പെട്രോളോ ഹൈബ്രിഡോ, ഏതാണ് കൂടുതൽ ലാഭകരം? ഉത്തരം നിങ്ങളെ അത്ഭുതപ്പെടുത്തിയേക്കാം

ഇലക്ട്രിക് മോഡലുകളുടെ എണ്ണം ക്രമേണ വർധിച്ചുകൊണ്ടിരിക്കുകയാണ്. ഇവിടെ ഇന്ത്യയിൽ ഇവികളുടെ വിഹിതം താരതമ്യേന ചെറുതാണെങ്കിലും ഇവയ്ക്ക് ശ്രദ്ധ പിടിച്ചുപറ്റാൻ സാധിക്കുന്നുണ്ട്. എന്നാൽ ഇലക്ട്രിക് കാറുകൾ വളരെ ചെലവേറിയതാണെന്ന വസ്‌തുത പലരേയും ഇതിൽ നിന്നും മാറ്റിനിർത്തുന്നുണ്ടെന്നത് യാഥാർഥ്യം തന്നെ.

അവിടെയാണ് ഹൈബ്രിഡ് കാറുകളുടെ വിജയം. ഹൈബ്രിഡ് എഞ്ചിനുകളുടെ വക്താക്കൾ സാങ്കേതികവിദ്യയെ കൂടുതൽ ന്യായമായ വിലയോടെ അവതരിപ്പിച്ചുകൊണ്ടിരിക്കുകയാണ്. ഹൈബ്രിഡ് സാങ്കേതികവിദ്യ എന്നത് ഒരു വാഹനത്തെ അതിന്റെ ഇന്റേണൽ കമ്പഷൻ എഞ്ചിൻ ഒരു ഇലക്ട്രിക് മോട്ടോറുമായി ജോടിയാക്കിയിരിക്കുന്ന പ്രക്രിയയാണ്.

ഒരു പൂർണ ഹൈബ്രിഡിന് (FHEV) പെട്രോൾ എഞ്ചിൻ, ഇലക്ട്രിക് എഞ്ചിൻ അല്ലെങ്കിൽ രണ്ടും സംയോജിച്ച് പ്രവർത്തിക്കാൻ കഴിയും. അതായത് മൂന്ന് തരത്തിൽ ഇത്തരം കാറുകൾക്ക് ഓടാൻ കഴിയുമെന്ന് സാരം. ചാർജിംഗ് സോക്കറ്റിൽ ബാറ്ററി പ്ലഗ് ചെയ്യേണ്ടതില്ല.

മാരുതി സുസുക്കി ഗ്രാൻഡ് വിറ്റാരയും ടൊയോട്ട അർബൻ ക്രൂയിസർ ഹൈറൈഡറും സ്ട്രോംഗ് ഹൈബ്രിഡ് സാങ്കേതികവിദ്യയുള്ള ആദ്യത്തെ എസ്‌യുവികളാണ്. അതേസമയം ഹോണ്ടയും സിറ്റിയും പൂർണ ഹൈബ്രിഡ് പതിപ്പ് പുറത്തിറക്കി ട്രെൻഡിംഗായിരുന്നു.

ഗ്രാൻഡ് വിറ്റാര, ഹൈറൈഡർ, സിറ്റി തുടങ്ങിയ കാറുകളിലെ കരുത്തുറ്റ ഹൈബ്രിഡ് എഞ്ചിനുകളുടെ ഏറ്റവും വലിയ നേട്ടം ഉയർന്ന മൈലേജ് തന്നെയാണ്. ഉദാഹരണത്തിന്, ഗ്രാൻഡ് വിറ്റാരയും ഹൈറൈഡറും ലിറ്ററിന് 28 കിലോമീറ്റർ മൈലേജ് അവകാശപ്പെടുമ്പോൾ സിറ്റി ലിറ്ററിന് 27 കിലോമീറ്റർ മൈലേജ് വാഗ്ദാനം ചെയ്യുന്നു. യഥാർഥ റോഡ് സാഹചര്യങ്ങളിൽ ഏകദേശം 22 കിലോമീറ്റർ വരെ ഇന്ധനക്ഷമത വാഹനത്തിന് പ്രതീക്ഷിക്കാം.

ഈ സാങ്കേതികവിദ്യയ്ക്ക് പെട്രോൾ ബിൽ കുറയ്ക്കാൻ സാധിക്കുമെങ്കിലും ഹൈബ്രിഡ് വാഹനങ്ങളുടെ ഉയർന്ന വാങ്ങൽ ചെലവ് എല്ലാ ബജറ്റിനും അനുയോജ്യമാകണമെന്നില്ല. അതിനാൽ, പരമ്പരാഗത അല്ലെങ്കിൽ മൈൽഡ്-ഹൈബ്രിഡ് എഞ്ചിൻ ഓപ്ഷനുകൾ ലഭ്യമാകുമ്പോൾ, സ്ട്രോംഗ് ഹൈബ്രിഡ് വേരിയന്റുകൾക്ക് ഗണ്യമായ ഉയർന്ന വില നൽകേണ്ടതുണ്ടോ എന്നതാണ് വലിയ ചോദ്യം.

ഒന്നു കണക്കുകൂട്ടി നോക്കിയാലോ?

15 കിലോമീറ്റർ മൈലേജ് നൽകുന്ന വാഹനത്തിൽ പ്രതിമാസം 1,000 കിലോമീറ്റർ ഓടുന്ന ഒരാൾക്ക് ഏകദേശം 66 ലിറ്റർ പെട്രോൾ വാങ്ങേണ്ടി വരും. ലിറ്ററിന് 96.72 രൂപയായ ഡൽഹിയിലെ നിരക്ക് വെച്ചു കണക്കുകൂട്ടിയാൽ പ്രതിമാസ പെട്രോൾ ചെലവ് ഏകദേശം 6,383 രൂപ അല്ലെങ്കിൽ വാർഷിക ചെലവ് 76,500 രൂപ വരും.

ഒരു ഉടമ ഒരു വാഹനം സൂക്ഷിക്കുന്ന ശരാശരി സമയമായ എട്ട് വർഷത്തെ കാലയളവിൽ ഇത് ഏകദേശം 6.12 ലക്ഷം രൂപയുടെ ഇന്ധനച്ചെലവ് വരും. ഇനി 22 കിലോമീറ്റർ വാഗ്ദാനം ചെയ്യുന്ന ഹൈബ്രിഡ് വാഹനം ഓടിക്കുന്ന അതേ വ്യക്തിയുടെ കാര്യമെടുക്കുക. ഈ വ്യക്തി പ്രതിമാസം 45 ലിറ്റർ പെട്രോൾ വാങ്ങും.

പെട്രോൾ ലിറ്ററിന് അതേ വിലയിൽ, ഇത് പ്രതിമാസ ചെലവ് 4,350 രൂപ അല്ലെങ്കിൽ വാർഷിക ചെലവ് 52,200 രൂപ അല്ലെങ്കിൽ 4.17 ലക്ഷം രൂപ വരും. എട്ട് വർഷ കാലയളവിൽ ഒരു ലിറ്ററിന് നിരക്ക് സ്ഥിരമായി തുടരുകയാണെങ്കിൽ ഒരു വ്യക്തിക്ക് ഏകദേശം 2 ലക്ഷം രൂപ പെട്രോളിൽ ലാഭിക്കാം. ഒരാൾ കൂടുതൽ വാഹനമോടിച്ചാലോ പെട്രോൾ വില ഉയരുമ്പോഴോ ഈ ലാഭം കൂടുതലായിരിക്കും.

അങ്ങനെ നോക്കിയാൽ ഹൈബ്രിഡ് കാറുകൾ തന്നെയാണ് പരമ്പരാഗത വാഹനങ്ങളേക്കാൾ പെട്രോൾ അടിക്കുന്ന കാര്യത്തിൽ ലാഭമെന്ന് വിലയിരുത്താം. എന്നാൽ അതേ വാഹനത്തിന്റെ പരമ്പരാഗത അല്ലെങ്കിൽ മൈൽഡ്-ഹൈബ്രിഡ് പതിപ്പിനെ അപേക്ഷിച്ച് ശക്തമായ ഹൈബ്രിഡ് വാഹനം വാങ്ങാൻ അതേ വ്യക്തി കൂടുതൽ പണം ചെലവഴിക്കേണ്ടി വരും.

ഏറ്റവും ഉയർന്ന ഗ്രാൻഡ് വിറ്റാര ആൽഫ പ്ലസ് ഹൈബ്രിഡ് സിവിടി DT വേരിയന്റിന് 19.65 ലക്ഷം രൂപയാണ് ഇന്ത്യയിലെ എക്സ്ഷോറൂം വില. അതേ കാറിന്റെ ഏറ്റവും ഉയർന്ന മൈൽഡ് ഹൈബ്രിഡ് മോഡലാണെങ്കിൽ 17.05 ലക്ഷം രൂപയാണ് എക്സ്ഷോറൂം രൂപ വില വരുന്നത്. ഇത് ഏകദേശം 2.50 ലക്ഷം രൂപയുടെ വ്യത്യാസമാണ്.

സ്ട്രോംഗ് ഹൈബ്രിഡ് എഞ്ചിനുകളാൽ പ്രവർത്തിക്കുന്ന കാറുകൾ ഇന്ധനച്ചെലവിൽ ധാരാളം ലാഭം വാഗ്ദാനം ചെയ്യുന്നുവെന്ന് നിസംശയം പറയാം. എന്നാൽ പരമ്പരാഗതമോ മൈൽഡ് ഹൈബ്രിഡ് പതിപ്പുകളോ ഉള്ള അതേ മോഡലിനെ അപേക്ഷിച്ച് മുൻകൂർ വാങ്ങൽ ചെലവ് വളരെ ഉയർന്നതാണ്.

സ്ഥിരമായി ദീർഘദൂരം ഓടിക്കുന്ന ഒരാൾക്ക്, ശക്തമായ ഹൈബ്രിഡ് മോഡലുകൾ വളരെ യുക്തിസഹമാണ്. എന്നിരുന്നാലും ഹൈബ്രിഡുകൾക്ക് നൽതുന്ന ആനുകൂല്യങ്ങൾ പരിശോധിക്കുന്നത് കൂടുതൽ ഉചിതമാണ്. ഇത് ഓരോ സംസ്ഥാനത്തിനും വ്യത്യാസപ്പെടാമെന്ന് മാത്രം.