ദിവസം വില്‍ക്കുന്നത് 4,009 എണ്ണം! ആക്ടിവയോട് മുട്ടി 90 ലക്ഷം കസ്റ്റമേഴ്‌സിനെ നേടി ജുപ്പിറ്ററിന്റെ ഹീറോയിസം

ഇന്ത്യന്‍ ഇരുചക്ര വാഹന വിപണിയിലെ വിസ്മയകരമായ നേട്ടവുമായി ടിവിഎസ് ജുപ്പിറ്റര്‍ (TVS Jupiter). 2013-ല്‍ പുറത്തിറങ്ങിയത് മുതല്‍ ഇന്ത്യയിലുടനീളം 90 ലക്ഷം (9 മില്യണ്‍) യൂണിറ്റുകള്‍ വിറ്റഴിച്ചാണ് ജുപ്പിറ്റര്‍ ഈ ചരിത്രനേട്ടം കൈവരിച്ചത്. 2026 മാര്‍ച്ച് അവസാനത്തോടെ ടിവിഎസ് മോട്ടോര്‍ കമ്പനി ഔദ്യോഗികമായാണ് ഈ കണക്കുകള്‍ പുറത്തുവിട്ടത്. 113 സിസി, 125 സിസി എന്നിങ്ങനെ രണ്ട് പതിപ്പുകളിലായാണ് ഈ സ്‌കൂട്ടര്‍ വില്‍പ്പനക്കെത്തുന്നത്. ഇതിനോടകം തന്നെ ഇന്ത്യയില്‍ ഏറ്റവും കൂടുതല്‍ വിറ്റഴിക്കപ്പെട്ട സ്‌കൂട്ടറുകളില്‍ ഒന്നായി മാറാന്‍ ജുപ്പിറ്ററിന് സാധിച്ചിട്ടുണ്ട്. ഈ നേട്ടത്തിന്റെ വിശദാംശങ്ങള്‍ ചുവടെ വിശദമായി വായിക്കാം.

2026 സാമ്പത്തിക വര്‍ഷം ടിവിഎസ് ജുപ്പിറ്ററിന്റെ ചരിത്രത്തിലെ ഏറ്റവും മികച്ച വര്‍ഷമായിരുന്നു. ആകെ 14,63,328 യൂണിറ്റുകളാണ് കഴിഞ്ഞ വര്‍ഷം മാത്രം വിറ്റഴിച്ചത്. 2025 സാമ്പത്തിക വര്‍ഷത്തെ അപേക്ഷിച്ച് 32 ശതമാനം വളര്‍ച്ചയാണ് ജുപ്പിറ്റര്‍ കൈവരിച്ചത്. ദിവസവും ശരാശരി 4,009 യൂണിറ്റുകള്‍ വിറ്റഴിക്കുന്നു എന്നത് തന്നെ ഈ സ്‌കൂട്ടറിന്റെ ജനപ്രീതിക്ക് തെളിവാണ്.

തുടര്‍ച്ചയായ രണ്ടാം വര്‍ഷമാണ് ജുപ്പിറ്റര്‍ 10 ലക്ഷത്തിലധികം യൂണിറ്റുകള്‍ വിറ്റഴിക്കുന്നത്. വാഹന വിപണിയിലെ മറ്റ് മോഡലുകളെ അപേക്ഷിച്ച് ജുപ്പിറ്റര്‍ ബഹുദൂരം മുന്നിലാണ്. കമ്പനിയുടെ ആകെ സ്‌കൂട്ടര്‍ വില്‍പ്പനയുടെ 64 ശതമാനവും ജുപ്പിറ്ററില്‍ നിന്നാണ് ലഭിക്കുന്നത്. ടിവിഎസിന്റെ മറ്റ് മുന്‍നിര മോഡലുകളായ അപ്പാച്ചെ, റൈഡര്‍, എന്‍ടോര്‍ക്ക് എന്നിവയുടെ സംയോജിത വില്‍പ്പനയെക്കാള്‍ മുകളിലാണ് ജുപ്പിറ്ററിന്റെ സ്ഥാനം.

മുന്‍ വര്‍ഷങ്ങളില്‍ 61 ശതമാനമായിരുന്ന ജുപ്പിറ്ററിന്റെ വിപണി വിഹിതം 64 ശതമാനമായി വര്‍ദ്ധിച്ചു. ടിവിഎസിന്റെ ഏറ്റവും കൂടുതല്‍ വിറ്റഴിക്കപ്പെടുന്ന ഇരുചക്ര വാഹനമെന്ന പദവി ജുപ്പിറ്റര്‍ നിലനിര്‍ത്തുന്നു. അവസാന 10 ലക്ഷം യൂണിറ്റുകള്‍ വിറ്റഴിക്കാന്‍ ജുപ്പിറ്ററിന് വേണ്ടിവന്നത് വെറും 8 മാസം മാത്രമാണ്. ഇതിനുമുന്‍പുള്ള 10 ലക്ഷം യൂണിറ്റുകള്‍ വിറ്റഴിക്കാന്‍ 11 മാസങ്ങള്‍ വേണ്ടിയിരുന്നു. ഈ വേഗത പരിശോധിച്ചാല്‍ ജുപ്പിറ്ററിന്റെ വളര്‍ച്ച എത്രത്തോളമാണെന്ന് വ്യക്തമാകും.

സ്‌കൂട്ടര്‍ വിപണിയില്‍ ടിവിഎസിന്റെ സ്ഥാനം ഉറപ്പിക്കുന്നതില്‍ ജുപ്പിറ്റര്‍ നിര്‍ണ്ണായക പങ്കാണ് വഹിക്കുന്നത്. ഉപഭോക്താക്കളുടെ വിശ്വാസം പിടിച്ചുപറ്റാന്‍ ഈ വാഹനത്തിന് സാധിച്ചു എന്നത് എടുത്തു പറയേണ്ട കാര്യമാണ്. ടിവിഎസിന്റെ വിപണി വിഹിതം 2014-ല്‍ 12.68 ശതമാനമായിരുന്നു. എന്നാല്‍ 2026-ല്‍ അത് 28 ശതമാനമായി ഉയര്‍ന്നു. ഇന്ത്യന്‍ സ്‌കൂട്ടര്‍ വിപണിയില്‍ ഹോണ്ടയ്ക്ക് ശേഷം രണ്ടാം സ്ഥാനത്താണ് ടിവിഎസ് ഇപ്പോള്‍. ഹോണ്ടയ്ക്ക് 39 ശതമാനം വിപണി വിഹിതമാണുള്ളത്.

ജുപ്പിറ്ററിന്റെ കരുത്തില്‍ ടിവിഎസ് വളരെ വേഗത്തിലാണ് വിപണിയില്‍ വളര്‍ന്നുകൊണ്ടിരിക്കുന്നത്. സ്‌കൂട്ടര്‍ പ്രേമികള്‍ക്കിടയില്‍ ജുപ്പിറ്ററിന് ലഭിക്കുന്ന സ്വീകാര്യത ടിവിഎസിന് വലിയ മുതല്‍ക്കൂട്ടാണ്. നിലവിലെ വളര്‍ച്ചാ നിരക്ക് കണക്കിലെടുത്താല്‍ 2026 കലണ്ടര്‍ വര്‍ഷം അവസാനിക്കുന്നതിന് മുമ്പ് തന്നെ ജുപ്പിറ്റര്‍ 1 കോടി (10 മില്യണ്‍) വില്‍പ്പന നാഴികക്കല്ല് പിന്നിടുമെന്ന് കരുതുന്നു. ഈ ലക്ഷ്യം കൈവരിക്കുക എന്നത് ടിവിഎസിനെ സംബന്ധിച്ചിടത്തോളം വലിയൊരു നേട്ടമായിരിക്കും.

കാലികമായി നിലനിര്‍ത്താനായി ടിവിഎസ് ജുപ്പിറ്ററിന്റെ ഡിസൈനിലും സാങ്കേതികമായും നിരന്തരം മാറ്റങ്ങള്‍ വരുത്തുന്നത് ഉപഭോക്താക്കളെ നിലനിര്‍ത്താനും പുതിയ ആളുകളെ ആകര്‍ഷിക്കാനും സഹായിക്കുന്നു. ഇന്ത്യയിലെ സാധാരണക്കാരുടെ ഉറ്റ യാത്രാ പങ്കാളികളില്‍ ഒന്നായി ജുപ്പിറ്റര്‍ മാറിയിട്ടുണ്ട്. മികച്ച ഇന്ധനക്ഷമതയും സുഖകരമായ റൈഡ് ക്വളിറ്റിയുമാണ് ജുപ്പിറ്ററിന്റെ വിജയരഹസ്യം.

ഓരോ തലമുറ മാറ്റത്തിലും കൂടുതല്‍ ഫീച്ചറുകളും സുരക്ഷാ സംവിധാനങ്ങളും ടിവിഎസ് ഉള്‍പ്പെടുത്തുന്നുണ്ട്. സ്ത്രീകള്‍ക്കും പുരുഷന്മാര്‍ക്കും ഒരുപോലെ ഉപയോഗിക്കാന്‍ പാകത്തിലുള്ള ഡിസൈനാണ് ഇതിന്റേത്. കുടുംബങ്ങള്‍ക്കിടയില്‍ ജുപ്പിറ്ററിന് ലഭിക്കുന്ന സ്വീകാര്യത മറ്റ് സ്‌കൂട്ടറുകള്‍ക്ക് ലഭിക്കാന്‍ പ്രയാസമാണ്. ഈ നേട്ടം ടിവിഎസിന്റെ ഭാവിയിലെ പുതിയ ഉല്‍പ്പന്നങ്ങള്‍ക്കും കൂടുതല്‍ പ്രചോദനം നല്‍കും.

ടിവിഎസ് മോട്ടോര്‍ കമ്പനിയുടെ വളര്‍ച്ചയില്‍ ജുപ്പിറ്റര്‍ നല്‍കിയ സംഭാവന വളരെ വലുതാണ്. 90 ലക്ഷം ഉപഭോക്താക്കളുടെ വിശ്വാസം ആര്‍ജ്ജിച്ചുകൊണ്ട് ജുപ്പിറ്റര്‍ കുതിപ്പ് തുടരുകയാണ്. ഇന്ത്യന്‍ റോഡുകളില്‍ ലക്ഷക്കണക്കിന് ജുപ്പിറ്ററുകള്‍ ഇന്നും സുഗമമായി ഓടിക്കൊണ്ടിരിക്കുന്നു. സിഎന്‍ജി മോഡല്‍ അടക്കം വരും ദിവസങ്ങളില്‍ ജുപ്പിറ്ററിന്റെ പുതിയ മോഡലുകള്‍ വിപണിയിലെത്തുമെന്ന് പ്രതീക്ഷിക്കാം. അത് ജുപ്പിറ്ററിനെ കൂടുതല്‍ ഉയരങ്ങളില്‍ എത്തിക്കും.