പുതിയ ലുക്കിൽ കവാസാക്കി Z650RS MY27; ആകർഷകമായ നിറവുമായി വിപണിയിൽ, വിലയും വിവരങ്ങളും

കവാസാക്കി ഇന്ത്യയുടെ ജനപ്രിയ ബൈക്കായ Z650RS-ന്റെ പുതിയ MY27 പതിപ്പ് വിപണിയിലെത്തി. 7.83 ലക്ഷം രൂപയാണ് (എക്സ്-ഷോറൂം) ഇന്ത്യയിലുടനീളമുള്ള വില. മെക്കാനിക്കൽ മാറ്റങ്ങളൊന്നുമില്ലാതെ എത്തുന്ന ഈ നിയോ-റെട്രോ മിഡിൽവെയ്റ്റ് മോഡലിൽ, ആകർഷകമായ 'മെറ്റാലിക് ഓഷ്യൻ ബ്ലൂ' എന്ന പുതിയ കളർ ഓപ്ഷനാണ് കവാസാക്കി ഉൾപ്പെടുത്തിയിരിക്കുന്നത്. കവാസാക്കി ഡീലർഷിപ്പുകൾ വഴിയും ഔദ്യോഗിക വെബ്‌സൈറ്റ് വഴിയും ബുക്കിംഗ് ആരംഭിച്ചുകഴിഞ്ഞു. ഡീലർഷിപ്പുകളിലെ സ്റ്റോക്കിന് അനുസരിച്ചായിരിക്കും ഡെലിവറി.

ബൈക്കിന്റെ പ്രധാന ഫീച്ചറുകളിലൊന്നും മാറ്റമില്ല. 68 എച്ച്പി കരുത്തും 64 എൻഎം ടോർക്കും നൽകുന്ന 649 സിസി പാരലൽ-ട്വിൻ എഞ്ചിൻ തന്നെയാണ് ഇതിലുമുള്ളത്. നഗരയാത്രകൾക്കും ഹൈവേ റൈഡുകൾക്കും ഒരുപോലെ അനുയോജ്യമായ പെർഫോമൻസാണ് ഇത് വാഗ്ദാനം ചെയ്യുന്നത്. ടു-മോഡ് കവാസാക്കി ട്രാക്ഷൻ കൺട്രോൾ (KTRC), ഡ്യുവൽ ചാനൽ എബിഎസ്, അസിസ്റ്റ് ആന്റ് സ്ലിപ്പർ ക്ലച്ച്, 12 ലിറ്റർ ഫ്യുവൽ ടാങ്ക്, 820 എംഎം സീറ്റ് ഹൈറ്റ്, എൽസിഡി സ്ക്രീനോട് കൂടിയ അനലോഗ് മീറ്റർ, സ്പോക്ക് സ്റ്റൈൽ കാസ്റ്റ് വീലുകൾ എന്നിവ ബൈക്കിന്റെ പ്രധാന പ്രത്യേകതകളാണ്.

പ്രധാന വിവരങ്ങൾ: Kawasaki Z650RS MY27

ഈ വർഷം ബൈക്കിൽ എന്തൊക്കെ മാറ്റങ്ങളാണ് വന്നിട്ടുള്ളത്? ചുരുക്കി പറഞ്ഞാൽ പുതിയ ബാഡ്ജിംഗും കളർ ഷേഡും മാത്രം. MY26 മോഡലുമായി താരതമ്യം ചെയ്യുമ്പോൾ ഹാർഡ്‌വെയറിലോ ഫീച്ചറുകളിലോ മറ്റ് മാറ്റങ്ങളൊന്നുമില്ല. ഇന്ത്യയിൽ 'മെറ്റാലിക് ഓഷ്യൻ ബ്ലൂ' കളറിൽ മാത്രമായിരിക്കും ഈ ബൈക്ക് ലഭ്യമാവുക. മുൻ വർഷത്തെ അതേ വിലയിൽ തന്നെ നിലനിർത്തിയത് സാങ്കേതിക അപ്‌ഡേറ്റിനേക്കാൾ മോഡൽ ലൈഫ് സൈക്കിൾ നിലനിർത്താനുള്ള ശ്രമമായാണ് വിലയിരുത്തപ്പെടുന്നത്.

വിലയും ലഭ്യതയും: Kawasaki Z650RS MY27

7.83 ലക്ഷം രൂപയിലാണ് ബൈക്കിന്റെ എക്സ്-ഷോറൂം വില ആരംഭിക്കുന്നത്. ഇൻഷുറൻസും സംസ്ഥാന നികുതികളും അനുസരിച്ച് ഓൺ-റോഡ് വിലയിൽ മാറ്റമുണ്ടാകും. കൊച്ചിയിൽ ഏകദേശം 10.10 ലക്ഷം രൂപയും ബെംഗളൂരുവിൽ 9.62 ലക്ഷം രൂപയും ഡൽഹിയിൽ 8.83 ലക്ഷം രൂപയുമാണ് നിലവിലുള്ള കണക്കുകൾ പ്രകാരമുള്ള ഓൺ-റോഡ് വില. ഏകദേശം 5,000 രൂപ നൽകി ഡീലർഷിപ്പുകൾ വഴി ബൈക്ക് ബുക്ക് ചെയ്യാം. ബുക്ക് ചെയ്യുന്നതിന് മുൻപ് കളർ ലഭ്യതയും മറ്റ് ചാർജുകളും ചോദിച്ചറിയുന്നത് നന്നായിരിക്കും.

മത്സരിക്കുന്ന മോഡലുകൾ: Kawasaki Z650RS MY27

പ്രീമിയം ജാപ്പനീസ് നിയോ-റെട്രോ ബൈക്കായ Z650RS വിപണിയിൽ ട്രയംഫിന്റെ സ്പീഡ് ട്വിൻ 900, റോയൽ എൻഫീൽഡിന്റെ ഇന്റർസെപ്റ്റർ 650 എന്നിവയോടാണ് പ്രധാനമായും മത്സരിക്കുന്നത്. ട്രയംഫ് സ്പീഡ് ട്വിൻ 900-ന് ഏകദേശം 9.71 ലക്ഷം രൂപയും റോയൽ എൻഫീൽഡ് ഇന്റർസെപ്റ്ററിന് 3.38 ലക്ഷം രൂപ മുതലുമാണ് എക്സ്-ഷോറൂം വില. മികച്ച റിഫൈൻമെന്റ്, കുറഞ്ഞ ഭാരം, ട്രാക്ഷൻ കൺട്രോൾ പോലുള്ള സേഫ്റ്റി ഫീച്ചറുകൾ എന്നിവ ആഗ്രഹിക്കുന്ന റൈഡർമാരെയാണ് കവാസാക്കി Z650RS ലക്ഷ്യമിടുന്നത്.