പള്‍സര്‍ 150, ഡൊമിനാര്‍ എന്നിവയുടെ വില വര്‍ധിപ്പിക്കാനൊരുങ്ങി ബജാജ്

കൂടാതെ പ്രധാന മോഡലായ ഡൊമിനാര്‍ 400 ന്റെ വിലയും ബജാജ് വര്‍ധിപ്പിച്ചിട്ടുണ്ട്. ഈ വര്‍ഷം മാര്‍ച്ചില്‍ വിപണിയിലെത്തിയ ഡൊമിനാറിന്റെ പുതിയ പതിപ്പിന് 6000 രൂപയുടെ വര്‍ധനവാണ് ഉണ്ടായിരിക്കുന്നത്.

പുതുക്കിയ വില പ്രകാരം ബജാജ് പള്‍സര്‍ നിയോണ്‍ പതിപ്പിന്റെ വില 68,250 രൂപയില്‍ നിന്ന് 71,200 രൂപയായി കൂടി. 2950 രൂപയുടെ വര്‍ധനവാണ് ഈ മോഡലുകള്‍ക്കുണ്ടായിരിക്കുന്നത്. സിംഗിള്‍ ഡിസ്‌ക് എബിഎസിന് 479 രൂപയും ഡ്യുവല്‍ ഡിസ്‌ക് എബിഎസിന് 499 രൂപയുടെ വര്‍ധവുമുണ്ടായി.

സിംഗിള്‍ ഡിസ്‌ക് എബിഎസിന് 84,960 രൂപയും ഡ്യുവല്‍ ഡിസ്‌ക് എബിഎസിന് 88,838 രൂപയുമാണ് എക്‌സ്‌ഷോറൂം വില. 2019 മാര്‍ച്ചില്‍ കമ്പനി അവതരിപ്പിച്ച ഡൊമിനാര്‍ 400 ആദ്യം 1.74 ലക്ഷം രൂപയായിരുന്നു. എന്നാല്‍ അത് 6000 രൂപ വര്‍ധിപ്പിച്ച് 1.80 ലക്ഷം രൂപയായി ബജാജ് ഉയര്‍ത്തി.

വിലവര്‍ധനവിന് പുറമെ ബൈക്കുകളില്‍ കാര്യമായ മാറ്റങ്ങളൊന്നുമില്ല. 149 സിസി സിംഗിള്‍ സിലിണ്ടര്‍ എയര്‍ കൂള്‍ഡ് എഞ്ചിനാണ് ബജാജ് പള്‍സര്‍ 150 ശ്രേണി ബൈക്കുകള്‍ക്കുള്ളത്. 5 സ്പീഡ് ഗിയര്‍ ബോക്‌സും 13.8 bhp കരുത്തില്‍ 13.4 Nm torque ഉം വാഹനം ഉത്പാദിപ്പിക്കും.

373 സിസി സിംഗിള്‍ സിലിണ്ടര്‍ ലിക്വിഡ്-കൂള്‍ എഞ്ചിനാണ് ഡൊമിനാര്‍ 400 ന്റെ കരുത്ത്. 37 bhp കരുത്തില്‍ 34 Nm torque വാഹനം സൃഷ്ടിക്കും. 6 സ്പീഡ് ഗിയര്‍ ബോക്‌സാണ് ഡൊമിനാറിന്. ഇന്‍വേര്‍ട്ടഡ് ഫ്രണ്ട് ഫോര്‍ക്കുകളും പിന്നില്‍ മോണോ ഷോക്കുമാണ് ബൈക്കിനുള്ളത്. 320 എംഎം ഡിസ്‌ക് അപ് ബ്രേക്ക് മുന്‍ഭാഗത്തും പിന്നില്‍ 230 എംഎം ഡിസ്‌ക് ബ്രേക്കുമാണ് കമ്പനി നല്‍കിയിരിക്കുന്നത്. എബിഎസ് ബ്രേക്കിംഗാണ് ഈ പതിപ്പിനുള്ളത്.

ബൈക്കുകളുടെ വില വര്‍ധനയുടെ കാരണം ബജാജ് വ്യക്തമാക്കിയിട്ടില്ല. എന്നിരുന്നാലും പള്‍സര്‍ 150 ഡൊമിനാര്‍ 400 എന്നിവയുടെ പുതിയ വില ഉടന്‍ പ്രാബല്യത്തില്‍ വരും. യമഹ FZ, ഹോണ്ട യൂണികോണ്‍, കെടിഎം ഡ്യൂക്ക് 125 എന്നിവയാണ് ബജാജ് പള്‍സര്‍ 150 യുടെ വിപണിയിലെ എതിരാളികള്‍. കെടിഎം ഡ്യൂക്ക് 390, ബിഎംഡബ്യൂ ജി 310, ടിവിഎസ് അപ്പാച്ചെ RR 310, ഹോണ്ട CB 300 എന്നിവയാണ് ഡൊമിനാര്‍ 400 ന്റെ എതിരാളികള്‍