ഡീസൽ കാറുകൾ ഇങ്ങനെ ഓടിക്കരുത്, പണികിട്ടുമെന്ന് ഉറപ്പാണ്

മലിനീകരണം നിയന്ത്രിക്കുന്നതിന്റെ ഭാഗമായി കഴിഞ്ഞ കുറച്ചു വര്‍ഷങ്ങളായി ലോകമെമ്പാടുമുള്ള വിപണികളിൽ നിന്നും ഡീസൽ കാറുകൾ പതിയെ കുറഞ്ഞുവരികയാണ്. പക്ഷേ ഇന്ത്യയിൽ ഏറ്റവും കൂടുതൽ ഡിമാന്റുള്ളതാവട്ടെ ഡീസൽ വാഹനങ്ങൾക്കാണെന്നതാണ് ശ്രദ്ധേയം. വാഹന നിർമാതാക്കൾ ചെറു ഡീസൽ കാറുകളുടെ ഉത്പാദനം നിർത്തുകയാണെങ്കിലും എസ്‌യുവി സെഗ്മെന്റിലെല്ലാം ഓയിൽ ബർണറുകൾ തന്നെയാണ് അതികായകൻമാർ.

ബിഎസ്-VI കാലഘട്ടത്തോടെ നിരവധി വാഹന നിർമാതാക്കൾ തങ്ങളുടെ നിരയിൽ നിന്നും ഡീസൽ ഉൽപ്പന്നങ്ങൾ കൂടുതലായി നീക്കം ചെയ്തിട്ടുണ്ട്. നിർമാണച്ചെലവ് ഗണ്യമായി ഉയർന്നതാണ് ഇതിന്റെ പിന്നിലുള്ള പ്രധാന കാരണം. ചെറിയ കാറുകൾ വിൽക്കുന്ന കാര്യത്തിൽ ഇന്ത്യയിലെ ഏറ്റവും ജനപ്രിയമായ രണ്ട് ബ്രാൻഡുകളായ മാരുതി സുസുക്കിയെയും ഹ്യുണ്ടായിയെയും ഡീസൽ കാറുകളിൽ നിന്നും അകലം പാലിക്കുകയാണ്. മാരുതി പൂർണമായും ഒഴിവാക്കിയപ്പോൾ ഹ്യുണ്ടായി തങ്ങളുടെ വലിയ കാറുകളിൽ മാത്രം ഡീസൽ എഞ്ചിൻ നിലനിർത്തുകയാണ് ചെയ്‌തത്.

ഇന്നും ദീര്‍ഘദൂര യാത്രകള്‍ ജീവിതത്തിന്റെ ഭാഗമായിട്ടുള്ളവര്‍ക്ക് പ്രത്യേക ഇഷ്ടം ഡീസല്‍ വാഹനങ്ങളോടുണ്ട്. ടാക്‌സിയോടുന്നവരുടെ പ്രിയപ്പെട്ടവനാണ് ഡീസൽ എഞ്ചിനുകൾ. മികച്ച പെർഫോമൻസിനൊപ്പം ഉയർന്ന മൈലേജ് നൽകുന്നതാണ് ഇതിനു പിന്നിലുള്ള പ്രധാന കാരണങ്ങളിൽ ഒന്ന്. പെട്രോൾ മോഡലുകൾ ഓടിക്കുന്നതുപോലെയല്ല ഡീസൽ കാറുകൾ ഓടിക്കേണ്ടത്. വരും ദിവസങ്ങളിൽ ഒരു ഡീസൽ വാഹനം സ്വന്തമാക്കാൻ പദ്ധതിയിടുന്ന ആളാണ് നിങ്ങളെങ്കിൽ ഡീസൽ കാർ എങ്ങനെ ഓടിക്കരുത് എന്നതിനെ കുറിച്ച് ഒന്ന് അറിഞ്ഞിരിക്കുന്നത് നന്നായിരിക്കും.

കുറഞ്ഞ ഇന്ധനത്തിൽ വാഹനമോടിക്കരുത് എന്നതാണ് ഡീസൽ വണ്ടികളോടിക്കുമ്പോൾ ആദ്യം ശ്രദ്ധിക്കേണ്ട കാര്യം. പെട്രോൾ കാറായാലും ഡീസൽ കാറായാലും കുറഞ്ഞ ഇന്ധനത്തിൽ വാഹനമോടിക്കുന്നത് ശരിയായ രീതിയല്ല. എഞ്ചിന്റെ നിരവധി നിർണായക ഘടകങ്ങൾക്ക് ഡീസൽ ഒരു ലൂബ്രിക്കന്റായി പ്രവർത്തിക്കുന്നുണ്ട്. ടാങ്കിൽ ഇന്ധനത്തിന്റെ അളവ് കുറയുമ്പോൾ, ഡീസലിന് പകരം ഫ്യുവൽ പമ്പ് കമ്പഷൻ ചേമ്പറിലേക്ക് വായു വലിച്ചെടുക്കാം. ഇത് ഘർഷണം വർധിപ്പിക്കുകയും എഞ്ചിന്റെ ആന്തരിക ഘടകങ്ങളെ നശിപ്പിക്കുകയും ചെയ്യും.

കൂടാതെ, കുറഞ്ഞ ഇന്ധനത്തിൽ വാഹനമോടിക്കുമ്പോൾ ടാങ്കിന്റെ അടിയിലുള്ള സ്ലഗ് കമ്പഷൻ ചേമ്പറിലേക്ക് വലിച്ചെടുക്കുകയും എഞ്ചിന് തകരാറുകൾ വരുത്താനുമുള്ള സാധ്യതയും ഉയർത്തുന്നു. കുറഞ്ഞ ഇന്ധനത്തിൽ വാഹനം ഓടിക്കുന്നത് ഫ്യുവൽ പമ്പിൽ സമ്മർദ്ദം ചെലുത്തും. ഇത് കേടുപാടുകൾക്ക് വഴിവെക്കാനും കാരണമാവുന്ന ഒന്നാണ്. അതിനാൽ എപ്പോഴും ടാങ്കിൽ ആവശ്യത്തിന് ഇന്ധനം നിറച്ച് വാഹനമോടിക്കാൻ പ്രത്യേകം ശ്രദ്ധിക്കേണ്ടത് അനിവാര്യമാണ്.

കുറഞ്ഞ ആർപിഎമ്മിൽ ടോപ്പ് ഗിയറുകളിൽ വാഹനമോടിക്കുന്നത് ഒഴിവാക്കുകയാണ് ഡീസൽ കാറുകൾ ഉപയോഗിക്കുമ്പോൾ ശ്രദ്ധിക്കേണ്ട അടുത്ത പ്രധാനപ്പെട്ട കാര്യം. ടോപ്പ് ഗിയറിൽ കുറഞ്ഞ ആർപിഎമ്മിൽ വാഹനമോടിക്കുന്നതിനെ ലഗ്ഗിംഗ് എന്ന് വിളിക്കുന്നു. ഇത് നിങ്ങളുടെ കാറിന്റെ എഞ്ചിനും ട്രാൻസ്മിഷനും ഗുരുതരമായ കേടുപാടുകൾ വരുത്തിയേക്കാം. അങ്ങനെ ചെയ്യുന്നത് എഞ്ചിനിൽ വലിയ സമ്മർദ്ദം ചെലുത്തുകയും അതിന്റെ നിർണായക ഘടകങ്ങൾക്ക് അകാല തേയ്മാനം ഉണ്ടാക്കുകയും ചെയ്യും.

ഇത് ഡീസൽ കാറുകളുടെ പെർഫോമൻസിനെയും ദീർഘായുസിനെയും കാര്യമായി ബാധിക്കുന്നു. നിങ്ങളുടെ വാഹനത്തിനായി എല്ലായ്‌പ്പോഴും കമ്പനി നിർദ്ദേശിച്ചിരിക്കുന്ന ആർപിഎം പരിധിക്കുള്ളിൽ ഡ്രൈവ് ചെയ്യുക. വാഹനത്തിൽ നിന്ന് സുഗമവും ഒപ്റ്റിമൽ ഡ്രൈവിംഗ് അനുഭവവും ലഭിക്കാൻ ആവശ്യമുള്ളപ്പോൾ ഗിയറുകൾ ഷിഫ്റ്റ് ചെയ്‌ത് വാഹനമോടിക്കുകയും ചെയ്യാം. അതിനാൽ ഡീസൽ കാറുകൾ ഓടിക്കുമ്പോൾ ലോ ആർപിഎമ്മുകളിൽ ടോപ്പ് ഗിയറുകളിൽ വാഹനമോടിക്കുന്നത് ഒഴിവാക്കാം.

പെട്രോൾ ആയാലും ഡീസൽ ആയാലും എല്ലാ കാർ ഉടമകളും ചെയ്യുന്നൊരു തെറ്റായ കീഴ്വഴക്കമാണ് ദീർഘനേരം നിർത്തിയിട്ട വാഹനം സ്റ്റാർട്ട് ചെയ്‌ത് ഉടൻ കാലുകൊടുത്ത് റേസ് ചെയ്യുന്ന പതിവ്. എഞ്ചിൻ സ്റ്റാർട്ട് ചെയ്‌തതിന് ശേഷം അത് ചൂടാക്കാൻ കുറച്ച് സമയം അനുവദിക്കുക. എഞ്ചിൻ ചൂടാകാൻ കുറച്ച് സമയം അനുവദിക്കുന്നത് എഞ്ചിനെ കൂടുതൽ നേരം രൂപത്തിൽ നിലനിർത്താനും മികച്ച പെർഫോമൻസ് നൽകാനും സഹായിക്കും. കോൾഡ് റെവ്വിംഗ് എന്നാൽ എഞ്ചിൻ സ്റ്റാർട്ട് ചെയ്ത ഉടൻ തന്നെ റേസ് ചെയ്‌ത് തുടങ്ങുമ്പോഴാണ്.

സ്റ്റാറ്റിക് മോഡിൽ എണ്ണ കട്ടി കൂടിയതും ലൂബ്രിക്കേഷൻ കുറവും ആയതിനാൽ കോൾഡ് റെവ്വിംഗ് എഞ്ചിന് കൂടുതൽ കേടുവരുത്തും. ഇത് പിസ്റ്റണുകൾ, പിസ്റ്റൺ റിങുകൾ, വാൽവുകൾ, സിലിണ്ടറുകൾ തുടങ്ങിയ നിർണായക ഘടകങ്ങളെ അകാലത്തിൽ ബൈധിക്കാനുള്ള സാധ്യത ഉയർത്തും. ആയതിനാൽ ഡീസൽ കാറുകളാണെങ്കിൽ എഞ്ചിൻ സ്റ്റാർട്ട് ചെയ്‌തതിന് ശേഷം അത് ചൂടാക്കാൻ കുറച്ച് സമയം അനുവദിക്കുകയാണ് വേണ്ടത്.

ഡീസൽ കാർ എക്‌സ്‌ഹോസ്റ്റിൽ നിന്ന് കറുത്ത പുക പുറത്തേക്ക് വരുന്നത് ഒരു പതിവ് കാഴ്ച്ചയാണ്. ആയതിനാൽ പല ഡ്രൈവർമാരും ഈ അടയാളം അവഗണിക്കാറാണ് പതിവ്. എന്നാൽ ഇത് ദീർഘകാലാടിസ്ഥാനത്തിൽ നിങ്ങളുടെ വാഹനത്തിന് പ്രശ്‌നമുണ്ടാക്കിയേക്കാം. എക്‌സ്‌ഹോസ്റ്റിൽ നിന്ന് പുക ഉയരുന്നത് എഞ്ചിനെ ശല്യപ്പെടുത്തുന്ന എന്തോ ഉണ്ടെന്നതിന്റെ സൂചനയാണ്. തണുത്ത കാലാവസ്ഥയിൽ വാഹനങ്ങൾ കുറച്ച് പുക പുറന്തള്ളുന്നത് സാധാരണമാണ്. അത് പൊതുവെ നീരാവിയായി കണക്കാക്കാം.

എന്നിരുന്നാലും സാധാരണ കാലാവസ്ഥയിൽ എക്‌സ്‌ഹോസ്റ്റിൽ നിന്ന് പുക പുറത്തേക്ക് വരുന്നത് അർഥമാക്കുന്നത് നിങ്ങളുടെ എഞ്ചിനിൽ എന്തെങ്കിലും തകരാറുണ്ടെന്നാണ്. എക്‌സ്‌ഹോസ്റ്റിൽ നിന്നുള്ള ഇരുണ്ട പുക അർഥമാക്കുന്നത് അമിതമായ ഇന്ധന ഉപഭോഗം അല്ലെങ്കിൽ തകരാറ് സംഭവിച്ച ഇൻജക്‌റ്റർ അല്ലെങ്കിൽ എഞ്ചിനുമായി ബന്ധപ്പെട്ട പ്രശ്‌നങ്ങൾ ഉണ്ടെന്നാണ്. വെളുത്ത പുക കൂളന്റ് ഇഞ്ചക്ടറിന്റെ തകരാറിനെയാണ് സൂചിപ്പിക്കുന്നത്. അതേസമയം നീല പുക ഓയിൽ കത്തുന്നതിനെയും സൂചിപ്പിക്കുന്ന കാര്യവുമാണ്.

ഡിപിഎഫ് വൃത്തിയായി സൂക്ഷിക്കുകയാണ് ഡീസൽ കാറുകൾ ഉപയോഗിക്കുമ്പോൾ ശ്രദ്ധിക്കേണ്ട അടുത്ത കാര്യം. ഡീസൽ വാഹനങ്ങളിൽ കാണപ്പെടുന്ന ഒരു നിർണായക ഘടകമാണ് ഡിപിഎഫ് അല്ലെങ്കിൽ ഡീസൽ കണികാ ഫിൽറ്റർ. ഈ ഘടകം നിങ്ങളുടെ വാഹനത്തിൽ നിന്ന് പരിസ്ഥിതിയിലേക്ക് ദോഷകരമായ എമിഷൻ ഘടകങ്ങളെ തടയുകയും കുറയ്ക്കുകയും ചെയ്യുന്നു. ഇത് പതിവ് സർവീസിന്റെയും മെയിന്റനെൻസിലും ഉൾക്കൊള്ളിച്ചാൽ മതിയാവും.

ഡി‌പി‌എഫ് അടഞ്ഞിരിക്കുകയാണെങ്കിൽ അത് ഡാസൽ വാഹനങ്ങലുടെ പവർ, പെർഫോമൻസ്, കാര്യക്ഷമത എന്നിവയെ ബാധിക്കാൻ കാരണമാകുന്നു. ഇത് ദീർഘകാലത്തേക്ക് എഞ്ചിന്റെ സുഗമമായ പ്രവർത്തത്തേയും തടസപ്പെടുത്തിയേക്കാം. അതിനാൽ ഡീസൽ കാറിന്റെ ആകൃതി നിലനിർത്താൻ ഡിപിഎഫിന്റെ ആനുകാലിക പരിശോധനയും വൃത്തിയാക്കലും ആവശ്യമാണെന്ന കാര്യവും ഉടമകൾ അറിഞ്ഞിരിക്കേണ്ടത് അനിവാര്യമാണ്.