വില കുറച്ച് എക്‌സ്‌പൾസിനെ പിടിക്കാൻ ഹോണ്ടയുടെ അഡ്വഞ്ചർ ബൈക്ക്, കൂട്ടിന് 10 വർഷം വാറണ്ടിയും

ഇന്ത്യയിൽ ബജറ്റ് സെഗ്മെന്റിൽ അഡ്വഞ്ചർ മോട്ടോർസൈക്കിളുകളുടെ ജനപ്രീതി കൂടിവരികയാണ്. റോയൽ എൻഫീൽഡ് ഹിമാലയനാണ് ഇത്തരം ബൈക്കുകളെ ജനഹൃദയങ്ങളിലേക്ക് എത്തിച്ചതെങ്കിലും ഹീറോ എക്‌സ്‌പൾസ് എഡിവി മോഡലുകൾക്ക് പുതിയ മാനം സമ്മാനിച്ചു. ഇന്ന് ഈ രണ്ട് ബൈക്കുകൾക്ക് പുറമെ ഹോണ്ട, സുസുക്കി, യെസ്‌ഡി, ട്രയംഫ് പോലുള്ള വമ്പൻ കമ്പനികളും അഡ്വഞ്ചർ ബൈക്കുകൾ പുറത്തിറക്കുന്നുണ്ട്.

അങ്ങനെ ബജറ്റ് ഫ്രണ്ട്‌ലി അഡ്വഞ്ചർ മോട്ടോർസൈക്കിൾ സെഗ്മെന്റിൽ മോഡലുകളുടെ ആറാട്ടാണ്. ഹോണ്ട CB200X എന്ന എഡിവി സ്റ്റൈൽ മോഡലുമായി സജീവമാണെങ്കിലും എൻഫീൽഡ് പോലെയെ എക്‌സ്‌പൾസ് പോലെയോ വിറ്റഴിക്കപ്പെടുന്നില്ലെതാണ് സത്യം. എന്നാൽ ബൈക്കിലേക്ക് പുതിയ പരിഷ്ക്കാരങ്ങൾ കൊണ്ടുവന്ന വിപണി പിടിക്കാൻ ശ്രമിക്കുകയാണ് ജാപ്പനീസ് ഇരുചക്ര വാഹന നിർമാതാക്കളായ ഹോണ്ടയിപ്പോൾ.

രാജ്യത്ത് നടപ്പിലാക്കിയ ഏറ്റവും പുതിയ മലിനീകരണ മാനദണ്ഡങ്ങൾക്ക് അനുസൃതമായുള്ള അപ്ഡേറ്റ് മാത്രമാണ് CB200X എഡിവി മോട്ടോർസൈക്കിളിന് ലഭിച്ചിരിക്കുന്നത്. അഡ്വഞ്ചർ സ്റ്റൈൽ മോട്ടോർസൈക്കിളിന്റെ 2023 പതിപ്പിന് 1.47 ലക്ഷം രൂപയാണ് എക്സ്ഷോറൂം വിലയായി മുടക്കേണ്ടി വരിക. പഴയ മോഡലിനെ അപേക്ഷിച്ച് അൽപ്പം വിലക്കുറവുണ്ടെന്നതും ആളുകളെ കൈയിലെടുക്കാനുള്ള ഹോണ്ടയുടെ തന്ത്രമാണ്.

ഇതേ തന്ത്രം അടുത്തിടെ മിനുക്കുപണികളോടെ പുറത്തിറക്കിയ CB300F സ്പോർട്‌സ് ബൈക്കിലും കമ്പനി പരീക്ഷിച്ചിരുന്നു. രാജ്യത്തുടനീളമുള്ള ഹോണ്ടയുടെ റെഡ് വിംഗ് ഡീലർഷിപ്പുകളിലൂടെ 2023 മോഡൽ CB200X ഇപ്പോൾ ബുക്ക് ചെയ്യാവുന്നതാണ്. മോട്ടോർസൈക്കിളിന്റെ പുതുക്കിയ 184.4 സിസി എഞ്ചിൻ ഇപ്പോൾ ബിഎസ്-VI രണ്ടാംഘട്ട ചട്ടങ്ങൾക്കും OBD II അനുയോജ്യവുമാണെന്ന് ബ്രാൻഡ് പറയുന്നു.

ഉപഭോക്താവിന്റെ ദൈനംദിന യാത്രകൾക്കും നഗരദൃശ്യങ്ങൾക്കപ്പുറത്തുള്ള ചെറിയ വാരാന്ത്യ യാത്രകൾക്കും അനുയോജ്യമായ ഒരു മോട്ടോർസൈക്കിളാണിത് എന്നും ഹോണ്ടയുടെ ഐതിഹാസിക CB ലെഗസിയിൽ നിന്ന് പ്രചോദനം ഉൾക്കൊണ്ട് 2023 മോഡൽ CB200X അവതരിപ്പിക്കുമ്പോൾ കമ്പനിക്ക് ഏറെ സന്തോഷമുണ്ടെന്നും പുതിയ മോഡലിന്റെ ലോഞ്ചിനെക്കുറിച്ച് സംസാരിക്കവെ ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യയുടെ മാനേജിംഗ് ഡയറക്ടർ, പ്രസിഡന്റും സിഇഒയുമായ സുറ്റ്സുമു ഒട്ടാനി പറഞ്ഞു.

കാഴ്ച്ചയിൽ പുതുമ തോന്നിക്കുന്നതിനായി പുതിയ ഡീസെന്റ് ബ്ലൂ മെറ്റാലിക് കളർ ഓപ്ഷനും ഹോണ്ട CB200X ബൈക്കിൽ അവതരിപ്പിച്ചിട്ടുണ്ട്. പേൾ നൈറ്റ്സ്റ്റാർ ബ്ലാക്ക്, സ്പോർട്സ് റെഡ് എന്നീ നിറങ്ങളും മോഡലിൽ സ്വന്തമാക്കാനാവും. ഹോണ്ട CB500X-ൽ നിന്ന് പ്രചോദനം ഉൾക്കൊണ്ട സ്റ്റൈലിംഗ് മനോഹരവും പ്രായോഗികവുമാണെന്ന് വേണം പറയാൻ. അഡ്വഞ്ചർ സ്റ്റൈൽ മോട്ടോർസൈക്കിളിന് സ്ലീക്ക് ലുക്കിംഗ് ബോഡി പാനലുകളും പുതിയ ഗ്രാഫിക്സും നൽകിയിരിക്കുന്നതും ശ്രദ്ധേയമാണ്.

ഹോർനെറ്റ് 2.0 അടിസ്ഥാനമാക്കി പുറത്തിറക്കിയിരിക്കുന്നതിനാൽ തന്നെ ഡയമണ്ട്-ടൈപ്പ് സ്റ്റീൽ ഫ്രെയിമിലാണ് CB200X പണികഴിപ്പിച്ചിരിക്കുന്നത്. ഷാർപ്പ് ഫെയറിംഗ്, നക്കിൾ ഗാർഡ് ഘടിപ്പിച്ച എൽഇഡി ടേൺ ഇൻഡിക്കേറ്ററുകൾ, ഫുൾ എൽഇഡി ഹെഡ്‌ലൈറ്റുകൾ, ഗോൾഡ് ഫിനിഷ് ചെയ്ത അപ്സൈഡ് ഡൌൺ ഫോർക്ക് (USD) ടെലിസ്‌കോപ്പിക് ഫ്രണ്ട് ഫോർക്കുകൾ എന്നിവ ഇതിന് സമ്പന്നവും പ്രീമിയം ആകർഷണവും നൽകുന്നുമുണ്ട്.

ഹാൻഡിൽ ബാർ അപ്-റൈറ്റ് ശൈലിയായതിനാൽ ദീർഘദൂര യാത്രകളിൽ ഇത് അനുയോജ്യമാവും. ബൈക്കിന്റെ ബിക്കിനി ഫെയറിംഗിൽ ആകർഷകമായ ഒരു വിൻഡ്‌ഷീൽഡും നൽകിയിട്ടുണ്ട്. നക്കിൾ ഗാർഡുകളും പ്രാക്‌ടിക്കലാണ്. 184.4 സിസി സിംഗിൾ-സിലിണ്ടർ ഫോർ-സ്ട്രോക്ക് ഫ്യുവൽ ഇഞ്ചക്ഷൻ എഞ്ചിനാണ് പുതിയ 2023 ഹോണ്ട CB200X മോഡലിന് തുടിപ്പേകുന്നത്. 8,500 rpm-ൽ 17 bhp കരുത്തും 6,000 rpm-ൽ 15.9 Nm torque ഉം വരെ ഉത്പാദിപ്പിക്കാൻ ഇതിനാവും.

എഞ്ചിൻ അഞ്ച് സ്പീഡ് ഗിയർബോക്‌സുമായാണ് ജോടിയാക്കിയിരിക്കുന്നത്. ഇപ്പോൾ ഒരു സ്ലിപ്പർ അസിസ്റ്റ് ക്ലച്ചിന്റെ അകമ്പടിയും ഈ അഡ്വഞ്ചർ സ്റ്റൈൽ ബൈക്കിലുണ്ട്. ഒന്നിലധികം സെൻസറുകളും മോണിറ്റർ ഘടകങ്ങളും ഉപയോഗിക്കുന്നതിനാൽ എമിഷൻ പ്രകടനത്തെ ബാധിക്കുന്ന തരത്തിൽ എന്തെങ്കിലും തകരാർ കണ്ടെത്തിയാൽ, അത് ഇൻസ്ട്രുമെന്റ് പാനലിൽ ഒരു വാർണിംഗ് ലൈറ്റായി പ്രദർശിപ്പിക്കും.

സിംഗിൾ-ചാനൽ എബിഎസ് സിസ്റ്റത്തിന്റെ സഹായത്തോടെയുള്ള ഡ്യുവൽ പെറ്റൽ ഡിസ്‌ക് ബ്രേക്കുകൾ, അഞ്ച് തലത്തിൽ കസ്റ്റമൈസ് ചെയ്യാവുന്ന പൂർണ ഡിജിറ്റൽ ഇൻസ്ട്രുമെന്റ് പാനൽ,മോണോഷോക്ക് റിയർ സസ്പെൻഷൻ എന്നിവയാണ് ഹോണ്ട CB200X-ലെ മറ്റ് ഹൈലൈറ്റുകൾ. സ്പീഡോമീറ്റർ, ഓഡോമീറ്റർ, ടാക്കോമീറ്റർ, ഫ്യൂവൽ ഗേജ്, ട്വിൻ ട്രിപ്പ് മീറ്ററുകൾ, ബാറ്ററി വോൾട്ട്മീറ്റർ, ഗിയർ പൊസിഷൻ ഇൻഡിക്കേറ്ററുകൾ, ക്ലോക്ക് തുടങ്ങിയ വിവരങ്ങൾ ഇൻസ്ട്രുമെന്റ് കൺസോളിലൂടെ ആക്‌സസ് ചെയ്യാം.

പത്ത് വർഷത്തെ വാറണ്ടി പാക്കേജും ഹോണ്ട ലഭ്യമാക്കിയിട്ടുണ്ട്. ഇതിൽ മൂന്ന് വർഷത്തേക്ക് സ്റ്റാൻഡേർഡായും ഏഴ് വർഷത്തേക്ക് ഓപ്ഷണലായുമാണ് വാറണ്ടി കിട്ടുക. 2023 ഹോണ്ട CB200X അഡ്വഞ്ചർ മോട്ടോർസൈക്കിൾ ഹീറോ എക്സ്പൾസ് 200 4V പതിപ്പിനേക്കാളും വിലയേറിയതാണ്. എന്നാൽ ഓൺ-റോഡിലെ മികച്ച പെർഫോമൻസ് ഹോണ്ട ബൈക്കിന്റെ കരുത്തായി എടുത്തുകാണിക്കാം.