Click it and Unblock the Notifications
ഇതുവരെ കാണാത്ത ഡിസൈനും 156 കി.മീ റേഞ്ചും! വിൻഫാസ്റ്റ് സ്കൂട്ടർ പേറ്റന്റ് ചെയ്തു, ആരാധകർ കാത്തിരിപ്പിൽ
വിയറ്റ്നാമില് നിന്നുള്ള പ്രമുഖ ഇലക്ട്രിക് വാഹന നിര്മ്മാതാക്കളായ വിന്ഫാസ്റ്റ് (VinFast) ഇന്ത്യന് ഇരുചക്ര വാഹന വിപണിയിലേക്ക് ശക്തമായ ചുവടുവെപ്പിനൊരുങ്ങുന്നു. കാറുകള്ക്ക് പുറമെ അത്യാധുനിക ഇലക്ട്രിക് സ്കൂട്ടറുകള് പുറത്തിറക്കാനുള്ള വമ്പന് പദ്ധതികളുടെ ഭാഗമായി താജ്യത്ത് തങ്ങളുടെ ഏറ്റവും പുതിയ സ്പോര്ട്ടി സ്കൂട്ടറിന്റെ ഡിസൈന് പേറ്റന്റ് ഫയല് ചെയ്തിരിക്കുകയാണ് വിന്ഫാസ്റ്റ്. മുമ്പ് തങ്ങളുടെ ക്ലാസിക് ലുക്കുള്ള ക്ലാര എസ് (Klara S) ഇ-സ്കൂട്ടറിന്റെ പേറ്റന്റ് വിന്ഫാസ്റ്റ് സ്വന്തമാക്കിയിരുന്നു. എന്നാല് നിലവില് പുറത്തുവന്നിട്ടുള്ള പുതിയ പേറ്റന്റ് ചിത്രങ്ങളിലെ സ്കൂട്ടര് ഡിസൈന് വിന്ഫാസ്റ്റിന്റെ സ്വന്തം വിപണിയായ വിയറ്റ്നാമില് പോലും ഇതുവരെ അവതരിപ്പിച്ചിട്ടില്ലാത്ത തികച്ചും വ്യത്യസ്തവും ആകര്ഷകവുമായ ഒന്നാണ്.
വൈപ്പര് മോഡലുമായുള്ള സാമ്യതകള്
ഈ പുതിയ സ്കൂട്ടറിന്റെ ആകെ ഘടന പരിശോധിക്കുമ്പോള് വിന്ഫാസ്റ്റ് രാജ്യാന്തര വിപണിയില് വില്ക്കുന്ന 'വൈപ്പര്' (Viper) മോഡലിന്റെ ഡിസൈനിനോട് അടുത്തുനില്ക്കുന്നതായി കാണാം. എങ്കിലും സൂക്ഷ്മമായി വിലയിരുത്തിയാല് വൈപ്പറില് നിന്നും വേറിട്ട ചില ആധുനിക ഡിസൈന് ഘടകങ്ങള് ഇതില് ഉള്പ്പെടുത്തിയിട്ടുണ്ട്. അതേസമയം വൈപ്പറിന് സമാനമായ സ്പോര്ട്ടി ലുക്കും പ്രീമിയം വൈബും ഈ പുതിയ പേറ്റന്റ് മോഡലിലും നിലനിര്ത്തിയിട്ടുണ്ട്. കമ്മ്യൂട്ടര് ഉപഭോക്താക്കള്ക്ക് താല്പര്യം തോന്നുന്ന രൂപത്തിലാണ് ഇതിന്റെ മുന്ഭാഗവും വശങ്ങളും രൂപകല്പ്പന ചെയ്തിരിക്കുന്നത്.
പ്രീമിയം സ്പോര്ട്ടി ലുക്കും ഡിസൈനും
വളരെ ഷാര്പ്പായ രൂപത്തിലുള്ള അത്യാധുനിക എല്ഇഡി ഫ്രണ്ട്, റിയര് ഹെഡ്ലാമ്പുകളാണ് ഇതില് നല്കിയിട്ടുള്ളത്. ഇതോടൊപ്പം സ്പോര്ട്ടി ലുക്ക് ഉയര്ത്തുന്ന പിന്ഭാഗത്തെ ഗ്രാബ് ഹാന്ഡില്, പ്രീമിയം ഫിനിഷിംഗിലുള്ള സൈഡ് പാനലുകള് എന്നിവ ഇതിന്റെ പ്രധാന എക്സ്റ്റീരിയര് ഹൈലൈറ്റുകളാണ്. ഇന്ത്യന് വിപണിക്കായി പ്രത്യേകം തയ്യാറാക്കിയതാണോ അതോ ആഗോള വിപണിയില് ഇനി അവതരിപ്പിക്കാനിരിക്കുന്ന പുത്തന് തലമുറ സ്കൂട്ടറാണോ ഇത് എന്ന കാര്യത്തില് നിലവില് കമ്പനി വ്യക്തത വരുത്തിയിട്ടില്ല.
ബാറ്ററി ശേഷിയും മെക്കാനിക്കല് കരുത്തും
ഡിസൈന് തികച്ചും പുതിയതാണെങ്കിലും ഇതിന്റെ പവര്ട്രെയിന് വിന്ഫാസ്റ്റ് വൈപ്പര് മോഡലില് നിന്നും തന്നെ കടമെടുത്തേക്കും. വിശ്വസനീയമായ 3 kWh ബാറ്ററി പായ്ക്കാണ് ഈ സ്കൂട്ടറില് സജ്ജീകരിക്കാന് സാധ്യതയുള്ളത്. ഈ കരുത്തുറ്റ ബാറ്ററി പായ്ക്കിനൊപ്പം പരമാവധി 3 kW പവര് ഉത്പാദിപ്പിക്കാന് ശേഷിയുള്ള അത്യാധുനിക ഇലക്ട്രിക് മോട്ടോറും ഘടിപ്പിക്കും. സിറ്റി റൈഡുകള് സുഗമമാക്കാനും മികച്ച പെര്ഫോമന്സ് കാഴ്ച്ചവെക്കാനും ഈ കോമ്പിനേഷന് സ്കൂട്ടറിനെ സഹായിക്കും.
ഉയര്ന്ന റേഞ്ചും വേഗതയും
ഈ സ്കൂട്ടറിന് ഫുൾ ചാർജിൽ പരമാവധി 156 കിലോമീറ്റര് വരെ റേഞ്ച് ലഭിക്കുമെന്ന് പ്രതീക്ഷിക്കുന്നു. കൂടാതെ മണിക്കൂറില് 70 കിലോമീറ്റര് വരെ ഉയര്ന്ന വേഗത കൈവരിക്കാനും സ്കൂട്ടറിന് കഴിയും. ഈ വലിയ ബാറ്ററി വെറും 4.30 മണിക്കൂര് കൊണ്ട് പൂര്ണമായി ചാര്ജ് ചെയ്യാന് സാധിക്കുമെന്നാണ് കമ്പനി അവകാശപ്പെടുന്നത്. സുഗമമായ യാത്രയ്ക്കായി രണ്ട് അറ്റങ്ങളിലും 14 ഇഞ്ചിന്റെ വലിയ വീലുകളും മികച്ച സ്റ്റോപ്പിംഗ് പവര് ഉറപ്പാക്കാന് മുന്ഭാഗത്ത് ഡിസ്ക് ബ്രേക്കും നല്കിയിട്ടുണ്ട്.
പ്രതീക്ഷിക്കുന്ന വിലയും വിപണി സാധ്യതകളും
വിയറ്റ്നാം വിപണിയില് വിന്ഫാസ്റ്റ് വൈപ്പര് മോഡലിന് ഇന്ത്യന് മൂല്യമനുസരിച്ച് ഏകദേശം 1.63 ലക്ഷം രൂപയാണ് വില വരുന്നത്. എന്നാല് പുതിയ സ്കൂട്ടര് വൈപ്പറിനേക്കാള് പ്രീമിയം ഫീച്ചറുകളോടെ എത്തുന്നതിനാല് വിദേശ വിപണിയില് ഇതിലും ഉയര്ന്ന നിരക്കായിരിക്കും ഈ മോഡലിന് ഉണ്ടാകുക. എങ്കിലും ഇന്ത്യയില് പ്രാദേശികമായി ഉത്പാദനം ആരംഭിക്കുന്നതിലൂടെ വിന്ഫാസ്റ്റ് VF6 കാറിന് നല്കിയത് പോലെ വലിയ വിലക്കുറവ് സ്കൂട്ടറിനും പ്രതീക്ഷിക്കാം.
ഇതനുസരിച്ച് വിപണിയില് എത്തുമ്പോള് 1.50 ലക്ഷം രൂപയില് താഴെ ആകര്ഷകമായ എക്സ്-ഷോറൂം വിലയില് ഇത് ലഭ്യമായേക്കും. ഇന്ത്യന് വിപണിയില് നിലവില് ഏഥര് 450, സിമ്പിള് വണ് തുടങ്ങിയ അത്യാധുനിക സ്പോര്ട്ടി സ്കൂട്ടറുകള് ലഭ്യമാണെങ്കിലും, വിന്ഫാസ്റ്റിന്റെ ഈ ലുക്ക് പരമ്പരാഗത പെട്രോള് സ്കൂട്ടറുകളെ ഓര്മ്മിപ്പിക്കുന്നതാണ്.
സ്പോര്ട്ടി ഇവികള്ക്ക് ഇന്ത്യന് കുടുംബങ്ങള്ക്കിടയില് വലിയ സ്വീകാര്യത ലഭിക്കാറില്ലെങ്കിലും ഈ വേറിട്ട രൂപം വഴിത്തിരിവായേക്കാം. ഈ നടപ്പ് വര്ഷത്തിന്റെ അവസാനത്തോടെയോ അല്ലെങ്കില് അടുത്ത വര്ഷം ആദ്യത്തോടെയോ വിന്ഫാസ്റ്റിന്റെ ഈ പുത്തന് ഇലക്ട്രിക് സ്കൂട്ടര് ഇന്ത്യന് വിപണിയില് ഔദ്യോഗികമായി ലോഞ്ച് ചെയ്യുമെന്നാണ് കരുതുന്നത്. വിന്ഫാസ്റ്റിന്റെ ഈ പുതിയ ഇലക്ട്രിക് സ്കൂട്ടര് ഡിസൈനിനെ കുറിച്ചുള്ള നിങ്ങളുടെ ചിന്തകള് താഴെ കമന്റായി രേഖപ്പെടുത്തുമല്ലോ.
Continue with Google