മികച്ച റീസെയിൽ മൂല്യമുള്ള മോഡലുകള്‍

കാര്‍ വില്‍പ്പനയില്‍ രാജാവായി മാരുതി ആള്‍ട്ടോ വാഴാന്‍ തുടങ്ങിയിട്ട് കാലമേറെയായി. അടക്കവും ഒതുക്കവുമുള്ള ആള്‍ട്ടോയുടെ രൂപത്തോടെ ഇന്ത്യയ്ക്ക് പ്രിയമേറെ. തിരക്കേറിയ നഗര സാഹചര്യങ്ങളിലാണ് ആള്‍ട്ടോയ്ക്ക് പ്രായോഗികത കൂടുതല്‍. അടിസ്ഥാന സൗകര്യങ്ങളെല്ലാം ആള്‍ട്ടോയില്‍ മാരുതി ഉറപ്പുവരുത്തുന്നുണ്ട്. മൈലേജിലും ആള്‍ട്ടോ മോശക്കാരനല്ല. സെക്കന്‍ഡ് ഹാന്‍ഡ് വിപണിയില്‍ ആള്‍ട്ടോയ്ക്ക് ഉയര്‍ന്ന റീസെയില്‍ വില ലഭിക്കാന്‍ കാരണങ്ങളും ഇതുതന്നെ.

800 സിസി, 1.0 ലിറ്റര്‍ പെട്രോള്‍ എഞ്ചിന്‍ പതിപ്പുകളിലാണ് ക്വിഡിനെ റെനോ അണിനിരത്തുന്നത്. ഓട്ടോമാറ്റിക് വേണമെന്നുള്ളവര്‍ക്കായി ക്വിഡ് 1.0 ലിറ്റര്‍ എഎംടി മോഡലിനെയും കമ്പനി ഒരുക്കുന്നുണ്ട്. എസ്‌യുവി ശൈലിയും ഉയര്‍ന്ന ഗ്രൗണ്ട് ക്ലിയറന്‍സും ഫീച്ചറുകളുടെ ധാരാളിത്തവും റെനോ ക്വിഡിന്റെ റീസെയില്‍ മൂല്യമുയര്‍ത്തുന്നതില്‍ നിര്‍ണായക പങ്കുവഹിക്കുന്നുണ്ട്.

ഇന്ത്യയ്ക്ക് ഏറ്റവും പ്രിയപ്പെട്ട ഹാച്ച്ബാക്കാണ് മാരുതി സ്വിഫ്റ്റ്. 2005 മുതല്‍ സ്വിഫ്റ്റ് ഇവിടെ വില്‍പ്പനയിലുണ്ട്. പെട്രോള്‍, ഡീസല്‍ എഞ്ചിന്‍ പതിപ്പുകളില്‍ മാരുതി സ്വിഫ്റ്റ് ലഭ്യമാണ്. ഓട്ടോമാറ്റിക് ഗിയര്‍ബോക്‌സ് വേണമെന്നുള്ളവര്‍ക്ക് അഞ്ചു സ്പീഡ് എഎംടി ഗിയര്‍ബോക്‌സും കാറില്‍ തിരഞ്ഞെടുക്കാം. നിലവില്‍ സെക്കന്‍ഡ് ഹാന്‍ഡ് വിപണിയിലും മാരുതി സ്വിഫ്റ്റിന് ആവശ്യക്കാരേറെയാണ്. ഇക്കാരണത്താല്‍ കാറിന് റീസെയില്‍ മൂല്യവുമേറെ.

സ്വിഫ്റ്റിലെ മെക്കാനിക്കല്‍ ഘടകങ്ങള്‍തന്നൊണ് മാരുതി ഡിസൈറിലും. പ്രീമിയം പകിട്ടിലും ഡിസൈര്‍ ഒട്ടും പിന്നിലല്ല. നാലു മീറ്ററില്‍ താഴെയുള്ള സെഡാനുകളിലെ മിന്നും താരമാണ് ഡിസൈര്‍. പെട്രോള്‍, ഡീസല്‍ പതിപ്പുകള്‍ മികവാര്‍ന്ന ഇന്ധനക്ഷമതയാണ് ഡിസൈറിന് സമര്‍പ്പിക്കുന്നത്. സെക്കന്‍ഡ് ഹാന്‍ഡ് വിപണിയില്‍ സ്വിഫ്റ്റിനോളം പ്രചാരം ഡിസൈറിനുമുണ്ട്.

ഇടത്തരം സെഡാന്‍ ലോകത്ത് ഹോണ്ട സിറ്റിയായിരുന്നു ഒരുകാലത്ത് രാജാവ്. പക്ഷെ ഇന്നു ചിത്രം മാറി. ശ്രേണിയില്‍ ഹ്യുണ്ടായി വേര്‍ണയും മാരുതി സിയാസും ഹോണ്ട സിറ്റിയോട് കൊമ്പുകോര്‍ക്കുന്നു. 1.5 ലിറ്റര്‍ i-VTEC പെട്രോള്‍, 1.5 ലിറ്റര്‍ i-DTEC ഡീസല്‍ എഞ്ചിന്‍ ഓപ്ഷനുകളിലാണ് സിറ്റി വില്‍പ്പനയ്‌ക്കെത്തുന്നത്. പ്രകടനക്ഷമതയുടെയും ഇന്ധനക്ഷമതയുടെയും കാര്യത്തില്‍ ഇരു എഞ്ചിന്‍ യൂണിറ്റുകളും സുപ്രസിദ്ധം. ഇക്കാരണത്താല്‍ സെക്കന്‍ഡ് വിപണിയില്‍ ഹോണ്ട സിറ്റി ഇന്നും താരമാണ്.

ഇന്ത്യയില്‍ ഏറ്റവും പ്രചാരമുള്ള കോമ്പാക്ട് എസ്‌യുവിയാണ് മാരുതി വിറ്റാര ബ്രെസ്സ. കേവലം ഡീസല്‍ പതിപ്പായിട്ടും വിറ്റാര ബ്രെസ്സയ്ക്ക് ആവശ്യക്കാരേറെ. മികവുറ്റ പ്രകടനക്ഷമതയും ഉയര്‍ന്ന ഇന്ധനക്ഷമതയും വിറ്റാര ബ്രെസ്സയുടെ വിശേഷങ്ങളാവുന്നു. മറ്റു മാരുതി കാറുകള്‍പോലെ റീസെയില്‍ മൂല്യത്തില്‍ ബ്രെസ്സയും മുന്നിലാണ്.

ഇന്ത്യയില്‍ കോമ്പാക്ട് എസ്‌യുവി തരംഗത്തിന് തുടക്കമിട്ട അവതാരങ്ങളില്‍ ഒന്നാണ് ഫോര്‍ഡ് ഇക്കോസ്‌പോര്‍ട്. ഫോര്‍ഡിന്റെ നിര്‍മ്മാണ മികവും മേന്മയേറിയ ഫീച്ചറുകളും ഇക്കോസ്‌പോര്‍ടിന്റെ വിശേഷങ്ങളാണ്. രണ്ടു പെട്രോള്‍, ഒരു ഡീസല്‍ എഞ്ചിന്‍ ഓപ്ഷനുകളാണ് ഇക്കോസ്‌പോര്‍ടിലുള്ളത്. പ്രകടനക്ഷമതയ്ക്ക് മുന്‍തൂക്കം നല്‍കുമ്പോഴും ഇന്ധനക്ഷമതയുടെ കാര്യത്തില്‍ വലിയ വിട്ടുവീഴ്ച്ചകള്‍ ഇക്കോസ്‌പോര്‍ട് ചെയ്യുന്നില്ല.

1.5 ലിറ്റര്‍ ഡീസല്‍ എഞ്ചിനൊപ്പമാണ് ഡസ്റ്ററിനെ റെനോ വിപണിയിലെത്തിക്കുന്നത്. ഓള്‍ വീല്‍ ഡ്രൈവ് ഘടനയാണ് ഡസ്റ്ററിന്. ഓഫ്‌റോഡ് സാഹസങ്ങള്‍ക്ക് റെനോ ഡസ്റ്ററിനെ ധൈര്യമായി കൂടെക്കൂട്ടാം. ആകാരയളവ് മുന്‍നിര്‍ത്തി ഭേദപ്പെട്ട മൈലേജും എസ്‌യുവി സമര്‍പ്പിക്കുന്നുണ്ട്.

2004 മുതല്‍ ഇന്ത്യയില്‍ വില്‍പ്പനയിലുള്ള കാറാണ് ടൊയോട്ട ഇന്നോവ. നിലവില്‍ ഇന്നോവ ക്രിസ്റ്റ പതിപ്പാണ് ടൊയോട്ട നിരയില്‍ അണിനിരക്കുന്നത്. വിശാലമായ അകത്തളവും പകിട്ടേറിയ ഫീച്ചറുകളുമാണ് ടൊയോട്ട ഇന്നോവയുടെ പ്രധാനാകര്‍ഷണം. ഏതുവര്‍ഷം പുറത്തിറങ്ങിയ ഇന്നോവ മോഡലിനും സെക്കന്‍ഡ് ഹാന്‍ഡ് വിപണിയില്‍ ആവശ്യക്കാരുണ്ട്.