പ്രത്യേകതകള്‍ ഒരുപാടുണ്ട്, അധികം വിലയുമില്ല; Buddie 25 ഇവി അവതരിപ്പിച്ച് Revamp Moto

മെറ്റാവേഴ്‌സില്‍ ആദ്യമായി ട്രാന്‍സ്‌ഫോമബിള്‍ ഇവി അവതരിപ്പിച്ച് നാസിക് ആസ്ഥാനമായുള്ള ഇലക്ട്രിക് വാഹന സ്റ്റാര്‍ട്ടപ്പായ റീവാമ്പ് മോട്ടോ. RM ബഡ്ഡി 25 എന്ന പേരിലാണ് ഇലക്ട്രിക് മോഡല്‍ അവതരിപ്പിച്ചിരിക്കുന്നത്. ഇന്ത്യയില്‍ 66,999 രൂപ എക്സ്ഷോറൂം പ്രാരംഭ വിലയിലാണ് ഇലക്ട്രിക് വാഹനം അവതരിപ്പിച്ചിരിക്കുന്നത്.

999 രൂപ ടോക്കണ്‍ തുകയ്ക്ക് കമ്പനിയുടെ ഔദ്യോഗിക വെബ്സൈറ്റില്‍ ഇതിനുള്ള ബുക്കിംഗ് ഓണ്‍ലൈനായി ആരംഭിച്ചുവെന്നും കമ്പനി പറയുന്നു. RM ബഡ്ഡി 25 ഇവിയില്‍ 48V, 25Ah ലിഥിയം-അയണ്‍ ബാറ്ററി പായ്ക്കാണ് കമ്പനി സജ്ജീകരിച്ചിരിക്കുന്നത്. ഒറ്റ ചാര്‍ജില്‍ 70 കിലോമീറ്റര്‍ റൈഡിംഗ് റേഞ്ച് വാഗ്ദാനം ചെയ്യുമെന്നും നിര്‍മാതാക്കള്‍ അവകാശപ്പെടുന്നു. ഇതിന് 25 കിലോമീറ്റര്‍ വേഗതയുണ്ട്, അതിനാല്‍ രജിസ്‌ട്രേഷനോ ലൈസന്‍സോ ആവശ്യമില്ല.

ഈ ഇലക്ട്രിക് മോഡല്‍ 2 മണിക്കൂറും 45 മിനിറ്റും കൊണ്ട് 0 മുതല്‍ 100 ശതമാനം വരെ പൂര്‍ണ്ണമായി ചാര്‍ജ് ചെയ്യാനും സാധിക്കും. റീവാമ്പ് മോട്ടോ അവകാശപ്പെടുന്നത് ബഡ്ഡി 25 പൂര്‍ണ്ണമായും രാജ്യത്തിനുള്ളില്‍ തന്നെ നിര്‍മ്മിച്ചതാണെന്നും ഇത് മഹാരാഷ്ട്രയിലെ താനെയിലുള്ള കമ്പനിയുടെ സ്ഥാപനത്തില്‍ നിര്‍മ്മിക്കുമെന്നും അവകാശപ്പെടുന്നു. അതിന്റെ വിവിധ ഫിനാന്‍സിംഗ് പങ്കാളികളിലൂടെ, റീവാമ്പ് നോ കോസ്റ്റ് ഇഎംഐ, ഇന്‍സ്റ്റന്റ് ലോണുകള്‍ തുടങ്ങിയ ഫിനാന്‍സിംഗ് ഓപ്ഷനുകള്‍ വാഗ്ദാനം ചെയ്യുന്നു.

ഇതിന്റെ ഡെലിവറികള്‍ 2023 ഏപ്രിലില്‍ ആരംഭിക്കുമെന്നാണ് പ്രതീക്ഷിക്കുന്നതെന്നും റിപ്പോര്‍ട്ടില്‍ പറയുന്നു. എന്നാല്‍ ഇത് സംബന്ധിച്ച് കമ്പനി ഒരു ഔദ്യോഗിക അറിയിപ്പും നല്‍കിയിട്ടില്ല. ''ദീര്‍ഘവും കഠിനവുമായ യാത്രയ്ക്ക് ശേഷം, ഇന്ത്യയിലെ ആദ്യത്തെ ട്രാന്‍സ്‌ഫോമബിള്‍ ആയിട്ടുള്ള ഇവി, RM ബഡ്ഡി 25 അവതരിപ്പിക്കുന്നതില്‍ റീവാമ്പ് അഭിമാനിക്കുന്നുവെന്ന് ലോഞ്ചിനെക്കുറിച്ച് സംസാരിച്ച റിവാമ്പ് മോട്ടോയുടെ സ്ഥാപകനും സിഇഒയുമായ പ്രതേഷ് മഹാജന്‍ പറഞ്ഞു. അറ്റാച്ച്മെന്റുകളുള്ള മോഡുലാര്‍ യൂട്ടിലിറ്റി പ്ലാറ്റ്ഫോമിലാണ് ബഡ്ഡി നിര്‍മ്മിച്ചിരിക്കുന്നത്. ഇന്‍സുലേറ്റഡ് ബോക്‌സ്, കാരിയര്‍, സാഡില്‍ ബാഗുകള്‍ എന്നിവയും മറ്റും 30 സെക്കന്‍ഡിനുള്ളില്‍ ആവശ്യാനുസരണം മാറ്റാനാകുമെന്നതും ഇതിന്റെ സവിശേഷതയാണ്.

അതേസമയം രാജ്യത്ത് ഇലക്ട്രിക് വാഹനങ്ങളുടെ ആവശ്യകത നാള്‍ക്കുനാള്‍ വര്‍ദ്ധിക്കുകയാണെന്നും റിപ്പോര്‍ട്ടുകള്‍ പറയുന്നു. ഇന്ത്യയില്‍ ഇതിനകം 1.8 ദശലക്ഷത്തിലധികം ഇലക്ട്രിക് വാഹനങ്ങള്‍ രജിസ്റ്റര്‍ ചെയ്തിട്ടുണ്ടെന്ന് കേന്ദ്ര സര്‍ക്കാര്‍ റോഡ് ഗതാഗത, ഹൈവേ മന്ത്രി നിതിന്‍ ഗഡ്കരി പറഞ്ഞു. ആന്തരിക ജ്വലന എഞ്ചിന്‍ വാഹനങ്ങളില്‍ നിന്ന് ഇലക്ട്രിക് വാഹനങ്ങളിലേക്കുള്ള പരിവര്‍ത്തനത്തില്‍ ഇന്ത്യ ഒരു സ്പീഡ് ബോട്ടിലാണെന്നും, ഇലക്ട്രിക് ഇരുചക്ര വാഹനങ്ങളും ഇലക്ട്രിക് വാണിജ്യ വാഹനവും ഇന്ത്യയില്‍ ഇവി വിപ്ലവത്തിന് നേതൃത്വം നല്‍കുന്നുവെന്നും അദ്ദേഹം പറഞ്ഞു.

സമീപകാല ഗവേഷണമനുസരിച്ച്, ഇന്ത്യയ്ക്ക് അതിന്റെ ലാസ്റ്റ് മൈല്‍ ഡെലിവറി, മൊബിലിറ്റി ഫ്‌ലീറ്റ് എന്നിവ ഇലക്ട്രിക് വാഹനങ്ങളിലേക്ക് മാറ്റാന്‍ കഴിഞ്ഞാല്‍ അത് അതിന്റെ നെറ്റ് സീറോ കാര്‍ബണ്‍ എമിഷന്‍ ലക്ഷ്യം കൈവരിക്കും. കൂടുതല്‍ സുസ്ഥിരമായ ആവാസവ്യവസ്ഥ കെട്ടിപ്പടുക്കുന്നതിന് ഫോസില്‍ അധിഷ്ഠിത ഇന്ധനങ്ങളെ ആശ്രയിക്കുന്നത് കുറയ്ക്കുന്നതിനും ഇലക്ട്രിക് വാഹനങ്ങള്‍ സ്വീകരിക്കുന്നതിനും ഇന്ത്യന്‍ സര്‍ക്കാര്‍ സജീവമായി പ്രോത്സാഹിപ്പിക്കുന്നുവെന്നും റിപ്പോര്‍ട്ടുകള്‍ പറയുന്നു.

ഇന്ത്യയില്‍ 1.8 ദശലക്ഷം (18 ലക്ഷം) ഇലക്ട്രിക് വാഹനങ്ങള്‍ രജിസ്റ്റര്‍ ചെയ്തിട്ടുണ്ടെന്നും ഡല്‍ഹി, ഉത്തര്‍പ്രദേശ്, മഹാരാഷ്ട്ര എന്നിവ ഇവി വില്‍പ്പനയില്‍ മുന്നില്‍ നില്‍ക്കുന്നുണ്ടെന്നും നിതിന്‍ ഗഡ്കരി പ്രസ്താവിച്ചു. ഉത്തര്‍പ്രദേശില്‍ 4,14,978, ഡല്‍ഹിയില്‍ 1,83,74, മഹാരാഷ്ട്രയില്‍ 1,79,087 എന്നിങ്ങനെയാണ് ഏറ്റവും കൂടുതല്‍ ഇവികള്‍ രജിസ്റ്റര്‍ ചെയ്തിരിക്കുന്നതെന്ന് അദ്ദേഹം പറഞ്ഞു. പരമാവധി പ്രവര്‍ത്തനക്ഷമമായ പബ്ലിക് ഇവി ചാര്‍ജിംഗ് സ്റ്റേഷനുകള്‍ (PCS) മഹാരാഷ്ട്രയില്‍ 660 ഉം, ഡല്‍ഹിയില്‍ 539 ഉം തമിഴ്നാട്ടില്‍ 439 ഉം, മൊത്തം 5,151 പൊതു ഇവി ചാര്‍ജിംഗ് സ്റ്റേഷനുകള്‍ രാജ്യത്ത് പ്രവര്‍ത്തനക്ഷമമാണെന്നും അദ്ദേഹം കൂട്ടിച്ചേര്‍ത്തു.

വരും വര്‍ഷങ്ങളില്‍ ഇലക്ട്രിക് വാഹനങ്ങളുടെ വില കുറയുമെന്നും അദ്ദേഹം പറഞ്ഞു. ഇലക്ട്രിക് വാഹനങ്ങള്‍ക്ക് പെട്രോള്‍ മോഡലുകളുടെ അതേ വിലയില്‍ വിപണിയില്‍ നിന്നും ലഭ്യമാകുമെന്നും അദ്ദേഹം കൂട്ടിച്ചേര്‍ത്തു. ഒരു ഇലക്ട്രിക് കാറിന്റെയോ സ്‌കൂട്ടറിന്റെയോ വില പെട്രോളില്‍ പ്രവര്‍ത്തിക്കുന്ന തത്തുല്യമായ വിലയ്ക്ക് തുല്യമാകുമെന്ന് അദ്ദേഹം വ്യക്തമാക്കി. ബാറ്ററികള്‍ക്കായി സിങ്ക്-അയോണ്‍, സോഡിയം-അയണ്‍, അലുമിനിയം-അയണ്‍ എന്നിവയുടെ കൂടുതല്‍ സാമ്പത്തികമായി വികസിപ്പിച്ച പദ്ധതികള്‍ വഴിയാകും ഇത് നടപ്പിലാകുക, ലിഥിയം-അയണ്‍ ബാറ്ററികളുടെ വില സാവധാനത്തില്‍ കുറയുന്നുണ്ടെന്നും അദ്ദേഹം പറഞ്ഞു.

ഇതിനുപുറമെ, ഫ്‌ലെക്‌സ്-ഇന്ധനം പോലെയുള്ള ചെലവ് കുറഞ്ഞ തദ്ദേശീയ ഇന്ധന ഓപ്ഷനുകള്‍ അംഗീകരിക്കുന്നതിന് കൂടുതല്‍ പ്രോത്സാഹനം ആവശ്യമാണെന്നും ഗഡ്കരി പറഞ്ഞു. വാഹനങ്ങളുടെ പുറന്തള്ളല്‍ മെച്ചപ്പെടുത്തുന്നതിനും വായു മലിനീകരണം തടയുന്നതിനുമായി ഫ്‌ലെക്‌സ്-ഇന്ധനം പോലുള്ള പ്യുവര്‍ ഇന്ധന ബദലുകള്‍ വേഗത്തില്‍ സ്വീകരിക്കാന്‍ സര്‍ക്കാര്‍ പ്രവര്‍ത്തിക്കുന്നുണ്ടെന്ന് അദ്ദേഹം മുമ്പ് സൂചിപ്പിച്ചിരുന്നു. ഡല്‍ഹി പോലുള്ള ഉത്തരേന്ത്യന്‍ നഗരങ്ങളില്‍ ഇതിന് കൂടുതല്‍ പ്രാധാന്യമുണ്ട്, അവിടെ വായു മലിനീകരണ തോത് ഭയാനകമായ തലത്തിലെത്തിയിരിക്കുന്നു. അത്തരം സാഹചര്യങ്ങള്‍ കൂടുതല്‍ ഒഴിവാക്കുന്നതിനാണ് ഇത്തരം പദ്ധതികളെന്നും അദ്ദേഹം കൂട്ടിച്ചേര്‍ത്തു.