ബജാജിന്റെ സർപ്രൈസ്! വെറും 91,399 രൂപയ്ക്ക് പുത്തൻ ചേതക് C25 എത്തി; 113 കി.മീ റേഞ്ചും ഇരട്ട സസ്പെൻഷനും

ഇന്ത്യന്‍ ഇരുചക്ര വാഹന വിപണിയിലെ കരുത്തരായ ബജാജ് ഓട്ടോ തങ്ങളുടെ ചേതക് ഇലക്ട്രിക് സ്‌കൂട്ടര്‍ ശ്രേണിയിലേക്ക് പുതിയ 'ചേതക് C25' (Bajaj Chetak C25) മോഡല്‍ അവതരിപ്പിച്ചു. നഗരയാത്രകള്‍ കൂടുതല്‍ സുഗമമാക്കാന്‍ ലക്ഷ്യമിട്ട് പുറത്തിറക്കിയ ഈ സ്‌കൂട്ടറിന് 91,399 രൂപയാണ് എക്‌സ്-ഷോറൂം വില നിശ്ചയിച്ചിരിക്കുഞ്ഞത്. കുറഞ്ഞ വിലയില്‍ മികച്ച പ്രകടനം ആഗ്രഹിക്കുന്നവര്‍ക്കായിട്ടാണ് ഈ മോഡല്‍ എത്തിയിരിക്കുന്നത്. ഇന്ത്യയിലെ ഇലക്ട്രിക് സ്‌കൂട്ടര്‍ വിഭാഗത്തില്‍ ഒന്നാം സ്ഥാനം ലക്ഷ്യമിടുന്ന ബജാജിന്റെ പുത്തന്‍ ഉല്‍പ്പന്നത്തെ കുറിച്ച് വിശദമായി അറിയാം.

തിരക്കേറിയ സിറ്റി റോഡുകളിലൂടെയുള്ള യാത്രകള്‍ക്ക് അനുയോജ്യമായ രീതിയിലാണ് ചേതക് C25 രൂപകല്‍പ്പന ചെയ്തിരിക്കുന്നത്. ഇടുങ്ങിയ വഴികളിലൂടെ അനായാസം ഓടിക്കാന്‍ സാധിക്കുന്ന തരത്തില്‍ ലൈറ്റ്‌വെയിറ്റായാണ് ഇത് പണിതിരിക്കുന്നത്. 107 കിലോഗ്രാം മാത്രം ഭാരമുള്ള ഈ സ്‌കൂട്ടര്‍ ഏതൊരു റൈഡര്‍ക്കും വളരെ എളുപ്പത്തില്‍ ഹാന്‍ഡില്‍ ചെയ്യാന്‍ സാധിക്കുമെന്നത് വലിയ നേട്ടമാണ്.

സാങ്കേതിക വശങ്ങളിലേക്ക് നോക്കിയാല്‍, 2.5 kWh ശേഷിയുള്ള എന്‍എംസി (NMC) ബാറ്ററിയാണ് ഇതില്‍ ഉപയോഗിച്ചിരിക്കുന്നത്. ഇത് സ്‌കൂട്ടറിന്റെ ഫ്‌ലോര്‍ബോര്‍ഡിലാണ് ഘടിപ്പിച്ചിരിക്കുന്നത്. ഇത് സ്‌കൂട്ടറിന്റെ ബാലന്‍സ് നിലനിര്‍ത്താന്‍ സഹായിക്കുന്നു. 2.2kW കരുത്തുള്ള മോട്ടോറാണ് ഈ സ്‌കൂട്ടറിന് കരുത്തേകുന്നത്. ഒറ്റത്തവണ ചാര്‍ജ് ചെയ്താല്‍ 113 കിലോമീറ്റര്‍ റേഞ്ച് ലഭിക്കുമെന്ന് ബജാജ് അവകാശപ്പെടുന്നു.

ഫാസ്റ്റ് ചാര്‍ജിംഗ് സൗകര്യമാണ് ചേതക് C25 ഇലക്ട്രിക് സ്‌കൂട്ടറിന്റെ മറ്റൊരു പ്രത്യേകത. 750W ഓഫ്-ബോര്‍ഡ് ചാര്‍ജര്‍ ഉപയോഗിച്ച് വെറും 2 മണിക്കൂര്‍ 25 മിനിറ്റ് കൊണ്ട് പൂജ്യത്തില്‍ നിന്ന് 80 ശതമാനം വരെ ചാര്‍ജ് ചെയ്യാം. നാല് മണിക്കൂറിനുള്ളില്‍ ബാറ്ററി പൂര്‍ണ്ണമായും ചാര്‍ജ് ചെയ്യാനും സാധിക്കും. നഗരങ്ങളിലെ ദൈനംദിന ആവശ്യങ്ങള്‍ക്ക് ഈ ചാര്‍ജിംഗ് വേഗത ഏറെ ഉപകരിക്കും.

കയറ്റങ്ങള്‍ അനായാസം കയറുന്നതിനായി 'ഹില്‍ ഹോള്‍ഡ് അസിസ്റ്റ്' (Hill Hold Assist) സംവിധാനം ഇതില്‍ ഉള്‍പ്പെടുത്തിയിട്ടുണ്ട്. രണ്ട് യാത്രക്കാരുമായി 19 ശതമാനം ചരിവുള്ള കയറ്റങ്ങള്‍ വരെ ഈ സ്‌കൂട്ടര്‍ അനായാസം മറികടക്കും. മറ്റ് ചേതക് മോഡലുകളില്‍ നിന്ന് വ്യത്യസ്തമായി മുന്നില്‍ ഇരട്ട ടെലിസ്‌കോപ്പിക് സസ്‌പെന്‍ഷനാണ് നല്‍കിയിരിക്കുന്നത്. ഇത് സുരക്ഷിതമായ യാത്രയും മികച്ച ബ്രേക്കിംഗും ഉറപ്പാക്കുന്നു.

യൂട്ടിലിറ്റി ഫീച്ചറുകളുടെ കാര്യത്തിലും ചേതക് C25 പിന്നിലല്ല. 25 ലിറ്റര്‍ വലിപ്പമുള്ള സ്റ്റോറേജ് ബോക്‌സ് (Boot space), കളര്‍ എല്‍സിഡി ഡിസ്‌പ്ലേ, 650 mm നീളമുള്ള സീറ്റ് എന്നിവ ഇതിലുണ്ട്. മഴയെയും പൊടിയെയും പ്രതിരോധിക്കാന്‍ ഐപി67 (IP67) റേറ്റിംഗും കമ്പനി നല്‍കിയിട്ടുണ്ട്. ദീര്‍ഘകാലം ഈടിനായി മെറ്റല്‍ ബോഡിയിലാണ് സ്‌കൂട്ടര്‍ നിര്‍മ്മിച്ചിരിക്കുന്നത്.

ഇലക്ട്രിക് സ്‌കൂട്ടര്‍ വിപണിയില്‍ ബജാജ് ചേതക്കിന് ലഭിക്കുന്ന സ്വീകാര്യത വര്‍ദ്ധിപ്പിക്കാന്‍ പുതിയ C25 സഹായിക്കും. മെച്ചപ്പെട്ട സസ്‌പെന്‍ഷനും പ്രായോഗികമായ റേഞ്ചും കുറഞ്ഞ വിലയും ഇതിനെ ഈ സെഗ്മെന്റിലെ കരുത്തനാക്കുന്നു. നിലവില്‍ വിപണിയിലുള്ള മറ്റ് ബജറ്റ് ഇലക്ട്രിക് സ്‌കൂട്ടറുകള്‍ക്ക് വലിയ വെല്ലുവിളിയായിരിക്കും ബജാജിന്റെ ഈ പുത്തന്‍ മോഡല്‍.

സുസ്ഥിരമായ മൊബിലിറ്റി പരിഹാരങ്ങള്‍ തേടുന്ന നഗരവാസികള്‍ക്ക് ചേതക് C25 ഒരു വിശ്വസനീയമായ ഓപ്ഷനാണ്. ബജാജിന്റെ വിപുലമായ സര്‍വീസ് ശൃംഖലയും ഈ മോഡലിന്റെ വിശ്വാസ്യത വര്‍ദ്ധിപ്പിക്കുന്നു. മികച്ച ബില്‍ഡ് ക്വാളിറ്റിയും അത്യാധുനിക ഫീച്ചറുകളും ചേരുന്നതോടെ ഇലക്ട്രിക് വിപണിയില്‍ ബജാജ് ചേതക് C25 ഒരു പുതിയ ചരിത്രം കുറിക്കാന്‍ ഒരുങ്ങുകയാണ്.

ഡ്രൈവ്സ്പാർക്ക് മലയാളം വെബ്‌സൈറ്റ് വാഹന സംബന്ധിയായ വാർത്തകൾ തത്സമയം നിങ്ങളുടെ വിരൽത്തുമ്പിൽ ലഭ്യമാക്കുന്നു. സോഷ്യൽ മീഡിയയിലൂടെ ഞങ്ങൾ വാർത്തകൾ വായനക്കാരുമായി തൽക്ഷണം പങ്കിടുന്നു. ഏറ്റവും പുതിയ കാർ, ബൈക്ക് വാർത്തകൾ, ടെസ്റ്റ് ഡ്രൈവ് റിപ്പോർട്ടുകൾ, വീഡിയോകൾ എന്നിവ ലഭിക്കാൻ ഡ്രൈവ്സ്പാർക്ക് മലയാളത്തിന്റെ ഫെയ്‌സ്ബുക്ക്, ഇൻസ്റ്റഗ്രാം, ടെലഗ്രാം, യൂട്യൂബ് ചാനൽ എന്നിവ മറക്കാതെ ഫോളോ ചെയ്യാം. ഞങ്ങളുടെ ഏതെങ്കിലും വാർത്ത ഇഷ്ടപ്പെട്ടാൽ ലൈക്ക് ചെയ്യാനും കമൻറ് ചെയ്യാനും മറക്കല്ലേ.