രാജകീയ യാത്രകളുടെ അവസാനവാക്ക്... ഇന്ത്യയിലെ ലക്ഷ്വറി ട്രെയിനുകളെ പരിചയപ്പെടാം

ആഡംബര തീവണ്ടികൾ വിശാലവും അതോടൊപ്പം തന്നെ റെസ്റ്റോറന്റുകളും ബാറുകളും സുഖപ്രദമായ സീറ്റിംഗുമാണ് പ്രതിദാനം ചെയ്യുന്നത്. ശരിക്കും പറഞ്ഞാൽ വിദേശ രാജ്യങ്ങളിൽ മാത്രം കണ്ടുവന്നിരുന്ന ഇത്തരം ട്രെയിൻ യാത്രകൾ ഇന്ന് നമ്മുടെ രാജ്യത്തിന്റെ മുഖമുദ്രയായി മാറിയിരിക്കുകയാണ്.

ടൂറിസത്തെ എങ്ങനെയെല്ലാം പരിഭോഷിപ്പിക്കാം എന്നതാണ് ഇത്തരം ലക്ഷ്വറി ട്രെയിനുകളുടെ പ്രധാന ലക്ഷ്യങ്ങളിൽ ഒന്നും. ലോകോത്തര സൗകര്യങ്ങള്‍ അനുഭവിച്ച്, രാജകീയ സുഖത്തില്‍ ഇന്ത്യയിലെ പ്രസിദ്ധമായ ഇടങ്ങളിലേക്കുള്ള യാത്രയാണ് ഇവ നൽകുന്നതും. ഒരുദിവസമെങ്കിൽ ഒരുദിവസം രാജാവിനെപ്പോ​ലെ ജീവിക്കാൻ ആഗ്രഹിക്കാത്തവർ ആരും തന്നെ കാണില്ല.

ഇത്തരത്തിലുള്ള രാജകീയമായ സുഖസൗകര്യങ്ങളോടു കൂടിയ യാത്ര ചെയ്യുന്നതിനായി തെരഞ്ഞെടുക്കാൻ സാധിക്കുന്ന ഇന്ത്യയിലെ 5 മികച്ച ആഡംബര ട്രെയിനുകളെ നമുക്കൊന്നു പരിചയപ്പെട്ടാലോ?

ഡെക്കാൻ ഒഡീസി

താജ് ഗ്രൂപ്പ് ഓഫ് ഹോട്ടൽസാണ് ഡെക്കാൻ ഒഡീസി എന്ന ആഡംബര തീവണ്ടി നിയന്ത്രിക്കുന്നത്. പതിനാറാം നൂറ്റാണ്ടിലെ മഹാരാജാസിന്റെ ജീവിതത്തെ പ്രതിഫലിപ്പിക്കുന്ന തരത്തിലാണ് ഇത് രൂപകൽപ്പന ചെയ്തിരിക്കുന്നത്.

മഹാരാഷ്ട്ര ടൂറിസത്തിന്റെ ഒരു സംരംഭമായ ഡെക്കാൻ ഒഡീസി ഗതാഗതവും ആഡംബരവും ആസ്വദിക്കാനുള്ള മികച്ച തെരഞ്ഞെടുപ്പാണ്. മുംബൈയിലോ ഡൽഹിയിലോ ആണ് ഇതിന്റെ തുടക്കം. ട്രെയിന്‍ യാത്രയിലെ ആഢംബരത്തിന്‍റെ അവസാനവാക്കായാണ് പലരും ഡെക്കാൻ ഒഡീസിയെ വിശേഷിപ്പിക്കുന്നത്.

മഹാരാജാസ് എക്സ്പ്രസ്

ഇന്ത്യയുടെ പൈതൃകത്തെക്കുറിച്ചുള്ള ഒരു ആശയം പര്യവേക്ഷണം ചെയ്യുന്നതിനാണ് മഹാരാജാസ് എക്സ്പ്രസ് നിർമിച്ചിരിക്കുന്നത്. ഇത് പ്രസിഡൻഷ്യൽ സ്യൂട്ടിന്റെ അനുഭവമാണ് യാത്രക്കാർക്ക് നൽകുന്നു. സ്വകാര്യ ലോഞ്ചുകൾ, കിടപ്പുമുറികൾ, ആഡംബര ശുചിമുറികൾ, സമൃദ്ധമായ ഡൈനിംഗ് ഏരിയ എന്നിവയ്‌ക്കൊപ്പം പ്രവർത്തിക്കുന്ന ഒരു പ്രീമിയം പഞ്ചനക്ഷത്ര ഹോട്ടൽ വരെ ഈ ലക്ഷ്വറി ട്രെയിനിന്റെ പ്രധാന ആകർഷണങ്ങളാണ്.

ഡൽഹിയിൽ നിന്ന് (വടക്ക്) ആരംഭിച്ച് യാത്ര തിരുവനന്തപുരത്ത് (തെക്ക്) അവസാനിക്കുന്ന രീതിയിലാണ് മഹാരാജാസ് എക്സ്പ്രസിന്റെ യാത്ര ക്രമീകരിച്ചിരിക്കുന്നതും.

റോയൽ രാജസ്ഥാൻ ഓൺ വീൽസ്

രാജസ്ഥാനിലെ സമ്പന്നമായ ഒരു സാംസ്കാരിക പര്യടനത്തിന് വേണ്ടിയാണ് റോയൽ രാജസ്ഥാൻ ഓൺ വീൽസ് രൂപകൽപ്പന ചെയ്തിരിക്കുന്നത്. രാജസ്ഥാനിലെ രാജകൊട്ടാരങ്ങളുടെ ശൈലിയിൽ അലങ്കരിച്ചിരിക്കുന്ന തീവണ്ടിയിലെ അകത്തളങ്ങൾ ഗംഭീരമായ സൗന്ദര്യവും സമൃദ്ധിയും കൊണ്ട് അലങ്കരിച്ചിരിക്കുന്നതാണ് പ്രധാന ആകർഷണം.

അതോടൊപ്പം രണ്ട് റെസ്റ്റോറന്റ് കോച്ചുകൾ, ഒരു സുവനീർ കോച്ച് സ്‌പോർട്‌സ്, ഒരു സ്പാ കോച്ച് എന്നിവയാണ് ട്രെയിനിലുള്ളത്. മറ്റ് തീവണ്ടികൾക്ക് സമാനമായി, ഈ കോച്ചിൽ നിങ്ങൾക്ക് രാജകീയ അനുഭൂതി നൽകും. ഡൽഹിയിലാണ് ഇതിന്റെ തുടക്കം.

പാലസ് ഓൺ വീൽസ്

രാജസ്ഥാൻ ടൂറിസം ഡെവലപ്‌മെന്റ് കോർപ്പറേഷന്റെ ആദ്യത്തെ ഹെറിറ്റേജ് ലക്ഷ്വറി ട്രെയിനാണ് പാലസ് ഓൺ വീൽസ്. ഇന്ത്യക്കാർക്കും വിദേശ സന്ദർശകർക്കും വേണ്ടിയാണ് ഇത് അവതരിപ്പിച്ചിരിക്കുന്നത്.

ഈ പ്രീമിയം ട്രെയിൻ അതിന്റെ രാജകീയ അതിപ്രസരം നിലനിർത്തി രാജസ്ഥാന്റെ ഹൃദയഭാഗത്തുകൂടി സഞ്ചാരികളെ കൊണ്ടുപോകുന്നു. ജയ്പൂരിലാണ് പാലസ് ഓൺ വീൽസ് സർവീസിന്റെ തുടക്കം.

ദി റോയൽ ഓറിയന്റ്

ഡൽഹി, ഉദയ്പൂർ, അഹമ്മദാബാദ്, ജയ്പൂർ, ജുനഗഡ്, പാലിറ്റാന എന്നിവയുൾപ്പെടെ ഗുജറാത്ത്, രാജസ്ഥാൻ എന്നീ രണ്ട് സംസ്ഥാനങ്ങളിലെയും പ്രധാനപ്പെട്ട വിനോദസഞ്ചാര കേന്ദ്രങ്ങളെ ഉൾക്കൊള്ളിച്ചുകൊണ്ട് ഓടുന്ന ഒരു ഇന്ത്യൻ ലക്ഷ്വറി ടൂറിസം ട്രെയിനാണ് റോയൽ ഓറിയന്റ്.

ഡൽഹിയിലാണ് ഇതിന്റെ തുടക്കം. സെപ്റ്റംബർ മുതൽ ഏപ്രിൽ വരെ ആഴ്ച്ചയിലെ എല്ലാ ബുധനാഴ്ചകളിലും ഡൽഹി കന്റോൺമെന്റിൽ നിന്ന് ഇത് പ്രവർത്തിക്കുന്നു. ഇന്ത്യയിലെ ആദ്യത്തെ ആഡംബര ടൂറിസ്റ്റ് ട്രെയിനായ പാലസ് ഓൺ വീൽസിന്റെ മാതൃകയിൽ, "ഇന്ത്യൻ സംസ്കാരത്തിന്റെയും പൈതൃകത്തിന്റെയും ഏറ്റവും മികച്ചത് പ്രദർശിപ്പിച്ചുകൊണ്ട്" വിനോദസഞ്ചാരികൾക്ക് രാജകീയ യാത്രയാണ് ഈ തീവണ്ടിയും പ്രദാനം ചെയ്യുന്നത്.