ABS സുരക്ഷയുള്ള ഏറ്റവും വില കുറഞ്ഞ 5 സ്‌കൂട്ടറുകൾ; ലിസ്റ്റിൽ സ്വദേശിയും വിദേശിയുമെല്ലാം ഉണ്ട്

ഇന്ത്യയിലെ തിരക്കേറിയ റോഡുകളിലെ യാത്രകള്‍ സുരക്ഷിതമാക്കുന്നതില്‍ ബ്രേക്കിംഗ് സംവിധാനങ്ങള്‍ വഹിക്കുന്ന പങ്ക് വളരെ വലുതാണ്. ബ്രേക്കിംഗുമായി ബന്ധപ്പെട്ട് നമ്മള്‍ ഏറ്റവും കൂടുതലായി കേള്‍ക്കുന്ന ഒരു വാക്കാണ് എബിഎസ് അഥവാ ആന്റിലോക്ക് ബ്രേക്കിംഗ് സിസ്റ്റം. സഡന്‍ ബ്രേക്കിംഗ് സമയത്ത് ടയറുകള്‍ ലോക്ക് ആകുന്നത് തടഞ്ഞ് വാഹനത്തിന്റെ നിയന്ത്രണം നിലനിര്‍ത്താന്‍ ABS സഹായിക്കുന്നു. മുന്‍നിര ബ്രാന്‍ഡുകളില്‍ നിന്നുള്ള ജനപ്രിയ സ്‌കൂട്ടറുകളില്‍ ഈ സേഫ്റ്റി ഫീച്ചര്‍ ലഭ്യമാണ്. ഇന്ത്യയില്‍ കുറഞ്ഞ വിലയില്‍ എബിഎസ് ഓഫര്‍ ചെയ്യുന്ന ജനപ്രിയ സ്‌കൂട്ടറുകള്‍ ഏതൊക്കെയാണെന്ന് ഈ ലേഖനത്തില്‍ വായിക്കാം.

സുസുക്കി ആക്‌സസ് 125 (Suzuki Access 125)

കുറഞ്ഞ വിലയില്‍ ABS സുരക്ഷ നല്‍കുന്ന ഇന്ത്യയിലെ മുന്‍നിര മോഡലാണ് സുസുക്കി ആക്‌സസ് 125. നിലവില്‍ 92,328 രൂപ മുതല്‍ 98,378 രൂപ വരെയാണ് ആക്‌സസ് 125-ന്റെ എക്‌സ്-ഷോറൂം വില വരുന്നത്. 8.4 PS പവറും 10.2 Nm പീക്ക് ടോര്‍ക്കും ഉത്പാദിപ്പിക്കുന്ന 124 സിസി എഞ്ചിനാണ് ഇതിന് കരുത്ത് പകരുന്നത്. ബ്ലൂടൂത്ത് കണക്റ്റിവിറ്റിയും ഡിജിറ്റല്‍ ഇന്‍സ്ട്രുമെന്റ് ക്ലസ്റ്ററും ഉള്ള ഈ സ്‌കൂട്ടര്‍ സുരക്ഷയ്ക്കും സൗകര്യത്തിനും ഒരുപോലെ മുന്‍ഗണന നല്‍കുന്നു.

ടിവിഎസ് എന്‍ടോര്‍ഖ് 150 (TVS Ntorq 150)

സ്‌പോര്‍ട്ടി സ്‌കൂട്ടറുകള്‍ ഇഷ്ടപ്പെടുന്നവര്‍ക്ക് വേണ്ടി ടിവിഎസ് അവതരിപ്പിച്ച കരുത്തുറ്റ മോഡലാണ് എന്‍ടോര്‍ഖ് 150. നിലവില്‍ 1.09 ലക്ഷം രൂപ എക്‌സ്‌ഷോറൂം വിലയില്‍ വിപണിയിലെത്തുന്ന ഈ സ്‌കൂട്ടറിന് 149.7 സിസി എഞ്ചിനാണ് തുടിപ്പേകുന്നത്. 13.2 hp പവറുള്ള എഞ്ചിനോടൊപ്പം സിംഗിള്‍ ചാനല്‍ എബിഎസ് കൂടി ചേരുമ്പോള്‍ ഡ്രൈവിംഗ് കൂടുതല്‍ സുരക്ഷിതമാകുന്നു. സ്മാര്‍ട്ട്ഫോണ്‍ നോട്ടിഫിക്കേഷനുകള്‍ ലഭിക്കുന്ന ഫുള്ളി ഡിജിറ്റല്‍ ക്ലസ്റ്ററും ഇതിന്റെ പ്രത്യേകതയാണ്.

അപ്രീലിയ SR 175 (Aprilia SR 175)

പെര്‍ഫോമന്‍സിന് പ്രാധാന്യം നല്‍കുന്നവര്‍ക്കുള്ള മികച്ച ചോയ്‌സാണ് അപ്രീലിയയുടെ SR 175. 174.7 സിസി എഞ്ചിനാണ് 1.26 ലക്ഷം രൂപ വിലയുള്ള ഈ സ്‌കൂട്ടറിന്റെ ഹൃദയം. മികച്ച റോഡ് ഗ്രിപ്പ് നല്‍കുന്ന വലിയ 14 ഇഞ്ച് വീലുകളും കൃത്യതയാര്‍ന്ന ബ്രേക്കിംഗിനായി സിംഗിള്‍ ചാനല്‍ എബിഎസ് സംവിധാനവും ഇതില്‍ കമ്പനി നല്‍കിയിട്ടുണ്ട്. സ്‌കൂട്ടറിനെ കൂടുതല്‍ പ്രീമിയമാക്കാനായി ടിഎഫ്ടി ഡിസ്പ്ലേയും എല്‍ഇഡി ലൈറ്റിംഗും നല്‍കിയിട്ടുണ്ട്.

VLF മോബ്സ്റ്റര്‍ 135 (VLF Mobster 135)

ഇന്ത്യയില്‍ ഡ്യുവല്‍ ചാനല്‍ എബിഎസ് (Dual-channel ABS) സുരക്ഷ നല്‍കുന്ന അപൂര്‍വ്വം സ്‌കൂട്ടറുകളില്‍ ഒന്നാണ് VLF മോബ്സ്റ്റര്‍ 135. രണ്ട് വീലുകളിലും ഡിസ്‌ക് ബ്രേക്കുകളുള്ള ഈ സ്‌കൂട്ടറിന് 1.30 ലക്ഷം രൂപയാണ് എക്‌സ്-ഷോറൂം വില. ഇതിലെ 125 സിസി എഞ്ചിന്‍ 12.1 bhp പവര്‍ നല്‍കുന്നു. ട്രാക്ഷന്‍ കണ്‍ട്രോള്‍, കീലെസ് ഇഗ്‌നിഷന്‍ തുടങ്ങിയ അത്യാധുനിക ഫീച്ചറുകള്‍ ഈ ഇറ്റാലിയന്‍ സ്‌കൂട്ടറിന്റെ മാറ്റ് കൂട്ടുന്നു.

ഹീറോ സൂം 160 (Hero Xoom 160)

ഹീറോ മോട്ടോകോര്‍പ്പിന്റെ ഏറ്റവും കരുത്തുറ്റ സ്‌കൂട്ടറായ സൂം 160 പട്ടികയില്‍ അഞ്ചാം സ്ഥാനത്തുണ്ട്. 1.37 ലക്ഷം രൂപ വിലയുള്ള ഈ മോഡലില്‍ 156 സിസി ലിക്വിഡ് കൂള്‍ഡ് എഞ്ചിനാണുള്ളത്. 14.6 bhp പവറുള്ള ഇവി സിംഗിള്‍ ചാനല്‍ എബിഎസ് സുരക്ഷയോടെയാണ് എത്തുന്നത്. ടാള്‍ വിന്‍ഡ്സ്‌ക്രീന്‍, എല്‍ഇഡി ലൈറ്റിംഗ് എന്നിവ അഡ്വഞ്ചര്‍ യാത്രകള്‍ക്കും സിറ്റി ഡ്രൈവിംഗിനും ഒരുപോലെ അനുയോജ്യമാണ്.

സാങ്കേതിക മികവും സുരക്ഷയും

എബിഎസ് സാങ്കേതികവിദ്യ വഴുക്കലുള്ള റോഡുകളില്‍ വാഹനം തെന്നിമാറാനുള്ള സാധ്യത കുറയ്ക്കുന്നു. സാധാരണ സ്‌കൂട്ടറുകളില്‍ കാണുന്ന കോംബി-ബ്രേക്കിംഗിനേക്കാള്‍ (CBS) എത്രയോ മടങ്ങ് സുരക്ഷയാണ് എബിഎസ് നല്‍കുന്നത്. പെര്‍ഫോമന്‍സ് സ്‌കൂട്ടറുകള്‍ക്ക് ആവശ്യക്കാര്‍ കൂടുന്നതോടെ കൂടുതല്‍ കമ്പനികള്‍ ഈ ഫീച്ചര്‍ ഉള്‍പ്പെടുത്താന്‍ തുടങ്ങിയിട്ടുണ്ട്. ഇത് അപകടസാധ്യതകള്‍ കുറയ്ക്കാന്‍ ഏറെ സഹായിക്കുമെന്നാണ് വാഹന വിദഗ്ദ്ധരുടെ പക്ഷം.

വിപണിയിലെ മാറ്റങ്ങള്‍

വിലയേക്കാള്‍ സുരക്ഷയ്ക്ക് മുന്‍ഗണന നല്‍കുന്ന ഒരു വിഭാഗം ഉപഭോക്താക്കള്‍ ഇന്ത്യയില്‍ വളര്‍ന്നു വരുന്നുണ്ട്. 1 ലക്ഷം രൂപയ്ക്ക് മുകളിലുള്ള പ്രീമിയം സ്‌കൂട്ടര്‍ സെഗ്മെന്റില്‍ എബിഎസ് ഇപ്പോള്‍ പ്രധാന മാനദണ്ഡമായി മാറിക്കഴിഞ്ഞു. ഹീറോ, ടിവിഎസ് പോലുള്ള ബ്രാന്‍ഡുകള്‍ തങ്ങളുടെ പുതിയ മോഡലുകളില്‍ ഈ സൗകര്യം ഉറപ്പാക്കുന്നു. വരും വര്‍ഷങ്ങളില്‍ കുറഞ്ഞ എഞ്ചിന്‍ ശേഷിയുള്ള സ്‌കൂട്ടറുകളിലും ABS നിര്‍ബന്ധമാക്കിയേക്കാം. സുരക്ഷിത യാത്രയ്ക്കായി മുകളില്‍ പറഞ്ഞ ഏത് സ്‌കൂട്ട നിങ്ങള്‍ തിരഞ്ഞെടുക്കും?. നിങ്ങളുടെ അഭിപ്രായം താഴെ കമന്റ് ചെയ്യൂ.