എല്ലാംകൊണ്ടും മിടുക്കന്‍; ഇന്ത്യന്‍ മോട്ടോര്‍സൈക്കിള്‍ ഓഫ് ദി ഇയര്‍ അവാര്‍ഡ് സ്വന്തമാക്കി TVS Raider 125

എന്നാല്‍ രാജ്യത്ത് കമ്മ്യൂട്ടര്‍ മോഡലുകള്‍ക്കാണ് ആവശ്യക്കാര്‍ എന്ന് മനസ്സിലാക്കിയതോടെ എതിരാളികളെയെല്ലാം ഞെട്ടിച്ചാണ് കമ്പനി റൈഡര്‍ 125 വില്‍പ്പനയ്ക്ക് എത്തിക്കുന്നത്. വില്‍പ്പനയില്‍ മികച്ച സ്വീകാര്യതയാണ് മോഡലിന് ലഭിക്കുന്നതെന്ന് വേണം പറയാന്‍.

കമ്മ്യൂട്ടര്‍ വിഭാഗത്തിലെ മറ്റ് മോഡലുകളെക്കാള്‍ മികച്ച ഡിസൈനും, ഫീച്ചറുകളുമായിട്ടാണ് മോട്ടോര്‍സൈക്കിള്‍ എത്തിയിരിക്കുന്നത്. അതുകൊണ്ട് തന്നെ വില്‍പ്പനയില്‍ വലിയ പ്രതീക്ഷകളാണ് കമ്പനിക്കുള്ളതും. ആഭ്യന്തര വിപണിക്കൊപ്പം തന്നെ മോട്ടോര്‍സൈക്കിളിന്റെ കയറ്റുമതിയിലും കമ്പനി കാര്യമായ ശ്രദ്ധയാണ് നല്‍കുന്നത്.

നേപ്പാളിലും, ലാറ്റിന്‍ അമേരിക്കയ്ക്കും പിന്നാലെ അടുത്തിടെ ബംഗ്ലാദേശിലും മോട്ടോര്‍സൈക്കിളിന്റെ വില്‍പ്പന കഴിഞ്ഞ ദിവസം കമ്പനി ആരംഭിച്ചിരുന്നു. ഇതിനെല്ലാം പിന്നാലെയാണ് ഇപ്പോള്‍ മോട്ടര്‍സൈക്കിളിനെയും, കമ്പനിയെയും തേടി മറ്റൊരു സന്തോഷ വാര്‍ത്തകൂടി എത്തിയിരിക്കുകയാണ്.

ഏറ്റവും പുതിയ റിപ്പോര്‍ട്ട് അനുസരിച്ച്, ടിവിഎസ് റൈഡര്‍ 125 ഇന്ത്യന്‍ മോട്ടോര്‍സൈക്കിള്‍ ഓഫ് ദി ഇയര്‍ 2022 അവാര്‍ഡ് നേടിയിരിക്കുകയാണ്. ഇന്ത്യന്‍ വിപണിയില്‍ ഒരു മോട്ടോര്‍സൈക്കിളിന് നേടാനാകുന്ന ഏറ്റവും അഭിമാനകരമായ അംഗീകാരമാണ് പ്രസ്തുത അവാര്‍ഡെന്നും റിപ്പോര്‍ട്ടില്‍ പരാമര്‍ശിക്കുന്നു.

ഇത് പലപ്പോഴും ഇന്ത്യന്‍ മോട്ടോര്‍സൈക്കിളുകളുടെ ഓസ്‌കാര്‍ എന്നും അറിയപ്പെടുന്നു. വിജയിക്കുന്ന ബൈക്ക് പണത്തിനായുള്ള മൂല്യം മുന്‍നിര്‍ത്തി മാത്രമല്ല, ഡിസൈന്‍, സാങ്കേതികവിദ്യ, ഇന്ധനക്ഷമത, പ്രകടനം, എല്ലാറ്റിനുമുപരിയായി ഇന്ത്യന്‍ റൈഡിംഗ് സാഹചര്യങ്ങള്‍ക്കുള്ള സുസ്ഥിരത എന്നിവയും പാലിക്കുന്നു.

IMOTY-യുടെ ജൂറിയില്‍ വിവിധ മാസികകളില്‍ നിന്നും ഓണ്‍ലൈന്‍ പ്രസിദ്ധീകരണങ്ങളില്‍ നിന്നുമുള്ള മുതിര്‍ന്ന മോട്ടോര്‍ സൈക്കിള്‍ ജേണലിസ്റ്റുകള്‍ ഉള്‍പ്പെടുന്നു. ഇവര്‍ ദിവസം മുഴുവന്‍ മോഡലുകളെ വിലയിരുത്തുകലയും വിവിധ ഘടകങ്ങള്‍ വിലയിരുത്തുകയും അതുവഴി സാധ്യതയുള്ള മോഡലുകളെ ഷോര്‍ട്ട്ലിസ്റ്റ് ചെയ്യുകയും ചെയ്യുന്നു.

ഈ വര്‍ഷത്തെ അവാര്‍ഡിനായി ഷോര്‍ട്ട്ലിസ്റ്റ് ചെയ്ത പേരുകള്‍ ഇവയാണ്: റോയല്‍ എന്‍ഫീല്‍ഡ് ക്ലാസിക് 350, ടിവിഎസ് റൈഡര്‍ 125, ഹോണ്ട CB200X, യമഹ FZ X, ബജാജ് പള്‍സര്‍ F250, ബജാജ് പള്‍സര്‍ N250.

ഇന്ത്യന്‍ മോട്ടോര്‍സൈക്കിള്‍ ഓഫ് ദ ഇയര്‍ 2022 ന്റെ ജൂറി ബുദ്ധ് ഇന്റര്‍നാഷണല്‍ സര്‍ക്യൂട്ടിലാണ് നടന്നത്. IMOTY അതിന്റെ തുടക്കം മുതല്‍ JKTyre ആണ് സ്‌പോണ്‍സര്‍ ചെയ്യുന്നത്, ഇരുവരും അടുത്തിടെ ഒരു ദീര്‍ഘകാല പങ്കാളിത്തത്തില്‍ ഒപ്പുവെയ്ക്കുകയും ചെയ്തിരുന്നു.

ഇന്ത്യന്‍ മോട്ടോര്‍സൈക്കിള്‍ ഓഫ് ദി ഇയര്‍ 2022 അവാര്‍ഡ് ടിവിഎസ് റൈഡര്‍ 125-ന്റെ മാര്‍ക്കറ്റിംഗ് സീനിയര്‍ വൈസ് പ്രസിഡന്റ് അനിരുദ്ധ ഹല്‍ദാര്‍ ഏറ്റുവാങ്ങുകയും ചെയ്തു.

125 സിസി സെഗ്മെന്റില്‍ മികച്ച വില ഓപ്ഷനിലാണ് മോട്ടോര്‍സൈക്കിളിനെ കമ്പനി അവതരിപ്പിച്ചിരിക്കുന്നത്. ഇതിന്റെ പ്രാരംഭ പതിപ്പിന് 77,500 രൂപയാണ് എക്‌സ്‌ഷോറൂം വില. അതേസമയം ഉയര്‍ന്ന വേരിയന്റിന് 84,500 രൂപയും എക്‌സ്‌ഷോറൂം വിലയായി നല്‍കണം.

ഇത് നിലവില്‍ ഡ്രം, ഡിസ്‌ക് വേരിയന്റുകളില്‍ വാഗ്ദാനം ചെയ്യുന്നു, 2022-ല്‍ എപ്പോഴെങ്കിലും TFT സജ്ജീകരിച്ചിരിക്കുന്ന വേരിയന്റുമായി ശ്രേണി വിപുലീകരിക്കാനും കമ്പനിക്ക് പദ്ധതിയുണ്ട്.

ടിവിഎസ് റൈഡര്‍ 125 ഇന്ത്യന്‍ വിപണിയില്‍ ഹോണ്ട SP 125, ഹീറോ ഗ്ലാമര്‍ Xtec, ബജാജ് പള്‍സര്‍ 125 എന്നിവയ്ക്കെതിരെയാണ് മത്സരിക്കുന്നത്. ഇത് 124.8 സിസി സിംഗിള്‍ സിലിണ്ടര്‍ എയര്‍ കൂള്‍ഡ് ത്രീ-വാല്യൂ എഞ്ചിനില്‍ നിന്നാണ് കരുത്ത് സൃഷ്ടിക്കുന്നത്.

ഈ യൂണിറ്റ് 7,500 rpm-ല്‍ പരമാവധി 11.38 bhp പവര്‍ ഔട്ട്പുട്ടും 6,000 rpm-ല്‍ 11.2 Nm പീക്ക് ടോര്‍ക്കും സൃഷ്ടിക്കുന്നു. എഞ്ചിന്‍ അഞ്ച് സ്പീഡ് ട്രാന്‍സ്മിഷനുമായി ജോടിയാക്കിയിരിക്കുന്നു. മോട്ടോര്‍സൈക്കിളിന് പൂജ്യം മുതല്‍ 60 കിലോമീറ്റര്‍ വരെ വേഗത കൈവരിക്കാന്‍ 5.9 സെക്കന്‍ഡ് സമയം മാത്രം മതിയെന്നും ടിവിഎസ് അവകാശപ്പെടുന്നു.

ഷാര്‍പ്പായിട്ടുള്ള എല്‍ഇഡി ഹെഡ്‌ലൈറ്റ് ക്ലസ്റ്റര്‍, ഇന്റഗ്രേറ്റഡ് എല്‍ഇഡി ഡേടൈം റണ്ണിംഗ് ലൈറ്റുകള്‍, സിംഗിള്‍ പീസ് ഗ്രാബ് റെയില്‍, സ്ലീക്ക് സൈഡ് പാനലുകള്‍, റൈഡര്‍ 3D ലോഗോ, മസ്‌കുലര്‍ ഫ്യൂവല്‍ ടാങ്ക്, നെഗറ്റീവ് എല്‍സിഡി സ്‌ക്രീന്‍, സൈഡ് സ്റ്റാന്‍ഡ് എഞ്ചിന്‍ കട്ട്-ഓഫ്, USB ചാര്‍ജിംഗ് പോര്‍ട്ട് എന്നിവയുള്ള അപ്പാച്ചെ സീരീസ് സ്വാധീനിച്ച സ്‌റ്റൈലിംഗാണ് റൈഡര്‍ 125-നുള്ളത്.

ബ്രേക്കിംഗ് ചുമതലകള്‍ കൈകാര്യം ചെയ്യുന്നതിനായി മുന്നില്‍ 240 എംഎം പെറ്റല്‍ ഡിസ്‌കും പിന്നില്‍ 130 എംഎം ഡ്രമ്മും സിന്‍ക്രണസ് ബ്രേക്കിംഗ് സാങ്കേതികവിദ്യയുമാണ് കമ്പനി നടപ്പാക്കിയിരിക്കുന്നത്.

സസ്‌പെന്‍ഷനായി മുന്‍വശത്ത് ടെലിസ്‌കോപ്പിക് ഫോര്‍ക്കുകളിലും പിന്നില്‍ പ്രീ-ലോഡ് അഡ്ജസ്റ്റബിലിറ്റിയോടെ മോണോഷോക്കും മോട്ടോര്‍സൈക്കിളില്‍ ഇടംപിടിക്കുന്നു. ഉയര്‍ന്ന ഇന്ധനക്ഷമതയ്ക്കായി ItelliGo സ്റ്റാര്‍ട്ട്/സ്റ്റോപ്പ് സാങ്കേതികവിദ്യയ്ക്കൊപ്പം സെഗ്മെന്റ്-ഫസ്റ്റ് പവര്‍, ഇക്കോ മോഡുകളും ഇതില്‍ കാണാന്‍ സാധിക്കും.

ടിവിഎസ് റൈഡര്‍ 125-ന്റെ സീറ്റ് ഉയരം 780 എംഎം ആണ്. വീല്‍ബേസ് നീളം 1,326 എംഎം. ഫ്യുവല്‍ ടാങ്ക് കപ്പാസിറ്റി 10 ലിറ്ററാണ്, ഇത് 123 കിലോഗ്രാം തൂക്കം നല്‍കുന്നു. 17 ഇഞ്ച് ബ്ലാക്ക് അലോയ് വീലുകളുള്ള 80/100 ഫ്രണ്ട്, 100/90 സെക്ഷന്‍ പിന്‍ ടയറുകളില്‍ മോട്ടോര്‍സൈക്കിള്‍ വിപണിയില്‍ എത്തുന്നു. സമീപഭാവിയില്‍ ടിവിഎസ് നിരവധി 125 സിസി മോട്ടോര്‍സൈക്കിളുകള്‍ പുറത്തിറക്കുമെന്നാണ് പ്രതീക്ഷിക്കുന്നത്.