രണ്ടും കൽപ്പിച്ച് Royal Enfield, 650 സിസി പ്രീമിയം അഡ്വഞ്ചർ ടൂററും അണിയറയിൽ

അഡ്വഞ്ചർ ടൂറർ ബൈക്കുകളെ ഇന്ത്യയിൽ ജനപ്രിയമാക്കിയത് ആരെന്ന ചോദ്യത്തിന് ഏവർക്കും ഒരൊറ്റ ഉത്തരമേയുണ്ടാവൂ... അത് റോയൽ എൻഫീൽഡിന്റെ ഹിമാലയൻ എന്നാവും അല്ലേ. 411 സിസി എഞ്ചിനും എവിടെയും കൊണ്ടുനടക്കാനാവുന്ന കഴിവും താങ്ങാനാവുന്ന വിലയും തുടങ്ങിയ ഘടകങ്ങളെല്ലാം എൻഫീൽഡിന്റെ പുലിക്കുട്ടിയെ ശരിക്കും ഹിറ്റാക്കി മാറ്റുകയായിരുന്നു.

ഹിമാലയന് ഈ വിഭാഗത്തിൽ ലഭിക്കുന്ന സ്വീകാര്യത കണ്ടാണ് ഇംപൾസിനെ എക്‌സ്പൾസാക്കി ഹീറോ വീണ്ടും അവതരിപ്പിക്കുന്നതു തന്നെ. പിന്നീട് ADV എന്ന പേരിൽ ഹോണ്ടയും സുസുക്കിയും എല്ലാം വരെ ഈ അടുത്ത് ഓരോ മോഡലുകൾ അവതരിപ്പിച്ചുവെങ്കിലും റോയൽ എൻഫീൽഡിന് അതൊന്നും ഒരു വെല്ലുവിളി ആയതേയില്ല. പിന്നീട് യെസ്‌ഡിയും ഒരു അഡ്വഞ്ചർ ബൈക്ക് ഇന്ത്യയിൽ കൊട്ടിഘോഷിച്ച് അവതരിപ്പിച്ചെങ്കിലും അത്രക്കങ്ങ് ഒരു ഓളവും ഉണ്ടാക്കിയെടുക്കാനിയില്ലെന്നു വേണം പറയാൻ.

റോയൽ എൻഫീൽഡിൽ നിന്നുള്ള ഒരു ഇലക്ട്രിക് മോട്ടോർസൈക്കിൾ പ്രോട്ടോടൈപ്പിന്റെ ചിത്രം പുറത്തുവന്നതിന് പിന്നാലെ, വരാനിരിക്കുന്ന മറ്റൊരു മോട്ടോർസൈക്കിളിനെക്കുറിച്ചുള്ള പുതിയ വിശദാംശങ്ങളും ഇന്റർനെറ്റിൽ ട്രെൻഡായിരിക്കുകയാണ് ഇപ്പോൾ. റെട്രോ ക്ലാസിക് ബ്ലാൻഡ് ഒരു 450 സിസി ലിക്വിഡ്-കൂൾഡ് ഹിമാലയൻ്റെ അണിയറ പ്രവർത്തനത്തിലാണെന്ന് നേരത്തെ തന്നെ വാർത്തകൾ പുറത്തുവന്നിട്ടുണ്ട്. എന്നാൽ അതിന് മുമ്പ് ബ്രാൻഡിൽ നിന്നുള്ള ഒരു മുൻനിര ഡ്യുവൽ പർപ്പസ് അഡ്വഞ്ചർ ടൂററിനെ കൂടി പുറത്തിറക്കാനുള്ള തന്ത്രം മെനയുകയാണ് ബ്രാൻഡ്.

ചെന്നൈ ആസ്ഥാനമായി പ്രവർത്തിക്കുന്ന റെട്രോ മോട്ടോർസൈക്കിൾ കമ്പനി നിലവിലുള്ള 650 സിസി പ്ലാറ്റ്‌ഫോമിനെ അടിസ്ഥാനമാക്കി ശരിയായ സാഹസിക മോട്ടോർസൈക്കിൾ വികസിപ്പിച്ചുകൊണ്ടിരിക്കുകയാണെന്നാണ് അഭ്യൂഹങ്ങൾ. ഇതിനകം തന്നെ ഇന്റർസെപ്റ്റർ 650, കോണ്ടിനെന്റൽ ജിടി 650, അടുത്തിടെയെത്തിയ സൂപ്പർ മീറ്റിയർ 650 എന്നിവയ്ക്ക് അടിവരയിടുന്ന അതേ പ്ലാറ്റ്ഫോമിൽ തന്നെയാകും റോയൽ എൻഫീൽഡ് ഇതിനെയും ഒരുക്കുക. എന്നാൽ ADV ബൈക്കിന്റെ എല്ലാ ചടുലതയും താളവും ഈ പുതുപുത്തൻ പ്രൊജക്റ്റിനുണ്ടാവും.

ഒരു പ്രൊഡക്റ്റ് പ്ലാൻ ഡോക്യുമെന്റ് ഉദ്ധരിച്ച് വരുന്ന വാർത്തകൾ പ്രകാരമാണെങ്കിൽ വരാനിരിക്കുന്ന 650 സിസി അഡ്വഞ്ചർ മോട്ടോർസൈക്കിൾ ഇന്റർസെപ്റ്റർ 650 ടൂററിൽ നിന്ന് ഉരുത്തിരിഞ്ഞതാണെന്നും മോഡലിന്റെ മൊത്തത്തിലുള്ള രൂപഘടനയും ഇതിന് സമാനമായിരിക്കുമെന്നുമാണ് അറിയാൻ കഴിയുന്നത്. ഇന്റർസെപ്റ്ററിന്റെ ഒരു ക്രൂയിസർ ഡെറിവേറ്റീവായാണ് സൂപ്പർ മീറ്റിയർ 650 കണക്കാക്കപ്പെടുന്നുണ്ട്. എന്നാൽ ഫ്ലാഗ്ഷിപ്പ് ക്രൂയിസർ ഒരു പുതിയ പ്ലാറ്റ്‌ഫോമിനെ അടിസ്ഥാനമാക്കിയുള്ളതാണെന്നും വ്യത്യസ്തമായ സസ്പെൻഷൻ സജ്ജീകരണമുണ്ടെന്നും റോയൽ എൻഫീൽഡും പറയുന്നു.

അതിനാൽ റോയൽ എൻഫീൽഡ് 650 സിസി അഡ്വഞ്ചർ അഡ്വാൻസ് ഇന്റർസെപ്റ്റർ 650-യിൽ നിന്ന് തികച്ചും വ്യത്യസ്തമായിരിക്കുമെന്ന് നമുക്ക് ഊഹിക്കാം. സാധാരണ ഓഫ്-റോഡറിന്റെ നിലപാട് വ്യക്തമായി തന്നെ നിലനിർത്താനാവും ബ്രാൻഡ് ശ്രമിക്കുക. അതുപോലെ തന്നെ വയർ-സ്‌പോക്ക്ഡ് ഫ്രണ്ട്, റിയർ വീലുകൾ മുൻ വീലുകളേക്കാൾ വലുതാവും. പുറകിലുള്ള. ഉയരമുള്ള സീറ്റ് പൊസിഷനിംഗ്, ഉയരമുള്ള സെറ്റ് വിൻഡ്‌സ്‌ക്രീൻ, അപ്-റൈറ്റ് ഹാൻഡിൽബാർ എന്നിവയാകും പുതിയ ബൈക്കിലെ മറ്റ് ഹൈലൈറ്റുകൾ.

നിലവിലുള്ള ഹിമാലയൻ 411 പതിപ്പിന് വിപരീതമായി ഒരു ആധികാരിക ഓഫ്-റോഡറായി പിച്ച് ചെയ്യാൻ കഴിയുന്നതിനാൽ ഉയർന്ന ഗ്രൗണ്ട് ക്ലിയറൻസും ഓഫ്-റോഡ് സ്പെക് ടയറുകളും ലഭ്യമാകുമ്പോൾ വരാനിരിക്കുന്ന പുത്തൻ പ്രീമിയം അഡ്വഞ്ചർ ടൂററിന് ഉയർന്ന എക്‌സ്‌ഹോസ്റ്റ് സിസ്റ്റം, എഞ്ചിൻ അണ്ടർബോഡി പ്രൊട്ടക്ടർ, റിയർ ലഗേജ് റാക്ക് എന്നിവയും എല്ലാം കമ്പനി സമ്മാനിച്ചേക്കും. ഒരു വലിയ ശേഷിയുള്ള ഫ്യുവൽ ടാങ്ക്, താഴ്ന്ന സ്ഥാനമുള്ള റൈഡർ സീറ്റ്, ലോംഗ് ട്രാവൽ സസ്പെൻഷൻ എന്നിവയും ഇതിലെ ശ്രദ്ധേയമായ സവിശേഷതകളായിരിക്കാം.

ഇവയെല്ലാം വരാനിരിക്കുന്ന 650 സിസി അഡ്വഞ്ചർ ടൂറർ എങ്ങനെ കാണപ്പെടാം എന്നതിന്റെ കേവലം പ്രതിനിധാനം മാത്രമായിരിക്കുമെങ്കിലും, ഹൈ-എൻഡ് അഡ്വഞ്ചർ ടൂറിങ് സ്‌പെയ്‌സിൽ ശക്തമായ സ്വാധീനം ചെലുത്താനുള്ള റോയൽ എൻഫീൽഡിന്റെ ഉദ്ദേശ്യം ഇത് കാണിക്കുന്നു. ലോഞ്ച് ടൈംലൈൻ ഇതുവരെ കമ്പനി പുറത്തുംവിട്ടിട്ടില്ല. പ്രൊഡക്ഷൻ-സ്പെക്ക് ഷോട്ട്ഗൺ 650, പുത്തൻ 650 സിസി സ്‌ക്രാംബ്ലർ മോഡലിന്റെയും വിപണി ലോഞ്ചിന് ശേഷം സമീപഭാവിയിൽ ഇത് എത്തിച്ചേരുമെന്നാണ് നിലവിലുള്ള വിലയിരുത്തലുകൾ.

എന്തായാലും സമീപ കാലത്ത് റോയൽ എൻഫീൽഡ് പ്രയോഗിച്ച തന്ത്രങ്ങളെല്ലാം വിപണിയിൽ വിജയം കാണുന്നതിനാണ് നാം സാക്ഷ്യംവഹിക്കുന്നത്. അടുത്തിടെ പുറത്തിറക്കിയ ഹണ്ടർ 350 ചുരുങ്ങിയ കാലയളവിനുള്ളിൽ 50,000 യൂണിറ്റ് വിൽപ്പന മറികടന്ന് കുതിക്കുകയാണ്. ഇതിനു പിന്നാലെ അവതരിപ്പിച്ച സൂപ്പർ മീറ്റിയോർ 650 ക്രൂയിസറും ഹിറ്റാവുമെന്നാണ് വിലയിരുത്തൽ. ഒരു ശൈലി പിടിച്ചാണ് ടൂറിംഗ് ആരാധകരെ കൈയിലെടുക്കാൻ റോയൽ എൻഫീൽഡ് തുനിയുന്നത്. പ്രീമിയം ക്രൂയിസറിനുള്ള ഔദ്യോഗിക ബുക്കിംഗുകൾ കമ്പനി അടുത്ത മാസം മുതൽ ആരംഭിക്കാൻ സാധ്യതയുണ്ട്. അതേസമയം ഡെലിവറി 2023 ഫെബ്രുവരി മാസത്തോടെയും നടന്നേക്കും.