അഗുസ്റ്റ ബ്രൂട്ടേൽ 1090 ഇന്ത്യയിൽ: അറിഞ്ഞിരിക്കേണ്ട ചിലത്

17.99 ലക്ഷം രൂപയാണ് അഗുസ്റ്റ ബ്രൂട്ടേൽ 1090 സൂപ്പർബൈക്കിന്റെ ഇV്ത്യയിലെ ഷോറൂം വില. ഇതൊരു നേക്കഡ് മോട്ടോർസൈക്കിളാണ്.

ഒരു ഇൻലൈൻ ഫോർ സിലിണ്ടർ, 1078സിസി ലിക്വിഡ് കൂൾഡ് എൻജിനാണ് ഈ സൂപ്പർബൈക്കിലുള്ളത്. 144 കുതിരകളുടെ കരുത്താണ് എൻജിന്. 112 എൻഎം ടോർക്കും ഉൽപാദിപ്പിക്കുന്നു. ഈ ബൈക്കിന് മണിക്കൂറിൽ പരമാവധി 265 കിലോമീറ്റർ വേഗത പിടിക്കാനുള്ള ശേഷിയുണ്ട്.

അഗുസ്റ്റയുടെ മൊഡ്യൂലാർ ഫ്രെയിമിലാണ് ബ്രൂട്ടേൽ 1090 നിലകൊള്ളുന്നത്. വാഹനശരീരത്തിന് അധിക കരുത്ത് നൽകുന്നതിനായി സ്റ്റീൽ‌ ട്രെല്ലിസ് ചേർത്തിട്ടുണ്ട്.

അഗുസ്റ്റ ബ്രൂട്ടേൽ 1090 മോഡലിന്റെ ബ്രേക്കിങ് മുന്നിലും പിന്നിലും ഫോർ-പിസ്റ്റൺ കാലിപ്പറുകളുടെ സഹായത്തോടെ നടക്കുന്നു. ഫ്രണ്ട് വീലിൽ 320 എംഎം ഡീസ്കാണ് ചേർത്തിരിക്കുന്നത്. പിന്നിലാകട്ടെ 210 എംഎം ഡിസ്ക് ചേർത്തിരിക്കുന്നു. എബിഎസ്, 8 ലെവൽ ട്രാക്ഷൻ കൺട്രോൾ, റിയർ വീൽ ലിഫ്റ്റ് അപ് മിറ്റിഗേഷൻ തുടങ്ങിയ സംവിധാനങ്ങൾ ബൈക്കിൽ ചേർത്തിട്ടുണ്ട്.

ഇന്ത്യയിൽ‌ കൈനറ്റിക് ഗ്രൂപ്പുമായി ചേർന്നാണ് എംവി അഗുസ്റ്റ പ്രവർത്തനങ്ങൾ നടത്തുന്നത്. അഗുസ്റ്റയുടെ മിക്ക മോഡലുകളും ഇന്ത്യയിലെത്തിച്ച് വിൽക്കാനാണ് കൈനറ്റിക് ശ്രമിക്കുന്നത്. നിലവിൽ അഗുസ്റ്റയ്ക്ക് ഷോറൂമുകളില്ല ഇന്ത്യയിൽ. മുംബൈയിൽ ഒരെണ്ണം തയ്യാറായി വരുന്നുണ്ട്. പൂനെ, ബങ്കളുരു, ദില്ലി എന്നിവിടങ്ങളിലും അധികം താമസിക്കാതെ ഷോറൂമുകൾ തുറക്കും.