സർവീസിംഗ് ഇനി കൂടുതൽ ഈസി, ഒപ്പം വമ്പൻ പ്രഖ്യാപനങ്ങളുമായി ഈ ഇലക്‌ട്രിക് സ്‌കൂട്ടർ ബ്രാൻഡ്

ഇന്ത്യയിലെ ഇലക്‌ട്രിക് ഇരുചക്ര വാഹന വിപണിയെ വേറെ ലെവലാക്കിയവരാണ് ഓല. ഇന്ന് വൈദ്യുത സ്‌കൂട്ടറുകൾക്ക് ലഭിക്കുന്ന വലിയ സ്വീകാര്യതയ്ക്ക് പിന്നിൽ ഓലയാണെന്ന് പറഞ്ഞാലും തെറ്റുപറയാനാവില്ല. ഒരു പ്രീമിയം ടൂവീലർ ഉപയോഗിക്കുന്ന ഫീലാണ് S1 ശ്രേണിയിലുള്ള വണ്ടികൾ നൽകുന്നത്. തുടക്കകാലത്ത് ചില കല്ലുകടികളുണ്ടായിരുന്നുവെങ്കിലും വിൽപ്പനയും സർവീസും ഡെലിവറിയും എല്ലാം സാധാരണ രീതിയിലാക്കിയതോടെ ബ്രാൻഡിന്റെ മുഖഛായ തന്നെ മാറി.

ഇന്നൊരു ഇലക്‌ട്രിക് വാഹനം വീട്ടിലേക്ക് എടുക്കാൻ തീരുമാനിച്ചാൽ പലരുടേയും ആദ്യ ചോയ്‌സ് ഓലയായിരിക്കും. പുതിയ തീരുമാനങ്ങളിലൂടെ ഉപഭോക്താക്കളെ ഞെട്ടിക്കാനും കമ്പനി പ്രത്യേകം താത്പര്യം കാണിക്കാറുണ്ട്. അത്തരത്തിലൊരു പ്രഖ്യാപനവും കഴിഞ്ഞ ദിവസം ഉടമ ഭവിഷ് അഗർവാൾ നടത്തുകയുണ്ടായി. ഇന്ത്യയിലുടനീളമുള്ള സർവീസ് ശൃംഖല മെച്ചപ്പെടുത്തുന്നതിനും അടുത്ത ഏതാനും മാസങ്ങൾക്കുള്ളിൽ ഉപഭോക്താക്കൾക്കായി വിപുലമായ ഇവി ചാർജിംഗ് ശൃംഖല നൽകുന്നതുമാണ് പ്രഖ്യാപനം.

ഇന്ത്യയിലെ ഏറ്റവും വലിയ ഇലക്ട്രിക് ഇരുചക്ര വാഹന നിർമാതാക്കൾ അടുത്ത പാദത്തിനുള്ളിൽ ഹൈപ്പർചാർജർ നെറ്റ്‌വർക്ക് ഒമ്പത് മടങ്ങാണ് വിപുലീകരിക്കാൻ ഒരുങ്ങുന്നത്. കൂടാതെ കമ്പനി തങ്ങളുടെ സർവീസ് കേന്ദ്രങ്ങൾ 50 ശതമാനത്തോളം വർധിപ്പിക്കുമെന്നും അറിയിച്ചിട്ടുണ്ട്. ഓലയ്ക്ക് നിലവിൽ രാജ്യത്തുടനീളം 400 സർവീസ് സെന്ററുകളും 1,000 ഇവി ചാർജറുകളുമാണുള്ളത്.

വിൽപ്പനയിലെ സമീപകാല ഉത്തേജനം ബ്രാൻഡിന് സർവീസ് കേന്ദ്രങ്ങളുടെ എണ്ണം വർധിപ്പിക്കേണ്ടത് അനിവാര്യമാക്കിയെന്നും പത്രസമ്മേളനത്തെ അഭിസംബോധന ചെയ്ത് അഗർവാൾ പറഞ്ഞു. ഓലയുടെ മിക്ക ഇലക്ട്രിക് സ്‌കൂട്ടറുകളും ഒന്നോ രണ്ടോ ദിവസത്തിനുള്ളിൽ സർവീസ് ചെയ്‌ത് ഉപഭോക്താക്കൾക്ക് കൈമാറുമെന്ന് അദ്ദേഹം പറഞ്ഞെങ്കിലും ഉയർന്ന വിൽപ്പന കാരണം അത്തരം സെന്ററുകളിൽ ധാരാളം തിരക്കുണ്ടെന്നും അദ്ദേഹം സമ്മതിച്ചു.

ഈ വർഷം ഏപ്രിലോടെ ഓല ഇലക്ട്രിക് ഇന്ത്യയിലുടനീളം 200 സർവീസ് കേന്ദ്രങ്ങൾ കൂടി ആരംഭിക്കുന്നതോടെ ഇതിനും പരിഹാരമുണ്ടാവുമെന്നാണ് പ്രതീക്ഷിക്കുന്നത്. പുതിയ തീരുമാന പ്രകാരം ഓലയുടെ മൊത്തം സർവീസ് സെൻ്ററുകളുടെ എണ്ണം ഇനി 600 ആയി ഉയരും. ഇവി ചാർജിംഗ് ശൃംഖലയുടെ കാര്യത്തിലേക്ക് വന്നാൽ നിലവിൽ ഏകദേശം 1,000 ഇവി ചാർജറുകളിൽ നിന്ന് അടുത്ത പാദത്തോടെ എണ്ണം 10,000 ആയി ഉയർത്തുക എന്ന മഹത്തായ ലക്ഷ്യം ഓല ഏറ്റെടുത്തു.

ഫാസ്റ്റ് ചാർജറുകളുടെ പതിപ്പായ ഓല ഹൈപ്പർചാർജർ നെറ്റ്‌വർക്ക് ഇന്ത്യയിലുടനീളം ചെറിയ തോതിൽ സ്ഥാപിച്ചിട്ടുണ്ട്. റേഞ്ച് ഉത്കണ്ഠയുള്ള ഉപഭോക്താക്കളെ സഹായിക്കുന്നതിനായി ഓല ഇലക്ട്രിക് തങ്ങളുടെ പോർട്ടബിൾ ഫാസ്റ്റ് ചാർജറുകൾ ഇലക്ട്രിക് സ്കൂട്ടർ ഉടമകൾക്ക് വിൽക്കും. ചാർജ് ചെയ്യാനുള്ള സൗകര്യത്തിനായി ഈ ചാർജറുകൾ വീട്ടിലോ ഓഫീസിലോ സജ്ജീകരിക്കാം. ഒരാൾക്ക് 30,000 രൂപയ്ക്ക് ഓലയിൽ നിന്ന് പോർട്ടബിൾ ഫാസ്റ്റ് ചാർജർ വാങ്ങാനാകും.

ഈ ഇവി ഫാസ്റ്റ് ചാർജറുകൾക്കുള്ള പർച്ചേസ് വിൻഡോ ആരംഭിച്ചിട്ടുണ്ട്. ഉപഭോക്താക്കളിൽ നിന്നുള്ള ആവശ്യങ്ങൾ നിറവേറ്റുന്നതിനായി ഓല ഇലക്ട്രിക് അതിൻ്റെ നിലവിലുള്ള മോഡലുകളുടെ കുറച്ച് പുതിയ വകഭേദങ്ങളും കൊണ്ടുവന്നിട്ടുണ്ട്. ഇതിൽ S1X ഇലക്ട്രിക് സ്‌കൂട്ടറിൻ്റെ പുതിയ വേരിയൻ്റ് പുറത്തിറക്കിയതാണ് ഏറ്റവും ശ്രദ്ധേയമായ കാര്യം. അത് 4kWh ബാറ്ററി പായ്ക്കോടെയാണ് വരുന്നത്. അങ്ങനെ ഒറ്റ ചാർജിൽ 190 കിലോമീറ്റർ വരെ റേഞ്ച് വരെ വാഗ്ദാനം ചെയ്യാൻ ഈ ബജറ്റ് ഫ്രണ്ട്ലി മോഡലിനാവും.

ഇത് ഒലയുടെ ഇതുവരെയുള്ള ഏറ്റവും ചെലവേറിയതും ഫീച്ചർ ലോഡുചെയ്തതുമായ മോഡലായ S1 പ്രോയ്ക്ക് തുല്യമാണെന്നതും രസകരമായ സംഭവമാണ്. കുറഞ്ഞ വിലയ്ക്ക് കൂടുതൽ റേഞ്ച് കിട്ടുന്ന ഇലക്ട്രിക് സ്‌കൂട്ടറുകൾ തിരയുന്നവരെ ലക്ഷ്യംവെച്ചാണ് വാഹനം കമ്പനി അവതരിപ്പിച്ചിരിക്കുന്നത്. 4 kWh ബാറ്ററി പായ്ക്ക് S1 X ഇലക്ട്രിക് സ്‌കൂട്ടര്‍ നിരയിലെ ഏറ്റവും വലുതാണ്. 1.10 ലക്ഷം രൂപ എക്‌സ്‌ഷോറൂം വിലയിലാണ് ഇത് വാങ്ങാന്‍ സാധിക്കുക.

S1 X 3 kWh വേരിയന്റിനേക്കാള്‍ ഏകദേശം 20,000 രൂപ കൂടുതലായി മുടക്കിയാലും അധികദൂരം ഓടാൻ സാധിക്കുന്നത് ആളുകളെ അടുപ്പിക്കാൻ കാരണമാവും. മണിക്കൂറില്‍ 90 കിലോമീറ്ററാണ് പരമാവധി വേഗത. ഇക്കോ, നോര്‍മല്‍, സ്പോര്‍ട്സ് എന്നീ മൂന്ന് റൈഡിംഗ് മോഡുകളും ഇതില്‍ വരുന്നുണ്ട്. ബാറ്ററി മുഴുവനായി ചാര്‍ജ് ചെയ്യാന്‍ 6 മണിക്കൂര്‍ 30 മിനിറ്റ് എടുക്കും.