എയർപോർട്ടില്ലാത്ത രാജ്യങ്ങളോ? ഇതിനു പിന്നിലുമുണ്ട് രസകരമായ ചില കാര്യങ്ങൾ

ഭൂരിഭാഗം ആളുകൾക്കും ഏറ്റവും ഇഷ്ടപ്പെട്ട ഗതാഗത മാർഗം വിമാന യാത്രയാണെന്ന് ആർക്കും നിഷേധിക്കാനാവാത്തൊരു കാര്യമാണ്. കുറഞ്ഞ സമയംകൊണ്ട് ലക്ഷ്യസ്ഥാനത്ത് എത്താം എന്നതാണ് വിമാന യാത്രയുടെ ഏറ്റവും വലിയ മെച്ചം. അതിനാൽ തന്നെ എയർപോർട്ടില്ലാത്ത രാജ്യങ്ങൾ ഉണ്ടാവില്ലെന്ന് വിചാരിക്കുന്നവരായിരിക്കും നമ്മളിൽ പലരും അല്ലേ. എയർപോർട്ടുകൾ സാമ്പത്തികവും സാമൂഹികവുമായ പുരോഗതിയുടെ പ്രതീകങ്ങൾ കൂടിയാണ്.

ഒരു രാജ്യത്തു നിന്നും മറ്റൊരു രാജ്യത്തേക്ക് പോവാനും അല്ലെങ്കിൽ ആഭ്യന്തര യാത്രകളുടെയും ഒഴിച്ചുകൂടാനാവാത്ത ഗതാഗത സംവിധാനമാണ് വിമാനങ്ങൾ. നമ്മുടെ കൊച്ചു കേരളത്തിൽ പോലും മൂന്ന് വിമാനത്താവളങ്ങളാണുള്ളത്. എന്നാൽ ഇന്നത്തെ കാലത്ത് വിമാനത്താവളമില്ലാത്ത ഒരു രാജ്യം കണ്ടെത്തുന്നതും ബോട്ടുകൾ, ട്രെയിനുകൾ തുടങ്ങിയ മറ്റ് ബഹുജന ഗതാഗത മാർഗങ്ങളെ ഇപ്പോഴും ആശ്രയിക്കുന്നതും അപൂർവമായ കാര്യമാണെന്ന് വിചാരിക്കുന്നുണ്ടെങ്കിൽ നമുക്കത് മറക്കാം.

വിമാനത്താവളങ്ങൾ അല്ലെങ്കിൽ എയർപോർട്ടുകൾ ഇല്ലാത്ത രാജ്യങ്ങളും ഈ ലോകത്തുണ്ട്. വിമാനത്തിനോ വ്യോമയാന ഗതാഗതത്തിനോ എതിരായതുകൊണ്ടല്ല, ചില പ്രത്യേക കാര്യങ്ങളാലാണ് ഈ രാജ്യങ്ങളിൽ വിമാനത്താവളങ്ങൾ ഇല്ലാത്തത്. ബഹിരാകാശ പ്രതിസന്ധി കാരണം ഒരു വിമാനത്താവളം പോലും നിലവിലില്ലാത്ത ആ രാജ്യങ്ങൾ ഏതെന്ന് പരിചയപ്പെടുത്തി തരാം. എയർപോർട്ടുകൾ ഇല്ലാത്ത രാജ്യങ്ങളുടെ പട്ടികയും അതിനുള്ള കാരണങ്ങളും ഇതാ.

വത്തിക്കാൻ സിറ്റി: 800-ഓളം ജനസംഖ്യയുള്ള ലോകത്തിലെ ഏറ്റവും ചെറിയ രാജ്യമാണിത്. ഒരു വിമാനത്തിന് ഇറങ്ങാൻ അധികം സ്ഥലമില്ലാത്തതും ഒരു ബദൽ ഗതാഗതത്തിന് നദിയോ കടലോ ഇല്ലാത്തതും വത്തിക്കാൻ സിറ്റിയുടെ പ്രത്യേകതയാണ്. കാൽനടയായി മാത്രം സഞ്ചരിക്കാവുന്ന ചുരുക്കം ചില രാജ്യങ്ങളിൽ ഒന്നാണിതെന്നതും രസകരമായ കാര്യമാണ്. റോമിന്റെ നഗരാതിർത്തിക്കുള്ളിലാണ് രാജ്യം സ്ഥിതി ചെയ്യുന്നത്.

വത്തിക്കാൻ സിറ്റിയിൽ നിന്നും ട്രെയിനിൽ 30 മിനിറ്റിൽ താഴെ മാത്രം യാത്ര ചെയ്‌താൽ സിയാമ്പിനോയും ഫിയുമിസിനോയും ഉൾപ്പെടെയുള്ള മറ്റ് വിമാനത്താവളങ്ങളിൽ ഇവിടെയുള്ളവർക്ക് എത്തിച്ചേരാനാവും. ലോകത്തിലെ ഏറ്റവും ചെറിയ രാജ്യം എന്ന ബഹുമതിക്കും ഉടമയാണ് വത്തിക്കാൻ. മതപരമായ പ്രാധാന്യവും ഒരു പ്രിയപ്പെട്ട വിനോദസഞ്ചാര കേന്ദ്രമെന്ന നിലയിലും വത്തിക്കാൻ പലരുടേയും ഡ്രീം ഡെസ്റ്റിനേഷനുകളിൽ ഒന്നാണ്. നേപ്പിൾസ്, പിസ, ഫ്ലോറൻസ് എന്നിവിടങ്ങളിലേക്ക് റെയിൽവേ ലിങ്കുകളും വത്തിക്കാനുള്ളതിനാൽ ഒറ്റപ്പെടലിന്റെ ഫീലൊന്നുമുണ്ടാവില്ല.

മൊണാക്കോ: വത്തിക്കാൻ സിറ്റി കഴിഞ്ഞാൽ ലോകത്തിലെ ഏറ്റവും ചെറിയ രണ്ടാമത്തെ രാജ്യമാണ് മൊണാക്കോ. മൂന്ന് വശവും ഫ്രാൻസിനാൽ ചുറ്റപ്പെട്ടിരിക്കുന്ന ഈ രാജ്യത്തിന് സ്വന്തമായി ഒരു വിമാനത്താവള സൗകര്യവുമില്ല. മൊണാക്കോ പര്യവേക്ഷണം ചെയ്യാൻ ആഗ്രഹിക്കുന്ന എല്ലാവരും ഫ്രാൻസിലെ നൈസ് കോട്ട് ഡി അസൂർ വിമാനത്താവളത്തിൽ ഇറങ്ങിയ ശേഷം ഒരു ക്യാബ് ബുക്ക് ചെയ്യുകയോ ബോട്ടിൽ യാത്ര ചെയ്യുകയോ വേണം. 40,000 ത്തോളം വരുന്ന ജനസംഖ്യ മാത്രമാണിവിടെ സ്ഥിരതാമസമുള്ളവർ.

അൻഡോറ: അൻഡോറയുടെ പ്രിൻസിപ്പാലിറ്റി സ്പെയിനിനും ഫ്രാൻസിനും ഇടയിലാണ് സ്ഥിതി ചെയ്യുന്നത്. യൂറോപ്പിന്റെ മറ്റ് ഭാഗങ്ങളിൽ നിന്ന് പൈറനീസ് പർവതനിരകളാൽ ഒറ്റപ്പെട്ടിരിക്കുന്നൊരു രാജ്യമാണിത്. ഇത് മറ്റ് രാജ്യങ്ങളെപ്പോലെ ചെറുതല്ലെങ്കിലും, മൊണാക്കോയേക്കാൾ നൂറിരട്ടി വലിപ്പമുള്ള ഉപരിതല വിസ്തീർണമുണ്ടെങ്കിലും രാജ്യം സ്ഥിതി ചെയ്യുന്ന പർവത പ്രദേശം കാരണം സ്വന്തമായി ഒരു വിമാനത്താവളം പടുത്തുയർത്താൻ ഇവർക്കായിട്ടില്ല.

3000 മീറ്ററിനടുത്ത് ഉയരമുള്ള കൊടുമുടികൾ നിരവധി താഴ്‌വരകൾ സൃഷ്ടിക്കുന്നുണ്ട്. അത്തരം ഉയരങ്ങളിൽ വിമാനങ്ങൾ പ്രവർത്തിപ്പിക്കുന്നത് ബുദ്ധിമുട്ടുള്ളതും അപകടകരവുമാണ്. പ്രത്യേകിച്ച് മഞ്ഞും മൂടൽമഞ്ഞുള്ള സാഹചര്യങ്ങളും കാരണം. എന്നിരുന്നാലും കോ-പ്രിൻസിപ്പാലിറ്റിയിലെത്താൻ ഏറ്റവും അടുത്തുള്ള വിമാനത്താവളം ഏകദേശം 30 കിലോമീറ്റർ അകലെയുള്ള കാറ്റലോണിയയിലെ അൻഡോറ-ലാ സ്യൂ എയർപോർട്ടിലാണ്, സ്യൂ ഡി ഉർഗല്ലിന് സമീപമാണുള്ളത്.

സാൻ മറിനോ: വത്തിക്കാൻ സിറ്റിയിൽ നിന്ന് വളരെ അകലെയല്ലാതെ സ്ഥിതി ചെയ്യുന്ന സാൻ മറിനോ ലോകത്തിലെ ഏറ്റവും പഴക്കം ചെന്ന സംസ്ഥാനങ്ങളിലൊന്നാണ്. പൂർണമായും ഇറ്റലിയാൽ ചുറ്റപ്പെട്ട സാൻ മറിനോയ്ക്ക് കടലിലേക്ക് പ്രവേശനമില്ല. വളരെ ചെറുതായതിനാൽ വിമാനത്താവള സൗകര്യവും ഈ രാജ്യത്തിനില്ല. ഇവിടെ പ്രധാനമായും റോഡ് ശൃംഖലയാണ് ഗതാഗത സംവിധാനത്തിന്റെ ജീവനാഢി.

മാത്രമല്ല ഈ രാജ്യക്കാർക്ക് എല്ലാ ദിശകളിൽ നിന്നും ഇറ്റലിയിലേക്ക് പ്രവേശനം അനുവദിക്കുകയും ചെയ്യുന്നു. ഇറ്റലിയിലെ റിമിനിയാണ് സാൻ മറിനോയുടെ ഏറ്റവും അടുത്തുള്ള വിമാനത്താവളങ്ങളിലൊന്ന്. ചെറുതാണെങ്കിലും ഫ്ലോറൻസ്, ബൊലോഗ്ന, വെനീസ്, പിസ തുടങ്ങിയ നിരവധി വിമാനത്താവളങ്ങൾ ഇതിന് സമീപത്തായി സ്ഥിതിചെയ്യുന്നുമുണ്ട്. ഇവ പലപ്പോഴും തദ്ദേശീയരും രാജ്യത്ത് സന്ദർശിക്കുന്ന വിനോദസഞ്ചാരികളുമാണ് കൂടുതലായും ഉപയോഗിക്കുന്നത്.

ലിച്ചെൻസ്റ്റീൻ: സ്ഥലപരിമിതിയും മലയോര ഭൂപ്രകൃതിയും കാരണം ലിച്ചെൻസ്റ്റീൻ പ്രിൻസിപ്പാലിറ്റിക്ക് വിമാനത്താവളമില്ല. ഏകദേശം 160 ചതുരശ്ര കിലോമീറ്റർ വിസ്തീർണമുള്ള പ്രിൻസിപ്പാലിറ്റിക്ക് 75 കിലോമീറ്റർ മാത്രം വലിപ്പം മാത്രമാണുള്ളത്. സവിശേഷമായ സ്ഥലവും ഭൂമിശാസ്ത്രപരമായ ഭൂപ്രകൃതിയും കാരണം ഇവിടെ വിമാനത്താവളം നിർമ്മിക്കുക അസാധ്യമാണ്. എന്നിരുന്നാലും, 120 കിലോമീറ്റർ അകലെയുള്ള സൂറിച്ച് വിമാനത്താവളത്തിലെത്താൻ പ്രദേശവാസികൾ ബസ് അല്ലെങ്കിൽ കാർ റൂട്ടുകളെ ആശ്രയിക്കാനാവും.