പ്രീമിയം ശ്രേണി വിപുലീകരിക്കാനൊരുങ്ങി ടിവിഎസ് മോട്ടോർസ്

പ്രീമിയം മോട്ടോർസൈക്കിൾ ശ്രേണിയിൽ തങ്ങളുടെ സംഭാവനകൾ കൂട്ടാനുളള ശ്രമത്തിലാണ് ടിവിഎസ് മോട്ടോർസ്. പ്രീമിയെ സെഗ്മെൻ്റിൽ അപ്പാച്ചെ, റോണിൻ എന്നീ രണ്ട് മോഡലുകളാണ് കമ്പനി വാഗ്ദാനം ചെയ്യുന്നത്. കൊവിഡിന് ശേഷം 150 സിസിക്ക് മുകളിലുളള മോഡലുകളെല്ലാം നല്ല രീതിയിൽ വിറ്റു പോയിരുന്നു.

അപ്പാച്ചെയും റോണിനും ചേർന്നുകൊണ്ട് ടിവിഎസ് മോട്ടോർ കമ്പനിയുടെ വിൽപ്പനയിൽ 14 ശതമാനമാണ് വളർച്ച നേടിക്കൊടുത്തത്. 2024 വർഷത്തിൽ തങ്ങളുടെ ശ്രേണികൾ കൂടുതൽ വിപുലീകരിക്കുവാനും ശക്തിപ്പെടുത്തുവാനുമുളള നീക്കങ്ങളാണ് കമ്പനി നടത്താൻ ഉദ്ദേശിക്കുന്നത്. അന്താരാഷ്ട്ര വിപണിയിൽ ഒരു ദശലക്ഷത്തിലധികം യൂണിറ്റുകളാണ് വിറ്റത്. അറുപതോളം രാജ്യങ്ങളിലായി അപ്പാച്ചെ ബൈക്കുകൾ വിൽക്കുന്നുണ്ട്, അത് മാത്രമല്ല ആഗോള വിൽപ്പന അഞ്ച് ദശലക്ഷം യൂണിറ്റുകളായിരുന്നു.

ഇന്ത്യയിലെ ഇലക്ട്രിക് ഇരുചക്ര വാഹന രംഗത്തെ കരുത്തന്‍ സാന്നിധ്യമാകാന്‍ ടിവിഎസ് നിര്‍മിച്ച ഇലക്ട്രിക് മോഡലായ ഐക്യൂബ് ദേ ഇപ്പോൾ പുതിയൊരു നാഴികക്കല്ല് പിന്നിട്ടിരിക്കുകയാണ്. 1 ലക്ഷം യൂണിറ്റുകളുടെ വിൽപ്പനയെന്ന നേട്ടമാണ് കമ്പനിയിപ്പോൾ നേടിയെടുത്തിരിക്കുന്നത്. 2023 ഫെബ്രുവരിക്കു പുറമെ മാർച്ചിലും 15,000 യൂണിറ്റ് വിൽപ്പന കൈവരിച്ചതോടെയാണ് സുപ്രധാന നാഴികക്കല്ലിൽ ടിവിഎസ് എത്തിയിരിക്കുന്നത്. 2020 ജനുവരിയിൽ സമാരംഭിച്ച മോഡൽ മൂന്ന് വർഷങ്ങൾക്കിപ്പുറമാണ് ഇത്തരമൊരു നാഴികക്കല്ലിൽ എത്തിയിരിക്കുന്നത്.

2023 സാമ്പത്തിക വർഷത്തിൽ 96,654 യൂണിറ്റ് വിൽപ്പനയുമായാണ് കമ്പനി നേടിയത്. അതായത് പോയ രണ്ട് വർഷത്തെ കണക്കുകളേക്കാൾ ഏതാണ്ട് 96 ശതമാനം വിൽപ്പനയും ഈ വർഷമാണുണ്ടായിരിക്കുന്നതെന്ന് സാരം. 2023 സാമ്പത്തിക വർഷത്തിൽ 1,00,000 യൂണിറ്റ് വിൽപ്പന കൈവരിക്കാൻ കമ്പനി നേരത്തെ ലക്ഷ്യമിട്ടിരുന്നു. ലക്ഷ്യം കൈവരിക്കാനായില്ലെങ്കിലും കേവലം 3,346 യൂണിറ്റുകളുകടെ കുറവ് മാത്രമാണ് ലക്ഷ്യത്തിലേക്ക് എത്താൻ കുറവ് വന്നത്.

ഇപ്പോൾ ഇലക്ട്രിക് സ്കൂട്ടറിന്റെ മൊത്തം 1,08,550 യൂണിറ്റുകളാണ് ഇന്ത്യൻ നിരത്തുകളിൽ ഓടുന്നത്. സ്റ്റാൻഡേർഡ്, S, ST എന്നിങ്ങനെ മൂന്നു വേരിയന്റുകളിലാണ് ടിവിഎസ് ഐക്യൂബ് ഇപ്പോൾ വിപണിയിൽ എത്തുന്നത്. 98,564 രൂപ മുതൽ 1,08,690 രൂപ വരെയാണ് ഇവിയുടെ ഇന്ത്യയിലെ ഓൺ-റോഡ് വില വരുന്നത്. ഫെയിം II സബ്സിഡിയും മറ്റ് സംസ്ഥാന ആനുകൂല്യങ്ങളും ഉൾപ്പെടുന്നതാണ് ഈ വിലകൾ.

ഒറ്റ ചാർജിൽ 140 കിലോമീറ്റർ റേഞ്ചുള്ള ഐക്യൂബിന്റെ ST വേരിയന്റിന്റെ ഡെലിവറി ഈ വർഷം ഉത്സവ സീസണോടെ കമ്പനി ആരംഭിക്കും. ഇതിന്റെ വിലയും ഡെലിവറിയോട് അനുബന്ധിച്ചായിരിക്കും ടിവിഎസ് വെളിപ്പെടുത്തുക. പോയ വർഷം വമ്പൻ പരിഷ്ക്കാരങ്ങളോടെ ഇലക്ട്രിക് സ്‌കൂട്ടർ വിപണിയിൽ എത്തിയിരുന്നു. പൂർണ എൽഇഡി ലൈറ്റിംഗിനൊപ്പം സ്റ്റൈലിഷായ 12 ഇഞ്ച് അലോയ് വീലുകളും അതേപടി നിലനിർത്തിയെങ്കിലും ധാരാളം പുതുമകൾ ഇവിയിലേക്ക് ഇത്തവണ എത്തുകയുണ്ടായി.

ഐക്യൂബിലെ TFT ഇൻസ്ട്രുമെന്റ് ക്ലസ്റ്ററുകളിൽ നിരവധി കണക്റ്റിവിറ്റി സവിശേഷതകൾ കൂട്ടിയോജിപ്പിച്ചാണ് ഇത്തവണ ടിവിഎസ് ഇലക്ട്രിക് സ്‌കൂട്ടറിനെ ഒരുക്കിയത്. കൂടാതെ എൻട്രി ലെവൽ വേരിയന്റിൽ ടേൺ-ബൈ-ടേൺ നാവിഗേഷനെ പിന്തുണയ്ക്കുന്ന 5 ഇഞ്ച് ഇൻസ്ട്രുമെന്റ് യൂണിറ്റും കമ്പനി നൽകുകയുണ്ടായി. S വേരിയന്റിൽ മ്യൂസിക് കൺട്രോളുകളും തീം കസ്റ്റമൈസേഷന്റെയും അധിക ക്രമീകരണങ്ങളുള്ള വലിയ 7 ഇഞ്ച് TFT ക്ലസ്റ്ററാണ് വാഗ്‌ദാനം ചെയ്യുന്നത്.

ഇ-സ്‌കൂട്ടറിന് വലിയ തോതിൽ ഡിമാന്റ് ലഭിക്കുന്നത് അനുസരിച്ച് കമ്പനി മോഡലിനായുള്ള റീട്ടെയിൽ ശൃംഖലയും വിപുലീകരിക്കുകയുണ്ടായി. ഇത് നിലവിൽ 100 നഗരങ്ങളിലും 200 ടച്ച് പോയിന്റുകളിലും ലഭ്യമാണെന്നാണ് ഇരുചക്ര വാഹന നിർമാതാക്കൾ അവകാശപ്പെടുന്നത്. നിലവിൽ ഇന്ത്യയിൽ ഇലക്ട്രിക് ഇരുചക്ര വാഹനങ്ങളുടെ ആവശ്യം വർധിച്ചു വരുന്നതിനാൽ ഐക്യൂബിനെ കൂടുതൽ നഗരങ്ങളിലേക്ക് എത്തിക്കുന്നത് തീർച്ചയായും കമ്പനിയെ സംബന്ധിച്ച് വിൽപ്പന വർധിപ്പിക്കാൻ സഹായിക്കും.