈക്കിളിനായി അനൗദ്യോഗിക ബുക്കിംഗും ആരംഭിച്ചിട്ടുണ്ട്.