സ്വിഗ്ഗിയുടെ ഫുഡ് ഡെലിവറിക്ക് കരുത്തേകാൻ ഇനി മുതൽ TVS iQube ഇലക്‌ട്രിക് സ്‌കൂട്ടറുകളും

ടിവിഎസ് പറയുന്നതനുസരിച്ച്, വൈവിധ്യമാർന്ന മൊബിലിറ്റി സെഗ്‌മെന്റുകളിലുടനീളം വൈദ്യുതീകരണം ശക്തിപ്പെടുത്തുന്നതിനുള്ള ടിവിഎസ് മോട്ടോർ കമ്പനിയുടെ പ്രതിബദ്ധതയാണ് ഈ പങ്കാളിത്തം എടുത്തുകാണിക്കുന്നത്. കൂടാതെ ഡെലിവറി ഫ്ലീറ്റിൽ ഇവികൾ സ്വീകരിക്കുന്നത് പ്രാപ്തമാക്കാനുള്ള സ്വിഗ്ഗിയുടെ നിരവധി ശ്രമങ്ങളുമായി ഇത് ഒത്തുചേരുകയും ചെയ്യും.

സ്വിഗ്ഗിയുമായുള്ള തന്ത്രപരമായ പങ്കാളിത്തത്തിന് കീഴിൽ ഭക്ഷണ വിതരണത്തിനും മറ്റ് ഡിമാൻഡ് ഡെലിവറികൾക്കും ടിവിഎസ് ഇലക്ട്രിക് വാഹനങ്ങൾ ഉപയോഗിക്കുമെന്ന് ബ്രാൻഡ് ഒരു പ്രസ്താവനയിലൂടെയാണ് വ്യക്തമാക്കിയത്.

സ്വിഗ്ഗിയുടെ ഡെലിവറി പങ്കാളികൾക്കായി ടിവിഎസ് സുസ്ഥിരവും സമഗ്രവുമായ പരിഹാരങ്ങൾ പര്യവേക്ഷണം ചെയ്യുകയാണെന്ന് ഇരുചക്ര വാഹന നിർമാതാക്കൾ അവകാശപ്പെടുന്നു. ആവശ്യ-നിർദ്ദിഷ്ട ഉൽപ്പന്നം, ഫ്ലെക്സിബിൾ ഫിനാൻസിംഗ് ഓപ്ഷനുകൾ, കണക്റ്റുചെയ്‌ത സേവനങ്ങൾ എന്നിവ പോലുള്ള ഇഷ്‌ടാനുസൃതമാക്കിയ പാക്കേജുകൾ വരെ ഇതിൽ ഉൾപ്പെടും.

ഫുഡ് ഡെലിവറിയിലും ലാസ്റ്റ് മൈൽ ഡെലിവറി സേവനങ്ങളിലും മൊബിലിറ്റിയുടെ വൈദ്യുതീകരണം ശക്തിപ്പെടുത്തുന്നതിനുള്ള സുപ്രധാന ചുവടുവയ്പ്പാണ് സ്വിഗ്ഗിയുമായുള്ള കമ്പനിയുടെ സഹകരണമെന്ന് ടിവിഎസ് മോട്ടോർ കമ്പനി ഫ്യൂച്ചർ മൊബിലിറ്റി സീനിയർ വൈസ് പ്രസിഡന്റ് മനു സക്‌സേന പറഞ്ഞു.

ടിവിഎസ് മോട്ടോർ കമ്പനിയുടെ അഭിപ്രായത്തിൽ സ്വിഗ്ഗിയുമായുള്ള ധാരണാപത്രം സാമ്പത്തിക വർഷാവസാനത്തോടെ എല്ലാ പ്രധാന നഗരങ്ങളിലും ടിവിഎസ് ഐക്യൂബ് ഇലക്ട്രിക് സ്കൂട്ടറിന്റെ സാന്നിധ്യം വിപുലീകരിക്കാനുള്ള പ്രതിജ്ഞാബദ്ധതയ്ക്ക് അനുസൃതമാണ്. നിലവിൽ ഡൽഹി, ബെംഗളൂരു, ചെന്നൈ, പൂനെ, കൊച്ചി, കോയമ്പത്തൂർ എന്നിവയുൾപ്പെടെ 33 നഗരങ്ങളിലാണ് കമ്പനി ഐക്യൂബ് ഇലക്ട്രിക് സ്കൂട്ടർ ലഭ്യമാവുന്നത്.

ഇലക്‌ട്രിക് വാഹന വിഭാഗത്തിലേക്ക് പ്രവേശിച്ച ഇന്ത്യയിലെ മുൻനിര ടൂവീലർ ബ്രാൻഡുകളിലൊന്നാണ് ടിവിഎസ്. ബജാജ് ചേതക് ഇലക്ട്രിക്, ഏഥർ 450X, ഹീറോ ഒപ്റ്റിമ HX, ഓഖിനാവ ഐപ്രൈസ് പ്ലസ്, ഓല ഇലക്ട്രിക് S1 എന്നിവയുമായി മത്സരിക്കുന്ന ടിവിഎസ് ഐക്യൂബ് ഇതിനോടകം തന്നെ ഇന്ത്യയിൽ ജനപ്രിയ മോഡലായി പേരെടുത്തിട്ടുണ്ട്.

ടിവിഎസ് ഐക്യൂബ് ഇലക്ട്രിക് സ്കൂട്ടറിന് ഒരു സ്റ്റൈലിഷ് ഡിസൈനാണ് ലഭിക്കുന്നത്. കൂടാതെ ഇത് നിരവധി സവിശേഷതകളുമായാണ് വരുന്നത്. ഒറ്റ ചാർജിൽ 75 കിലോമീറ്റർ ഓടാൻ ഈ സ്കൂട്ടറിന് കഴിയും. 78 കിലോമീറ്റർ വേഗതയിൽ ഐക്യൂബ് പ്രവർത്തിപ്പിക്കാൻ പ്രാപ്തമാക്കുന്ന ഒരു ഇലക്ട്രിക് മോട്ടോറുമായി ജോടിയാക്കിയ 2.25 kWh ബാറ്ററി പായ്ക്കിൽ നിന്നാണ് ഇതിന് പവർ ലഭിക്കുന്നത്.

ഇക്കോ, പവർ എന്നിങ്ങനെ രണ്ട് റൈഡിംഗ് മോഡുകളും ഇലക്ട്രിക് സ്കൂട്ടറിന് ലഭിക്കുന്നുണ്ട്. കൊച്ചിയിലെ തെരഞ്ഞെടുത്ത ഡീലര്‍ഷിപ്പുകളില്‍ ടിവിഎസ് ഐക്യൂബ് ഇലക്ട്രിക് ലഭ്യമായി തുടങ്ങിയിട്ടുണ്ട്. 1,23,917 രൂപയാണ് സ്‌കൂട്ടറിന്റെ ഓണ്‍ റോഡ് വിലയായി മുടക്കേണ്ടി വരികയെന്നാണ് കമ്പനി അറിയിച്ചിരിക്കുന്നത്.

FAME II സബ്‌സിഡിക്കു ശേഷം ഉള്ള വിലയാണിതെന്നും ബ്രാൻഡ് വ്യക്തമാക്കി. 4.2 സെക്കൻഡിൽ 0-40 കിലോമീറ്റർ വേഗത കൈവരിക്കാൻ സ്കൂട്ടറിന് കഴിയും. ഐക്യൂബ് പൂർണമായും ചാർജ് ചെയ്ത ബാറ്ററിയിൽ വാഹനത്തിലെ ഇക്കോ മോഡിൽ 75 കിലോമീറ്റർ സർട്ടിഫൈഡ് റേഞ്ച് നൽകും. പൂർണമായും തീർന്ന ബാറ്ററി 80 ശതമാനമായി ചാർജ് ചെയ്യാൻ ഏകദേശം 5 മണിക്കൂർ എടുക്കുമെന്നാണ് ടിവിഎസ് പറയുന്നത്.

എന്നാൽ സ്‌കൂട്ടറിലെ ബാറ്ററി പൂർണമായി ചാർജ് ചെയ്യാൻ ഏകദേശം 7 മണിക്കൂർ സമയം വേണ്ടിവരുമെന്നതാണ് യാഥാർഥ്യം. ഐക്യൂബ് ഇലക്ട്രിക് സ്കൂട്ടറിനെ 2020-ലാണ് ടിവിഎസ് വിപണിയിൽ അവതരിപ്പിക്കുന്നത്. ഒരു കണക്‌റ്റഡ് ടൂവീലർ എന്നു കമ്പനി വിളിക്കുന്ന ഈ മോഡൽ ഫീച്ചറുകളുടെ ഒരു നീണ്ട നിരയാണ് തന്നെയാണ് ഉപഭോക്താക്കൾക്കായി വാഗ്‌ദാനം ചെയ്യുന്നത്.

ഇലക്ട്രിക് സ്കൂട്ടറിനെക്കുറിച്ചുള്ള വിവിധ വിവരങ്ങൾ കാണിക്കുന്ന ഫുൾ TFT ഡിസ്പ്ലേ പോലുള്ള സവിശേഷതകൾ ഐക്യൂബിൽ ടിവിഎസ് വാഗ്ദാനം ചെയ്യുന്നുണ്ട്. ടിവിഎസ് സ്‍മാര്‍ട്ട് എക്‌സ്‌കണക്ട് സംവിധാനം, ടിഎഫ്ടി ഇൻസ്ട്രുമെന്റ് ക്ലസ്റ്റര്‍, ടിവിഎസ് ഐക്യൂബ് ആപ്പ് എന്നിവയുമായാണ് മോഡൽ വിപണിയിൽ എത്തുന്നത്.

ജിയോ ഫെന്‍സിങ്, വിദൂര ബാറ്ററി ചാര്‍ജ് സ്റ്റാറ്റസ്, നാവിഗേഷന്‍ സഹായം, ഒടുവില്‍ പാര്‍ക്ക് ചെയ്‍ത സ്ഥലം മനസിലാക്കല്‍, കോളുകളും എസ്എംഎസുകളും വരുന്നതിന്റെ അറിയിപ്പുകള്‍, ക്യൂ പാര്‍ക്ക് അസിസ്റ്റ്, ഇക്കോണമി, പവര്‍ മോഡുകള്‍ തെരഞ്ഞെടുക്കാനുള്ള സൗകര്യം, ഡേ-നൈറ്റ് ഡിസ്‌പ്ലേ, റീജനറേറ്റീവ് ബ്രേക്കിങ് എന്നിവയും ശബ്ദമില്ലാത്ത സൗകര്യപ്രദമായ റൈഡ് തുടങ്ങിയ സൗകര്യങ്ങള്‍ ഈ ആപ്പ് വാഗ്‌ദാനം ചെയ്യും.