Click it and Unblock the Notifications
പെട്രോള് ബൈക്കുകളുടെ 'മരണമണി' മുഴങ്ങി! ഓല ഇ-ബൈക്കിന്റെ ടീസറെത്തി, 'ട്രെയിലര്' ഓഗസ്റ്റ് 15-ന്
ഓരോ വര്ഷവും ഓഗ്സ്റ്റ് 15-ന് ഓല ഇലക്ട്രിക് ഇന്ത്യയിലെ വാഹന പ്രേമികള്ക്കായി 'സ്പെഷ്യലായി' ചിലത് ഒരുക്കി വെക്കാറുണ്ട്. കഴിഞ്ഞ ഒന്ന് രണ്ട് വര്ഷമായി കമ്പനിയുടെ ശ്രേണിയിലെ കുറഞ്ഞ വിലയുള്ള ഉല്പ്പന്നങ്ങളായിരുന്നു സ്വതന്ത്ര്യ ദിനത്തിന് ബ്രാന്ഡ് അവതരിപ്പിച്ചത്. മാത്രമല്ല കഴിഞ്ഞ വര്ഷം ഓല ഇലക്ട്രിക്കില് നിന്ന് പിറവിയെടുക്കാന് പോകുന്ന ഇലക്ട്രിക് മോട്ടോര്സൈക്കിള് നിരയും പ്രദര്ശിപ്പിച്ചിരുന്നു. ഒരു വര്ഷം പിന്നിടുമ്പോള് ഓലയുടെ ഇലക്ട്രിക്ക് ബൈക്ക് പ്രൊജക്ട് വളരെയേറെ മുന്നേറിയതായി നാം ഇതിനോടകം മനസ്സിലാക്കിയിട്ടുണ്ട്. ഈ വര്ഷം ഓഗസ്റ്റ് 15-ന് നടക്കാന് പോകുന്ന ഓല ഇവന്റിന്റെ പ്രധാന ശ്രദ്ധാകേന്ദ്രം കമ്പനിയുടെ ആദ്യ ഇലക്ട്രിക് മോട്ടോര്സൈക്കിള് ആയിരിക്കും.
പുത്തന് ഉല്പ്പന്നത്തെ കുറിച്ചുള്ള പ്രതീക്ഷകള് വാനോളമുയര്ത്തി ബ്രാന്ഡ് കഴിഞ്ഞ കുറച്ച് ദിവസങ്ങളായി ടീസറുകള് പുറത്തുവിടുന്നുണ്ട്. ഇപ്പോള് വരാനിരിക്കുന്ന ഇലക്ട്രിക് ബൈക്കിന്റെ മറ്റൊരു ടീസര് കൂടി പുറത്തിറക്കിയിരിക്കുകയാണ് ബെംഗളൂരു ആസ്ഥാനമായി പ്രവര്ത്തിക്കുന്ന കമ്പനി. S1 ഇലക്ട്രിക് സ്കൂട്ടര് ശ്രേണിയോട് സാമ്യമുള്ള എല്ഇഡി ഹെഡ്ലൈറ്റ് ഡിസൈന് ടീസറില് പ്രദര്ശിപ്പിക്കുന്നു.
ഓല ഇലക്ട്രിക് പങ്കുവെച്ച ടീസര് പുതിയ ഇലക്ട്രിക് ബൈക്കിന്റെ നിരവധി പ്രധാന സവിശേഷതകള് വെളിപ്പെടുത്തുന്നു. എല്ഇഡി ഹെഡ്ലൈറ്റ് യൂണിറ്റ് S1 ഇലക്ട്രിക് സ്കൂട്ടര് ശ്രേണിയുമായി സാമ്യമുള്ളതാണ്. എന്നാല് എല്ഇഡി സ്ട്രിപ്പ്, വെര്ട്ടിക്കല് ഇന്ഡിക്കേറ്ററുകള് എന്നിവ പോലുള്ള അദ്വിതീയ ഘടകങ്ങള് ഇതില് ഉള്പ്പെടുന്നു. ഈ ഡിസൈന് ചോയ്സ് ഹെഡ്ലൈറ്റ് യൂണിറ്റിനുള്ളില് സംയോജിത ടേണ് സിഗ്നലുകള് അനുവദിച്ചേക്കാം.
ഓല ഇലക്ട്രിക് സഹ സ്ഥാപകനും സിഇഒയുമായ ഭവിഷ് അഗര്വാള് മുന് ടീസറില് സ്ഥിരീകരിച്ച ബൈക്കിന്റെ ചെയിന് ഡ്രൈവാണ് മറ്റൊരു പ്രധാന സംഗതി. കഴിഞ്ഞ വര്ഷം ഓല പ്രദര്ശിപ്പിച്ച കണ്സെപ്റ്റ് പതിപ്പുകളില് നിന്ന് വ്യത്യസ്തമായി പവര് ട്രാന്സ്മിഷനുള്ള പരമ്പരാഗത സമീപനത്തെയാണ് ഈ സവിശേഷത സൂചിപ്പിക്കുന്നത്. ബൈക്കിന്റെ മൊത്തത്തിലുള്ള രൂപം വെളിപ്പെട്ടിട്ടില്ലെങ്കിലും ഓല സമീപകാലത്ത് ട്രേഡ്മാര്ക്ക് ചാര്ത്തിയ ഡിസൈനുമായാണ് ഇതിന് സാമ്യതകള് ഏറെയെന്നാണ് തോന്നുന്നത്.
ഹെഡ്ലൈറ്റിന് സമീപം 'ടാങ്ക്' പാനലുകള് സ്ഥാപിക്കുന്നത് കാര്യക്ഷമവും യോജിച്ചതുമായ ഡിസൈന് സമീപനത്തെ സൂചിപ്പിക്കുന്നു. ഇ-ബൈക്കിന്റെ ഫ്രണ്ട് സസ്പെന്ഷന് ഒരു പരമ്പരാഗത റൈറ്റ് സൈഡ് അപ്പ് ടെലിസ്കോപ്പിക് ഫോര്ക്ക് ആണെന്ന് തോന്നുന്നു. കൂടാതെ, 'ടാങ്ക്' പാനലുകള് ഹെഡ്ലൈറ്റിന്റെ ഏകദേശം അതേ ലെവലിലാണ് സ്ഥാപിച്ചിരിക്കുന്നത്. ഓലയുടെ മുന്കാല ഫ്യൂച്ചറിസ്റ്റിക് പ്രോട്ടോടൈപ്പുകളേക്കാള് അടുത്തിടെ ട്രേഡ്മാര്ക്ക് ചെയ്ത കണ്സെപ്റ്റ് മോഡലുകളുമായി പൊരുത്തപ്പെടുന്നതാണ് ഈ ഒരു ഡിസൈന്.
ഓല ഇലക്ട്രിക് ബൈക്കുമായ ബന്ധപ്പെട്ട സുപ്രധാനമായ പല വിവരങ്ങളും ഇന്നും അജ്ഞാതമാണ്. എന്നിരുന്നാലും അടുത്തകാലത്തായി പുറത്ത് വരുന്ന ഈ ടീസറുകള് അതിന്റെ രൂപകല്പ്പനയെയും ഫീച്ചറുകളെയും സംബന്ധിച്ചുള്ള ചില ഉള്ക്കാഴ്ചകള് നല്കുന്നു. ഓലയുടെ ഇലക്ട്രിക് വാഹന നിരയിലേക്ക് എത്താന് പോകുന്ന പുത്തന് ഉല്പ്പന്നത്തെ ഓഗസ്റ്റ് 15-ന് കമ്പനി പൂര്ണ രൂപത്തില് വെളിപ്പെടുത്തുമെന്ന് നമുക്ക് പ്രതീക്ഷിക്കാം.
ഓരോ ദിവസവും ഈ ബൈക്കിനെ കുറിച്ചുള്ള പുത്തന് വിവരങ്ങള് പുറത്ത് വരുമ്പോള് ഇവി പ്രേമികളുടെ പ്രതീക്ഷയും വാനോളം ഉയരുന്നുണ്ട്. ഔദ്യോഗിക അവതരണം തൊട്ടടുത്ത് എത്തി നില്ക്കേ ഓല ഫാന്സും ഇലക്ട്രിക് ബൈക്ക് വാങ്ങാന് ഉദ്ദേശിക്കുന്നവരും ആകാംക്ഷാ പൂര്വം കാത്തിരിക്കുകയാണ്. നിലവില് പ്രാരംഭ ഓഹരി വില്പ്പനയിലൂടെ ഫണ്ട് സ്വരൂപിക്കുന്ന ഓല ഇലക്ട്രിക് ഏകദേശം 40% ഓഹരിയുമായി ഇന്ത്യന് ഇലക്ട്രിക് ഇരുചക്ര വാഹന വിപണിയില് മുന്നില് തുടരുകയാണ്.
2023 ജൂലൈയില് വിറ്റ 19,406 യൂണിറ്റില് നിന്ന് 2024 ജൂലൈയില് ഓല വില്പ്പന 41,597 യൂണിറ്റാക്കി ഉയര്ത്തി. 114% വില്പ്പന വര്ധനവ് രേഖപ്പെടുത്തി. ഇതോടെ കമ്പനിയുടെ വിപണി വിഹിതം 39 ശതമാനമായി. ഫെയിം സബ്സിഡി കുറച്ചതിന് ശേഷം കഴിഞ്ഞ കുറച്ച് മാസങ്ങളായി ഇലക്ട്രിക് ടൂവീലര് വില്പ്പനയില് ഇടിവ് നേരിട്ടിരുന്നു. ഏറെ നാളുകള്ക്ക് ശേഷം ഇന്ത്യന് ഇലക്ട്രിക് ഇരുചക്ര വാഹന വിപണി വീണ്ടും ഉണര്വ് വീണ്ടെടുത്തിരിക്കുകയാണ്.
ഫെയിം സബ്സിഡി സ്കീമിന് പകരം ഇലക്ട്രിക് മൊബിലിറ്റി പ്രൊമോഷന് സ്കീം സെപ്റ്റംബര് 30 വരെ നീട്ടിയത് ഒരു കാരണമാണ്. 2024 ജൂലൈ മാസത്തില് ഇന്ത്യയില് മൊത്തം 1,06,949 ഇലക്ട്രിക് സ്കൂട്ടറുകള് വിറ്റു. 2023 ജൂലൈയില് 54,616 ഇലക്ട്രിക് സ്കൂട്ടറുകളായിരുന്നു വില്പ്പന. 96 ശതമാനമാണ് വളര്ച്ച. 79,868 ഇലക്ട്രിക് സ്കൂട്ടറുകള് വിറ്റ 2024 ജൂണിനെ അപേക്ഷിച്ചും വളര്ച്ചയാണ്. കഴിഞ്ഞ നാല് മാസത്തിനിടെ ആദ്യമായാണ് ഇലക്ട്രിക് സ്കൂട്ടര് വില്പ്പന ഒരു ലക്ഷം കടക്കുന്നത്.
Continue with Google