Click it and Unblock the Notifications
1 ലക്ഷം വീടുകളില് 'ജോയ്'; 30,000 രൂപ ഡിസ്കൗണ്ടില് ഇ-സ്കൂട്ടറുകള് വിറ്റഴിച്ച് കമ്പനിയുടെ ആഘോഷം
ഇന്ത്യയില് ഇവി വിപ്ലവത്തിനായി മുന്നില് നിന്ന് പടനയിക്കുന്നത് ഇലക്ട്രിക് ടൂവീലറുകളാണ്. സ്റ്റാര്ട്ടപ്പ് കമ്പനികളുടെ വിജയത്തിന് പിന്നാലെ പരമ്പരാഗത ടൂവീലര് നിര്മാതാക്കളും ഇപ്പോള് ഈ വിഭാഗത്തിലേക്ക് ചുവടുവെക്കുകയാണ്. ഉപഭോക്താക്കളുടെ ആവശ്യങ്ങള് കണ്ടറിഞ്ഞ് ഉല്പ്പന്നങ്ങള് വിപണിയിലിറക്കിയാല് അത് ക്ലിക്കാകുമെന്ന കാര്യം ഉറപ്പാണ്. അതിന്റെ ഏറ്റവും പുതിയ ഉദാഹരണാമായിരിക്കുകയാണ് ജോയ് ഇ-ബൈക്ക്.
വാര്ഡ് വിസാര്ഡ് ഇന്നൊവേഷന്സ് ആന്ഡ് മൊബിലിറ്റി ലിമിറ്റഡ് (WIML) ആണ് ജോയ് ഇ-ബൈക്ക് എന്ന ബ്രാന്ഡിന് കീഴില് ഇലക്ട്രിക് ടൂവീലറുകള് പുറത്തിറക്കുന്നത്. ഗുജറാത്ത് ആസ്ഥാനമായി പ്രവര്ത്തിക്കുന്ന കമ്പനി ഇപ്പോള് ശ്രദ്ധേയമായ വില്പ്പന നാഴികക്കല്ല് പിന്നിട്ടിരിക്കുകയാണ്. ഇന്ത്യയില് 100,000 യൂണിറ്റിലധികം ഇലക്ട്രിക് ഇരുചക്രവാഹനങ്ങള് വിറ്റഴിച്ചാണ് നിര്മാതാക്കള് പുതുചരിത്രമെഴുതിയത്.
ഇവി നിര്മാതാവ് ഗുജറാത്തിലെ വഡോദരയിലെ നിര്മ്മാണ പ്ലാന്റില് നിന്ന് മിഹോസ് സ്കൂട്ടറിന്റെ രൂപത്തില് തങ്ങളുടെ 100,000-ാമത്തെ ഇലക്ട്രിക് ഇരുചക്ര വാഹനം പുറത്തിറക്കി. 2016-ല് വാര്ഡ് വിസാര്ഡ് സൊല്യൂഷന്സ് എന്ന പേരിലാണ് കമ്പനി സ്ഥാപിതമായത്. പിന്നീട് 2019-ല് WIML എന്ന് പുനര്നാമകരണം ചെയ്യപ്പെട്ട കമ്പനി ഇലക്ട്രിക് സൈക്കിളുകളിലൂടെയാണ് തങ്ങളുടെ ഐതിഹാസിക യാത്രക്ക് തുടക്കം കുറിച്ചത്.
ബോംബെ സ്റ്റോക് എക്സ്ചേഞ്ചില് (ബിഎസ്ഇ) ലിസ്റ്റ് ചെയ്യപ്പെട്ട ആദ്യ ഇവി കമ്പനി കൂടിയാണ് WIML. വാര്ഡ് വിസാര്ഡ് തങ്ങളുടെ ആദ്യത്തെ ലോ-സ്പീഡ് ഇലക്ട്രിക് സ്കൂട്ടറായ ബട്ടര്ഫ്ലൈ 2018-ലാണ് അവതരിപ്പിച്ചത്. ലോ-സ്പീഡ്, ഹൈ-സ്പീഡ് വേരിയന്റുകള് ഉള്പ്പെടെ നിലവില് കമ്പനിയുടെ പോര്ട്ഫോളിയോയില് 10-ലധികം മോഡലുകള് ഉള്പ്പെടുന്നു. 750-ലധികം ടച്ച് പോയിന്റുകളുള്ള വിപുലമായ ശൃംഖലയും ജോയ് ഇ-ബൈക്കിനുണ്ടെന്നതാണ് ശ്രദ്ധേയം.
വില്പ്പന നാഴികക്കല്ല് ആഘോഷിക്കുന്ന വാര്ഡ് വിസാര്ഡ് ഉപഭോക്താക്കള്ക്കായി 30,000 രൂപ വരെ കിഴിവുകള് ഉള്പ്പെടെ നിരവധി എക്സ്ക്ലൂസീവ് ഓഫറുകളും അവതരിപ്പിച്ചു. മിഹോസ്, വൂള്ഫ്+, ജെന് നെക്സ്റ്റ് നാനു+ തുടങ്ങിയ മോഡലുകള്ക്ക് സൗജന്യ ഇന്ഷുറന്സ് പോലുള്ള ആനുകൂല്യങ്ങളും വാഗ്ദാനം ചെയ്യുന്നതായി ഇവി നിര്മ്മാതാവ് അറിയിച്ചു. ഇന്ത്യയിലുടനീളമുള്ള എല്ലാ അംഗീകൃത ജോയ് ഇ-ബൈക്ക് ഡീലര്ഷിപ്പുകളിലും 2024 മാര്ച്ച് 31 വരെ ഈ ഓഫറുകള്ക്ക് സാധുതയുണ്ടാകും.
'രാജ്യത്തെ മുന്നിര ഇലക്ട്രിക് ഇരുചക്രവാഹന ബ്രാന്ഡ് എന്ന നിലയില് വാര്ഡ് വിസാര്ഡിനെ തല്സ്ഥാനത്തേക്ക് ഉയര്ത്തിയ ഞങ്ങളുടെ ഉപഭോക്താക്കളോടും പങ്കാളികളോടും അവരുടെ അചഞ്ചലമായ പിന്തുണക്ക് ഞങ്ങള് നന്ദിയുള്ളവരാണ്. 100,000 വില്പ്പനയുടെ ഈ നാഴികക്കല്ല് ഞങ്ങളുടെ വൈവിധ്യമാര്ന്ന ഉല്പ്പന്ന ശ്രേണിയുടെ ഗുണനിലവാരത്തെ അടിവരയിടുകയും സുസ്ഥിരമായ ഭാവിയിലേക്കുള്ള അചഞ്ചലമായ സമര്പ്പണവും ഉപഭോക്തൃ ആവശ്യങ്ങള് നിറവേറ്റുകയും ചെയ്യുന്നു' വാര്ഡ് വിസാര്ഡ് ചെയര്മാനും മാനേജിംഗ് ഡയറക്ടറുമായ യതിന് ഗുപ്തെ പറഞ്ഞു.
കഴിഞ്ഞ വര്ഷം നടന്ന 2023 ഓട്ടോ എക്സ്പോയില് വെച്ചാണ് ജോയ് ഇ-ബൈക്ക് മിഹോസ് ഇലക്ട്രിക് സ്കൂട്ടര് അവതരിപ്പിച്ചത്. കര്ക്കശവും കരുത്തുറ്റതുമായ പാനലുകള് ഉപയോഗിച്ചാണ് നിര്മ്മിച്ച ഈ ഉല്പ്പന്നം ബില്ഡ് ക്വാളിറ്റിയുടെ കാര്യത്തില് വേറെ ലെവലാണെന്നാണ് നിര്മാതാക്കള് അവകാശപ്പെടുന്നത്. ജോയ് മിഹോസ് ഇലക്ട്രിക് സ്കൂട്ടര് ഒറ്റ ചാര്ജില് 130 കിലോമീറ്റര് വരെ ഓടുമെന്നാണ് അവകാശവാദം.
1,500 വാട്ട് ബാറ്ററി പായ്ക്ക് അഞ്ച് മണിക്കൂറിനുള്ളില് പൂര്ണമായി ചാര്ജ് ചെയ്യാന് കഴിയും. ഈ ഇലക്ട്രിക് സ്കൂട്ടറിന് മണിക്കൂറില് 65 കിലോമീറ്റര് വേഗതയില് ഓടാന് കഴിയുമെന്ന് കമ്പനി അവകാശപ്പെടുന്നു. 1.135 ലക്ഷം രൂപ വിലയുണ്ടായിരുന്ന ജോയ് മിഹോസ് ഇപ്പോള് 1.10 ലക്ഷം രൂപക്ക് വാങ്ങാം. 20000 രൂപയാണ് വിലക്കിഴിവ്. അതുപോലെ 1,15,694 രൂപ വിലയുണ്ടായിരുന്ന വൂള്ഫ്+ ഇവിക്ക് ഇപ്പോള് 87000 രൂപ മാത്രം മുടക്കിയാല് മതി.
28,694 രൂപയാണ് ഡിസ്കൗണ്ട്. അതുപോലെ 1,12,341 രൂപ വിലയുള്ള ജെന് നെക്സ്റ്റ് നാനു+ ഇവി ഇപ്പോള് 83000 രൂപക്ക് വാങ്ങാന് സാധിക്കും. ഈ സ്കൂട്ടറുകള് ഇപ്പോള് 999 രൂപ നല്കി ബുക്ക് ചെയ്യാന് സാധിക്കും. കേരളത്തിലെ ഒട്ടുമിക്ക ജില്ലകളിലും ജോയ് ഇ-ബൈക്കിന്റെ സ്റ്റോറുകള് ഉണ്ട്. മാര്ച്ച് അവസാനം വരെ ഈ കിടിലന് ഓഫര് കൂടിയുള്ളതിനാല് വില്പ്പന കുത്തനെ കൂടുമെന്നാണ് ജോയ് ഇ-ബൈക്ക് പ്രതീക്ഷിക്കുന്നത്.
Continue with Google