പഴയതിനേക്കാൾ 9,000 രൂപയും ഫീച്ചറുകളും കൂടി, എൻടോർഖിനെ ഒതുക്കാൻ പുതിയ 125 സിസി സ്‌കൂട്ടറുമായി ഹോണ്ട

ഇന്ത്യൻ ഇരുചക്ര വാഹന വിപണിയിൽ ഹോണ്ടയെ അതികായകൻമാരാക്കിയത് സ്‌കൂട്ടറുകളാണെന്ന് വേണം പറയാൻ. ആക്‌ടിവയിലൂടെ (Honda Activa) കമ്പനി രാജ്യം വെട്ടിപ്പിടിച്ചപ്പോൾ ഡിയോ എന്ന സ്പോർട്ടി മോഡലിലൂടെ (Honda Dio) ബ്രാൻഡ് യുവാക്കൾക്കിടയിലും വലിയ ട്രെൻഡായി മാറിയിരുന്നു. ഇന്നത്തെ തലമുറയ്ക്ക് ഡിയോയുടെ മഹത്വം മനസിലായേക്കില്ലെങ്കിലും ഒരുകാലത്ത് യൂത്തൻമാരുടെ ബൈക്ക് പോലെയായിരുന്നു ഈ സ്‌കൂട്ടർ. കോളേജിലെല്ലാം ഡിയോയിൽ ചെത്തിനടന്ന കാലഘട്ടം അത്രവേഗമൊന്നും 90 കിഡ്‌സിന് മറക്കാനായേക്കില്ല. പിന്നീട് ആധുനിക എതിരാളികളെല്ലാം കയറിപ്പോയപ്പോൾ അപ്ഡേറ്റാവാൻ മടികാട്ടിയതോടെ ഹോണ്ടയുടെ വണ്ടി പതിയെ പിൻനിരയിലേക്ക് തഴയപ്പെട്ടു.

പിന്നീട് ഇപ്പോൾ മോഡേണായി ആക്‌ടിവയ്ക്കൊപ്പം പിടിച്ചുനിൽക്കാൻ ഡിയോയ്ക്കാവുന്നുണ്ട്. ഇപ്പോഴിതാ 2025 മോഡൽ ഇയർ പരിഷ്ക്കാരങ്ങളുമായി വിപണിയിലേക്ക് കടന്നുവന്നിരിക്കുകയാണ് കക്ഷി. 96,749 രൂപയുടെ എക്സ്ഷോറൂം വിലയോടെയാണ് പുതിയ ഡിയോ വിപണിയിൽ എത്തിയിരിക്കുന്നത്. യുവാക്കളെ ലക്ഷ്യം വെച്ചുള്ള പുതുക്കിയ ഡിയോ 125 കൂടുതൽ രസകരമായ ഡിസൈൻ, നവീകരിച്ച സവിശേഷതകൾ, മെച്ചപ്പെട്ട കാര്യക്ഷമത എന്നിവയോടെയാണ് വരുന്നത്.

DLX, H-സ്മാർട്ട് എന്നിങ്ങനെ രണ്ട് വേരിയന്റുകളിലായി വരുന്ന മോഡലിന് യഥാക്രമം 96,749 രൂപയും 1,02,144 രൂപയുമാണ് എക്സ്ഷോറൂം വിലയായി മുടക്കേണ്ടി വരിക. മാറ്റ് മാർവൽ ബ്ലൂ മെറ്റാലിക്, പേൾ ഡീപ് ഗ്രൗണ്ട് ഗ്രേ, പേൾ സ്പോർട്സ് യെല്ലോ, പേൾ ഇഗ്നിയസ് ബ്ലാക്ക്, ഇംപീരിയൽ റെഡ് എന്നീ 5 കളർ ഓപ്ഷനുകളുടെ അകമ്പടിയും 2025 ഹോണ്ട ഡിയോയിലുണ്ട്.

ഒരു സ്പോർട്ടിയും സ്റ്റൈലിഷുമായ മോട്ടോ-സ്കൂട്ടർ എന്ന നിലയിൽ ഡിയോയുടെ ആകർഷണം ഇപ്പോൾ കൂടുതൽ ശക്തിപ്പെടുത്തുന്നു. ജെൻ Z വിഭാഗങ്ങൾക്കായി പ്രത്യേകം രൂപകൽപ്പന ചെയ്‌തിരിക്കുന്ന വാഹനം കൂടുതൽ ഫീച്ചറുകളുമായാണ് രംഗത്തെത്തിയിരിക്കുന്നത്. ഊർജ്ജസ്വലമായ പുതിയ ഗ്രാഫിക്സും കളർ ഓപ്ഷനുകളും ഉപയോഗിച്ച് ഡിയോയെ പുതുക്കുന്നതിനൊപ്പം ഹോണ്ട അതിന്റെ ഐക്കണിക് ഡിസൈൻ രൂപവും നിലനിർത്തിയിട്ടുണ്ട്.

മൈലേജ്, ട്രിപ്പ് മീറ്റർ, റേഞ്ച്, ഇക്കോ ഇൻഡിക്കേറ്ററുകൾ തുടങ്ങിയ തത്സമയ ഡാറ്റകൾ പ്രദർശിപ്പിക്കുന്ന പുതിയ 4.2 ഇഞ്ച് TFT ഡിസ്‌പ്ലേയാണ് 2025 ഹോണ്ട ഡിയോയിലെ പ്രധാന കൂട്ടിച്ചേർക്കലുകൾ. കോൾ/മെസേജ് അലേർട്ടുകളും നാവിഗേഷനും പ്രാപ്തമാക്കുന്ന ഹോണ്ട റോഡ്‌സിങ്ക് ആപ്പുമായും പുതിയ മോഡൽ പൊരുത്തപ്പെടുന്നു.

സ്മാർട്ട് കീ, യുഎസ്ബി ടൈപ്പ്-സി ചാർജർ, എഞ്ചിൻ സ്റ്റാർട്ട്/സ്റ്റോപ്പ് സിസ്റ്റം തുടങ്ങിയ സവിശേഷതകൾ സൗകര്യവും പ്രവർത്തനക്ഷമതയും കൂടുതൽ മെച്ചപ്പെടുത്താനും സഹായിക്കുന്നുണ്ട്. ഒപ്പം കരുത്തുറ്റ പുതിയ OBD2B നിലവാരത്തിലുള്ള എഞ്ചിനും കൂടിയാവുന്നതോടെ ഡിയോ കളറാവുന്നുണ്ടെന്ന് വേണം പറയാൻ. പുതിയ ഡിയോ 125 ഇപ്പോൾ OBD2B അനുസൃതമാണ്.

8.19 bhp പവറിൽ പരമാവധി 10.5 Nm ടോർക്ക് ഉത്പാദിപ്പിക്കുന്ന 123.92 സിസി, സിംഗിൾ-സിലിണ്ടർ, PGM-Fi എഞ്ചിനാണ് സ്കൂട്ടറിന്റെ ഹൃദയം. സിവിടി ഓട്ടോമാറ്റിക് ട്രാൻസ്മിഷനുമായി ജോടിയാക്കിയിരിക്കുന്ന എഞ്ചിന് മികച്ച ഇന്ധനക്ഷമതയ്ക്കായി ഇതിന് ഐഡ്ലിംഗ് സ്റ്റോപ്പ് സിസ്റ്റവും ലഭിക്കുന്നു. 3 വർഷത്തെ സ്റ്റാൻഡേർഡ് വാറണ്ടിയോടെയാണ് സ്കൂട്ടർ വരുന്നത്.

ഓപ്ഷണൽ എക്സ്റ്റൻഡഡ് വാറണ്ടി തെരഞ്ഞെടുത്ത് ഉടമയ്ക്ക് 10 വർഷം വരെ വാറണ്ടി നീട്ടാനും കഴിയും. ഡിയോയുടെ സ്മാർട്ട് വേരിയന്റിൽ ഹോണ്ടയുടെ H-സ്മാർട്ട് കീ സംവിധാനവും വരുന്നുണ്ടെന്നതും പ്രായോഗികമായ കാര്യമാണ്. അതിൽ അഞ്ച് ഫംഗ്ഷനുകൾ റോട്ടറി നോബിലേക്ക് സംയോജിപ്പിക്കുന്ന ഒരു ലോക്ക് മോഡ് ഫീച്ചർ ചെയ്യുന്നു. വലിയ 18 ലിറ്റർ അണ്ടർസീറ്റ് സ്റ്റോറേജ്, എക്സ്റ്റേണൽ ഫ്യൂവൽ ഫില്ലർ ക്യാപ്പ്, ഡ്യുവൽ-ഫംഗ്ഷൻ സ്വിച്ച് തുടങ്ങിയ പ്രായോഗിക ഫീച്ചറുകൾ വാഹനത്തിൽ വേറെയുമുണ്ട്.

ഇനി മെക്കാനിക്കൽ വശങ്ങളിലേക്ക് നോക്കിയാൽ കാര്യമായ പരിഷ്ക്കാരങ്ങൾ ഒന്നുമില്ലാതെയാണ് 2025 മോഡൽ ഹോണ്ട ഡിയോ 125 സ്‌കൂട്ടറിന്റെ വരവ്. സസ്പെൻഷനായി മുന്നിൽ ടെലിസ്കോപ്പിക് ഫോർക്കുകളും പിന്നിൽ മോണോഷോക്കുമാണ് കമ്പനി ഒരുക്കിയിരിക്കുന്നത്. അതേസമയം മുൻവശത്ത് ഒരു ഡിസ്കും പിന്നിൽ ഒരു ഡ്രം ബ്രേക്കുമാണ് ബ്രേക്കിംഗ് ചുമതലകൾ നിർവഹിക്കുന്നത്. ട്യൂബ്‌ലെസ് ടയറുകളുള്ള അലോയ് വീലുകളും സ്കൂട്ടറിലുണ്ട്.

പുതിയ പരിഷ്ക്കാരങ്ങൾ ഉപയോഗിച്ച് 125 സിസി സ്‌പോർട്ടി സ്‌കൂട്ടർ വിഭാഗത്തിൽ ഡിയോയുടെ സ്ഥാനം ശക്തിപ്പെടുത്താനും കണക്റ്റഡ്, സ്റ്റൈലിഷ് റൈഡിംഗ് അനുഭവം തേടുന്ന യുവ റൈഡർമാരെ ആകർഷിക്കാനുമാണ് ഹോണ്ട ലക്ഷ്യമിടുന്നത്. പുതിയ ഡിയോ 125 ഇപ്പോൾ ഇന്ത്യയിലുടനീളമുള്ള ഹോണ്ട ഡീലർഷിപ്പുകളിൽ ലഭ്യമാണ്. ടിവിഎസ് എൻടോർഖ്, സുസുക്കി അവെനിസ്, ഹീറോ സൂം തുടങ്ങിയവയുമായാണ് പുത്തൻ ഡിയോയുടെ പ്രധാന മത്സരം.