ബിഎസ്-VI കരുത്തിൽ നിഞ്ച 300; അവതരണം ഏപ്രിൽ-മെയ് മാസത്തോടെ

പുതിയ ചട്ടങ്ങൾക്ക് അനുസൃമാക്കി പരിഷ്ക്കരിച്ച നിഞ്ച 300 സൂപ്പർ ബൈക്കിനെ കമ്പനി ഇന്ത്യയിൽ ഇതുവരെ പുറത്തിറക്കിയിട്ടില്ല. എന്നാൽ രാജ്യത്ത് കവസാക്കിക്കായി മികച്ച വിൽപ്പന നേടിക്കൊടുക്കുന്ന ബൈക്കുകളിലൊന്നായ മോഡലിന്റെ പുതിയ പതിപ്പ് അധികം വൈകാതെ തന്നെ നിരത്തിലെത്തുമെന്നാണ് വിശദീകരണം.

2021-ന്റെ ആദ്യ പാദത്തിന്റെ അവസാനത്തോടെ പുതിയ ബിഎസ്-VI നിഞ്ച 300 ഇന്ത്യയിൽ വിപണിയിലെത്തുമെന്ന് ഡീലർമാരും സ്ഥിരീകരിച്ചിട്ടുണ്ട്. അതായത് ഏപ്രിൽ-മെയ് മാസത്തോടെ മോട്ടോർസൈക്കിൾ വിൽപ്പനയ്ക്ക് എത്തുമെന്ന് സാരം.

MOST READ: വരാനിരിക്കുന്ന ഹൈബ്രിഡ് മോട്ടോര്‍സൈക്കിളിന്റെ ടീസറുമായി കവസാക്കി

കവസാക്കി മോട്ടോർസൈക്കിളിൽ പ്രാദേശിക ഉള്ളടക്കം വർധിപ്പിക്കാൻ ഒരുങ്ങുന്നതിനാലാണ് 300 മോഡലിന്റെ അരങ്ങേറ്റം വൈകിയത്. പ്രത്യേകിച്ച് എഞ്ചിൻ ഘടകങ്ങൾ ഇന്ത്യയിൽ നിന്ന് തന്നെ കണ്ടെത്താനാണ് കമ്പനി ശ്രമിക്കുന്നത്. അതിനാൽ തന്നെ ബിഎസ്-VI മോട്ടോർസൈക്കിളിന്റെ വില 2.5 ലക്ഷം രൂപയായി കുറയുമെന്നാണ് സൂചനയും.

നിലവിലുണ്ടായിരുന്ന ബിഎസ്-IV മോഡലിന് 2.98 ലക്ഷം രൂപയായിരുന്നു ഇന്ത്യയിലെ എക്സ്ഷോറൂം വില. ബോഡി പാനലുകൾ, ലൈറ്റുകൾ, ബ്രേക്കുകൾ, ടയറുകൾ എന്നിവ ഉൾപ്പെടുന്ന നിഞ്ച 300-ന്റെ പ്രാദേശികവൽക്കരണ ഉള്ളടക്കം കവസാക്കി വർധിപ്പിച്ചത് 2018 ലാണ്.

MOST READ: സൂപ്പർവെലോസിന്റെ ആൽപൈൻ ലിമിറ്റഡ് എഡിഷൻ മോഡലുമായി എംവി അഗസ്റ്റ

ബിഎസ്-IV മോഡലിന് 296 സിസി പാരലൽ-ട്വിൻ എഞ്ചിനായിരുന്നു കരുത്ത് പകർന്നിരുന്നത്. ഇത് 11,000 rpm-ൽ 39 bhp പവറും 10,000 rpm-ൽ 27 Nm torque ഉം ഉത്പാദിപ്പിക്കാൻ ശേഷിയുള്ളതായിരുന്നു. ആറ് സ്പീഡ് ഗിയർബോക്‌സുമായാണ് എഞ്ചിൻ ജോടിയാക്കിയിരുന്നത്. സ്റ്റാൻഡേർഡായി സ്ലിപ്പർ ക്ലച്ചും വാഗ്ദാനം ചെയ്തിരുന്നു.

സവിശേഷതകൾ, സ്റ്റൈലിംഗ് എന്നിവയിൽ കുറഞ്ഞ മാറ്റങ്ങളോടെ നിഞ്ച 300 ന്റെ ബി‌എസ്-VI വേരിയന്റിന് സമാന സജ്ജീകരണം ലഭിക്കാൻ സാധ്യതയുണ്ട്. ഇതിനോടൊപ്പം ഇന്ത്യൻ റെട്രോ-ക്ലാസിക് റോഡ്സ്റ്റർ മോട്ടോർസൈക്കിൾ വിഭാഗത്തിലേക്ക് കവസാക്കി W175 മോഡലിനെ കൂടി അവതരിപ്പിക്കാൻ പദ്ധതിയിട്ടിട്ടുണ്ട്.

MOST READ: കാണാൻ ഏറെ കൗതുകം; മിനോ മങ്കി ബൈക്കിനെ പരിചയപ്പെടുത്തി ട്രോമോക്‌സ്

റോയൽ എൻഫീൽഡിന്റെ കുത്തകയായ ഈ ശ്രേണി പിടിച്ചെടുക്കാനാണ് കവസാക്കി ഇതിലൂടെ ശ്രമിക്കുന്നത്. അടുത്ത വർഷത്തോടെ മോഡലിനെ വിൽപ്പനയ്ക്ക് എത്തിക്കാനാണ് കമ്പനിയുടെ പദ്ധതി. ബ്രാൻഡിന്റെ ഇന്ത്യൻ നിരയിലെ ഏറ്റവും താങ്ങാവുന്ന മോഡലായിരിക്കും W175.

സിംഗിൾ സിലിണ്ടർ, എയർ-കൂൾഡ് 177 സിസി എഞ്ചിനാണ് ബൈക്കിന്റെ ഹൃദയം. ഇത് 13.05 bhp കരുത്തിൽ 13.2 Nm torque ഉത്പാദിപ്പിക്കാൻ പ്രാപ്‌തമായിരിക്കും. വിപണിയിൽ എത്തുമ്പോൾ ഏകദേശം 1.40 ലക്ഷം രൂപയായിരിക്കും ബൈക്കിന് എക്സ്ഷോറൂം വിലയായി നിശ്ചയിക്കുക