എജ്ജാതി ബിസിനസ്, തലയ്ക്ക് 'ആത്മീയ സുരക്ഷ' നൽകാൻ സ്റ്റീൽബേർഡിന്റെ ജയ് ശ്രീറാം സ്‌പെഷ്യൽ ഹെൽമെറ്റ്

അയോധ്യയും രാമക്ഷേത്രവും ബാബറി മസ്‌ജിദും എല്ലാം ഇന്ത്യയെ സംബന്ധിച്ച് അവസാനിക്കാത്ത ചർച്ചയാണ്. ഇന്നലെ രാമക്ഷേത്രത്തില്‍ പ്രതിഷ്ഠാച്ചടങ്ങുകള്‍ പൂർത്തിയാക്കിയതോടെ നിരവധി നിയമ-രാഷ്ട്രീയ സംഭവങ്ങൾക്ക് സാക്ഷ്യംവഹിച്ച നൂറ്റാണ്ടുകൾ നീണ്ട യാത്രയുടെ സമാപനം കൂടിയായിരുന്നു. രാംലല്ലയെ കാണാൻ ഭക്തരുടെ ജനപ്രവാഹമാണിപ്പോൾ. എന്തായാലും ഇനി അയോധ്യയിലേക്ക് ബൈക്കിൽ ട്രിപ്പ് പോവണമെന്ന് വിചിരിക്കുന്നവർക്ക് സ്റ്റീൽബേർഡിന്റെ വകയൊരു സമ്മാനം കൂടിയെത്തിയിട്ടുണ്ട്.

അയോധ്യയിലെ ചരിത്രപ്രസിദ്ധമായ റാം മന്ദിർ പ്രാൺ പ്രതിഷ്ഠാ ചടങ്ങിന്റെ ആഘോഷത്തിന്റെ ഭാഗമായി രാജ്യത്തെ പ്രമുഖ ഹെൽമെറ്റ് നിർമാതാക്കളായ സ്റ്റീൽബേർഡ് ഹൈടെക് ഇന്ത്യ ലിമിറ്റഡ് ജയ് ശ്രീറാം എഡിഷൻ SBH-34 മോഡൽ പുറത്തിറക്കിയിരിക്കുകയാണ്. രാമക്ഷേത്രത്തിന്റെ പ്രതിഷ്ഠാച്ചടങ്ങിന്റെ സാംസ്കാരിക പ്രാധാന്യം മുൻനിർത്തിയാണ് ഈ സ്പെഷ്യൽ എഡിഷൻ ഹെൽമെറ്റ് രൂപകൽപ്പന ചെയ്‌തിരിക്കുന്നത്.

ഒപ്പം അത്യാധുനിക സാങ്കേതിക വിദ്യയുമായി ആത്മീയതയെ സമന്വയിപ്പിച്ച് പരിപാടിയുടെ സാംസ്കാരിക പ്രാധാന്യത്തിന് ആശംസകൾ അ‍ർപ്പിക്കുകയും ചെയ്യുന്നു. ഈ ഹെൽമെറ്റ് വെറുമൊരു ഉൽപ്പന്നമല്ല, ഇത് നമ്മുടെ സാംസ്കാരിക ധാർമ്മികതയുടെ മൂർത്തീഭാവമാണെന്ന് ഹെൽമെറ്റ് പുറത്തിറക്കിക്കൊണ്ട് സ്റ്റീൽബേർഡ് മാനേജിംഗ് ഡയറക്ടർ രാജീവ് കപൂർ പറഞ്ഞു. ഷെല്ലിലെ ശ്രീരാമന്റെയും അയോധ്യയുടെയും മുദ്രകൾ നമ്മുടെ ആഴത്തിൽ വേരൂന്നിയ ബഹുമാനത്തെ പ്രതീകപ്പെടുത്തുന്നു.

ജയ് ശ്രീ റാം എഡിഷൻ SBH-34 എന്നെന്നും സ്റ്റീൽബേർഡ് പ്രൊഡക്‌ട് ലൈനപ്പിൽ നിലനിൽക്കുമെന്നും അദ്ദേഹം കൂട്ടിച്ചേർത്തു. പാരമ്പര്യം, സുരക്ഷ, ശൈലി എന്നിവയുടെ സമന്വയം തേടുന്ന വിവേചനാധികാരമുള്ള ഉപഭോക്താക്കൾക്കുള്ള മികച്ച തെരഞ്ഞെടുപ്പാവും ജയ് ശ്രീ റാം എഡിഷൻ SBH-34 സ്പെഷ്യൽ എഡിഷൻ ഹെൽമെറ്റുകൾ എന്നും കമ്പനി പറയുന്നു. ബോൾഡ് സാഫ്റോൺ ആക്‌സന്റുകളുള്ള ഗ്ലോസി ബ്ലാക്ക്, ബ്ലാക്ക് ഹൈലൈറ്റുകളുള്ള ഗ്ലോസി ഓറഞ്ച് എന്നീ നിറങ്ങളിൽ ഈ മോഡൽ ഹെൽമെറ്റ് വാങ്ങാനാവും.

സൗകര്യത്തിനും സംരക്ഷണത്തിനുമായി ഒരു തെർമോപ്ലാസ്റ്റിക് ഷെൽ ഉപയോഗിച്ചാണ് ജയ് ശ്രീ റാം എഡിഷൻ SBH-34 ഹെൽമെറ്റ് നിർമിച്ചിരിക്കുന്നതെന്നും സ്റ്റീൽബേർഡ് അവകാശപ്പെടുന്നു. അതോടൊപ്പം ഒപ്റ്റിക്കൽ ഇംപാക്ട് ആഗിരണത്തിനായി ഉയർന്ന സാന്ദ്രതയുള്ള ഇപിഎസ് ഹെൽമെറ്റിൽ ഉൾപ്പെടുത്തിയിട്ടുണ്ടെന്നതും ശ്രദ്ധേയമായ കാര്യമാണ്. പോളികാർബണേറ്റ് ആന്റി സ്‌ക്രാച്ച് കോട്ടഡ് വൈസറും പിന്നിലെ റിഫ്‌ളക്ടറും വ്യക്തതയും മികച്ച കാഴ്ച്ചയും മൊത്തത്തിലുള്ള റോഡ് സുരക്ഷയും വർധിപ്പിക്കുന്ന സവിശേഷതകളാണ്.

സുരക്ഷയിൽ വിട്ടുവീഴ്ച്ച ചെയ്യാതെ വ്യത്യസ്ത പ്രകാശ സാഹചര്യങ്ങളുമായി (Light Condition) ക്രമീകരിക്കാനുള്ള സൗകര്യം പ്രദാനം ചെയ്യുന്ന ഒരു സൺ ഷീൽഡും ഈ ഹെൽമെറ്റിനുണ്ട്. മീഡിയം (580 mm), ലാർജ് (600 mm) എന്നീ വ്യത്യസ്‌ത വലിപ്പങ്ങളിലും ഹെൽമറ്റ് ലഭ്യമാണ്. ഇതിലൂടെ വിശാലമായ ഉപഭോക്താക്കളെയാണ് ബ്രാൻഡ് ലക്ഷ്യമിടുന്നത്. സ്റ്റീൽബേർഡ് SBH-34 ജയ് ശ്രീറാം എഡിഷന് 1349 രൂപയുടെ പ്രാരംഭ വിലയിലാണ് വാങ്ങാനാവുന്നത്.

ഉത്തർപ്രദേശിലെ അയോധ്യയിൽ നടക്കുന്ന രാമമന്ദിർ പ്രാൺ പ്രതിഷ്ഠയുടെ ശുഭദിനത്തിൽ ഒരു പ്രത്യേക പതിപ്പ് ഹെൽമറ്റ് പുറത്തിറക്കി സ്റ്റീൽബേർഡ് ഹൈടെക് ഇന്ത്യ ലിമിറ്റഡ് തങ്ങളുടെ ഉൽപ്പന്നങ്ങൾ പ്രോത്സാഹിപ്പിക്കുന്നതിന് വളരെ സ്വാധീനമുള്ള മാർഗം കണ്ടെത്തി. ഈ തീരുമാനവും ഉൽപ്പന്നവും ബഹുജനത്തെ സ്വാധീനിക്കാൻ കഴിയുമെന്നതിൽ തർക്കമുണ്ടാവില്ല. എങ്കിലും കേരളം പോലുള്ള ഉത്തരേന്ത്യൻ വിപണികളിൽ ഇവയ്ക്ക് ശോഭിക്കാനാവുമോ എന്ന കാര്യം കണ്ടറിയണം.

ബൈക്കുകൾ ഉപയോഗിക്കുമ്പോൾ ഒഴിവാക്കാൻ കഴിയാത്ത സുരക്ഷാ ഘടകമാണ് ഹെൽമെറ്റുകൾ. വേറിട്ട ഗ്രാഫിക്‌സും സൌകര്യങ്ങളുമുള്ള മോഡലുകൾ സ്വന്തമാക്കാൻ ധാരാളം ഉപഭോക്താക്കൾ മുന്നോട്ടു വരുന്നുണ്ട്. എങ്കിലും ഇവരിൽ പലർക്കും പ്രിയം ആക്സോർ, എംടി, എസ്എംകെ എന്നീ മോഡലുകളാണ്. ഇനി രാമക്ഷേത്രത്തിന്റെ കാര്യത്തിലേക്ക് വന്നാൽ പ്രതിഷ്ഠാ ചടങ്ങുകൾ കഴിഞ്ഞതോടെ രാംലല്ലയെ കണ്ടുതൊഴാൻ‌ പതിനായിരങ്ങളാണ് എത്തുന്നത്. രാമക്ഷേത്രം ദർശനത്തിനായി തുറന്നതോടെ അയോധ്യ നിറഞ്ഞ് ഭക്തരാണിപ്പോൾ.

ദിവസവും രാവിലെ 7 മുതൽ ഉച്ചയ്‌ക്ക് 11.30 വരെയും ഉച്ചയ്‌ക്ക് 2 മണി മുതൽ വൈകിട്ട് 7 മണി വരെയുമാണു ദർശനം അനുവദിക്കുക. പുലർച്ചെ 6.30ന് ജാഗരൺ ആരതിയോടെ ക്ഷേത്രം തുറക്കും. വൈകിട്ട് 7.30ന് സന്ധ്യാ ആരതിയോടെ നട അടയ്‌ക്കും. ഉച്ചയ്ക്ക് 12നും ആരതിയുണ്ടാകും. ആരതി ചടങ്ങുകളിൽ പങ്കെടുക്കാൻ ശ്രീരാമ ജന്മഭൂമിയുടെ ഓഫിസിൽ നിന്നോ, വെബ് സൈറ്റിൽ നിന്നോ പാസ് എടുക്കുകയും വേണം.