പുത്തൻ നിറത്തിന് 14000 രൂപ കൂടുതൽ മുടക്കണം! 2026 കവസാക്കി നിഞ്ചയിലെ മാറ്റങ്ങൾ ഇതൊക്കെ

കവസാക്കി 2026 മോഡൽ നിഞ്ച 650 ഇന്ത്യൻ വിപണിയിൽ പുറത്തിറക്കിയിരിക്കുകയാണ്. മുൻപുളള മോഡലിനേക്കാൾ 14,000 രൂപ കൂടുതലാണ് ഈ പുതിയ പതിപ്പിന് കമ്പനി നിശ്ചയിച്ചിരിക്കുന്ന വില. നിലവിലെ എക്സ്-ഷോറൂം വില 7.91 ലക്ഷം രൂപയാണ്. പുതിയൊരു 'ലൈം ഗ്രീൻ' കളർ സ്കീമിലാണ് പ്രധാന അപ്ഡേറ്റ് വരുന്നത്. മറ്റ് വലിയ മാറ്റങ്ങളൊന്നും വാഹനത്തിൽ കമ്പനി വരുത്തിയിട്ടില്ല. ഇരട്ട എൽഇഡി ഹെഡ്‌ലാമ്പുകൾ, എയറോഡൈനാമിക് മുൻ വിൻഡ്‌ഷീൽഡ്, ഷാർപ്പ് നിഞ്ചാ സ്റ്റൈലിംഗ്, സ്പോർട്ടി സ്പ്ലിറ്റ് സീറ്റുകൾ, മസ്കുലർ ഫ്യുവൽ ടാങ്ക്, പൂർണ്ണമായി ഫെയറിങ് ചെയ്ത ഡിസൈൻ, വീതിയുള്ള മിററുകൾ, കവസാക്കിയുടെ റേസിംഗ് ലൈവറി എന്നിവയെല്ലാം മാറ്റമില്ലാതെ തുടരുന്നുണ്ട്.

അതിനൊപ്പം തന്നെ നിഞ്ചയിലെ പവർട്രെയിനിൽ മാറ്റങ്ങളൊന്നും വരുത്തിയിട്ടില്ല. 649 സിസി, പാരലൽ-ട്വിൻ, DOHC, ലിക്വിഡ്-കൂൾഡ് എഞ്ചിനാണ് നിഞ്ച 650-ക്ക് കരുത്ത് പകരുന്നത്. ഈ എഞ്ചിൻ 8,000 rpm-ൽ 68 PS കരുത്തും 6,700 rpm-ൽ 62.1 Nm ടോർക്കും ഉത്പാദിപ്പിക്കുന്നു. റിച്ചേൺ ഷിഫ്റ്റോടുകൂടിയ 6-സ്പീഡ് ഗിയർബോക്സാണ് ഇതിനൊപ്പം ജോടിയാക്കിയിരിക്കുന്നത്.

2-മോഡ് KTRC (കവസാക്കി ട്രാക്ഷൻ കൺട്രോൾ), റൈഡോളജി ആപ്പ് വഴിയുള്ള സ്മാർട്ട്‌ഫോൺ കണക്റ്റിവിറ്റി, 4.3 ഇഞ്ച് TFT കളർ ഇൻസ്ട്രുമെന്റ് ക്ലസ്റ്റർ, അസിസ്റ്റ്, സ്ലിപ്പർ ക്ലച്ച്, ഡ്യുവൽ ത്രോട്ടിൽ വാൽവുകൾ, ഡ്യുവൽ-ചാനൽ എബിഎസ് എന്നിവയെല്ലാമാണ് നിഞ്ചയിലെ പ്രധാന പ്രീമിയം ഫീച്ചറുകളായി എടുത്തു പറയേണ്ടത്.

ഉയർന്ന ടെൻസൈൽ സ്റ്റീൽ ട്രെല്ലിസ് ഫ്രെയിമിലാണ് നിഞ്ച 650 നിർമ്മിച്ചിരിക്കുന്നത്. മുന്നിൽ 41mm ടെലിസ്കോപിക് ഫോർക്കും പിന്നിൽ ഹോറിസോണ്ടൽ ബാക്ക്-ലിങ്ക് മോണോഷോക്കുമാണ് സസ്പെൻഷൻ. ബ്രേക്കിംഗിനായി മുന്നിൽ 300mm ഡ്യുവൽ സെമി-ഫ്ലോട്ടിംഗ് പെറ്റൽ ഡിസ്‌കുകളും പിന്നിൽ 220mm സിംഗിൾ പെറ്റൽ ഡിസ്കുമാണുള്ളത്. 17 ഇഞ്ച് അലോയ് വീലുകളിൽ ട്യൂബ്‌ലെസ് ടയറുകൾ ഘടിപ്പിച്ചിരിക്കുന്നു.

പുതിയ നിറം മാത്രമുള്ള മാറ്റം ചില വാഹനപ്രേമികളെ നിരാശപ്പെടുത്തിയേക്കാം. എങ്കിലും മികച്ച പ്രകടനവും സമ്പന്നമായ ഫീച്ചറുകളും കാരണം ഈ മിഡിൽവെയ്റ്റ് മോട്ടോർസൈക്കിൾ ഇപ്പോഴും സെഗ്മെൻ്റിൽ മുന്നിൽ തന്നെയുണ്ട്. ഹോണ്ട CBR 650R, ട്രയംഫ് ഡേടോണ 660, അപ്രീലിയ ടുവോനോ 660 എന്നിവരാണ് ഈ വിഭാഗത്തിലെ പ്രധാന എതിരാളികൾ.

മോഡേൺ ക്ലാസിക് റോഡ്‌സ്റ്ററായ W230 (Kawasaki W230) ആണ് ഇന്ത്യയിലേക്ക് കമ്പനി കൊണ്ടുവരാൻ ഒരുങ്ങുകയാണ്. ഇതിൻ്റെ സൂചന നൽകുന്ന ആദ്യ ടീസറും ബ്രാൻഡ് തങ്ങളുടെ ഇൻസ്റ്റഗ്രാം പേജ് വഴി പങ്കുവെച്ചിരുന്നു. വരവ് നടക്കുകയാണെങ്കിൽ റോയൽ എൻഫീൽഡ് ബുള്ളറ്റിനെ പൂട്ടാൻ കവസാക്കിക്ക് സാധിക്കുമെന്നാണ് ആരാധകരുടെ വിശ്വാസം.

ആദ്യ കാഴ്ച്ചയിൽ തന്നെ ഏതൊരു ക്ലാസിക് മോട്ടോർസൈക്കിൾ പ്രേമിയുടേയും മനസിൽ ഇടം കണ്ടെത്താനുള്ള സൗന്ദര്യം കവസാക്കി W230 മോഡേൺ ക്ലാസിക് റോഡ്‌സ്റ്ററിനുണ്ട്. കാലാനുസൃതമായ മോഡേൺ ക്ലാസിക് ഡിസൈൻ, നല്ല വലിപ്പം, ഗംഭീര ഫീച്ചറുകൾ തുടങ്ങി നിരവധി സവിശേഷതകളോടെയാണ് 650-W1 മോഡലിൽ നിന്ന് പ്രചോദനം ഉൾക്കൊണ്ട് നിർമിച്ച പുതിയ W230 വിപണിയിലെത്തുക.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു.ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലിഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻ്റ് ചെയ്യാനും മറക്കല്ലേ.