പൾസറുകളുടെ രാജാവ്... ഇതുവരെ കാണാത്തത്ര ഫീച്ചറുകളുമായി വരുന്നത് ആരെന്ന് അറിഞ്ഞോ?

യുവാക്കളുടെ ഹരമായി മാറിയ മോട്ടോർസൈക്കിളാണ് പൾസറുകൾ. എന്നാൽ സാധാരണ പൾസറുകളിൽ നിന്നും വ്യത്യസ്‌തമായി എന്തെങ്കിലും കൊണ്ടുവന്നാലോ എന്ന് ബജാജ് ചിന്തിച്ചപ്പോഴാണ് NS200 എന്ന തട്ടുപൊളിപ്പൻ സ്പോർട്‌സ് ബൈക്ക് പിറവിയെടുക്കുന്നത്. പിന്നീട് ചെറുപ്പക്കാരെല്ലാം ഈ മോഡലിനു പിന്നാലെയായിരുന്നു. ഹീറോ കരിസ്‌മയുടെ പ്രതാപം പൊളിച്ചതും ഈ വില്ലനായിരുന്നു.

പോക്കറ്റിന് ഇണങ്ങുന്ന വിലയ്ക്ക് ഉഗ്രൻ പെർഫോമൻസ് നൽകുന്ന മറ്റൊരു ബൈക്ക് അക്കാലത്ത് ഉണ്ടായിരുന്നില്ലെന്നു വേണം പറയാൻ. എന്നാൽ ഇപ്പോൾ മോഡേൺ എതിരാളികൾക്ക് പിന്നിലായി പോയെന്നതാണ് സത്യം. പക്ഷേ കാലത്തിനൊത്ത് കോലംമാറ്റാനായി കമ്പനി തീരുമാനിച്ചിരിക്കുകയാണ്. അതിന്റെ ഭാഗമായി കിടിലൻ പരിഷ്ക്കാരങ്ങളോടെ വിപണിയിലേക്ക് എത്തുകയാണ് പൾസർ NS200. ഇക്കാര്യം സൂചന നൽകിക്കൊണ്ട് പുതിയ ടീസർ പുറത്തുവിട്ടിരിക്കുകയാണ് കമ്പനി.

23-24 സാമ്പത്തിക വർഷത്തിൻ്റെ അവസാനത്തോടെ ആറ് പുതിയ പൾസർ ബൈക്കുകൾ പുറത്തിറക്കുമെന്ന് കഴിഞ്ഞ വർഷം സെപ്റ്റംബറിൽ ബജാജ് പ്രഖ്യാപിച്ചിരുന്നു. പൾസർ N150, പൾസർ N160 എന്നിവയുടെ മികച്ച വേരിയൻ്റുകൾ കമ്പനി അടുത്തിടെ പുറത്തിറക്കിയത് ഇതിന്റെ തുടക്കമായിരുന്നുവെന്ന് വേണം കരുതാൻ. ഇതിനു പിന്നാലെയാണ് മൂന്നാമനായി പുതുക്കിയ പൾസർ NS200 വിപണിയിലേക്ക് എത്തുന്നത്.

കിടുക്കാച്ചി പെർഫോമൻസിന് പൾസർ ബൈക്കുകൾ ജനപ്രിയരാണെങ്കിലും സാങ്കേതിക സവിശേഷതകളുടെ കാര്യത്തിൽ അവ പിന്നിലാണെന്ന് വേണം പറയാൻ. വിപണിയിൽ നിന്നും ലഭിച്ച ഫീഡ്‌ബാക്കും വ്യവസായ പ്രവണതകളും അടിസ്ഥാനമാക്കി ബജാജ് പൾസർ ശ്രേണിയെ മോഡേണാക്കുകയാണ് കമ്പനിയുടെ പ്രധാന ലക്ഷ്യം. അതടിസ്ഥാനമാക്കിയുള്ള മാറ്റങ്ങളാവും NS200 ബൈക്കിലും കാണാനാവുക.

ബൈക്കിന്റെ പുതിയ ടീസറിൽ സംയോജിത എൽഇഡി ഡിആർഎൽ ഉള്ള എൽഇഡി ഹെഡ്‌ലൈറ്റ് ഫീച്ചറുകളെല്ലാം ഉൾപ്പെടുത്തിയിട്ടുണ്ടെന്ന സൂചനയും ബജാജ് നൽകുന്നുണ്ട്. 2024 പൾസർ NS200 നേക്കഡ് സ്ട്രീറ്റ് പതിപ്പിന് പുതിയ ഡിജിറ്റൽ ഇൻസ്ട്രുമെൻ്റ് കൺസോളും പരിഷ്ക്കരിച്ച സ്വിച്ച് ഗിയറും ഇക്കൂടെ തന്നെ ലഭിക്കും. അടുത്തിടെ പുറത്തിറക്കിയ പൾസർ N150, N160 എന്നിവയുടെ ടോപ്പ്-സ്പെക്ക് വേരിയൻ്റുകളിൽ കാണുന്നതിന് സമാനമായിരിക്കും ഇതും.

നിലവിലെ പൾസർ NS200 സെമി-ഡിജിറ്റൽ ഇൻസ്ട്രുമെൻ്റ് കൺസോളുമായാണ് വരുന്നത്. 2012-ൽ അവതരിപ്പിച്ചതിന് ശേഷം ഇതിന് വലിയ മാറ്റങ്ങളൊന്നും കണ്ടിട്ടില്ല. പുതിയ എൽസിഡി ഡിജിറ്റൽ ഇൻസ്ട്രുമെൻ്റ് സ്‌ക്രീനിൽ ബ്ലൂടൂത്ത് ഉണ്ട്, ബജാജ് റൈഡ് കണക്ട് ആപ്പ് വഴി തങ്ങളുടെ സ്മാർട്ട്‌ഫോൺ ജോടിയാക്കാൻ റൈഡറിനെ അനുവദിക്കും. കോളുകൾ, ടെക്സ്റ്റ് മെസേജുകൾ, മൊബൈൽ സിഗ്നൽ സ്ട്രെങ്ത്ത് ഇൻഡിക്കേറ്റർ, ബാറ്ററി ഹെൽത്ത് പോലുള്ള മറ്റ് വിവിധ വിവരങ്ങളും പ്രവർത്തനങ്ങളും ഇതുവഴി ആക്സസ് ചെയ്യാനും കഴിയും.

ടേൺ-ബൈ-ടേൺ നാവിഗേഷനും പുതിയ NS200-ൽ വാഗ്ദാനം ചെയ്യും. ടിവിഎസ് പോലുള്ള എതിരാളികൾ അപ്പാച്ചെ മോട്ടോർസൈക്കിളുകൾക്കൊപ്പം ടേൺ-ബൈ-ടേൺ നാവിഗേഷൻ വാഗ്ദാനം ചെയ്യുന്നുണ്ടെന്നത് പൾസർ ശ്രേണിയുടെ വലിയൊരു പോരായ്‌മയായിരുന്നു. പുതിയ എൽസിഡി ഇൻസ്ട്രുമെൻ്റ് ഡിസ്‌പ്ലേയുടെ വിവിധ ഫംഗ്‌ഷനുകൾ ആക്‌സസ് ചെയ്യാൻ ഉപയോഗിക്കാവുന്ന ഒരു സമർപ്പിത മോഡ് ബട്ടണും അപ്‌ഡേറ്റ് ചെയ്‌ത സ്വിച്ച് ഗിയറിനുണ്ടാവും.

പുതുമകളോടെ വരുന്ന ബജാജ് പൾസർ NS200 മോട്ടോർസൈക്കളിന് ഒന്നോ അതിലധികമോ പുതിയ കളർ ഓപ്‌ഷനുകൾക്കൊപ്പം സ്‌പോർട്ടിയർ ഗ്രാഫിക്‌സും ഡീക്കലുകളും ലഭിക്കും. നിലവിലുള്ള മോഡലിന് ഗ്ലോസി എബണി ബ്ലാക്ക്, മെറ്റാലിക് പേൾ വൈറ്റ്, കോക്ക്‌ടെയിൽ വൈൻ റെഡ് - വൈറ്റ്, പ്യൂറ്റർ ഗ്രേ - ബ്ലൂ എന്നിങ്ങനെ നാല് കളർ ചോയ്‌സുകളാണ് നിലവിലുള്ളത്. ഇവയെല്ലാം കണ്ടുമടുത്തവർക്കുള്ള വിരുന്നായിരിക്കും വരാനിരിക്കുന്നത്.

കാഴ്ച്ചയിലും സേഫ്റ്റിയിലും ഇത്തരം പരിഷ്ക്കാരങ്ങൾ ഉണ്ടായിരിക്കുമെങ്കിലും പൾസറിന്റെ എഞ്ചിനിൽ മാറ്റമൊന്നുമുണ്ടാവില്ല. അതേ 199.5 സിസി, ലിക്വിഡ് കൂൾഡ്, ട്രിപ്പിൾ സ്പാർക്ക്, 4-വാൽവ്, FI DTS-i എഞ്ചിൻ തന്നെയാവും 2024 മോഡലിലും തുടിപ്പേകാൻ എത്തുക. ഇത് 24.5 bhp പവറിൽ പരമാവധി 18.74 Nm torque വരെ ഉത്പാദിപ്പിക്കാൻ ശേഷിയുള്ളതാണ്. ഇത് 6-സ്പീഡ് ഗിയർബോക്സുമായാണ് ജോടിയാക്കിയിരിക്കുന്നത്.

ആറാമത്തെ ഗിയർ ഉയർന്ന ആർപിഎമ്മുകളിൽ മെച്ചപ്പെട്ട പവർ ഡെലിവറി ഉറപ്പാക്കുന്നു. ഇത് ഗിയർബോക്സിലെ സമ്മർദ്ദം കുറയ്ക്കുകയും ചെയ്യുന്നു. പൾസർ NS200 രൂപകൽപന ചെയ്തിരിക്കുന്നത് ഒപ്റ്റിമൽ ബോഡിഭാരം ഉള്ളതിനാണെന്നും കമ്പനി പറയുന്നു. ഇതിലൂടെ മെച്ചപ്പെട്ട പവർ-ടു-വെയ്റ്റ് അനുപാതം കൈവരിക്കാനും ബ്രാൻഡിനായിട്ടുണ്ട്. സസ്പെൻഷനായി USD ഫ്രണ്ട് ഫോർക്കുകളും പിന്നിൽ കാനിസ്റ്ററോടു കൂടിയ നൈട്രോക്സ് മോണോ ഷോക്കുമാണ് ബജാജ് ഒരുക്കിയിരിക്കുന്നത്.

ഡ്യുവൽ ചാനൽ എബിഎസും സ്റ്റാൻഡേർഡായി സജ്ജീകരിച്ചിട്ടുള്ള ഒരു ബൈക്കാണ് പൾസർ NS200. ബ്രേക്കിംഗ് സജ്ജീകരണത്തിൽ യഥാക്രമം 300 mm, 230 mm ഡിസ്കുകൾ മുന്നിലും പിന്നിലും ലഭ്യമാക്കിയിട്ടുണ്ട്. മുന്നിലും പിന്നിലും 17 ഇഞ്ച് വീലുകളാണുള്ളത്. 100/80 സൈസാണ് ഫ്രണ്ട് ടയറുകൾ. അതേസമയം 130/70 സൈസാണ് റിയർ ടയറുകളുടേത്. മൊത്തത്തിൽ റിച്ചായി വരുമ്പോൾ വാങ്ങാനും കൂടുതൽ ആളുകൾ എത്തുമെന്നാണ് പ്രതീക്ഷിക്കുന്നത്.