പ്രേമലു പോലെ അതിലെ ഇ-സ്‌കൂട്ടറും ബ്ലോക്ക്ബസ്റ്റര്‍! ശരവേഗത്തില്‍ 20000 യൂണിറ്റും കടന്ന് കുതിപ്പ്

കഴിഞ്ഞ വര്‍ഷം മോളിവുഡില്‍ പിറന്ന സര്‍പ്രൈസ് ഹിറ്റ് ചിത്രമായിരുന്നു പ്രേമലു. 100 കോടി രൂപയിലധികം കളക്ഷന്‍ നേടിയ സിനിമയിലെ പാട്ടുകളും ശ്രദ്ധിക്കപ്പെട്ടിരുന്നു. ഇതിലെ ഒരു ഗാനരംഗത്തില്‍ നസ്‌ലെനും മമിത ബൈജുവും ഹൈദരാബാദ് നഗരത്തിലൂടെ ചുറ്റിക്കറങ്ങുന്ന ഒരു സ്‌കൂട്ടറില്‍ പലരുടെയും കണ്ണുടക്കിയിട്ടുണ്ടാകും. മലയാളികള്‍ ഉടമകളായ റിവര്‍ മൊബിലിറ്റി പുറത്തിറക്കുന്ന ഇന്‍ഡി എന്ന ഇലക്ട്രിക് സ്‌കൂട്ടറായിരുന്നു അത്. പ്രേമലു പോലെ തന്നെ അതിലെ സ്‌കൂട്ടറും സൂപ്പര്‍ ഹിറ്റായി. ഇപ്പോള്‍ റിവര്‍ മൊബിലിറ്റി ഒരു സുപ്രധാന ഉത്പാദന നാഴികക്കല്ല് പിന്നിട്ടിരിക്കുകയാണ്. കര്‍ണാടകയിലെ ഹോസ്‌കോട്ടിലുള്ള നിര്‍മ്മാണശാലയില്‍ നിന്ന് 20000-ാമത്തെ 'റിവര്‍ ഇന്‍ഡി' പുറത്തിറക്കിയാണ് കമ്പനി നേട്ടം കൈവരിച്ചത്.

ലോഞ്ച് ചെയ്ത് വെറും രണ്ട് വര്‍ഷത്തിനുള്ളിലാണ് ഈ മികച്ച മുന്നേറ്റം സാധ്യമാക്കിയത്. ആറ് മാസം മുമ്പാണ് റിവര്‍ ഇന്‍ഡിയുടെ വില്‍പ്പന 10,000 യൂണിറ്റ് നാഴികക്കല്ല് പിന്നിട്ടത്. ഡിമാന്‍ഡ് വര്‍ധിച്ചതിനൊപ്പം ഉല്‍പ്പാദന ശേഷി ഉയര്‍ത്തുകയും ഡീലര്‍ഷിപ്പ് ശൃംഖല വിപുലീകരിക്കുകയും ചെയ്താണ് റിവര്‍ മൊബിലിറ്റി ചുരുങ്ങിയ നാളുകള്‍ കൊണ്ട് ഈ തരത്തില്‍ ഒരു വളര്‍ച്ച സാധ്യമാക്കിയത്.

റീട്ടെയില്‍ ശൃംഖല ശക്തിപ്പെടുത്തുന്നതിന്റെ ഭാഗമായി അടുത്തിടെ കമ്പനി രാജസ്ഥാന്‍, മധ്യപ്രദേശ്, ഡല്‍ഹി, മഹാരാഷ്ട്ര ഉള്‍പ്പെടെയുള്ള പുതിയ സംസ്ഥാനങ്ങളിലേക്ക് തങ്ങളുടെ സാന്നിധ്യം വ്യാപിപ്പിച്ചിരുന്നു. ഉത്തരേന്ത്യയിലെ സാന്നിധ്യം വര്‍ധിപ്പിക്കുന്നതിനായി 'ഇന്‍ഡി ജെന്‍ 3' എന്ന പുതിയ പതിപ്പ് പുറത്തിറക്കുകയും ഡല്‍ഹിയില്‍ സ്വന്തമായി ഒരു സ്റ്റോര്‍ തുറക്കുകയും ചെയ്തു. നിലവില്‍ രാജ്യത്തിന്റെ വിവധ ഭാഗങ്ങളിലായി ഏകദേശം 40 സ്റ്റോറുകളാണ് റിവര്‍ മൊബിലിറ്റിക്കുള്ളത്.

ദക്ഷിണേന്ത്യന്‍ നഗരങ്ങളായ ബെംഗളൂരു, ചെന്നൈ, ഹൈദരാബാദ്, കൊച്ചി, കോയമ്പത്തൂര്‍ എന്നിവിടങ്ങളില്‍ ഇതിനോടകം തന്നെ ശക്തമായ സാന്നിധ്യമാകാന്‍ റിവര്‍ മൊബിലിറ്റിക്ക് സാധിച്ചു. കൊച്ചി കൂടാതെ തിരുവനന്തപുരം, കോഴിക്കോട്, കൊല്ലം, കോട്ടയം, മലപ്പുറം, പാലക്കാട്, തൃശൂര്‍ എന്നീ നഗരങ്ങളിലും റിവറിന് ഷോറൂമുകളുണ്ട്. അടുത്തതായി പഞ്ചാബ്, ഉത്തര്‍പ്രദേശ്, ഗുജറാത്ത് തുടങ്ങിയ പ്രധാന സംസ്ഥാനങ്ങളാണ് കമ്പനി കണ്ണുവെച്ചിരിക്കുന്നത്.

'രണ്ട് വര്‍ഷത്തിനുള്ളില്‍ 20,000 ഇന്‍ഡി സ്‌കൂട്ടറുകള്‍ എന്ന ഈ നേട്ടം ഞങ്ങളുടെ ഉല്‍പ്പന്നങ്ങളെ ഉപഭോക്താക്കള്‍ സ്‌നേഹിക്കുന്നു എന്നതിന്റെ തെളിവാണ്. പുതിയ നഗരങ്ങളിലേക്ക് വികസിപ്പിക്കുകയും ഉല്‍പ്പാദനം വര്‍ദ്ധിപ്പിക്കുകയും ചെയ്യുമ്പോള്‍, ഓരോ റൈഡറുടെയും അനുഭവം മെച്ചപ്പെടുത്തുന്നതിലാണ് ഞങ്ങളുടെ ശ്രദ്ധ' റിവര്‍ മൊബിലിറ്റിയുടെ സഹസ്ഥാപകനും ചീഫ് എക്‌സിക്യൂട്ടീവ് ഓഫീസറുമായ അരവിന്ദ് മണി പറഞ്ഞു.

ആവശ്യാനുസരണം ഉല്‍പ്പാദനം വര്‍ധിപ്പിക്കാന്‍ പറ്റുന്ന രീതിയിലാണ് റിവറിന്റെ ഹോസ്‌കോട്ടിലെ ഫാക്ടറി രൂപകല്‍പ്പന ചെയ്തിരിക്കുന്നത്. ഉല്‍പ്പാദന ശേഷി വര്‍ധിപ്പിച്ച് ഡിമാന്‍ഡ് നിറവേറ്റാന്‍ ഇത് സഹായിക്കുന്നു. പുതിയ ഇലക്ട്രിക് ഉല്‍പ്പന്നങ്ങള്‍ പുറത്തിറക്കാനും ഉല്‍പ്പാദന ശേഷി ഗണ്യമായി വര്‍ധിപ്പിക്കാനും കമ്പനി ഒരുങ്ങുകയാണ്. 2025 നവംബറില്‍ റിവര്‍ മൊബിലിറ്റി മികച്ച വില്‍പ്പന നേടി. 1,801 പുതിയ ഉപഭോക്താക്കളെ ലഭിച്ചതോടെ ഏറ്റവും ഉയര്‍ന്ന പ്രതിമാസ വില്‍പ്പന രേഖപ്പെടുത്താനായി.

കഴിഞ്ഞ 11 മാസത്തിനുള്ളില്‍ റിവര്‍ ഇന്‍ഡി ഏഴ് തവണ ടോപ്പ് 10 ലിസ്റ്റിംഗില്‍ ഇടം നേടിയിട്ടുണ്ട്. വാഹന്‍ റീട്ടെയില്‍ വില്‍പ്പന ഡാറ്റാ പ്രകാരം നവംബറിലെ പ്രകടനത്തിലൂടെ റിവര്‍ ഇന്‍ഡിയുടെ മൊത്തം വില്‍പ്പന 15,000 യൂണിറ്റ് നാഴികക്കല്ല് മറികടക്കാന്‍ സഹായിച്ചു. 2023 ഒക്ടോബര്‍ മുതല്‍ നവംബര്‍ അവസാനം വരെ ആകെ വില്‍പ്പന 16,041 യൂണിറ്റാണ്.

കഴിഞ്ഞ 11 മാസത്തിനുള്ളില്‍ 13,434 യൂണിറ്റുകള്‍ വിറ്റഴിച്ചതോടെ ഈ വര്‍ഷം ആദ്യമായി റിവര്‍ മൊബിലിറ്റി കലണ്ടര്‍ വര്‍ഷം 15,000 യൂണിറ്റ് വില്‍പ്പനയെന്ന നേട്ടം കുറിക്കും. ഇലക്ട്രിക് സ്‌കൂട്ടറുകളിലെ എസ്‌യുവി എന്ന് വിളിക്കപ്പെടുന്ന റിവര്‍ ഇന്‍ഡിയുടെ തിരുവനന്തപുരത്തെ എക്‌സ്‌ഷോറൂം വില 145,799 രൂപയാണ്. മണ്‍സൂണ്‍ ബ്ലൂ, സ്പ്രിംഗ് യെല്ലോ, സ്റ്റോം ഗ്രേ, സമ്മര്‍ റെഡ്, വിന്റര്‍ വൈറ്റ് എന്നീ അഞ്ച് നിറങ്ങളില്‍ ലഭ്യമാണ്.

നഗര യാത്രകള്‍ക്കും ചെറിയ വാരാന്ത്യ യാത്രകള്‍ക്കും വേണ്ടി രൂപകല്‍പ്പന ചെയ്തിരിക്കുന്ന ഇവിക്ക് 4 kWh NMC ബാറ്ററി പായ്ക്കാണ് ലഭിക്കുന്നത്. ഒറ്റത്തവണ ചാര്‍ജ് ചെയ്താല്‍ ഇന്‍ഡി 163 കിലോമീറ്റര്‍ ഓടുമെന്ന് റിവര്‍ മൊബിലിറ്റി അവകാശപ്പെടുന്നു. ബാറ്ററി 0-80% ചാര്‍ജ് അഞ്ച് മണിക്കൂര്‍ എടുക്കും. റിവര്‍ ഇന്‍ഡി സ്‌കൂട്ടര്‍ 6.7 kW (9hp) പീക്ക് പവറും 26 Nm ടോര്‍ക്കും വികസിപ്പിക്കുന്നു.

പൂജ്യത്തില്‍ നിന്ന് മണിക്കൂറില്‍ 40 കിലോമീറ്റര്‍ വേഗത കൈവരിക്കാന്‍ 3.7 സെക്കന്‍ഡ് മതി. പരമാവധി വേഗത മണിക്കൂറില്‍ 90 കിലോമീറ്ററാണ്. 55 ലിറ്റര്‍ ലോക്ക് ചെയ്യാവുന്ന സംഭരണശേഷി, മുന്‍വശത്തെ ഫുട്‌പെഗുകള്‍, റൈഡിംഗ് സുഖവും റൈഡിംഗ് സുഖവും മെച്ചപ്പെടുത്തുന്നതിനായി 14 ഇഞ്ച് വീലുകള്‍ എന്നിവയാണ് മറ്റ് ഹൈലൈറ്റുകള്‍. ഇക്കോ, റൈഡ്, റഷ് എന്നീ മൂന്ന് റൈഡിംഗ് മോഡുകളും ഇന്‍ഡിയിൽ ലഭ്യമാണ്.