2019 കവാസാക്കി നിഞ്ച ZX-6R, ബുക്കിംഗ് തുടങ്ങി

അടുത്തവര്‍ഷം ജനുവരിയിലാണ് 2019 നിഞ്ച ZX-6R ഇന്ത്യയില്‍ വില്‍പനയ്‌ക്കെത്തുക. ഇപ്പോള്‍ ബുക്ക് ചെയ്യുന്നവര്‍ക്ക് ജനുവരിയില്‍ കമ്പനി ബൈക്കുകള്‍ കൈമാറും. ആദ്യ ഘട്ടത്തില്‍ നിഞ്ച ZX-6R -നെ പരിമിതമായി മാത്രമെ കവാസാക്കി നിര്‍മ്മിക്കുകയുള്ളൂ.

നിഞ്ച ZX-10R പോലെ പുതിയ നിഞ്ച ZX-6R -നെ പ്രാദേശികമായി സംയോജിപ്പിച്ച് വിപണിയില്‍ അവതരിപ്പിക്കാനാണ് കവാസാക്കിയുടെ തീരുമാനം. വരുംദിവസങ്ങളില്‍ മോഡലിന്റെ വിലയും സാങ്കേതിക വിവരങ്ങളും കമ്പനി പരസ്യപ്പെടുത്തും.

ലിക്വിഡ് കൂളിംഗ് സംവിധാനമുള്ള 636 സിസി നാലു സിലിണ്ടര്‍ എഞ്ചിനാണ് രാജ്യാന്തര നിരയിലെ കവാസാക്കി നിഞ്ച ZX-6R മോഡലിന്. എഞ്ചിന്‍ 128 bhp കരുത്തും 70.8 Nm torque ഉം പരമാവധി സൃഷ്ടിക്കും. ആറു സ്പീഡാണ് ഗിയര്‍ബോക്‌സ്.

Most Read: ക്ലാസിക് തനിമ, ബുള്ളറ്റിന് പകരക്കാരനാവാന്‍ പുതിയ ജാവ ബൈക്ക്

ഇന്ത്യന്‍ പതിപ്പിലും കാര്യമായ പരിഷ്‌കാരങ്ങള്‍ കമ്പനി നടപ്പിലാക്കില്ലെന്നാണ് വിവരം. മുന്നോട്ടു കുതിച്ചു ചാടാന്‍ നില്‍ക്കുംവിധം അക്രമണോത്സുക ഭാവമാണ് 2019 നിഞ്ച ZX-6R -ന്. മൂര്‍ച്ചയേറിയ ഹെഡ്‌ലാമ്പ് ഘടന മോഡലിന്റെ സ്‌പോര്‍ടി ഭാവം കാര്യമായി ഉയര്‍ത്തും.

പുതിയ ഫെയറിംഗും പരിഷ്‌കരിച്ച ബോഡി ഗ്രാഫിക്‌സും ബൈക്കിന്റെ സവിശേഷതയാണ്. ഒരല്‍പം ഉയര്‍ത്തിയ പിന്‍ഭാഗം മോഡലില്‍ പുതുമ അനുഭവപ്പെടുത്തും. ബൈക്കിലെ സെമി ഡിജിറ്റല്‍ ഇന്‍സ്ട്രമെന്റ് ക്ലസ്റ്ററും കമ്പനി പരിഷ്‌കരിച്ചിട്ടുണ്ട്.

കവാസാക്കി ട്രാക്ഷന്‍ കണ്‍ട്രോള്‍, രണ്ടു പവര്‍ മോഡുകള്‍, ആന്റി - ലോക്ക് ബ്രേക്കിംഗ് സംവിധാനം, കവാസാക്കി ക്വിക്ക് ഷിഫ്റ്റര്‍ എന്നിവയെല്ലാം മോഡലിന്റെ പ്രത്യേകതകളില്‍പ്പെടും. ഭാരം 196 കിലോ. ഏകേദശം 11 ലക്ഷം രൂപ മോഡലിന് ഇന്ത്യയില്‍ വില പ്രതീക്ഷിക്കാം.