ഇന്ത്യയിൽ 50,000 ഇവി ചാർജിംഗ് സ്റ്റേഷനുകൾ ഒരുക്കാൻ ബോൾട്ടുമായി കൈകോർത്ത് Hero Electric

ഇന്ത്യയിലുടനീളമുള്ള ഹീറോ ഇലക്ട്രിക്കിന്റെ 750-ലധികം ടച്ച് പോയിന്റുകളിൽ 4.5 ലക്ഷത്തിലധികം ഉപഭോക്താക്കൾക്ക് പ്രയോജനം ചെയ്യുന്നതിനായാണ് BOLT ചാർജറുകൾ സ്ഥാപിക്കുക. കൂടാതെ ഏകദേശം 2,000 ഇവി ഉടമകൾക്ക് അവരുടെ വീടുകളിൽ ബോൾട്ട് ചാർജിംഗ് യൂണിറ്റുകൾ സൗജന്യമായി സ്ഥാപിക്കാനും അവസരം ലഭിക്കും.

ഇരു ബ്രാൻഡുകളും തമ്മിലുള്ള ഈ സഹകരണം ഇന്ത്യയിൽ ഇലക്ട്രിക് വാഹനങ്ങളിലേക്കുള്ള പരിവർത്തനവും കാർബൺ രഹിത മൊബിലിറ്റിയിലേക്കുള്ള മുന്നേറ്റവും കൂടുതൽ എളുപ്പത്തിലാക്കുമെന്നാണ് പ്രതീക്ഷിക്കുന്നത്. രാജ്യത്ത് ഇലക്ട്രിക് വാഹനങ്ങൾ സ്വീകരിക്കുന്നത് പ്രോത്സാഹിപ്പിക്കുന്നതിന് കരുത്തുറ്റതും താങ്ങാനാവുന്നതും ആക്സസ് ചെയ്യാവുന്നതുമായ ഇവി ചാർജിംഗ് ഇൻഫ്രാസ്ട്രക്ചർ നൽകുകയെന്ന ലക്ഷ്യം നേടാൻ ഹീറോ ഇലക്ട്രിക്കിനെയും ബോൾട്ടിനെയും ഈ പങ്കാളിത്തം സഹായിക്കും.

ഹീറോ ഇലക്ട്രിക്കിന്റെ എന്റർപ്രൈസ് പങ്കാളികളും ഇവി ഉപഭോക്താക്കളും ബോൾട്ട് ചാർജിംഗ് നെറ്റ്‌വർക്ക് പ്രയോജനപ്പെടുത്തും. ഇത് റേഞ്ചുമായി ബന്ധപ്പെട്ട ഉത്കണ്ഠകളെ പരിഹരിക്കാൻ കൂടുതൽ സഹായകരമാവും. കൂടാതെ ഹീറോ ഇലക്ട്രിക് ആപ്പിലും വെബ്‌സൈറ്റിലും ബോൾട്ടിനെയും കമ്പനി സംയോജിപ്പിക്കും.

ചാർജിംഗ് സ്റ്റേഷൻ കണ്ടെത്തുന്നതിനും സ്ലോട്ട് ബുക്ക് ചെയ്യുന്നതിനും പേയ്‌മെന്റിനും ഒറ്റത്തവണ പരിഹാരമാണ് ഇതിലൂടെ സാധ്യമാവുന്നത്. ബോൾട്ട് ചാർജിംഗ് സ്റ്റേഷനുകളുടെ ഇൻസ്റ്റാളേഷന് ശേഷം വ്യക്തികൾക്ക് അവരുടെ ചാർജിംഗ് സ്റ്റേഷനുകൾക്കായി സ്വകാര്യ/പൊതു പ്രവർത്തന രീതികൾ തെരഞ്ഞെടുക്കാനും നിലവിലുള്ള വാണിജ്യ/ഇവി താരിഫുകൾ അനുസരിച്ച് വില തീരുമാനിക്കാനും കഴിയും.

കൂടാതെ ഹീറോ ഇലക്ട്രിക് റൈഡറുകൾക്ക് അവരുടെ ഉപയോഗം എളുപ്പമാക്കുന്നതിന് സബ്‌സ്‌ക്രിപ്‌ഷൻ അടിസ്ഥാനമാക്കിയുള്ള പ്ലാനുകൾ പ്രഖ്യാപിക്കും. BOLT ചാർജിംഗ് നെറ്റ്‌വർക്ക് ഹാർഡ്‌വെയർ രാജ്യത്തെ ഏത് ചാർജിംഗ് സൊല്യൂഷൻ പ്രൊവൈഡറുമായും സംയോജിപ്പിക്കാനുമാവും.

ബോൾട്ട് ഓപ്പറേറ്റിംഗ് സിസ്റ്റം നിരവധി ഇലക്ട്രിക് വാഹനങ്ങളിൽ മുൻകൂട്ടി ഇൻസ്റ്റാൾ ചെയ്തിട്ടുണ്ട്. ബോൾട്ടിന്റെ വിപ്ലവകരമായ വാഹനങ്ങൾ ചാർജർ കണക്റ്റിവിറ്റിയിലേക്ക് (V2C) ഇവി ഉപയോക്താക്കൾക്ക് തടസമില്ലാത്ത ഫാസ്ടാഗ് പോലുള്ള ചാർജിംഗ് അനുഭവം പ്രാപ്തമാക്കും.

ഹീറോ ഇലക്ട്രിക്കും ബോൾട്ടും തങ്ങളുടെ വാഹനങ്ങൾക്കായി IOT ട്രാക്കിംഗ് സൊല്യൂഷനുകൾക്കായി ഒരു സംവിധാനം ഒരുക്കുമെന്നും അറിയിച്ചിട്ടുണ്ട്. എല്ലാ ഹീറോ ഇലക്ട്രിക് ബി2ബി പങ്കാളികൾക്കും ഫ്ലീറ്റ് മാനേജ്‌മെന്റ്, ചാർജിംഗ് മാനേജ്‌മെന്റ് സൊല്യൂഷനുകളും ഇതിലൂടെ വഴികാട്ടും.

ബോൾട്ട് ചാർജിംഗ് നെറ്റ്‌വർക്കിനൊപ്പം മികച്ചതും സുരക്ഷിതവും ബന്ധിപ്പിച്ചതുമായ ഒരു ഇക്കോസിസ്റ്റം പ്രവർത്തനക്ഷമമാക്കിക്കൊണ്ട് BOLT OS പ്രവർത്തനക്ഷമമാക്കിയ സ്മാർട്ട് സ്പീഡോമീറ്റർ സൊല്യൂഷൻ ഹീറോ ഇലക്ട്രിക് വാഹനങ്ങളുമായി സമന്വയിപ്പിക്കുന്നതും വരാനിരിക്കുന്ന മാറ്റങ്ങളിൽ ഒന്നായിരിക്കും.

യൂണിവേഴ്‌സൽ ബോൾട്ട് ചാർജിംഗ് പോയിന്റും ബോൾട്ട് ഓപ്പറേറ്റിംഗ് സിസ്റ്റവും അടങ്ങുന്ന ഇന്ത്യയിലെ ഏറ്റവും വലിയ ഇലക്ട്രിക് വാഹന ചാർജിംഗ് നെറ്റ്‌വർക്കാണ് BOLT. ശക്തമായ ഇവി ചാർജിംഗ് അടിസ്ഥാന സൌകര്യങ്ങൾ നിർമിക്കുക എന്ന ലക്ഷ്യത്തോടെ വികസിപ്പിച്ചെടുത്ത രാജ്യത്തുടനീളമുള്ള റൈഡർമാരെ ബന്ധിപ്പിക്കുന്ന IoT- പ്രാപ്തമാക്കിയ ചാർജിംഗ് പോയിന്റുകളുടെ ഇന്ത്യയിലെ ആദ്യത്തെ സമർപ്പിത ശൃംഖലയാണിത്.

ഇന്ത്യയിൽ നിർമിച്ച യൂണിവേഴ്‌സൽ ചാർജിംഗ് പോയിന്റാണ് ബോൾട്ടിന്റേത്. അത് ഇലക്ട്രിക് വാഹനങ്ങൾക്കൊപ്പം വരുന്ന ഏത് പോർട്ടബിൾ ചാർജറുമായി പൊരുത്തപ്പെടുകയും ചെയ്യും. ഇത് എല്ലായിടത്തും നിലവിലുള്ള എസി പവർ സപ്ലൈയിൽ പ്രവർത്തിക്കാനും യോഗ്യമാണ്. 33000KW-ലധികം സ്ഥാപിത ശേഷിയും 50,000 സജീവ ഉപയോക്താക്കളും ഉള്ള 10,000-ലധികം ബോൾട്ട് ചാർജിംഗ് പോയിന്റുകൾ ഇതിനകം തന്നെ ഇന്ത്യയിലെ 100 വ്യത്യസ്ത നഗരങ്ങളിൽ സ്ഥാപിച്ചിട്ടുണ്ട്.

സുരക്ഷിതവും വിശ്വസനീയവും താങ്ങാനാവുന്നതുമായ ഇവി ചാർജിംഗ് ഇൻഫ്രാസ്ട്രക്ച്ചറിനുള്ള അമിതമായ ആവശ്യത്തിന് പ്രതികരണമായി അടുത്ത 6 മാസത്തിനുള്ളിൽ ഇന്ത്യയിലുടനീളം 100,000 ചാർജിംഗ് പോയിന്റുകൾ വിന്യസിക്കുന്നതിനുള്ള നീക്കവുമായാണ് കമ്പനി ഇപ്പോൾ മുന്നോട്ടുപോവുന്നത്.

ഇന്ത്യയിലെ ഏറ്റവും വലിയ ഇലക്ട്രിക് ഇരുചക്ര വാഹന ബ്രാൻഡാണ് ഹീറോ ഇലക്ട്രിക്. ഒരു ദശാബ്ദത്തിലേറെയായി ഇന്ത്യയിൽ ഇലക്ട്രിക് മൊബിലിറ്റിയുടെ മുൻനിരയിലുള്ള ഹീറോ ഇലക്ട്രിക് 2022 സാമ്പത്തിക വർഷത്തിൽ 1 ലക്ഷം വിൽപ്പന നാഴികക്കല്ല് നേടിയ ഏക ഇവി കമ്പനിയാണെന്നതും ശ്രദ്ധേയം.

നിലവിൽ 4.5 ലക്ഷത്തിലധികം വാഹനങ്ങളും 750-ലധികം ടച്ച്‌പോയിന്റുകളുടെ വിശാലമായ ശൃംഖലയുമുള്ള ഹീറോ ഇലക്‌ട്രിക് "നോ എമിഷൻ" ദൗത്യത്തെ പിന്തുണയ്‌ക്കുന്ന ഇലക്ട്രിക് വാഹനങ്ങളുടെ വിശാലമായ ശ്രേണിയിലൂടെ 'സീറോ പൊല്യൂഷൻ' ഗതാഗതത്തിലൂടെ രാജ്യത്തെ ഹരിതാഭമാക്കാനാണ് കമ്പനി ശ്രമിക്കുന്നതും.

ഹീറോ ഇലക്ട്രിക് അടുത്തിടെ പുതിയ ഒപ്റ്റിമ CX മോഡലിനെ രാജ്യത്ത് അവതരിപ്പിച്ചിരുന്നു. ഒപ്റ്റിമ HX പതിപ്പിന്റെ നവീകരിച്ച സ്കൂട്ടറാണിത്. സിംഗിൾ ബാറ്ററി വേരിയന്റിന് 62,190 രൂപയും ഡ്യുവൽ ബാറ്ററി വേരിയന്റിന് 77,490 രൂപയുമാണ് എക്സ്ഷോറൂം വില.