സ്‌കൂട്ടർ സെഗ്മെന്റ് തൂക്കാൻ ഹീറോ, വരവിനൊരുങ്ങിയത് ആരെന്ന് കണ്ടോ; യമഹ എയ്‌റോക്‌സ് ഇനി സൈഡാവും?

ഇന്ത്യയിൽ സ്‌കൂട്ടറെന്നാൽ പലർക്കും ആക്‌ടിവയാണ്. ഈ സെഗ്മെന്റിലെ ജാപ്പനീസ് ആധിപത്യം തകർക്കാൻ ഇന്നേവരെ മറ്റൊരു മോഡലിനും സാധിച്ചിട്ടില്ലെന്നു വേണം പറയാൻ. എങ്കിലും ഒരു പരിധിവരെ ടിവിഎസിനും സുസുക്കിക്കും ഹോണ്ടയെ വെല്ലുവിളിക്കാനായിട്ടുണ്ട്. അതേസമയം രാജ്യത്തെ ഏറ്റവും വലിയ ഇരുചക്ര വാഹന നിർമാതാക്കളായ ഹീറോ മോട്ടോകോർപ് ഭേദപ്പെട്ട പ്രകടനം കാഴ്ച്ചവെക്കുന്നുമുണ്ട്. പക്ഷേ ജനപ്രിയമായൊരു പേര് പറയാൻ കമ്പനിക്ക് ഇതേവരെ സാധിച്ചിട്ടില്ല.

ഡെസ്റ്റിനിയും മാസ്ട്രോയുമെല്ലാം ആക്‌ടിവയ്ക്കെതിരെ പോരാടി തളർന്നു പോയവരാണ്. പക്ഷേ സ്‌കൂട്ടർ സെഗ്മെന്റിൽ അടുത്തകാലത്തായി ഹീറോ പരീക്ഷിക്കുന്ന തന്ത്രം വിജയം കാണുന്നുണ്ട്. അതിനുള്ള ഉദാഹരണമാണ് സൂം 110 മോഡലിന്റെ വിജയം. ഇതിനെ അടിസ്ഥാനമാക്കിയുള്ള 125 സിസി പതിപ്പും വിപണിയിൽ ഉടൻ തന്നെ സ്ഥാനമുറപ്പിക്കും. പക്ഷേ ഇതിനെല്ലാം മുമ്പ് സർപ്രൈസായി മാക്‌സ് സ്‌കൂട്ടറിനെ അവതരിപ്പിക്കാൻ പോവുകയാണ് കമ്പനിയെന്നാണ് വിവരം.

പ്രശസ്തമായ EICMA മോട്ടോർഷോയുടെ 2023 പതിപ്പിൽ ഈ പുത്തൻ സ്‌കൂട്ടറിനെ ഹീറോ മോട്ടോകോർപ് അവതരിപ്പിക്കുമെന്നാണ് ഇപ്പോൾ ലഭിക്കുന്ന വിവരം. അതിന്റെ ഭാഗമായി മോഡലിന്റെ ടീസർ ചിത്രങ്ങളും കമ്പനി പുറത്തുവിട്ടിരിക്കുകയാണിപ്പോൾ. ട്രേഡ് ഷോയിൽ പുതിയ മാക്സി-സ്കൂട്ടർ പ്രദർശിപ്പിക്കുന്നതോടെ അധികം വൈകാതെ തന്നെ വാഹനം ഇന്ത്യൻ വിപണിയിലേക്കും ചേക്കേറിയെത്തുമെന്നാണ് പ്രതീക്ഷിക്കുന്നത്. ഡിസൈൻ വെളിപ്പെടുത്തുന്നതിനു പുറമേ സൂം 160 (Xoom 160) എന്ന മാക്‌സ് സ്‌കൂട്ടറിന്റെ പേരും ബ്രാൻഡ് ടീസറിലൂടെ പുറത്തുവിട്ടിട്ടുണ്ട്.

ടീസറിൽ നിന്ന് കാണാൻ കഴിയുന്നത് പോലെ സൂം 160 അടിസ്ഥാനപരമായി ചില സാഹസിക കേന്ദ്രീകൃത സ്വഭാവങ്ങളുള്ള ഒരു മാക്സി-സ്കൂട്ടർ ആയിരിക്കും. അതായത് അഡ്വഞ്ചർ ശൈലിയുമായി എത്തുന്ന രാജ്യത്തെ ആദ്യത്തെ സ്‌കൂട്ടറായിരിക്കും ഇതെന്ന് സാരം. ബൾക്കി ഫ്രണ്ട് ആപ്രോണും വിൻഡ്‌സ്‌ക്രീനും മാക്‌സി സ്‌കൂട്ടറുകളിൽ സാധാരണമാണെങ്കിലും ടോൾ സ്റ്റാൻസ്, വലിയ വീലുകൾ, ലോംഗ് ട്രാവൽ സസ്പെൻഷൻ എന്നിവ ADV സ്‌കൂട്ടർ പോലെയുള്ള പ്രകമ്പനം പ്രകടമാക്കുന്നുണ്ട്.

മാത്രമല്ല ബീഫി എക്‌സ്‌ഹോസ്റ്റ് കാനിസ്റ്റർ സ്‌കൂട്ടറിന്റെ ഗംഭീരമായ നിലപാടിലേക്ക് വ്യക്തമായി ചേർക്കുന്നതും ശ്രദ്ധേയമാണ്. യമഹ എയ്‌റോക്‌സ് 155, അപ്രീലിയ SR 160 എന്നിവയ്ക്ക് സമാനമായ രീതിയിൽ ഒരുപക്ഷേ 14 ഇഞ്ച് വലിപ്പമുള്ള അലോയ് വീലുകളും ഹീറോ മോട്ടോകോർപിന്റെ പുത്തൻ അഡ്വഞ്ചർ മാക്‌സി സ്‌കൂട്ടറിന്റെ പ്രത്യേകതയാവും. സെന്റർ സ്പൈനുള്ള ഫ്രെയിമിനെ അടിസ്ഥാനമാക്കിയുള്ളതായതിനാൽ മുമ്പിലെ സ്റ്റോറേജ് സ്പേസിൽ പരിമിതികളുണ്ടാവും.

വരാനിരിക്കുന്ന പുതിയ ഹീറോ സൂം 160 മാക്‌സ് സ്‌കൂട്ടറിൽ ഉപയോഗിക്കാൻ പോവുന്ന എഞ്ചിനെക്കുറിച്ചുള്ള വിശദാംശങ്ങൾ ഇതുവരെ ലഭ്യമല്ല. എന്നിരുന്നാലും എക്സ്ട്രീം 160R 4V മോട്ടോർസൈക്കിളിന്റെ എഞ്ചിൻ വ്യത്യസ്‌ത ട്യൂണിംഗോടെ അവതരിപ്പിക്കുമെന്നാണ് അഭ്യൂഹങ്ങൾ. അതായത് യമഹ R15 V4 സ്പോർട്‌സ് ബൈക്കിൽ നിന്നും അതിന്റെ എഞ്ചിൻ എയ്റോക്‌സിൽ ഉപയോഗിച്ചതിനു സമാനമായ തന്ത്രമാണിതും.

ഈ മാക്സി-സ്കൂട്ടർ ലിക്വിഡ്-കൂൾഡ് എഞ്ചിനാണ് ഉപയോഗിക്കുന്നതെന്ന് എന്നതിനാൽ പെർഫോമൻസ് സ്‌കൂട്ടർ പ്രേമികളെ ഹീറോയ്ക്ക് ബ്രാൻഡിലേക്ക് അടുപ്പിക്കാൻ സഹായിക്കും. ഹീറോയ്ക്ക് നിലവിൽ ഒരു ലിക്വിഡ് കൂൾഡ് എഞ്ചിൻ മാത്രമേ ഉള്ളൂവെന്നതും ഊഹാപോഹങ്ങൾക്ക് വഴിവെക്കും. ഏതായാലും കരിസ്‌മയിലെ ഈ ശേഷി കൂടിയ എഞ്ചിൻ കമ്പനി ഉപയോഗിക്കാൻ സാധ്യതയില്ല.

ഇനി ഹീറോ എക്സ്ട്രീം 160R മോഡലിന്റെ എഞ്ചിനാണ് ഉപയോഗിക്കുന്നതെങ്കിൽ ഈ 163 സിസി എയർ-കൂൾഡ് എഞ്ചിന് 8,500 rpm-ൽ പരമാവധി 16.6 bhp കരുത്തും 6,500 8,500 rpm-ൽ 14.6 Nm torque ഉം വരെ ഉത്പാദിപ്പിക്കാനാവും. ഇത് റീട്യൂൺ ചെയ്‌താവും സിവിടി ഓട്ടോമാറ്റിക് ഗിയർബോക്‌സുമായി എഞ്ചിൻ ജോടിയാക്കുക. ഈ പുതിയ മാക്സി-സ്കൂട്ടറിനൊപ്പം ഹീറോ തങ്ങളുടെ ഇവി ഉൽപ്പന്നങ്ങളും വിഡ ബ്രാൻഡിന് കീഴിൽ EICMA മോട്ടോർഷോയിൽ പ്രദർശിപ്പിക്കും.

സ്‌കൂട്ടർ വിപണിയിൽ തങ്ങളുടെതായാ സ്ഥാനം കണ്ടെത്താൻ ശ്രമിക്കുന്ന ഹീറോ മോട്ടോകോർപ് വരും ദിവസങ്ങളിൽ ഒരു 125 മോഡലും വിപണിയിൽ അവതരിപ്പിക്കാൻ ഒരുങ്ങുന്നുണ്ട്. ടിവിഎസ് എൻടോർഖുമായി നേരിട്ട് മാറ്റുരയ്ക്കാൻ എത്തുന്ന മോഡലിന് പുതിയ 125 സിസി എഞ്ചിനാവും ലഭിക്കുകയെന്നാണ് വിവരം. ഈ വർഷം അവസാനത്തോടെയോ അല്ലെങ്കിൽ അടുത്ത വർഷം തുടക്കത്തോടെയോ എത്തുന്ന സ്‌കൂട്ടറിന് സൂഡ് (Xude) എന്ന പേരാവും ഉപയോഗിക്കുക.