Click it and Unblock the Notifications
102KM മൈലേജുള്ള ബൈക്കിന് 1 ലക്ഷം പോലും വിലയില്ല! പക്ഷേ, വില്പ്പന വെറും 2152 എണ്ണം
ഇന്ത്യന് വിപണിയില് പ്രിയങ്കരമായ ബൈക്കുകളിലൊന്നാണ് ബജാജ് ഫ്രീഡം (Bajaj Freedom). ലോകത്തിലെ ആദ്യ സിഎന്ജി മോട്ടോര്സൈക്കിള് എന്ന ഖ്യാതിയുമായി കഴിഞ്ഞ വര്ഷം ജൂലൈയിലാണ് ബജാജ് ഫ്രീഡം 125 വിപണിയില് എത്തിയത്. ഇന്ധന വില വര്ധനവില് നിന്ന് 'സ്വാതന്ത്ര്യം' എന്ന നിലയില് തുടക്കത്തില് ഈ ബൈക്ക് മോഡലിന് മികച്ച സ്വീകാര്യത ലഭിച്ചിരുന്നു. ഇന്ത്യയില് മൊത്തം വാഹന വിപണി എടുക്കുമ്പോള് സിഎന്ജി പോലുള്ള ബദല് ഇന്ധനങ്ങളില് പ്രവര്ത്തിക്കുന്ന വാഹനങ്ങള്ക്ക് പ്രത്യേകിച്ച് കാറുകള്ക്ക് മികച്ച ഡിമാന്ഡ് ആണ്. ഈ സാഹചര്യത്തില് ബജാജ് ഫ്രീഡം ബൈക്കിന്റെ വില്പ്പന എങ്ങിനെയുണ്ടെന്ന് നമുക്ക് പരിശോധിച്ചാലോ?.
2025 നവംബര് മാസത്തെ മോഡല് തിരിച്ചുള്ള വില്പ്പന കണക്കുകള് പുറത്തു വന്നിട്ടില്ലാത്തതിനാല് ഒക്ടോബര് മാസത്തെ ഡേറ്റയാണ് ഞങ്ങളുടെ പക്കലുള്ളത്. 2025 ഒക്ടോബറിലെ കണക്കുകള് പ്രകാരം ഈ ബൈക്കിന് വലിയ വില്പ്പന ഇടിവ് രേഖപ്പെടുത്തിയിട്ടുണ്ട്. റഷ്ലെയ്ന് പുറത്തുവിട്ട വില്പ്പന റിപ്പോര്ട്ട് അനുസരിച്ച് 2025 ഒക്ടോബറില് വെറും 2,152 ബജാജ് ഫ്രീഡം ബൈക്കുകള് മാത്രമാണ് വിറ്റഴിഞ്ഞത്.അതേസമയം 12 മാസങ്ങള്ക്ക് മുമ്പ് 2024 ഒക്ടോബറില് ഇത് 30,051 യൂണിറ്റായിരുന്നു.
മുന്വര്ഷത്തെ അപേക്ഷിച്ച് 27,899 യൂണിറ്റുകളുടെ കുറവാണ് രേഖപ്പെടുത്തിയത്. അതായത് വാര്ഷികാടിസ്ഥാനത്തില് 92.84 ശതമാനത്തിന്റെ വമ്പന് ഇടിവാണ് രേഖപ്പെടുത്തിയത്. മികച്ച മൈലേജും താങ്ങാനാവുന്ന വിലയുമുണ്ടായിരുന്നിട്ടും ഈ വില്പ്പന ഇടിവ് ശ്രദ്ധേയമാണ്. ദീപാവലിയടക്കമുള്ള ഉത്സവങ്ങള് വന്ന ഒക്ടോബര് മാസത്തില് പൊതുവേ ബൈക്കുകളുടെ വില്പ്പന വര്ധിക്കാറാണ് പതിവ്. എന്നാല് ബജാജ് ഫ്രീഡത്തിന്റെ വമ്പന് ഇടിവ് ബജാജ് തീര്ച്ചയായും വിശകലനം ചെയ്യുന്നതായിരിക്കും.
നിലവില് NG04 ഡ്രം, NG04 ഡ്രം എല്ഇഡി, NG04 ഡിസ്ക് എന്നിങ്ങനെ ആകെ 3 വേരിയന്റുകളിലാണ് ബജാജ് ഫ്രീഡം വില്പ്പനക്കെത്തുന്നത്. ഇതില് NG04 ഡ്രം വേരിയന്റിന്റെ വില 90,976 രൂപയാണ്. അതേസമയം, NG04 ഡ്രം എല്ഇഡി വേരിയന്റിന്റെ വില 1,03,468 രൂപയാണ്. മറുവശത്ത്, NG04 ഡിസ്ക് വേരിയന്റിന്റെ വില 1,07,026 രൂപയാണ്. ഇതെല്ലാം ബജാജ് ഇന്ത്യയുടെ ഔദ്യോഗിക വെബ്സൈറ്റില് പരാമര്ശിച്ചിരിക്കുന്ന എക്സ്-ഷോറൂം വിലകളാണ്.
ഈ വിലയ്ക്ക് ഏറ്റവും വിലയേറിയ ഉല്പ്പന്നമായി ബജാജ് ഫ്രീഡം കണക്കാക്കപ്പെടുന്നു. 7 നിറങ്ങളിലാണ് കമ്പനി ഇത് പുറത്തിറക്കിയിരിക്കുന്നത്. 124.58 സിസി എഞ്ചിനാണ് ബജാജ് ഫ്രീഡത്തിന് കരുത്ത് പകരുന്നത്. 9.7 Nm ടോര്ക്കും 9.5 PS പവറും ഉത്പാദിപ്പിക്കാന് ഇതിന് കഴിയും. സിഎന്ജിയിലും പെട്രോളിലും ഒരുപോലെ പ്രവര്ത്തിക്കുമെന്നത് ഈ ബൈക്കിന്റെ പ്രധാന സവിശേഷതയാണ്. ഓരോന്നിനും 2 ലിറ്റര് വീതമുള്ള ടാങ്കുകളാണ് നല്കിയിരിക്കുന്നത്.
മൈലേജിന്റെ കാര്യമെടുത്താല്, പെട്രോളില് ലിറ്ററിന് 64 കിലോമീറ്ററും സിഎന്ജിയില് കിലോയ്ക്ക് 102 കിലോമീറ്ററുമാണ് ഇന്ധനക്ഷമത അവകാശപ്പെടുന്നത്. ഫുള്ടാങ്കില് ബൈക്ക് 330 കിലോമീറ്റര് ദൂരം ഓടുമെന്നാണ് ബജാജ് പറയുന്നത്. ഫ്രീഡം സിഎന്ജി ബൈക്കിന് 1,800 രൂപ വരെ ഇന്ധനച്ചെലവില് ലാഭിക്കാന് കഴിയുമെന്നാണ് ബജാജിന്റെ അവകാശവാദം. വെറും 99 രൂപ മാത്രമാണ് ഫ്രീഡത്തിന്റെ പ്രവര്ത്തനച്ചെലവെന്ന് യഥാര്ത്ഥ ഡ്രൈവിംഗ് സാഹചര്യങ്ങളില് നടത്തിയ മൈലേജ് ടെസ്റ്റില് കണ്ടെത്തിയിരുന്നു.
വലിയ സീറ്റ് വാഗ്ദാനം ചെയ്യുന്ന ബൈക്കില് രണ്ട് പേര്ക്ക് വളരെ സുഖമായി ഇരിക്കാം. 125 സിസി സെഗ്മെന്റിലെ ഒരു ബൈക്കിലും നല്കാത്ത സസ്പെന്ഷന് സെറ്റപ്പ്, കൂടുതല് കരുത്തുറ്റ ട്രെല്ലിസ് ഫ്രെയിം, 16 ഇഞ്ച് റിയര് വീല്, വീതിയേറിയ ഹാന്ഡില്ബാര്, ബ്ലൂടൂത്ത് കണക്റ്റിവിറ്റിയുള്ള ഫുള് ഡിജിറ്റല് സ്പീഡോമീറ്റര്, എല്ഇഡി ഹെഡ്ലൈറ്റ് എന്നിവ ഫ്രീഡം 125 ബൈക്കിന്റെ സവിശേഷതകളാണ്. 11 സുരക്ഷാ പരിശോധനകളില് വിജയിച്ച ശേഷമാണ് ബജാജ് ബൈക്ക് പുറത്തിറക്കിയത്.
ബജാജ് ഫ്രീഡത്തിന്റെ വില്പ്പന വിപണിയിലേക്ക് കൂടുതല് സിഎന്ജി മോഡലുകള് വരുന്നതിന് നിര്ണായകമാണ്. ടിവിഎസ് ജുപ്പിറ്റര്, സുസുക്കി ആക്സസ് എന്നീ ജനപ്രിയ സ്കൂട്ടറുകളുടെ സിഎന്ജി പതിപ്പുകള് അണിയറയില് ഒരുങ്ങുന്നുണ്ട്. അധികംവൈകാതെ ഇവ പുറത്തിറങ്ങും. ഏതായാലും ബജാജ് ഫ്രീഡത്തിന്റെ വില്പ്പനയിലെ ഈ ഇടിവ് താല്ക്കാലികമാകുമെന്ന് നമുക്ക് പ്രതീക്ഷിക്കാം. വരും മാസങ്ങളില് ബജാജ് ഫ്രീഡം തിരിച്ചടിയില് നിന്ന് കരകയറി വില്പ്പനയില് വീണ്ടും മുന്നേറ്റം നടത്തുമെന്ന് കരുതുന്നു.
Continue with Google