ഈ കാശിന് രണ്ട് പുത്തൻ ഡിസയർ വാങ്ങാം! 1390 സൂപ്പർ ഡ്യൂക്കിനെ ലോഞ്ച് ചെയ്ത് കെടിഎം; വില ഇങ്ങനെ

എത്ര വളർന്നാലും നമ്മിൽ പലരുടേയും ഉള്ളിന്റെ ഉള്ളിൽ ഒരു കുട്ടി ഉണ്ടായിരിക്കും, പുത്തൻ ടോയ്സും വണ്ടികളും ഒക്കെ കാണുമ്പോൾ എല്ലാം മറന്ന് അല്പനേരം അത് നമ്മിൽ പലരും നോക്കി നിൽക്കാറുമുണ്ട്. ചെറുപ്പത്തിൽ നമ്മെ എല്ലാം ആശ്ചര്യപ്പെടുത്തിയ കെടിഎം ഇന്ന് ശിശുദിനത്തിൽ, നമ്മുടെ ഉള്ളിലെ ചെറുപ്പക്കാരനെ എന്നത്തേക്കാളും സന്തോഷിപ്പിക്കാൻ ചില പ്രഖ്യാപനങ്ങളുമായി എത്തിയിരിക്കുകയാണ്. കെടിഎം തങ്ങളുടെ ബിഗ് ഡാഡി ഡ്യൂക്ക് ഉൾപ്പെടെയുള്ള വലിയ ബൈക്കുകൾ തിരികെ ഇന്ത്യയിലേക്ക് കൊണ്ടുവന്നിരിക്കുകയാണ്. 1390 സൂപ്പർ ഡ്യൂക്ക് R -ന്റെ ഇന്ത്യൻ വിപണിയിൽ 22.96 ലക്ഷം രൂപയ്ക്ക് നിർമ്മാതാക്കൾ ലോഞ്ച് ചെയ്തിരിക്കുകയാണ്.

ബ്രാൻഡിൻ്റെ മുൻനിര മോഡലാണ് ഇത്. ഹൈപ്പർ നേക്കഡ് സ്‌പോർട്‌സ് മോഡൽ, ഏകദേശം ഒരു വർഷം മുമ്പ് ആഗോള തലത്തിൽ അരങ്ങേറ്റം കുറിച്ചിരുന്നു. ഒരു V-ട്വിൻ യൂണിറ്റ് തന്നെയാണ് കെടിഎം 1390 സൂപ്പർ ഡ്യൂക്ക് R-ൻ്റെ ഹൃദയം, എന്നാൽ ഇതിന്റെ ഡിസ്പ്ലേസ്മെന്റ് അല്ലെങ്കിൽ കപ്പാസിറ്റി ഇപ്പോൾ 1,350 സിസി ആയി ഉയർന്നു എന്നത് ശ്രദ്ധേയമാണ്.

ഈ യൂണിറ്റ് മുൻ തലമുറ 1290 സൂപ്പർ ഡ്യൂക്ക് R ഉത്പാദിപ്പിച്ചിരുന്നതിനേക്കാൾ 10 bhp കൂടുതൽ പവറും 5 Nm കൂടുതൽ ടോർക്കും നൽകുന്നു. പവർ ടോർക്ക് ഔട്ട്പുട്ടുകൾ യഥാക്രമം 190 bhp ഉം 145 Nm ഉം ആണ്. അത് കൂടാതെ ഒരു പുതിയ "ക്യാം ഷിഫ്റ്റ്" സംവിധാനവും നിർമ്മാതാക്കൾ ഇതിൽ അവതരിപ്പിക്കുന്നു.

ആറ് -സ്പീഡ് ഗിയർബോക്‌സും സ്ലിപ്പ് ആൻഡ് അസിസ്റ്റ് ക്ലച്ചും ബൈഡയറക്ഷണൽ ക്വിക്ക്ഷിഫ്റ്ററും സ്റ്റാൻഡേർഡായി ലഭ്യമായ ഗിയർ അനുപാതങ്ങൾക്കൊപ്പം ഓസ്ട്രിയൻ നിർമ്മാതാക്കൾ കാര്യമായി ഒപ്റ്റിമൈസ് ചെയ്തിട്ടുണ്ട്. പുതിയ KTM 1390 സൂപ്പർ ഡ്യൂക്ക് R മുൻ തലമുറയുടെ അതേ ട്രെല്ലിസ് ഷാസി ഫ്രെയിമിൽ തന്നെയാണ് നിർമ്മിച്ചിരിക്കുന്നത്.

സ്റ്റാൻഡേർഡായി കംപ്രഷൻ, റീബൗണ്ട്, പ്രീലോഡ് എന്നിവയെല്ലാം അഡ്ജസ്റ്റ് ചെയ്യാവുന്ന ഓപ്‌ഷനുകൾ വാഗ്ദാനം ചെയ്യുന്ന ഏറ്റവും പുതിയ 48 mm WP അപെക്‌സ് ഫോർക്കാണ് ഇതോടൊപ്പം കെടിഎം ചേർത്തിരിക്കുന്നത് എന്നതും ശ്രദ്ധേയമാണ്. ഉയർന്ന വേഗതയിലും കുറഞ്ഞ വേഗതയിലും പ്രത്യേക അഡ്ജസ്റ്റ്മെന്റ് ഫംഗഷനുകൾ ഉൾക്കൊള്ളുന്നതിനായി മോണോഷോക്ക് സിസ്റ്റവും പരിഷ്കരിച്ചിട്ടുണ്ട്. അതുപോലെ, ഡ്യുവൽ -320 mm ഡിസ്കുകളിൽ പുതിയ ബ്രെംബോ സ്റ്റൈൽമ മോണോബ്ലോക്ക് ക്യാലിപ്പറുകൾ ഉപയോഗിച്ച് ബ്രേക്കിംഗ് സിസ്റ്റവും നിർമ്മാതാക്കൾ മെച്ചപ്പെടുത്തിയിട്ടുണ്ട്.

പുതിയ 1390 സൂപ്പർ ഡ്യൂക്ക് R -ൻ്റെ വളരെ അഗ്രസ്സീവായ ഡിസൈൻ ശൈലി കെടിഎം 990 ഡ്യൂക്കിന് സമാനമായിരിക്കാം. വെർട്ടിക്കലായി പ്ലേസ് ചെയ്തിരിക്കുന്ന പുതിയ എൽഇഡി ഹെഡ്‌ലൈറ്റും വിംഗ്‌ലെറ്റുകളോട് കൂടിയ പുതിയ ടാങ്ക് സ്‌പോയിലറും ഇതിൽ ഉൾപ്പെടുന്നു. സബ്‌ഫ്രെയിം കവറും കമ്പനി ചെറുതാക്കിയിട്ടുണ്ട്, ഇത് ബൈക്കിനെ പിന്നിൽ നിന്ന് ബോൾഡ് & സ്ട്രീംലൈൻ ലുക്ക് നൽകുന്നു.

അടുത്തതായി ഫീച്ചറുകളുടെ കാര്യത്തിൽ, പുതിയ കെടിഎം 1390 സൂപ്പർ ഡ്യൂക്ക് R -ന് ലീൻ-സെൻസിറ്റീവ് ABS, ട്രാക്ഷൻ കൺട്രോൾ, വീലി കൺട്രോൾ, സ്ലൈഡ് കൺട്രോൾ മുതലായ റൈഡ്-അസിസ്റ്റ് ഫീച്ചറുകളുടെ ഒരു വലിയ ശ്രേണി തന്നെ ലഭിക്കുന്നു. അതിലുപരിയായി, ഇതിന് ഒരു ടയർ പ്രഷർ മോണിറ്ററിംഗ് സിസ്റ്റവും ലഭിക്കുന്നു.

കൂടാതെ റെയിൻ, സ്ട്രീറ്റ്, സ്പോർട് എന്നിവയ്ക്കു മുകളിൽ പെർഫോമെൻസ്, ട്രാക്ക് എന്നിങ്ങനെ രണ്ട് റൈഡ് മോഡുകൾ കൂടെ ലഭിക്കുന്നു. തീർന്നില്ല, പുതിയ കെടിഎം 1390 സൂപ്പർ ഡ്യൂക്ക് R, ക്രൂയിസ് കൺട്രോൾ, എഞ്ചിൻ ബ്രേക്ക് കൺട്രോൾ, അഞ്ച് -സ്റ്റെപ്പ് അഡ്ജസ്റ്റ് ചെയ്യാവുന്ന വീലി കൺട്രോൾ ഫംഗ്ഷൻ എന്നിവയുൾപ്പെടെ ഒരു സെറ്റ് ഓപ്ഷണൽ എക്സ്ട്രാ ഫീച്ചറുകളും വാഗ്ദാനം ചെയ്യുന്നു.

എന്നിരുന്നാലും, 22.96 ലക്ഷം രൂപയ്ക്ക് എത്തുന്ന ഈ പുതിയ ഹൈപ്പർ-നേക്കഡ് സ്‌പോർട്‌സ് ബൈക്ക് ഇന്ത്യയിലെ കെടിഎം ബ്രാൻഡിന്റെ ഏറ്റവും വിലയേറിയ മോഡലാണ്. കെടിഎം 1390 സൂപ്പർ ഡ്യൂക്ക് R, അതിൻ്റെ പ്രധാന എതിരാളികളായ ഡ്യുക്കാട്ടി സ്ട്രീറ്റ്ഫൈറ്റർ V4, ബിഎംഡബ്ല്യു M 1000 R എന്നിവയെ പോലെ തന്നെ, ഒരു CBU ആയിട്ടാണ് വിപണിയിൽ എത്തുന്നത്.