50 വര്‍ഷം മുമ്പ് വില 2000 രൂപ; ഐതിഹാസിക ടൂവീലര്‍ ഇലക്ട്രിക് അവതാരത്തില്‍ തിരിച്ചെത്തുന്നു

1970 കളില്‍ അര്‍ബന്‍ ഇന്ത്യയ്ക്ക് ചിറകു നല്‍കിയ രാജ്യത്തെ പ്രമുഖ ബ്രാന്‍ഡായ ലൂണ ഇലക്ട്രിക് വേഷമണിഞ്ഞ് തിരിച്ചു വരാന്‍ പോകുകയാണ്. ഒരു കാലത്ത് ഇന്ത്യയിലെ ജനപ്രിയ ഇരുചക്രവാഹന ബ്രാന്‍ഡുകളായിരുന്ന ചേതകിന്റെയും ലാംബ്രട്ടയുടെയും പാത പിന്തുടര്‍ന്നാണ് ലൂണയും റീഎന്‍ട്രിക്കൊരുങ്ങുന്നത്. തങ്ങളുടെ റെട്രോ ഡിസൈനിന്റെ ഒരു ഭാഗം നിലനിര്‍ത്തി ആധുനിക ഇലക്ട്രിക് പതിപ്പിലാണ് തിരിച്ചെത്തുന്നത്.

വരാനിരിക്കുന്ന കൈനറ്റിക് ഇ-ലൂണയുടെ ഷാസിയുടെയും മറ്റ് ഘടകങ്ങളുടെയും നിര്‍മ്മാണം ആരംഭിച്ചതായി കൈനറ്റിക് എഞ്ചിനീയറിംഗ് ലിമിറ്റഡ് (കെഇഎല്‍) അറിയിച്ചു. ബ്രാന്‍ഡിന്റെ ഐക്കണിക് ലൂണ മോപ്പഡിന്റെ ഇലക്ട്രിക് ആവര്‍ത്തനം കൈനറ്റിക് ഗ്രീന്‍ ബ്രാന്‍ഡിന് കീഴില്‍ വിപണിയിലെത്തും. ഏതാനും മാസങ്ങള്‍ക്കുള്ളില്‍ ലൂണയുടെ ഇലക്ട്രിക് പതിപ്പിന്റെ അരങ്ങേറ്റം പ്രതീക്ഷിക്കുന്നു. കൈനറ്റിക് ഗ്രൂപ്പ് പദ്ധതി ആരംഭിച്ചതായി പ്രഖ്യാപിച്ച് ഒരു വര്‍ഷത്തിന് ശേഷമാണ് ഇലക്ട്രിക് ഇരുചക്രവാഹനത്തിനുള്ള ഘടകങ്ങളുടെ ഉല്‍പ്പാദന പ്രഖ്യാപനം വരുന്നത്.

മെയിന്‍ ഷാസി, മെയിന്‍ സ്റ്റാന്‍ഡ്, സൈഡ് സ്റ്റാന്‍ഡ്, സ്വിംഗ് ആം ഇന്‍ ഹൗസ് എന്നിവയുള്‍പ്പെടെ ഇ-ലൂണയ്ക്കായി എല്ലാ പ്രധാന സബ് അസംബ്ലികളും വികസിപ്പിച്ചതായി കൈനറ്റിക് എഞ്ചിനീയറിംഗ് പറയുന്നു. പ്രതിമാസം 5,000 സെറ്റുകള്‍ പുറത്തിറക്കാനുള്ള പദ്ധതികളോടെ ഒരു സമര്‍പ്പിത പ്രൊഡക്ഷന്‍ ലൈനും കമ്പനി സ്ഥാപിച്ചിട്ടുണ്ട്. മോഡലിന്റെ നിര്‍മ്മാണത്തിനും അസംബ്ലിക്കും പിന്തുണ നല്‍കുന്നതിനായി അഹമ്മദ്നഗര്‍ പ്ലാന്റിലെ പെയിന്റ്, പ്രസ്, ഫാബ്രിക്കേഷന്‍ ഷോപ്പുകള്‍ എന്നിവ നവീകരിക്കാന്‍ മൂന്ന് കോടിയിലധികം രൂപ നിക്ഷേപിച്ചതായി കെഇഎല്‍ പറയുന്നു.

'ഇതിഹാസമായ ലൂണ അതിന്റെ ഇ-അവതാറില്‍ തിരിച്ചെത്തുന്നത് അതിശയകരമാണ്. എല്ലാ പ്രധാന സബ് അസംബ്ലികളും ഒരേപോലെ നിര്‍മ്മിക്കുന്നതിലും ഈ പൈതൃകത്തിന്റെ ഭാഗമാകുന്നതിലും ഞങ്ങള്‍ വളരെ അഭിമാനിക്കുന്നു. അതിന്റെ പ്രതാപകാലത്ത് പ്രതിദിനം 2000-ത്തിന് മുകളില്‍ യൂണിറ്റുകള്‍ വിറ്റു. പുതിയ അവതാരത്തില്‍ ലൂണ വളരെ മികച്ച പ്രകടനം കാഴ്ചവെക്കുമെന്ന് എനിക്ക് ഉറപ്പുണ്ട്. ഇ-ലൂണയുടെ അളവ് കൂടുന്നതിനനുസരിച്ച് അടുത്ത 2-3 വര്‍ഷത്തിനുള്ളില്‍ ഈ ബിസിനസ്സ് പ്രതിവര്‍ഷം 30 കോടി രൂപ അധികമാകുമെന്ന് ഞങ്ങള്‍ പ്രതീക്ഷിക്കുന്നു' കൈനറ്റിക് എഞ്ചിനീയറിംഗ് ലിമിറ്റഡിന്റെ എംഡി അജിങ്ക്യ ഫിറോദിയ പറഞ്ഞു.

കഴിഞ്ഞ 12 മാസത്തിനിടെ വിപ്ലവാത്മകമായ വളര്‍ച്ചയ്ക്ക് സാക്ഷ്യം വഹിച്ച ഇലക്ട്രിക് ടു, ത്രീ-വീലറുകള്‍ക്കായുള്ള എല്ലാ പ്രധാന മെക്കാനിക്കല്‍ സബ് അസംബ്ലികളുടെയും ഏകജാലക സംവിധാനമായി കെഇഎല്‍ ഉയര്‍ന്നുവരുന്നുവെന്ന് അവര്‍ പറഞ്ഞു. ഏകദേശം 50 വര്‍ഷങ്ങള്‍ക്ക് മുമ്പ് ലൂണ ലോഞ്ച് ചെയ്യുമ്പോള്‍ 2,000 രൂപയായിരുന്നു വില. അത് അക്കാലത്ത് ഇന്ത്യയിലേക്കുള്ള ഏറ്റവും കാര്യക്ഷമവും താങ്ങാവുന്നതും സൗകര്യപ്രദവുമായ വാഹനങ്ങളില്‍ ഒന്നായി മാറുകയും ചെയ്തു.
അക്കാലത്തെ ജനപ്രിയ മോപെഡ് ആയി മാറിയ ലൂണ പ്രതിദിനം 2,000 വാഹനങ്ങള്‍ വരെ വിറ്റിരുന്നു.

സെഗ്‌മെന്റ് ലീഡേഴ്‌സ് ആയിരുന്ന സമയത്ത് 95 ശതമാനം വിപണി വിഹിതം നേടുകയും ചെയ്തു. ഇലക്ട്രിക് ഇരുചക്രവാഹനത്തിന്റെ ലോഞ്ച് അടുത്തുവരുമ്പോള്‍ ഇ-ലൂണയെക്കുറിച്ചുള്ള കൂടുതല്‍ വിശദാംശങ്ങള്‍ പുറത്തുവരുമെന്നാണ് പ്രതീക്ഷ. 1980-കളിലെ ഇന്ത്യയിലെ അറിയപ്പെടുന്ന മോപ്പഡുകളിലൊന്നായിരുന്ന ലൂണയുടെ വൈദ്യുത പതിപ്പിന്റെ സ്‌പെസിഫിക്കേഷനുകള്‍, റേഞ്ച്, പവര്‍ തുടങ്ങിയ മറ്റ് വിശദാംശങ്ങള്‍ അറിയില്ല. ഇ-ലൂണ താങ്ങാനാവുന്നതും സൗകര്യപ്രദവും ഭാരം കുറഞ്ഞതുമായ മോഡലായിരിക്കുമെന്നും ഇത് ഒരു മോപ്പഡിന്റെ ആധുനികവും ശൈലിയിലുള്ളതുമായ പതിപ്പായിരിക്കുമെന്നും ലൂണയെ നിര്‍വചിച്ച അതേ മൂല്യങ്ങള്‍ തങ്ങള്‍ നിലനിര്‍ത്തിയിട്ടുണ്ടെന്നും തിരിച്ചു വരവ് പ്രഖ്യാപന വേളയില്‍ കൈനറ്റിക് ഗ്രീന്‍ എനര്‍ജി സ്ഥാപകയും സിഇഒയുമായ സുലജ്ജ ഫിറോഡിയ മോട്‌വാനി വ്യക്തമാക്കിയിരുന്നു.

അതിവേഗം വികസിച്ചുകൊണ്ടിരിക്കുന്ന ഇ-കൊമേഴ്സ് ഡെലിവറി വിഭാഗത്തെയായിരിക്കും ഇ-ലൂണ ലക്ഷ്യം വെക്കുന്നത്. ഡെലിവറി ആവശ്യങ്ങള്‍ കൂടി വരുന്ന സാഹചര്യത്തില്‍ ഈ സ്‌പേസില്‍ എളുപ്പം കയറിച്ചെല്ലാമെന്നാണ് അവരുടെ വിശ്വാസം. അടുത്ത കാലത്തായി ജാവ, യെസ്ഡി, വെസ്പ, ചേതക് എന്നിങ്ങനെ മിക്ക പഴയ ബ്രാന്‍ഡുകളും പുതിയ സാങ്കേതികവിദ്യയും സ്റ്റൈലിംഗും ഉപയോഗിച്ച് പൂര്‍ണ്ണമായ മേക്ക് ഓവര്‍ നേടിയിട്ടുണ്ട്. 2014-ല്‍ മഹീന്ദ്ര ആന്‍ഡ് മഹീന്ദ്രയുമായുള്ള പങ്കാളിത്തം അവസാനിപ്പിച്ചതിന് ശേഷം ഒഴിഞ്ഞ് കിടക്കുന്ന വിഭാഗത്തില്‍ ശക്തമായ തിരിച്ചുവരവ് നടത്താന്‍ കൈനറ്റിക് പദ്ധതി തയാറാക്കുന്ന മൂന്ന് ഇ ടൂ-വീലര്‍ ബ്രാന്‍ഡുകളില്‍ ഒന്നാണ് ഇ-ലൂണ.

കെനറ്റിക് ഗ്രീന്‍ ബ്രാന്‍ഡിന് കീഴില്‍ ഒരു വര്‍ഷമായി ഒരു ലോ സ്പീഡ് ഇലക്ട്രിക് സ്‌കൂട്ടര്‍ കമ്പനി വില്‍ക്കുന്നുണ്ട്. ഇന്ത്യയില്‍ ഇന്ന് ഇലക്ട്രിക് ഇരുചക്ര വാഹനങ്ങള്‍ക്ക് വര്‍ധിച്ച് വരുന്ന ഡിമാന്‍ഡ് ഉപയോഗപ്പെടുത്തി നേട്ടം കൊയ്യാനുള്ള പദ്ധതിയിലാണ് കൈനറ്റിക്. കൈനറ്റിക് ഗ്രീന്‍ അതിന്റെ ഇരുചക്ര വാഹന ബിസിനസില്‍ 50 കോടി രൂപയുടെ പ്രാരംഭ നിക്ഷേപം നടത്തിയിട്ടുണ്ട്. അടുത്ത നാല് വര്‍ഷത്തിനുള്ളില്‍ 400 കോടിയിലധികം നിക്ഷേപിക്കാന്‍ പദ്ധതിയിടുന്നു.