സ്മാർട്ട്‌ഫോൺ വേണ്ട, സ്കൂട്ടർ ഉണ്ടല്ലോ! ഇന്ത്യയിൽ ടച്ച്‌സ്‌ക്രീൻ ഡിസ്‌പ്ലേയുമായെത്തുന്ന ടോപ് 5 ഇ-സ്‌കൂട്ടറുകൾ

ഇന്ത്യന്‍ വിപണിയിലെത്തുന്ന ഇലക്ട്രിക് സ്‌കൂട്ടറുകള്‍ വെറും യാത്രാ ഉപാധികള്‍ മാത്രമല്ല, അത്യാധുനിക സാങ്കേതിക വിദ്യകളുടെ സമ്മേളനവേദി കൂടിയാണ്. സാധാരണ സ്‌കൂട്ടറുകളില്‍ നിന്നും വ്യത്യസ്തമായി സ്മാര്‍ട്ട്ഫോണുകള്‍ക്ക് സമാനമായ ടച്ച്സ്‌ക്രീന്‍ ഡിസ്പ്ലേകളാണ് പുതിയ ഇവികളുടെ പ്രധാന ആകര്‍ഷണം. ഡിജിറ്റല്‍ യുഗത്തിലെ ഉപഭോക്താക്കള്‍ക്കായി മികച്ച ഇന്‍ഫോടെയ്ന്‍മെന്റ് സൗകര്യങ്ങള്‍ ഒരുക്കുന്ന ഇന്ത്യയിലെ 5 മുന്‍നിര ഇലക്ട്രിക് സ്‌കൂട്ടറുകളെ പരിചയപ്പെടുത്തുകയാണ് ഈ ലേഖനം.

1. ഏഥര്‍ 450X (Ather 450X)

ലിസ്റ്റില്‍ ഒന്നാമതായി നില്‍ക്കുന്നത് ഏഥര്‍ എനര്‍ജിയുടെ പ്രീമിയം മോഡലായ ഏഥര്‍ 450X ആണ്. സുഗമമായ പ്രവര്‍ത്തനക്ഷമത ഉറപ്പാക്കുന്ന 7 ഇഞ്ച് ടിഎഫ്ടി ടച്ച്സ്‌ക്രീന്‍ ഡാഷ്ബോര്‍ഡാണ് ഇതിന്റെ പ്രത്യേകത. മാജിക് ട്വിസ്റ്റ്, പാര്‍ക്ക് അസിസ്റ്റ്, ഗൂഗിള്‍ മാപ്സ് നാവിഗേഷന്‍ എന്നിവയ്ക്ക് പുറമെ അലക്‌സ ഇന്റഗ്രേഷനും ഇതിലുണ്ട്. 1.46 ലക്ഷം രൂപ മുതല്‍ വില ആരംഭിക്കുന്ന ഈ സ്‌കൂട്ടര്‍ 161 കിലോമീറ്റര്‍ റേഞ്ചും വാഗ്ദാനം ചെയ്യുന്നു.

2. ഓല S1 പ്രോ ജെന്‍ 3 (Ola S1 Pro Gen 3)

ഇലക്ട്രിക് വിപണിയിലെ വമ്പന്‍മാരായ ഓലയുടെ ഫ്‌ലാഗ്ഷിപ്പ് മോഡലായ S1 പ്രോ ജെന്‍ 3 ആണ് പട്ടികയിലെ രണ്ടാമന്‍. മൂവ് ഒഎസ് 5 (MoveOS 5) അടിസ്ഥാനമാക്കിയുള്ള 7 ഇഞ്ച് ടച്ച്സ്‌ക്രീന്‍ ഇതിന്റെ പ്രവര്‍ത്തനങ്ങള്‍ കൂടുതല്‍ ലളിതമാക്കുന്നു. ട്രാക്ഷന്‍ കണ്‍ട്രോള്‍, ക്രൂയിസ് കണ്‍ട്രോള്‍, മ്യൂസിക് കണ്‍ട്രോള്‍ എന്നിവ ഇതിലുണ്ട്. 1.54 ലക്ഷം രൂപ വിലയുള്ള ഈ സ്‌കൂട്ടര്‍ ഹൈപ്പര്‍ മോഡില്‍ മികച്ച പ്രകടനം കാഴ്ചവെക്കുന്നു.

3. ടിവിഎസ് ഐക്യൂബ് ST (TVS iQube ST)

ടിവിഎസ് ഐക്യൂബ് ST ആണ് മൂന്നാം സ്ഥാനത്ത്. ഇതിന്റെ ടോപ് സ്‌പെക് വേരിയന്റില്‍ 17.78 സെന്റിമീറ്റര്‍ വലിപ്പമുള്ള വലിയ ടിഎഫ്ടി ടച്ച്സ്‌ക്രീനാണുള്ളത്. ജിയോ ഫെന്‍സിംഗ്, ആന്റി തെഫ്റ്റ് അലര്‍ട്ട്, മ്യൂസിക് കണ്‍ട്രോള്‍ എന്നിവയാണ് ഇതിന്റെ സവിശേഷതകള്‍. 5.3 kWh ബാറ്ററി ഓപ്ഷനില്‍ 212 കിലോമീറ്റര്‍ വരെ റേഞ്ച് ലഭിക്കുന്ന ഈ സ്‌കൂട്ടറിന് 1.58 ലക്ഷം രൂപയാണ് വിപണി വില.

4. ഏഥര്‍ റിസ്ത (Ather Rizta)

ഏഥര്‍ കുടുംബത്തില്‍ നിന്നുള്ള ഫാമിലി സ്‌കൂട്ടറാണ് ഏഥര്‍ റിസ്ത. കുടുംബങ്ങളെ ലക്ഷ്യമിട്ട് പുറത്തിറക്കിയ ഈ സ്‌കൂട്ടറില്‍ 7 ഇഞ്ച് ടച്ച്സ്‌ക്രീന്‍ ഡിസ്പ്ലേയാണുള്ളത്. ഇതിലെ സൈ്വപ്പിംഗ്, സൂമിംഗ് ഫീച്ചറുകള്‍ സ്മാര്‍ട്‌ഫോണ്‍ അനുഭവം നല്‍കുന്നു. 1.30 ലക്ഷം രൂപ വിലയുള്ള റിസ്ത Z മോഡലില്‍ സ്‌കിഡ് കണ്‍ട്രോള്‍, ഫോള്‍ സേഫ് തുടങ്ങിയ സുരക്ഷാ ഫീച്ചറുകളും ഗൂഗിള്‍ മാപ്സ് നാവിഗേഷനും ഉള്‍പ്പെടുത്തിയിട്ടുണ്ട്.

5. സിമ്പിള്‍ വണ്‍ (Simple One)

റേഞ്ചിന്റെ കാര്യത്തില്‍ മുന്‍പന്തിയില്‍ നില്‍ക്കുന്ന സിമ്പിള്‍ വണ്‍ ആണ് അഞ്ചാമത്തെ സ്മാര്‍ട്ട് സ്‌കൂട്ടര്‍. സ്മാര്‍ട്ട് വാച്ച് കണക്റ്റിവിറ്റിയോട് കൂടിയ 7 ഇഞ്ച് ടിഎഫ്ടി ടച്ച്സ്‌ക്രീനാണ് ഇതില്‍ സജ്ജീകരിച്ചിരിക്കുന്നത്. ലൈവ് ലൊക്കേഷന്‍ ഷെയറിംഗ്, ക്രൂയിസ് കണ്‍ട്രോള്‍ തുടങ്ങിയ സൗകര്യങ്ങള്‍ ഇതിലുണ്ട്. 5.0 kWh ബാറ്ററി 265 കി.മീ റേഞ്ച് നല്‍കുന്ന ഈ കരുത്തുറ്റ സ്‌കൂട്ടറിന്റെ വില 1.69 ലക്ഷം രൂപ മുതല്‍ ആരംഭിക്കുന്നു.

ഈ അഞ്ച് സ്‌കൂട്ടറുകളും ടച്ച്സ്‌ക്രീന്‍ ഡിസ്പ്ലേ വഴി നാവിഗേഷന്‍ മാത്രമല്ല, വാഹനത്തിന്റെ മറ്റ് വിവരങ്ങളും സുരക്ഷാ മുന്നറിയിപ്പുകളും നല്‍കുന്നു. ഫോണ്‍ കോളുകള്‍ അറ്റന്‍ഡ് ചെയ്യാനും മ്യൂസിക് പ്ലേ ചെയ്യാനും ഇത്തരം ഡിസ്പ്ലേകള്‍ സഹായിക്കും. ഒടിഎ (Over-the-Air) അപ്ഡേറ്റുകള്‍ വഴി പുതിയ ഫീച്ചറുകള്‍ നിരന്തരം വാഹനത്തിലേക്ക് എത്തിക്കാനും കമ്പനികള്‍ ശ്രദ്ധിക്കുന്നുണ്ട്. ഇത് അത്യാധുനിക ഇവി ഓണര്‍ഷിപ്പ് എക്‌സ്പീരിയന്‍ ഇവി ഉടമകള്‍ക്ക് സമ്മാനിക്കും.

മുകളില്‍ പറഞ്ഞ ഇലക്ട്രിക് വാഹനങ്ങളുടെ വിലയും ലഭ്യതയും നഗരങ്ങള്‍ക്ക് അനുസരിച്ച് വ്യത്യാസപ്പെടാന്‍ സാധ്യതയുണ്ട്. മികച്ച റേഞ്ചും സ്മാര്‍ട്ട് ഫീച്ചറുകളും ആഗ്രഹിക്കുന്നവര്‍ക്ക് ഇന്ന് വിപണിയില്‍ ലഭ്യമായ ഏറ്റവും മികച്ച ഓപ്ഷനുകളാണ് മുകളില്‍ പറഞ്ഞ അഞ്ച് ഇലക്ട്രിക് സ്‌കൂട്ടറുകള്‍.
ഇവികള്‍ വ്യാപനം വേഗത്തിലാക്കുന്നതിന് സാങ്കേതികവിദ്യകള്‍ക്കുള്ള പ്രാധാന്യമാണ് ഈ സ്മാര്‍ട്ട് സ്‌കൂട്ടറുകളുടെ വിജയം സൂചിപ്പിക്കുന്നത്. ഇവി സ്‌കൂട്ടര്‍ വാങ്ങുമ്പോള്‍ നിങ്ങളുടെ യാത്രാ ആവശ്യങ്ങള്‍ക്കും ബജറ്റിനും അനുസരിച്ച് ഏറ്റവും അനുയോജ്യമായ ഒന്ന് തിരഞ്ഞെടുക്കാം.